1 Corinthians 10

1Vojity, yejĉojam' dyijtucsejam' mi'in jun' chuc bä'yaque jiquej mu'in urucyaty vóshi' tsun, ji'c̣honactyi' jiquej Egiptoĉan in. Cäjyasĉan jac jiquej räj mu'in in cäc̣hä'chui' dyicba'badye' in, judyeya' räj ñutsen'je' jäijnäs tsique' in.133 2Yoqui'dyem' cäc̣hä'chui'ya' in mọ' dyicba'badye',134 judyeya' räj ñutsen'je' tsique' in, räj ayotute mu' Moisés in, mu'tum bä'yi in, jeñej bu'yi ji'chojtity Moisésya' in, me' shupqui' mọ'. 3Räjdye mu'in chime' jebei' in mọ' säcsedye' so'macsis Jen',135 4judyeya' chime' räjtumdye tyeij in mọ' ojñi' mijĉansi' so'macsis Jen'.136 Mu' mij jeñej bu'yi Cristo, me' bu'yi mu', mu' pen'dyetucsity cäjyasĉan jac jiquej. 5Me' tsan' me' arajdye qui nam' räjyaij jam ma'jotacsi mu' Jen', mọ'dyes qui räj säñi in cäjyasĉan jac jiquej in, mọ'ĉan va'cac a' mu'in. 6Tsundyes me' cạve' jiquej in, paj qui tsun q̂uin' chị́ja', paj qui tsun jam me' mạ'jeja' a'c̣his dyijyedye', jam jeñej mu'in jiquej in. 7Jam ra' tima'quetiñe' jäm'tacdye', jam jeñej mu'in jiquej pạrej in, yoj yi'dyem' sánacdye' o: “Muntyi' feshtaij in, säcsi in, tyeij in, judyeya' a'c̣his jäm'taqui in”, yi'.137 8Tsun na jam ra' vo'voyeja', jam jeñej mu'in jiquej in. Juchadyes mu'in mu' Jen' va'tacdye' so'macsi jiquej, yirisĉan mạyedye' shach ijacsi pärä' qui'tac chibin jiyi' mir muntyi' in, me'tum ijacsi. 9Tsun ra' jam me' jị'ĉojtyeja mu' Cristo are'ĉa cạtyeja va'tacdye', jam jeñej mu'in jiquej in, yoqui'dyem' jị'ĉojteya' Jen' jiquej u in, mu' juteyeyacsi nas mu'in qui ji'jitsacsi in, ujacsi in.138 10Mijam ra' ñiñeja Jen' q̂uin', jam jeñej mu'in jiquej in, ñinacdye'ya' mu'in mu' Jen' jutete anjer ijacsity mu' qui ijacsi. 11Tsundyes me' cạve' jiquej in paj qui tsun q̂uin' jäqui'vety jam me' dyijyeja' tsun. Tsundyes mu' Jen' ji'sañeyacsi räj ọij paj qui mọ' q̂uin' ji'chäyisin' tsun, ĉaĉaij na c̣hẹi'ya' jadyiquis tupudye' atsvun. 12Tyi chuc va'bunyi yi, “Yụ fer bu'yi Jen'dyes”, yi, tyi chuc yity in peñi ra' in. 13Jam jayej mọ'ya' jacches ji'penacdyedyes in, räjen'dye muntyi' in vaj me' jị'ĉojtye' in. Mu' na Jen' jị'cätse' p̂eyacdye' mu', yi' jun' chuc mu' chịj ñutsjityinac mi'in paj qui jam peñi mi'in. Mu' ra' ñutsjityinac paj qui jam jiyi' fer mọ' ji'penacdye' mi'indyes, judyeya' ra' chime' ñútyinac paj qui tupuj dyichjetiñe' mọ', me' ra' c̣hoñi mi'in, paj qui jam peñi mi'in ji'penacdye'ya'. 14Chätidye' mạ'jeyacdyety yụ, jam ra' dam' cudyiti jäm'tacdye'che' mi'in mijam ra' ĉọcsequi mu'in me'tyity in. 15Yụ nash chị́yeyac anic dyijyedye'tumtyi' mi'in tupuj chäyibutiĉa' p̂eyacdye' yụs mi'in, jedac rụijsis jedac jam. 16Jäm'dyeya' jebeja' ji'dyijviti-dyes säcsedye', tsun yoshoropaij jéja' Jen' tyédyedyes. Mọ' tyédye' jorojĉanjisin' jun' chuc räj vaj cäts tsundyes mu' Cristo yụ'taqui chäsh mu'. Chime'dye mu' pan jebeja tsun, mu' chime' jorojĉanjisin' jun' chuc räj cäts tsundyes mu' Cristo yụ'taqui a' mu'. 17Me' tsan' dai'tyi' tsun, jeñej qui nam' yirity shupqueja', ĉaĉaij na vaj cäts tsun jebeja yirity mọmo' pan. 18Me'dye chime' mu'in Israeltyi' vóshi' in, mu'in dam'jety shush in ji'co'shayacsi' Jen'dyes, vaj cäts mu'in so'mete Jen' in. 19Jam nash yi yụ mọ'ya' ferdye' jäm'tacdye'si', mijam mọ' shush jadyiquis jäm'tacdye'ya' me'chui' ferdye'. 