1 Corinthians 14

1Mọjo'cha' dyijtuvac ọij paj qui räjĉan mạ'jeyacsi bä'yi mi'in. Chime'dye dyijtuvac paj qui mu' Jen' me' so'minac mọ' mọjo'chas carijtacdyedyes, mọ' so'macsis Jen'si' Ạ'edye' mu'. Mọ' anic mọjo'cha' jemonacsi' paj qui so'mac mi'in Jen'si' p̂eyacdye' mu' paj qui mọ' jị'chiqueyacsi mi'in. 2Jesha' mu'in yocsi'ĉan p̂eyacdye' p̂eyaquity in jam muntyidyes p̂eyaqui in, Jen'dyes mọmo' p̂eyaqui p̂eyacdye' in, ĉaĉaij na jam tyi chiquepte p̂eyacdye' in, ĉaĉaij na mọ' p̂eyacdye' mu'in jumves mu'in, mọ' Jen'si' Ạ'edyem' so'macsis. 3Mu'in na voro'yity in mọ' so'macsis Jen', mọ' nọ́tacsi' mu'in anicjetety Jen' in, chịmo'dye ji'ma'yacsi' paj qui fer bu'yi bä'yi in Jen'dyes. 4Mu'in yocsi'ĉan p̂eyacdye' p̂eyaquity in ĉụi' mọmo' mu'in ñútyiti in, ferjoij ạ'edye'ĉan in, mu'in na voro'yity in mọ' p̂eyacdye' so'macsis Jen', mu'in nọ́tacsi in mu'in anicjetety Jen' in. 5Yụ mạ'je' tsan' paj qui mi'in räj p̂eyaqui yocsi'ĉan p̂eyacdye', mọjo'cha' qui nam' mạ'je' yụ paj qui voro'yi mi'in yódyesdyem' so'minacsi' Jen' u, mọ' mọjo'cha' jemonac, ọya'ya' mọ' paj qui yocsi'ĉan p̂eyacdye' p̂eyaqui mi'in. Mọ'ĉan p̂eyaqui jụijya' mi'in jemoñe' mu'ya' yirity jị'chiqueyacsebantyi' mu'si' p̂eyacdye' mu'indyes anicjetetydyes Jen' in paj qui mọ'ya' p̂añi Jen'dyes in. Jam jụijya' me', fibi' shupqui' yocsi'ĉan p̂eyacdye' p̂eyaqui in. 6Jesha' vojity, yụ ĉọcyac jụijya' mi'in, judyeya' p̂eyaqui jụijya' yụ yocsi'ĉan p̂eyacdye', fibis ram' shupqui' p̂eyacdye' yụ, jam ra' méqui' mọ' ñútyinac mi'in mọ' p̂eyacdye'. Dam'dye jäm' muntyisĉan mọmo' p̂eyacdye' jéyac mi'in yiris ji'chäyitidye' so'minsi' yụ mu' Jen', vatyquej mu'si'ĉan chị́dye' jụijya' mu' jị'chiyeyac, vatyquej chime' voro'yi yụ mọ' so'minsi' Jen' yụ. Me' jị'chiyeyac muntyisĉan jụijya', mọ' chat ra' tupuj ñútyinac mi'in. 7Chime'dye mọ' vịcdye' judyeya' boñedye' in, jam rụij dyijyedye'tum p̂ujtyeja' jụijya' tsun, jam ra' jun' jorojĉan shupqui' mạ'edye' mọ'. 