1 Cäc̣hä'chubutiĉam' yụs dyijyedye' yojdyem' yụ u cäc̣hä'chupte Cristos dyijyedye' mu'. 2 Vojity, yụ ma'joij mi'indyes ĉaĉaij na räjĉan dyijtutiĉa' yụ mi'in, judyeya' chäquibutiĉa' yus ji'chäyitidye' mi'in so'meyacsi' yụ jiquej. 3 Yụ mạ'je' jéyac ọij, mu' Cristo ayo'bu'yi räjdyes son'dyes in, me'dye mu' son' ayo'bu'yi p̂endyes mu', judyeya' mu' Jen' ayo'bu'yi Cristodyes. 4 Mọ'dyes mu' son' jam tupuj p̂ur' bu'yi' yụ'taqui jo'no' mu' cọdaqui Jen'che' jụijya', judyeya' jị'chiqueyacsi p̂eyacdye' jaso'mitis Jen' jụijya'. Me' jụijya' mu', jeñej äcäijjeyacdye' Ayo'che', me' shupqui' mọ'. 5 P̂en na jụijya' jemoñe' p̂ur' bu'yi' yụ'taqui' jo'no' mọ', cọdaqui' Jen'che' jụijya', judyeya' jị'chiqueyacsi' p̂eyacdye' jaso'mitis Jen' jụijya'. Jam me' yụ'taqui' jụijya' mọ', äcäijjeyaqui' vämtyi' mọ', me' shupqui' mọ'. Jam me' mạ'je' p̂ur' bu'yi' jo'no' jụijya' mọ', där tsị́cai' shupqui', jeñej qui tä'tsetacsi' fin mọ', me' shupqui' mọ'. 6 Mọ'dyes jam mạ'je' p̂ur'jeyaqui' jo'no' jụijya' mọ', dam'dye jäm' tä'tsetac fin mọ'. Chị́ja' tsun därsi' tsị́cadye' me' tä'tsetac jụijya' p̂ensi' fin mọ', jemoñe' qui p̂ur' bu'yi' yụ'taqui' jo'no' mọ' jimacdye'ĉan. 7 Son' na jụijya' in jam jemoñe' mu'in p̂ur' bu'yi' yụ'taqui jo'no' mu'in, ĉaĉaij na mu' son' jäm'tac yódyeijdyem' mu' Jen' u, judyeya' jị'cavepte ferdye' mu'. P̂en na jị'cavaqui' vämtyis ferdye' mọ', 8 ĉaĉaij na mu' son' jam p̂ensi' a' mọ' jämi' jiquej, mọ' chat p̂en jämi' son'si' a' mu' jiquej. 9 Mu' son' jam p̂endyety jäm'te Jen', mọ' p̂en jäm'tye' mu' Jen' son'dyes jiquej.139 10 Mọ'dyes q̂uin' mọ' p̂en jemoñe' p̂ur' bu'yi' yụ'taqui' jo'no' mọ', mọ' jorojĉanyi' mọ' ayotuqui' vämtyi' mọ', judyeya' paj qui jäm' bu'yi' anjersi'ya' vej mu'in. 11 Tsun na anicjejaty Jen', mu' son' jemoñe' fer p̂en, me'dye mọ' chime' p̂en fer jemonte son'. 12 Me' tsan' mọ' p̂en son'si' a' mu' jämi' jiquej, q̂uin' qui nam' mu' son' p̂enĉan na'i in, mu'dye Jen' me' jäm'tye'. 13 Ĉụi'si'ya' dyijyedye' jätäjyi tyu' u mi'in, yiris p̂en cọdaqui' Jen'che' jụijya' ¿jam buty p̂ur' bu'yi' jo'no' mọ'? Jemoñe' p̂ur' bu'yi' jo'no' yụ'taqui'. 14 Chime'dye mọ'ya' yicdye' muntyis mu'in anic där tsịca' shupqui mu' son' ji'moc̣haye' fin jụijya' mu'. 15 Mọ' chat p̂en me'dye yụ'tac moc̣ha' fin mọ' paj qui jäm'yi', ĉaĉaij na mu'dye Jen' me' so'macsi paj qui mọ' busdyesi' jo'no' mọ'in. 16 Pạrej mu'ya' jam mạ'je' se've'tyi' jụijya' in ọij ji'chäyitidye', yụ ra' jéyacsi mọ' mọmo' yicdye' tsun jimacdye'ĉansi'. Chime'dye me' yi in junanaty ĉụi' in vajmu'yaijĉantyi' in mu'in ñuru'tyity Cristoty in. 17 ̣Q̂uin' yụ ra' voro'tyeyac mi'in, jam qui na ram' tima'queyac mi'in, ĉaĉaij na jam rụij cạtiñe' dyijyedye' mi'in jimacdye'ĉan. Mọ' vajmu'yadye' mi'in mọ' jam méqui' ñútyinac, dadam' yocvejinac. 