1 Corinthians 4

1Me' ra' chäyitiĉa' tsun mi'in, tsun Cristoty úñity mu', mu' nash yu'tyin tsun paj qui tsun jéyacsi muntyi' in Jen'si' p̂eyacdye' mu', jam chị́yeptes jiquej urucyaty muntyi' in. 2Jesha', mu' yụ'tactyi' muntyi' jemoñe' chiquepte p̂eyacdye' mu' mu'si' jayu'titysi'. 3Me' ra' tsan' pạrej p̂iijbun yụ in carijtacdye' Jen'dyes yụ, vatyquej ra' mi'in chime' p̂iijbutiĉa' carijtacdye' yụs mi'in, jam mọ' jedye' yi'. Mijam yụ ĉụi' jị'cäts yụ'tye' ĉụi'si' carijtacdye' yụ. 4Me' tsan' itŝi' juchaj ĉọ́qui yụ, jam qui nam' yi yụ: “Yụ nash rụijtyity.” Me'dye Ayo' mọmo' chäyibun dyijyedye' yụ, mu' ra' jị'cäts yu'tyin yụ. 5Jam ra' tashche' dyijtucsebi mi'in juchaj muntyis mu'in jambi'dyem' ayij tupudye'. Mu'dye ra' atsijbanya' Ayo' tsun, mu' ra' jị'caveyacseban juchaj mu'in tojmadye'ĉan bä'yitysi' in, judyeya' ra' jị'ĉocsebi ĉojtyi'ĉansi' dyijyedye' mu'in. Mu'dye ra' tima'cacsi räj mu'in jun' chuc jäm' bä'yi jiquej in. 6Vojity, me' sáñe' yụ ọij q̂uin' paj qui chicacsive mi'in. Yụ ĉụi' ji'jicdyi judyeya' mu' Apolos, me' yụ jéyac mi'in paj qui mi'in räj chịj jun' chuc jemoñe' carijtaqui mu'in voro'yity in, paj qui me' rụij mi'in cäc̣hä'chuptinte Jen'si' sánacdye' mu'. Me' jụijya' mi'in räj ra' cäts cạvacsi mi'in mu'in voro'tacsity in. 7Pạrej mu'ya' ĉụi' tima'quiti mi'in, muju'cha' ĉúti mi'in. Yụ ra' jéyac: ¿Tyi adac muju'cha' yu'tyinac mi'in? ¿Jedye' mọ'ya' ĉụi'si' u mi'in, mọ' jam so'minacsi' Jen'? Mijam jedye'. Mọ'dyes jam ra' ĉụi' tima'quiti mi'in, ĉaĉaij na q̂uin' me'chutiñes mi'in räj mọ' so'minac mu' Jen'. 8Anic va'bunyi mi'in, jeñej aty räj me'chutiñe' jedye', ĉúti u mi'in, jeñej aty jam yiris jedye' jayej ĉọ́tiñe' u mi'in. Jeñej aty ayo'bu'yi chime' ĉúti u mi'in, tsun qui nam' jam jeñej ayo'bu'yi, ĉútiĉa' tsun mi'in. Faraj vu' ca' me' ayo'bu'yi mi'in paj qui tsunmun nọ́taquity mi'intyi' shupqui. 9Jam tsun me' jutactyi' Jen'tyi' mu', anic ñịbe' cạve' tsun, jo'mes jị'ĉojtye' tsun. Jen' uya'ya' yu'tyin tsun, jeñej yirity muntyi' ji'me'tactyi' sän'dye'ya' mu', me' shupqui tsun muntyisya' vej mu'in judyeya' anjersi'ya' chime'. 