8Me'dye chime' mọ' chutidyedyes boñedye', jam rụij dyijyedye'tum p̂ujtac jụijya' väc̣hä'tyitydyes in, jam ra' jun' chique' in, jätäjyi' ra' mọ', mijam ra' jä'miij jäm' yu'ti in paj qui chuti in. 9Me'dye mi'in chime', yocsi'ĉan p̂eyacdye' p̂eyaqui jụijya' mi'in, mọ' jam chique'si' muntyi' in, fibi' ra' mọmo' p̂eyaqui mi'in, jeñej tyi'mu cabunactyi' p̂eyacdye' mi'in, me' ra' shupqui' p̂eyacdye' mi'in. 10Jesha', yịjyi mọ'ya' muntyis p̂eyacdye' mu'in, räjen' mọ'in dyijyedye'tum in. 11Vatyquej yirity muntyi' p̂eyaqui yụ́tum yoctyisĉan p̂eyacdye', yụ ra' jam jun' chicacsi, me' tsan' chätidye' yụ, jeñej yocvety, me' shupqui yụ́tum, me' bu'yidye yụ chime', jeñej bu'yi yocvety mu'tum. 12Aty fer mạ'jetiñe' u paj qui Jen'si' Ạ'edye' mu' so'minac carijtacdyedyes Jen'dyes, dam'dye jäm' dyijtutiñe' mọ' mọjo'chas carijtacdye', paj qui mọ'ya' p̂añi Jen'dyes in mu'in anicjetety Jen' in. 13Tyi chuc yocsi'ĉan p̂eyacdye' p̂eyaquity jụijya' in, paj cọdyete Jen' in paj qui mu' so'macsi in paj qui jị'chiqueyacseban in jätäjyi' chuc mọ' p̂eyacdye'. 14Jesha', yocsi'ĉan p̂eyacdye' cọdaqui Jen'che' jụijya' yụ, ạ'edye'ĉan qui nam' cọdaqui yụ, jam qui chịj yụ jätäjyi' chuc mọ' cọdacdye' yụ. 15¿Jätäjyeja' bu ra' tsun? P̂eyaĉa' yocsi'ĉan p̂eyacdye' jụijya' tsun ạ'edye'ĉan mọmo' cọdyeja tsan', mijam chiqueja' jedye' buty cại' mọ'. Jemoñe' qui nam' dyijyedye'tum cọdyeja tsun chime'. Tupuj ạ'edye'ĉan jimaĉa' tsun, jemoñe' qui nam' dyijyedye'tum jimaĉa' chime' tsun. 16Jesha', yocsi'ĉan p̂eyacdye' tima'quetinte Jen' jụijya' mi'in, ạ'edye' mọmo' yi' mi'in, mu'in na mu'ĉantyi' in jam me' so'mactyi' in, mijam ra' jun' chịj in jedye' buty cại' mọ' p̂eyacdye' mi'in, mijam ra' mu'in mi'inmun yoshoropaij jéte Jen' in, mijam ra' yi in “Paj me'.” 17Me' tsan' rụijsis shupqui' cọdacdye' mi'in, mọ' jam dam' nọ́tacsi' yoctyi' muntyi' in. 18Yụ yoshoropaij jéte Jen' ĉaĉaij na mu' so'min yụ paj qui yụ dam'dye pucmun p̂eyaqui yocsi'ĉan p̂eyacdye', uya'ya' p̂eyaqui mi'in. 19Me' tsan' me' vajmu'yaijĉan jụijya' tsun, yụ qui nam' dam'dye mạ'je' p̂eye' yụ jụ'ñis chuc jorojĉansi' p̂eyacdye', paj tsan' ĉanam' mọmo' p̂eyacdye' jéyacsi jụijya' yụ, ọya'ya' mạ'je' yụ yocsi'ĉan p̂eyacdye' yojdyesdyem' jam ji'chäquitis uij, paj tsan' yiri'tac mir p̂eyacdye' jụijya' yụ, fibis ra' mọmo' shupqui'. 20Vojity, jemoñe' rụij dyijtutiñe' mi'in jun' chuc ra' p̂eyaqui mi'in yocsi'ĉan p̂eyacdye', dyijyedye'tum ra' bä'yi mi'in yojdyem' isho' muntyi', jam ra' dyijyi mi'in yojdyem' miquity u. Me' tsan' me', yojdyem' miquity u jam a'c̣his dyijyedye' cại', me'dye ra' mi'in chime'. 