1 Corinthians 15

1̣Q̂uin' vojity, mạ'je' yụ ji'dyijveyac mi'in mọ' jäm'si' p̂eyacdye' Jen'si' mu', mọ' voro'tyeyacsi' jiquej, mọ' jụjjetiñes mi'in, yódyesche'dyem' fer bu'yiche' u mi'in. 2Mọ'dye p̂eyacdye' ji'c̣honnacsi' mi'in, mi'in rụij anicyi jụijya' judyeya' fer bu'yi mi'in, mọ' ra' tupuj ji'c̣honnac mi'in, jam ra' fibi' anicyi mi'in. 3Yụ jị'chiqueyeyac jiquej mi'in mọ' p̂eyacdye' so'minsi' yụ mu' Jen'. Ọij mọjo'chas p̂eyacdye', jä'miij yi' mọ' sánacdye'. Yi' mu' Cristo ijac tsunsidyes juchaj, 4judyeya' nạ́te in. Chibin qui nam' mạyedye' me' bu'yi to'ĉan chat qui vañinyeban, yi' sánacdye'.140 5Aty me'si' ji'cavibun Pedroya' judyeya' mu'inya' yiri'tac pärä' jiyityya' in. 6Judyeya' chime' ji'cavibun mu'inya' in anicjetetyya' Jen' in, ĉanam' qui' cientyityya' in vajmu'yaijtyi' in. Mu'in mu'ya' cạvetety in taca' tsạ' q̂uin' in, pạrej qui nam' mu'yayaj in aty sänjan in. 7Judyeya' Santiagoya' chime' ji'caviti, judyeya' jutactyi'ya' Jen'tyi' mu'. 8Jäqui've ji'caviti yụ́ya' chime', chat q̂uin'dyem' yụ anicjete, jam jeñej yoctyi' jutactyi' mu', jäqui've mu' Jen' yu'tyin yụ jutactyi' mu'. 9Yụ uya'ya' bu'yi, jam jeñej yoctyi' jutactyi' mu', mijam yụ tupuj jutactyi' bu'yi Jen'tyi' mu', me' ĉúti yụ, ĉaĉaij na yụ jị'ñibe'cacsi jiquej mu'in ñuru'tyity Jen'tyi' mu'. 10Mu' na Jen' ñịbe'jin yụ, ñịbe'yedye'ya' mu' yoc yu'tyin yụ paj qui yocve bä'yi yụ. Jam fibi' me' ñịbe'jin yụ, ĉaĉaij na yụ muju'cha' fer carijtaqui yụ mu'dyes, jam jeñej yoctyi' jutactyi' Jen'tyi' mu'. Jam qui nam' ĉụi'si'ya' ferdye' carijtaqui yụ, Jen'si'ya' ferdye' mu' paj qui me' carijtaqui yụ. 11Me' tsan' yụ voro'tyeyactyi' mi'in, me' tsan' jam, me' tsan' yoctyi' voro'tyinac jụijya' in, mọ' jam jedye' yi', ĉaĉaij na mọ'dye voro'yedye' voro'tacsis tsun, yódyesdyem' anicjetiñes u mi'in. 12P̂eyacdye' jéyacsejas tsun mọ' yi' jun' chuc mu' Cristo vañinyeban jiquej. ¿Jun' me' pạrej yi u mi'in: “Jam ra' vañinyeban säñity in?” 13Jam vañinyeban säñity jụijya' in, a vuty mu' Cristo chime' jam vañinyeban u. 14Jam vañinyebanya' mu' Cristo, a vuty fibi' shupqui' voro'yedye' tsunsi' u, me'dye chime' a vuty fibi' shupqui' anicyedye' mu'che' u mi'in. 15Jam mọ' mọmo', jam vañinyebanya' mu', a vuty väñädye' shupqui' o tsunsi' voro'yedye' u, ĉaĉaij na yi tsun jéyacsi muntyi' in voro'yedye'ya' tsun jun' chuc mu' Jen' jịjtsa'ebajte mu' Cristo. 