20Me' tsan' me' mu'in jam anicjetety Jen' in so'me' jedye' jäm'tacdye' jụijya' in, sọyo' qui nam' so'me' in, me' bu'yi' mọ'. Yụ jam mạ'je' jo'mes paj qui mọ' jebetiñe' paj qui jam vaj me' sọyo'tum mi'in. 21Jam tupuj pärä' cäc̣hä'chuja' tsun, mọ'dyes qui jam jun' tyéja' tsun Ayosĉansi' tyéquis judyeya' sọyosĉansi' chime', mijam jun' jebeja' mọ' ji'dyijvitidyes Ayodyes säcsedye' judyeya' sọyos säcsedye' chime'. 22Me' bu'ja' jụijya' tsun mu' ra' Jen' jị'fajqueja. ¿Muju'cha' buty ferdye'tum tsun, uya'ya' buty mu' Jen' ĉọ́ja? Jam jun'. 23Pạrej yi in: “Itŝi' jedye' ñucchusin'si' tsun, jun' chuc mạ'jeja' ĉụi' jụijya' tsun, tupuj me' bä'ja' tsun”, yi in. Anicdye tsan' me', pạrej qui nam' jäm'taĉa' jụijya' me', mọ' jam jäm'si' tsundyesi' paj qui Jen'dyes bä'ja' tsun. Me' tsan' itŝi' ñucchusin'si' tsun, me' qui nam' bä'ja' jun' chuc mạ'jeja' jụijya' tsun, mọ' jam dam' ñútyisin' paj qui fer bu'ja' Jen'dyes tsun. 24Jam ra' ĉụi'sim' jedye' dyijtuja' tsun, dyijtucseja' ra' chime' vojity tsun paj qui nọ́tacseja'. 25Tupuj jebetiñe' mi'in jụ'ñis ĉụi' mọmo' shush ji'mincai'si' in ji'mincacdye'ĉan. Jam ra' jéyacsi mi'in: “¿Jam ca' jäm'tacdye'ya' jadyiquis ọij?” Vatyquej ra' voryi in: “Anicdye me'”, yi in chat qui ra' ji'yoquiti ĉojtyi'ĉan mi'in jebetiñe'ya'. 26Ọij jac räjtumdye jedye' mọ' Ayo'si' mu'. 27Chime'dye yirity jam anicjetety Jen' me' fayinac jụijya' mi'in paj qui jebetacsi mi'in, tupuj mọmo' jebetacsi mi'in. Aty me' jụijya', jebejam' jedye' chuc so'minac in, mijam ra' jétinte: “¿Jam ca' jäm'tacdye'ya' jadyiquis ọij”? jam ra' jétinte, paj qui jam ĉụi' ji'yoquiti ĉojtyi'ĉan mi'in jebetiñe'ya'. 28Vatyquej ra' yirity yi jụijya' mu'ya': “Ọij shush jäm'tacdye'ya' jadyiquis”, yi jínac jụijya', chat qui ra' q̂uin'dyem' jam jebetiñe' paj qui yoctyi' in jam ji'yoquiti ĉojtyi'ĉan in. 29Me' tsan' jebetiñe' mi'in, mi'in ra' jam yoqui ĉojtyi'ĉan mi'in, mu' ra' chat jínactyi', mu' ra' yoqui ĉojtyi'ĉan mu' jebetiñe' jụijya' mi'in, ĉaĉaij na taca' dyijyi jäm'tacdye'che' mu'. Vatyquej ra' pạrej yi mi'in: “¿Jun' yụ u farajje' ọij jebei' yụ? Me' tsan' pạrej mu'ya' taca' cạquity jäm'tacdyedyes dyijyedye' mu'in, yụ qui nam' jam me', faraj bu'yi yụ. 30Tupuj mọ' jebei' yụ ĉaĉaij na aty yoshoropaij jéte Jen' yụ säcsedyedyes, mọ'dyes jam tupuj ñäñin yụ in säcsedyedyes”, vatyquej ra' yi mi'in. 31Rụij tsan' me' dyijyedye' mi'in, me' tsan' me', yụ qui na ram' jéyac mi'in, Jen' räjĉan dyijtumac, räj jedye' chuc jebetiñe', jedye' chuc tyeij mi'in, räjĉan ra' rụij dyijyi mi'in paj qui mu'in muntyi' in tima'quete Jen' in mi'indyes. 32Jun' chuc bä'yi mi'in, jedye' chuc jebetiñe', me' dyijyedye'tum ra' bä'yi mi'in paj qui jam ji'yocacsi mi'in mu'in judío in, judyeya' mu'in jam judío in, jam ra' chime' ji'yocacsi mi'in mu'in anicjetety Jen' in. 33Me' yụ chime' dyijyedye'tum bä'yi, paj qui ma'jotyin yụ in räj muntyi' in, jam yụm' ĉụi' ma'jotyiti, räj muntyi' dyijtucsi yụ, mạ'je' yụ paj qui mu'in c̣hoñi chime' in.

will be added

X\