21Yi' sánacdye': “Yụ ra' jutacsi mu'in yocve bä'yity in, mu'in qui ra' jéyacsi yụs p̂eyacdye' útsi muntyi' yụ, yoctyisĉan ra' p̂eyacdye' se'vibun ra' yụ in. Me' ra' tsan' me' mu'in jéyacsi in muntyi' yụ, mu'in ra' jam jun' se'vibun p̂eyacdye' yụ in, yi mu' Ayo' tsun”, yi' sánacdye'. 22Ọij sánacdye' jorojĉanjisin' jedyedyes buty mu' Jen' so'misin' ferdye' paj qui yocsi'ĉan p̂eyacdye' p̂eyaĉa' tsun, me' bu'yi mu' Jen' jị'caveyacsi ferdye' mu' mu'in jam anicjetety Jen' in paj qui mu'in anicyive in, jam tsundyes anicjejatydyes Jen', me' jị'cave' ferdye'. Tsun anicjejaty Jen' yocdye so'mac tsun, so'misin' ferdye' paj qui mọ'ya' tupuj voro'yeja' p̂eyacdye' mu', mọ' so'misin'si' tsun, paj qui nọ́tacseja' mu'in anicjetety Jen' in. 23Mọ'dyes vajmu'yaij jụijya' mi'in anicjetintety Jen', yedyej yocsi'ĉan p̂eyacdye' p̂eyaqui jụijya' mi'in, vatyquej ra' säsnac yirity muntyi' jụijya', jam me' so'mactyi', vatyquej yirity jụijya' jam anicjetety Jen' se'vinac jụijya' mi'in yocsi'ĉan p̂eyacdye' mọmo' p̂eyaqui jụijya' mi'in, mu' ra' yi: “Uts nash där shapuijtyi' in.” 24Mi'in na voro'yi mọ' so'minacsi' p̂eyacdye' Jen' jụijya', vatyquej siti yirity jam me' so'mactyi', vatyquej yirity jụijya' jam anicjetety Jen', chat qui ra' mọ' p̂eyacdye' voro'yis mi'in mọ' ra' ji'dyijvete mu', chat qui ra' mu' dyijyi juchajche' mu', 25ĉaĉaij na mọ' p̂eyacdye' jị'caveyete caminsis dyijyedye' a'c̣his mu', mọ' ra' p̂eye' mu' judyeya' ra' dyụtsyi mu' tima'quete Jen', chat qui ra' yi mu': “Anicdye me' rụij, mu' Jen' mi'inya'.” 26Mọ'dyes vojity, yụ ra' jéyac, me' ra' mi'in vajmu'yadye'ĉan mi'in, tupuj yocsi' yocsi' jäm'taqui mi'in. Pạrej ra' jimaqui Jen'dyes mi'in, pạrej ra' ji'chäyitidye' tutiñe' mi'in, judyeya' pạrej ra' voro'tacsi p̂eyacdye' mi'in, mọ' so'minacsi' mu' Jen', judyeya' pạrej ra' yocsi'ĉan p̂eyacdye' p̂eyaqui mi'in, judyeya' pạrej ra' jị'chiqueyacsebantyi' mi'in mọ' p̂eyacdye'. Me' me' tupuj vajmu'yadye'ĉan mi'in, jemoñe' qui nam' dyijyedye'tum cạtiñe' mi'in paj qui vaj me' p̂añi Jen'dyes mi'in. 27Pạrej mu'ya' yocsi'ĉan p̂eyacdye' p̂eyaqui jụijya' mi'in, jam ra' dai' yu'ti me'tyity mi'in, pärä' judyeya' chibin, me'si' ram' p̂eyaqui mi'in. Jam qui na ram' yiristum yiri'ya' p̂eyaqui mi'in, cäts ra' yirity jịjcaij mi'in, judyeya' jị'chiqueyacsebantyi' p̂eyacdye' mi'in. 