10Itŝity dyijyedye' ĉun tsun in cäc̣hä'chucdye'ya' mu' Cristo, mi'in na Cristoyaty dyijyedye'-tumtyi' tsan' ĉúti mi'in, uts na me' va'bunyi mi'in. Tsunsi' itŝi' ferdye' tsun, mi'in na ferdye'tumtyi' ĉúti. Anic jäm'jinac muntyi' in, tsun na äcäijjin tsun in. 11Me'dye q̂uin' jayej säcsedye' tsun judyeya' jajri bä'yi tsun judyeya' cädädye' jị'ĉojtye' chime' tsun. Pạrej ñịbe'tac tsun, itŝi' ĉụi'si' aca' bä'yi tsun. 12Fer úñi tsun tsạ' bu'yedyes tsun.128 Tyi chuc a'c̣his p̂eyacdye' ji'shupquiyin tsun in, tsun na jäm'si' p̂eyacdye' ji'shupqueyacsi. Tyi chuc ñịbe'tyin jụijya' tsun in, tsun na jam chime'jeyacsidye, dyichchuti mọmo' tsun. 13Ñäñin tsun in, tsun qui nam' jäm'si' p̂eyacdye' jéyacsi. Muntyi' uya'ya' ĉun tsun in, judyeya' äcäijjin tsun in, jeñej va'cacsi' patsacdye' me'jin tsun in, taca'dye q̂uin' ọij mạyedye'. 14Yụ jam mọ' jéyac paj qui jam jị'tsicayeyac mi'in, me'dye mọmo' mạ'je' yụ rụijjebiyac dyijyedye' mi'in, ĉaĉaij nash mi'in mạ'jeyacdyety ạva' yụ. 15Jesha', tashche' jiquej dai' tsan' ji'chäyinac in, yụ qui nam' yirity jen' bu'yity mi'in ĉaĉaij na yụ́dye mọmo' tashche' se' ja'yeyac mi'in Jesucristosya' p̂eyacdye' mu', yụ́dye anic ja'yeyac. 16Mọ'dyes yụ ra' ferche' jéyac mi'in, cäc̣hä'chubutiĉam' dyijyedye' yụs mi'in. 17Mọ'dyes q̂uin' yụ ra' jutete mi'inya' mu' Timoteo, mu' jị'ruij yụ'tyety p̂eyacdye' mu' mạ'jeyacdyety yụ, mu' jeñej bu'yi ĉụi'tyi' ạva' yụ, cäc̣hä'chucdye'ya' Ayo' tsun. Mu' ra' ji'dyijvinac jun' chuc yụ bä'yi, yojdyem' yụ u cäc̣hä'chute Cristo. Mọ'dye ji'chäyitidye' pai' jéyacsi yụ junanaj chuc Cristoty ñuru'tyity in. 18Pạrej mu'ya' va'bunnaqui mi'in, jeñej aty ra' jam ĉọcyac ĉúti u mi'in, chime'dye jeñej aty ra' jam cạvebiyac dyijyedye' a'c̣his u mi'in, me' ĉúti mi'in. 19Ayo' yíya' cavintum ra' yụ ĉọcyac mi'in, yụ ra' cạvacsebi dyijyedye' mu'in va'bunyitysi' in, jun' a ĉa rụij bä'yi in Jen'si'ya' ferdye' mu', are' jam, are' p̂eyacdye'ya' mọmo' yi mu'in in. 20Jesha', tsun ayotuja Jen' jụijya', tupuj rụij bä'ja' Jen'si'ya' ferdye' mu', jam ra' p̂eyacdye'ya' mọmo' yéja', mọ' jam ya'i' Jen'si'ya' vej mu'. 21A ra' mi'inya' jụijya' tsun, ¿jedye' a ĉa mạ'jetiñe' mi'in? ¿Are' mạ'jetiñe' paj qui yụ fạra'ñeyac a'c̣hisya' dyijyedye' mi'in? Dam'dye jäm' tashche' farajjetiñe' mọ' a'c̣his dyijyedye' mi'in paj qui yụ jäm'yedye'tum jị'chiyeyac mi'in.

will be added

X\