1 Corinthians 3

1Vojity, yoqui'dyem' yụ voro'tyeyacya' jiquej u, mọ'dyety jam jéyac mọ' mọjo'chas ji'chäyitidye' Jen'si' mu', jeñej jambi' me'chubitintety Jen'si' Ạ'edye' mu', me' bu'yi jị'chiyeyac jiquej, ĉaĉaij na jambi' p̂añi Jen'dyes jiquej mi'in. 2Tashches ji'chäyitidye' jam carijsis, mọ' jị'chiyeyac yụ, ĉaĉaij na jambi' se'vetiñe' mọ' carijsis ji'chäyitidye', jeñej bu'yi yirity joijno' tsi'yity taca', me'dyem' mi'in, mijam jun' säcsedye' chañes jebetiñe' ĉaĉaij na jambi' jäm'joij mi'in.127 3A'sim' dyijyedye' cạtiñe' mi'in, ĉaĉaij na fáquitidye'tum mọmo' bä'yi mi'in, judyeya' ji'me'tyiyitidyeij jedye' mi'in, mijam jun' cäts dyijyi mi'in. Anic jorojĉan mi'in taca' yejĉoij mọmo' a'sim' a'c̣his dyijtutiñe' mi'in, muntyis mọmo' dyijyedye' cäc̣hä'chucsebi mi'in, jam na Jen'si' mu'. 4Chime'dye pạrej yi mi'in: “Yụ cäc̣hä'chutety Pablo”, yi mi'in, pạrej na yi mi'in: “Yụ cäc̣hä'chute Apolos”, yi mi'in. Anic jorojĉan mọ' yi mi'in a'sim' a'c̣his dyijyedye' me'chutiñe' mi'in. 5Jesha', ¿tyi ĉaĉaij yụ u? ¿Tyi ĉaĉaij mu' Apolos u? Tsun nash Jen'tyi' mọmo' úñity mu', mu' jutin tsun paj qui tsun anic ja'yeyac mi'in p̂eyacdye'ya'. Tsun úñi Ayodyes mọmo', jun' jun' chuc mu' yu'tyin tsun, me' me'dye carijtaqui tsun. 6Jen' yu'tyin yụ cätity yụ mọ' p̂eyacdye' mi'indyes, mu' qui Apolos chojo'dyety jayu'ti, mu' qui nam' Jen' jị'chibe'tyi' mọ' cätidye'. 7Jesha', mu' quịi'tyi' judyeya' mu' chojo'dyety, mu'in jam jị'chibe' in, me'dye Jen' mọmo' jị'chibe' mọ' cätidye'. 8Mu' quịi'tyi' judyeya' mu' chojo'dyety vaj cäts mọ' shupqui' Jen'si'ya' vej mu', jun' jun' chuc carijtaqui Jen'dyes in, mu'in ra' bijoij in. 9Tsun vaj me' carijtaqui Jen'dyes, mi'in jeñej bu'yi Jen'si' quịjodye' mu', me' bu'yi mi'in. Chime'dye jeñej bu'yi mi'in mọ' aca' jäm'tyeva'ques mu' Jen'. 10Mu' Jen' ñịbe'jin yụ yu'tyin yụ paj qui me' carijtaqui yụ mu'dyes, dyijyedye'tum acaij yụ, jäm'bi' yụ jäm'chuquis acas mọ'. Yụ nash tashche' voro'tyeyac mi'in, mọ' tashches voro'yedye' yụ jeñej bu'yi' jäm'chuquis acas mọ'. Yoctyi' na jäqui've voro'tyinac mi'in, mu'in jeñej bu'yi acaijtyi' in, jäm'chuquische' bu'yi' cächje' carijtye' in. Me'dye mu'in chime' in carijtaquity Jen'dyes in, jemoñe' rụij carijtaqui in. 11Me' tsan' me', yiris qui nam' jäm'chuquis acas mọ'yam', mu' Jesucristo mum' yirity jeñej bu'yi jäm'chuquissi' acas mọ', mum' yirity anicjejaty