28Itŝij jị'chiqueyacsity jụijya', jam ra' yocsi'ĉan p̂eyacdye' p̂eyaqui mi'in vajmu'yadye'ĉan mi'in, dam'dye jäm' ĉụi' p̂iyiti dyijyedye'ĉan mi'in judyeya' cọdyetinte Jen' ĉojtyi'ĉan mi'in. 29Vajmu'ya-dye'ĉan mi'in tupuj voro'yi mi'in mọ' so'minacsi' mu' Jen', jam ra' dai' me' yu'ti mi'in voro'yity mi'in, pärä' judyeya' chibin, me'si' ram' voro'yi mi'in. Yoctyi' tupuj paj qui se'vaquity mọmo' in judyeya' dyijtucsebi p̂eyacdye' mu'in, jadac rụijsis, jadac jam. 30Yirity jụijya' mu'ĉantyi' vatyquej so'mactyi' Jen'si' p̂eyacdye' mu', jemoñe' c̣hu'c̣huij chum mu' voro'tacseva'joijtyi' paj qui mu' p̂eyaqui q̂uin'dyem' so'mactyi'. 31Me' ra' cháta' tupuj räj mi'in voro'tacsi mọ' so'minacsi' Jen', cäts ram' yirity jịjcaij mi'in, paj qui mi'in vaj me' chịj mi'in judyeya' chime' paj qui vaj me' p̂añi Jen'dyes mi'in. 32Mu'in jaso'mitity p̂eyacdye' Jen' in chịj ĉujcati in ĉụi', tupuj c̣hu'c̣huyacsi yoctyi' in. 33Mu' Jen' jam mạ'je' shapudye'tum cạja' jo'mes vajmu'ya'yeja'ĉan, mu' mạ'je' paj qui dyijyedye'tum tsun paj qui räj jäm'jitidye'tum catiĉa' tsun vajmu'yaijĉan. Me' jị'chiyacsi yụ mu'in ñuru'tyity Cristoty mu', pai' bä'yity in, 34paj qui mọ'in p̂en in jam p̂eyaqui' vajmu'yadye'ĉan in, mọ'ĉan jam tupuj p̂eyaqui' p̂en in. Jemoñe' chicaqui' vämtyi' mọ'in, yi' Jen'si' yụ'tacdye' mu'. 35Mạ'je' jụijya' yiris jedye' chị' in, tupuj jéyaqui' vämtyi' mọ'in ĉụi'si'ya' aca' mọ'in, ĉaĉaij na jam tupuj jo'mei'ĉan tsudyujñitidye'ĉan p̂eyaqui' in, jam me'dyes mọ'. 36Jam mạ'je' se'vibutiĉa' ọij ji'chäyitidye' yụs mi'in, yụ ra' jéyac, ¿Mi'inya' adac mọmo' na'i' Jen'si' p̂eyacdye' mu'? ¿Mi'in adac mọmo' se'vebitinte jiquej? Jam jun'. 37Pạrej yi mi'in: “Yụ nash so'mactyi' Jen'si' p̂eyacdye' mu'.” Tyi chuc me' yity in mu'in ra' chäyibun yụ in, ọij ji'chäyitidye' sáñes q̂uin' yụ, ọij anic Ayo'si' p̂eyacdye' mu'. 38Jam jụijya' se'vibun ọij p̂eyacdye' yụ, me'dye ra' mu'si' jam ra' se'vebitinte mi'in p̂eyacdye' mu'. 39Mọ'dyes vojity, fer dyijtuvac mi'in paj qui so'mac mi'in voro'yedye' Jen'si' mu'. Chime'dye ra' jam dyäcjeĉúnacsi mi'in mu'in yocsi'ĉan p̂eyacdye' p̂eyaquity in. 40Jemoñe' jäm' cạtiñe' mi'in vajmu'yaijĉan mi'in, bistidyeij ra' mi'in, dyijyedye'tum ra' cạtiñe' mi'in judyeya' jäm'yedye'tum chime'.

will be added

X\