16Jam me' vañinyeban jụijya' mu'in säñity in, a vuty mu' Cristo jam vañinyeban chime' u. 17Jam vañinyeban jụijya' mu' Cristo, a vuty fibi' shupqui' anicyedye' mu'che' u mi'in, a vuty taca' mon'dye'ĉan juchajĉan u mi'in, 18a vuty me'dye u mu'in va'tacdyedyety u in mu'in säñity in anicjetety Cristo jiquej in. 19Jam vañinyeban säñity jụijya' in, a vuty mu' Cristo ñútyisin' u q̂uin'sis tupudye' mọmo' úche'dyem'. A vuty jam vañinyebajsha' ra' u, a vuty muju'cha' ñịbe' u tsun, jam jeñej mu'in jam anicjetety Jen' in, uya'ya' ra' ñịbe' mu'in in. 20Jam na me', ĉaĉaij na vañinyeban mu'. Mu' tashi vañinyeban, mọ' ji'ĉuyisin' vañinyeban ra' mu'in sänaque-muntyi' in. 21Aty juchaij jiquej mu' tashchety muntyi', q̂uin' räj sän'dyety tsun, me'dye chime' mu' yirity muntyi' yu'sin' tsun paj qui vañinyebajsha' tsun. 22̣Q̂uin' muntyi' tsun räj sän'dyety tsun ĉaĉaij na Adántyi' vóshi' tsun, me'dye ra' chime' räj vañinyebajsha' tsun ĉaĉaij na Cristoty tsun. 23Jen' yụ'tye' tupudye' cäts yirityityij in vañinyeban ra' in. Tashi Cristo vañinyeban, jäqui've ra' tsun vañinyebajsha' Cristoty tsun, jun'si' chuc ra' atsijbanya' mu'. 24Chat qui ra' ayij jadyiquis tupudye', Cristo ra' räj ji'penacsi ayo' in judyeya' tashche' bu'yity in räjtumdye mu'in fer bu'yity in, judyeya' mọ'in fer bu'yis chime' in, chat qui ra' mu' Cristo so'maĉan Jen' mu', mu' qui ra' ayo'bu'yi räjdyes. 25Mọ'dyes q̂uin' yejĉoij ra' mu' ayo'bu'yi mu' Cristo jun' qui' chuc mu' Jen' ji'penbite mu'in fạ́quetety in. 26Tas ra' ji'penac in fạ́quetety in, mu' ra' ji'peñe' mọ' sän'dye', mọ' jeñej bu'yi' fáquisin'si' tsun, jadyic ra' säñi muntyi' in. 27Yi' sánacdye': “Jen' ji'peñe' räj, mu' jayu'ti paj qui mu' Cristo räjdyes ayo'bu'yi.” Me' tsan' yi' sánacdye': “Räjdyes ayo'bu'yi mu'”, chị́ja' qui nam' tsun jam ji'jäcte Jen', mu' jam ĉụi' yu'ti paj qui mu'dyes ayo'bu'yi Cristo, jam, ĉaĉaij na mu'dye Jen' yụ'tyeyete. 28A na ra' tas ji'penacya' mọ', aty qui ra' räjen'dyes ayo'bu'yiya' mu' Cristo, chat q̂uin'dyem' ra' mu' Cristo ĉụi' ji'säsdyi paj qui ayo'bu'yi mu'dyes mu' Jen', mu' ji'penbitety mu'in fạ́quetety jiquej in, chat q̂uin'dyem' ra' mu' Jen' ayo'bu'yi räjen'dyes. 29Chime'dye jam vañinyebanya' mu'in säñity in, ¿jun' dash pạrej mu'in ji'chojti in säñitydyes in?141 30Jam vañinyebanya' mu'in säñity in, a vuty fibim' me' räjĉan ñịbe' bä'yi u tsun cäc̣hä'chucdyedyes Jen'. 