18 A nash jin yụ in jun'si' chuc jimaquiya' ca mi'in, jam ca vaj cäts dyijyi mi'in, yụ na chet anicyi. 19 Anicdye me', ĉaĉaij na me' mọmo' bä'yi muntyi' in, yoc yoc dyijyity in. Me' tsan' jam rụij me', mọ'ya' tupuj chị́ja' tyijtyi chuc rụij bä'yity in. 20 Vajmu'yaij jụijya' mi'in me' tsan' jebetiñe' mọ' ji'dyijvitidyes säcsedye' jam mọ' Ayodyes shupqui', ĉaĉaij na ca a'c̣hisya' dyijyedye' säcsi mi'in. 21 Cäj cäj ca säcsi mi'in, pạrej tashche' säcsi mi'in, ĉụi' ĉụi' jebaĉan säcsedye' mi'in jun' qui' chuc ca mạ'jetiñe' jebetiñe', pạrej qui nam' ca mu'ya' shu'qui mi'in, yoctyi' na dáquisya' yi in. 22 Me' mi'in jeñej äcäijjeyacdye' Jen'che' mu'intumdye ñuru'tyity mu', me' shupqui' mọ', judyeya' chime' mi'in jị'tsicayacsi mu'in ñịbety in. ¿Jun' me' u mi'in? ¿Itŝi' adac ĉaĉaij ĉụi'si' aca' mi'in paj qui mu'ya' säcsi mi'in? ¿Jo'mesya' adac ra' tima'queyac yụ? ¡Jam jun'! 23 Mu' Ayo' tsun so'min yụ ọij ji'chäyitidye', yụ ji'jiyeyac mi'in jiquej. Mọ'dye tsedyedye', yoqui'dyem' mu' Jesús Ayo' tsun ji'mincac ra' ayo'ya' jiquej u mu', mu' tapjete pan, 24 yoshoropaij jéte Jen', q̂uemi'vete qui, chat qui jéyacsi: “Uts pan jeñej bu'yi ĉụi'si' a' yụ, mọ' ra' yụ'tac mi'indyes. Jebemac mi'in paj qui räjĉan dyijtutiĉa' yụ mi'in.” 25 Ijaij säcsi in, tyéquis qui tapje' mu', jéyacsi: “Ọij tyéquisĉansi' jeñej bu'yi' chäsh yụ, yụ'tac ra' mi'indyes, mọ' ra' jaso'miti' ferdye' mọ' mụi'sis p̂eyacdye' Jen'si' mu'. Tyévac mi'in paj qui yụ dyijtutiĉa' mi'in,” yi Ayo' tsun jéyacsi. 26 Jäm'dyeya' jebetinte uts pan judyeya' tyétiñe' ọij tyéquisĉansi', me' ra' p̂eijbitinte sän'dye' Ayos mu', me' ra' yejĉoi' jun' qui' chuc atsijbanya' mu'. 27 Tyi chuc itŝity dyijyedye' jebete mu' pan judyeya' tyeij mọ' tyéquisĉansi', mu'in me'tyity in äcäijjepte in Ayo'si' a' mu' judyeya' chäsh mu'. 28 Tashche' chum ra' cạvaĉa' ĉụi'tyi' ĉojtyi' tsun, vatyquej ra' mọ'ya' juchaj tsun, chat qui ra' me'si' q̂uin'dyem' chuja mu' p̂an judyeya' tyéja' mọ' tyéquisĉansi'. 29 Ĉụi' mọmo' jụijya' jebeja judyeya' tyéja', jam dyijtupja Ayo'si' a' jụijyam', va'tacdye' ra' cạja' tsun. 30 Anicdye me' dai' mu'ya' japacjoijtyi' mi'in, pạrej aty jam feryi mi'in, pạrej säñi mi'in. 31 Ĉụi' cạvaĉa' juchaj tsun, judyeya' farajjeja', chat qui ra' aty jam cạja' va'tacdye' Jen'si' mu'. 32 Jen' va'tacdye' so'misin' paj qui mọ' ji'chäyisin' paj qui jam tsunmun va'cac tsäqui'sisĉan, jam ra' jeñej mu'in in úchety jacchety in jam anicjetety Jen' in. 33 Mọ'dyes vojity, vajmu'yaij jụijya' mi'in, jebetiñe' ra' ji'dyijvitidyes säcsedye' jụijya' mi'in, jam ra' yiristum säcsi mi'in, bisti chum ra' mi'in, jun' qui' chuc räj venchuij in, 34 paj qui jam va'tacdye' cạtiñe' mi'in. Dáqui jụijya' mi'in jemoñe' säcsetaqui chum ĉụi'si'ya' aca' mi'in. Mọ'dyety yocsi' jedye' in, jambi' vorjeyeyac, mọ' ra' jị'chiqueyac aty ventyecyacya' yụ.
