1 Corinthians 12

1Vojity, q̂uin' yụ ra' jị'chiqueyeyac jun' chuc mọ' Jen'si' Ạ'edye' mu' so'misin' tsun carijtacdyedyes Jen'dyes. 2Chịj mi'in jambi'dyem' anicjetinte Jen' jiquej mi'in, cäc̣hä'chutiñe' jiquej mi'in mọ'in jäm'tacdye' in, anic fibis mọ'in in, mom' jiquej räjĉan dyijtutiñe' mi'in, anic ferdye'tum ĉọ́tiñe' mi'in. 3Yụ ra' jéyac mi'in, tyi chuc jaso'miti p̂eyacdye' Jen'si' Ạ'edye' mu', mu' jam jun' jañäñiti mu' Jesús. Tyi chuc jam játŝutity Jen'si' Ạ'edye' mu', mu' jam jun' yi: “Jesús anictyity Ayo' tsun”, mijam yi. 4Mọ'ya' yịjyi carijtacdyedyes so'misin'si' tsun, me' tsan' me'tum, yiris qui nam' Jen'si' Ạ'edye' mọ' so'misin'si'. 5Me'dye chime' yịjyi mọ'ya' carijtacdye', mu' qui nam' yirity Ayo' tsun yojdyetydyem' carijtyeyejaty u. 6Me' me'dye chime' ferdye' mu' carijtacdyedyes mu' mọ' so'misin'si', mu' qui nam' Jen' yirity so'macsity. 7Me'dyes qui mu' Jen' räjen'dye so'misin' ferdye' Ạ'edye'ya' mu', me' jị'ĉoqui Ạ'edye' mu'. Mu' me' so'misin' ferdye' mu' paj qui vaj meij ñútyitiĉa' bä'ja' tsun, 8jam qui nam' vaj me' so'macsi' carijtacdyedyes. Pạrej so'macsi' paj qui dyijyedye'tum jị'chiyacsi in jun' chuc ra' bä'yi in, judyeya' pạrej so'macsi' chị́dyem' mọ'ya' qui jị'chiyacsi jätäjyi' chuc Jen'si' p̂eyacdye' mu'. 9Chime' mọ' Jen'si' Ạ'edye' mu' pạrej so'macsi' paj qui muju'cha' anicjete Jen' in, judyeya' mọ'dye pạrej so'macsi' ferdye' paj qui ji'chäcacseban muntyi' in, 10judyeya' chime' so'macsi' paj qui jị'caveyacsi ferdye' in, pạrej na so'macsi' ferdye' paj qui jị'chiqueyacsi in mọ' p̂eyacdye' jaso'mitis Jen' in. Pạrej so'macsi' paj qui tupuj chị́yacsebi in yoctyis ji'chäyitidye' mu'in, are' Jen'si' mu', vatyquej ra' sọyos mọ'. Judyeya' chime' pạrej so'macsi' paj qui yocsi'ĉan p̂eyacdye' p̂eyaqui in, judyeya' pạrej chime' so'macsi' paj qui jị'chique-yacseban in jätäjyi' chuc mọ' p̂eyacdye' p̂eyes in. 11Me' me' so'mac in anicjetety Jen' in, me' tsan' me' bu'yi', yiris qui nam' Jen'si' Ạ'edyem' mọ' so'macsis carijtacdye' mu'in, jun' jun' chuc mạ'je' mọ', me' me' so'macsi'. 12Ọij a' tsun yiris mọmo', dai' qui nam' jedye' me'chui'. Me'dye mu' chime' Cristo, me' tsan' dai' tsun anicjejaty, yojdyem' mus a' um', me' bu'ja'dye mọmo' tsun yu'sin'. 13Räjen'dye tsun, paj tsan' judío tsun, paj tsan' jam judío tsun, paj tsan' úñity tsun, paj tsan' jam úñity tsun, räjen' qui nam' tsun Jen'si' Ạ'edye' mu' yu'sin' tsun paj qui Cristoty tsun, jeñej bu'ja' Cristos a' mu', me' bu'ja' tsun, räjen' tsun so'mac Jen'si' Ạ'edye' mu'. 14A' muntyis tsun jam yiris mọmo' jedye' jäm'tac, dai' mọ'ya' jedye' me'chui'. 