31Juna' ĉụi' jịjcaijya' yụ pai' jo'mei'vevej c̣hojvin yụ in, pạrej mạ'je' ujan yụ in. Yụ jéyac vojity, mu'in nash mạ'je' ujan yụ in, me'dye yụ chime' jéyac jun' chuc yụ ma'jotyitiĉa' mi'in, ĉaĉaij na mi'in anicjetinte Jesucristo Ayo' tsun. 32Chime'dye mu'in Efesoĉantyi' in anic fer fáquibun p̂eyacdye' yụ in, judyeya' c̣hojvin yụ in jeñej yirity pupujri', me' cavin yụ in. Jam vañinyebanya' mu'in säñity in, a vuty fibim' ñịbe' cạve' u yụ p̂eyacdyedyes, a vuty tupuj yéja' u: “Säcseja' mọmo', jäm' ra' feshtayeja', mọ' mọmo' dyijtuja' ĉaĉaij na ra' nojno jadyic tsun”, a vuty tupuj yéja' tsun u jam vañinyebajsha'ya' tsun. 33Anic rụij shupqui' mọ' p̂eyacdye' muntyis, yi': “Tyi chuc pen'dyetucsi mu'in ac̣hi'yity in, mu' qui ra' chime' jịjcatacsi cäc̣hä'”, yi'. Anicdye me', mọ'dyes jam ra' ĉụi' väñätuti mi'in. 34Tsạ'ejam' dyijyedye'ĉan mi'in, me'qui'dye ra' juchaij mi'in, ĉaĉaij na pạrej mu'ya' mi'inĉantyi' in mijam chị́yete Jen' pạrej in, mijam anicjete in. Där tsị́cadye' shupqui' mọ' mi'indyes. 35Vatyquej yirity yi jụijya': “¿Jun' buty ra' vañinyeban mu'in säñity in? ¿Jụ'ñii' qui buty ra' a' mu'in?” vatyquej yi jụijya' pạrej mi'in. 36Itŝi' jétiñe' dyijyedye' mi'in. Jesha' quịc jụijya' yiris vej, tạbai' chum a' mọ'si', chat q̂uin'dyem' shupqui' chịpdye' mọ'. 37Quị́ja' jụijya' tsun jụ'ñis ĉụi' mọmo' vej, vatyquej trivos vatyquej yocsi' vej jụijya', yedyes vej quịc, jam a' quịc mọ'. 38Aty qui nam' chịbi' jụijya', yoc qui shupqui' a' mọ', jun' chuc mu' Jen' jäm'tye', jo'mei' shupqui' a' mọ'. Jam vaj cäts vej mọ'in, me' bu'yi'dye chime' a' mọ'in, yoc yoc shupqui' mọ'in, jụ'ñis chuc mọ' quịc vej jo'mei'dye shupqui' a' mọ'. Me' bu'yi'dye chime', aty nạcya' a'vun tsun mọ' jeñej bu'yi' vej, a qui na ra' vañinyeban'ya' mọ', anic ra' yoc shupqui' mụi'sis a' tsun. 39Me' bu'yi'dye chime' mọ'in jacche' bä'yis in, mijam vaj jo'mei' in. A' muntyis jam cäts jebacdye'tum, judyeya' chime' tạbedyes a' mọ' judyeya' jaijtyistum, jam vaj jo'mei'dye in, yoc bu'yi'dye a' mọ'in. Me' bu'yi'dye chime', mọ' ra' vañinyeban' a' tsun, yoc ra' shupqui', jam jeñej q̂uin'sis a' tsun. 40Anic jäjämunsi' mọ'in mạyedye'ches jedye' in, chime' jäjämunsi' ọ́ches a' mu'in, mọ'in qui nam' mạyedye'ches in anic yocsi' a' mu'in, jam jeñej ọ́ches a' in. 41Chime'dye mu' tsun judyeya' mọ' ịvaj judyeya' ọ́rota' in jam vaj cäts mạijyi in. Mu'in ọ́rota' in pạrej yoc yoc me'chui' mạijquedye' mu'in. 42Me'dye ra' mu'in chime' vañinyebantyi' in, yocve ra' shupqui' a' mu'in. Nạc jụijya' muntyis a' tsun focoi'. A na ra' vañinyeban'ya', mijam ra' jụ'ñi' focoi'. 43Nạc jụijya' muntyis a' tsun, anic a'c̣his mọ', itŝi' ferdye' mọ'. A na ra' vañinyeban'ya' mọ', där ra' jäm'si' shupĉan' mọ', ferdye'tum ra'. 