tsun. 12Ọijche' jäm'chuquische' jam cäts acaij in. Pạrej oro carijte in, judyeya' plata judyeya' ya'ijtyi' mij. Pạrej na carijtye' in, tajñi' mọmo' judyeya' si' judyeya' son, me' me' carijtye' in. 13A na ra' ayijya' mọ' tupudye', ji'cavitiĉa' Cristoya' tsun, mu' ra' cavibusin' räj carijtacdye' tsun, are' jäm' are' jam, tŝijya' ra' cavibusin' carijtacdye' tsun. Jäm' jụijya' mọ' carijtacdye' tsun jam ra' co'shai' mọ', jam na me' jäm' jụijya', räj ra' p̂udaij co'shai' carijtacdye' tsun, fibis ra' shupqui'. 14Tyi chuc jam co'shayetaquity jụijya' jäm'chuquische' carijtacdye' mu', mu' ra' so'mac bíjodye'. 15Mu' na ra' räj p̂udaij co'shayetaquity carijtacdye', mus ra' itŝi' bíjodyedyes mu'. Me' tsan' me' c̣hoñi qui na ram' mu', itŝi' qui na ram' jedye' cại' mu' bijodyes mu'. 16¿Jam adac chịj mi'in, mi'in jeñej bu'yi Jen'si' aca' mu'? Mi'inĉan bä'yi' Jen'si' Ạ'edye' mu'. 17Tyi chuc ac̣hi'bite Jen'si' aca' mu', mu' ra' ja'ac̣hi'ti mu' Jen' va'tacdye'ya' mu', ĉaĉaij na Jen'si' aca' mu' mu'dyes mọmo'. Mi'in nash jeñej bu'yi Jen'si' aca' mu' me' bu'yi nash mi'in. 18Jam ra' ĉụi' väñätuti mi'in, mijam ra' yi mi'in: “Yụ dyijyedye'tumtyi', räj jacches jedye' chị́ye' yụ.” Dam'dye jäm' yi mi'in: “Jam dyijyedye'tum yụ”, me' ra' chat tupuj me'chuptinte anicsis dyijyedye' Jen'si' mu'. 19Mọ' dyijyedye' úchetysi' muntyis in mu'insi' dyijyedye'-tumtyis ĉútity in, anic fibis mọ' shupqui' Jen'tum, rụijdye yi' sánacdye': “Ĉụi'si' dyijyedye' mu'in dyijyedye'tumtyis in, mu' Jen' yụ'tacsebi jeñej jibej quepyis me' shupqui', ĉaĉaij na ĉụi'si'ya' dyijyedye' mu'in jị'ĉoqui juchaj mu'in”, yi' sánacdye'. 20Mọ'dye quivij yi' sánacdye': “Mu' Ayo' tsun chị́yacsebi dyijyedye' mu'in úchetysi' in dyijyedye'tumtyis in, fibis qui nam' mu'in”, yi' sánacdye'. 21Mọ'dyes jam tupuj muntyi' cäc̣hä'chucsi mi'in, mijam ra' tima'cacsi mi'in, ĉaĉaij na q̂uin' aty räj voro'yity in yụ'tac in paj qui ñútyinac mi'in. 22Jen' yu'tyiyinac mi'in paj qui tsun jị'chiyeyac mi'in, yụ Pablo judyeya' mu' Apolos, judyeya' mu' Pedro, tsun me'chutiĉa' mi'in. Chime'dye ọij jacches jedye' räj me'chutiñe' mi'in, räj jị'ĉojtiñe', me' tsan' tsạ'bu'yi mi'in, me' tsan' säñi mi'in, mọ' q̂uin'sis jedye', judyeya' mọ' jábiyadyes chime', räj mọ' so'minac Jen' mọ' jị'ĉojtiñes mi'in, 23ĉaĉaij na mi'in Cristoty mi'in, mu' na Cristo Jen'tyi' mu'.

will be added

X\