15Vatyquej yi' jụijya' yuj tsun: “Yụ nash jam a' bu'yi' ĉaĉaij na yụ jam un”, yi' vatyquej jụijya'. Me' tsan' me' yi' yuj tsun, yejĉoi' qui nam' taca' a' tsun. 16Vatyquej yi' jụijya' chun tsun: “Jam nash a' bu'yi' yụ ĉaĉaij na yụ jam vej”, vatyquej yi' jụijya'. Me' tsan' me' yi' chun tsun, yejĉoi' qui nam' taca' a' tsun. 17Yedyej vej mọmo' jụijya' a' tsun, a vuty jam jun' se'vaĉa' u. Yedyej chun mọmo' a' jụijya' tsun, a vuty jam jun' jụ'saĉa' u. 18Jam na me', mu' Jen' rụij yu'busin' a' tsun, mu' yu'tyiyisin' räj a'si' jedye' tsun juna' juna' bu'yi' chuc jäm' ĉọi' mu', mọ'ya' yụ'tye'. 19Yiris mọmo' a'si' jedye' jụijya' tsun, jun'dyem' mọ' a' shupqui'. 20Dai' jedye' Jen' jäm'tyiyisin' a'si' tsun, me' tsan' me', yiris qui nam' a' shupqui' tsun. 21Vej tsun jam jun' ñiñe' un tsun, je': “Yụ jam jemonye mi”, mijam mọ' jo'no' tsun ñiñe' mọ' yuj tsun, je': “Yụ jam jemonye mi.” 22Jam me' a'si' jedye' tsun, yódyesdyem' itŝi' ferdye' om', mọ' anic mọjo'cha' jemonja' tsun. 23Pạrej a'si' jedye' tsun ọya'ya' ĉọ́ĉa', mọ' qui nam' mọjo'cha' ĉọjcaja' tsun, judyeya' chime' pạrej a'si' jedye' tsun jam tupuj mọ' cạveja' mijam jị'cavejas, mọ' jumjeja' mọmo'. 24Yocsi' na a'si' jedye' tsun mọ' mọmo' jị'caveja' tsun. Anicdye me', mu' Jen' räj jäm' yu'busin' a'si' jedye' tsun, mu' muju'cha' yụ'tacsi mọ' ọya'ya' ĉọ́jas tsun, 25paj qui jam yocvevej bu'yi' a'si' jedye' tsun, paj qui vaj meij ĉujcati' in, chime' paj qui vaj me' ñútyitidyei' in. 26Are'yi' jụijya' yiris a'si' jedye' tsun, räjtumdye vatyquej are'rei' a' tsun. Tima'cac jụijya' yiris a'si' jedye' tsun räjtum vatyquej ma'joi' in a'si' jedye' tsun. 27Mi'in nash Cristos bu'yi a' mu', mi'in nash cäts yirity jịjcaij shupqui mi'in Cristos a' mu'. 28Me'dye mu' Jen' jäm' yụ'tacsi mu'in anicjetety Jen' in, paj qui mu'dyes carijtaqui in. Muju'chaty mu' yụ'tacsi mu'in jutactyi' Jen'tyi' in, judyeya' chime' mu'in jaso'mitity p̂eyacdye' Jen' in, judyeya' mu'in chime' jị'chiyacsity in. Chime'dye pạrej mu'ya' yụ'tacsi mu'in jị'caveyacsity ferdye' in, judyeya' mu'in ji'chäcacsebantyi' are'reijtyi' in, judyeya' mu'in nọ́tacsity in, judyeya' mu'in bächäcsity in mu'in anicjetety Jen' in, judyeya' mu'in yocsi'ĉan p̂eyacdye' p̂eyaquity in, me' me' Jen' yụ'tacsi paj qui mu'in anicjetety Jen' in vaj meij ñútyitidyeij in. 29¿Yedyej buty jutactyi' Jen'tyi' mu'? Jam. Chime'dye jam yedyej jaso'mitity p̂eyacdye' Jen' in, mijam chime' yedyej jị'chiyacsity in, mijam yedyej jị'caveyacsity ferdye' in. 30Chime'dye jam yedyej ji'chäcacsebantyi' are'reijtyi' muntyi' in, mijam yedyej yocsi'ĉan p̂eyacdye' p̂eyaquity in, mijam yedyej jị'chiqueyacsebantyi' p̂eyacdye' mu'in, jam. Mu'dyem' Jen' yoc yoc yụ'tacsi paj qui me' tupuj carijtaqui mu'dyes in. 31Jemoñe' räjĉan dyijtutiñe' mi'in paj qui mu' Jen' me' so'minac mọ' mọjo'chas carijtacdyedyes mi'in. Q̂uin' ra' yụ jéyac mọjo'cha' jemonacsi', ọya'ya' jemonja' yocsi' carijtacdye'.

will be added

X\