44Nạc jụijya' a' tsun, ọ́chedyes mọmo' jiquej, a na ra' vañinyeban'ya', mụi'sis qui ra' mọ' mạyedye'chedyes qui ra' mọ'. Mọ'ya' jacchedyes a' tsun, mọ' ji'chäquiyisin' mọ'ya' ra' chime' mạyedye'chedyes a' tsun. 45Mọ'dye p̂eye' mọ' sánacdye' yi': “Tashchety muntyi' Adán so'mac jiquej paj qui tsạ' bu'yi mu'”,142 yi' mọ', mu' na jäqui'vety Adán mu' anic tsạ'chusin'tyi' tsun ĉụi'si'ya' Ạ'edye' mu', paj qui Jen'yadyety tsun.143 46Jambi' tashche' me'chuja' mạyedye'chedyes a' tsun, tashche' me'chuja' jacchedyes a' tsun, jäqui've qui ra' mọ' me'chuja' mạyedye'chedyes a' tsun. 47Mu' tashchety muntyi' jac jäm'tac jiquej, jacchedyety mu', mu' na jäqui'vety muntyi' jam mu' me', mạyedye'chety mu' atsij. 48Räj tsun jacchety tsun jac jäm'tac a' tsun, yojdyem' Adánsi' jiquej um', mu'in na mạyedye'chedyety in mạyedye'ches a' mu'in me'chui' in, yojdyem' mu' mạyedye'chety muntyi' u. 49A' tsun yódyesdyem' Adánsi' um', jo'mesdyem' me'chuja' q̂uin' tsun. Yirisĉan ra' mạyedye' me'chuja' mọ' mạyedye'-chedyes a' tsun, yódyesdyem' mu'si' u mạyedye'chetysi' u. 50Yụ ra' jéyac vojity, ọij jacchedyes a' tsun, shushtum judyeya' chäshtum, mọ' ra' jam Jen'ya' jịjcai', yóĉandyem' ayo'bu'yedyes Jen'si' um', mọ' focodye' jam jun' Jen'yadyes mọ'. 51Jesha' yụ ra' jéyac ọij p̂eyacdye' jam chị́yes muntyi' in, yi': pạrej ra' jam sänja', räj qui na ram' Jen' yoc yu'sin', yocsi' qui ra' a' tsun, 52yiristum ra' mu' yu'sin' aty ayijban'ya' mọ' tupudye'. Mạ'i' ra' tujyedye', tujyedye'ĉandye ra' vañinyeban säñity in, aty qui ra' jam sän'dyety in, tsunsi' ra' a' chime' yoc yu'busin' mu' Jen'. 53Mọ' focoi'si' q̂uin' a' tsun mọ' sän'dyes, mụi'sis qui ra' shuban' mọ', mijam qui ra' jun' mọtsi' aty qui ra' jam jun' sän'dyes. 54A ra' me' yu'sin'ya' mu' Jen', cạ̈tsi' ra' sánacdye' mu' yi'sim': “Aty ji'penac sän'dye', jadyic ferdye' mọ'. 55Jadyic ra' ji'pensin' sän'dye', mijam ra' quivij me'busin'”, yi' sánacdye'. 56Mọ' juchaj so'me' ferdye' mọ' sän'dye', mọ' qui me'sin', mọ' na yụ'tacdye' Jen'si' mu', mọ' so'macsi' va'tacdye' mu'in juchajtumtyi' in. 57Yoshoropaij jéja' Jen' tsun, Jesucristoya' Ayo' tsun, mu' ji'c̣honsin' sän'dye'ya' tsun. 58Vojity, mi'in mạ'jeyacdyety yụ, fer bu'yi ra' mi'in, jam ra' yocve dyijyi mi'in, fer ra' carijtaqui Ayodyes mi'in, jäm'tujcavac. Aty chịj mi'in carijtaĉa' Ayodyes jụijya' tsun, mọ' jam fibis shupqui' carijtacdye' tsun, anic ya'i' mọ' shupqui'.

will be added

X\