1 Corinthians 1

1- 2Yụ nash Pablo jutactyi' Jesucristoty mu', Jen' ĉụi'si'ya' dyijyedye' mu', me' yu'tyin yụ. Yụ Sóstenestum vojity tsun, yụ sáñe' mi'indyes anicjetintety Jen' mi'in Corintoĉan bä'yity mi'in.126 Mi'in fayactyi' paj qui Jen'dyety mi'in, mi'in nash Jesucristoty Ayo' tsun, judyeya' räj yocvety chime' junaty ĉụi' in mu'in tima'quetety Jesucristo in, ĉaĉaij na chimu'dye mu'intyi' Ayo' mu'in. 3Yụ cọdyete tsuntyi' Jen' judyeya' mu' Jesucristo Ayo' tsun paj qui mu' ñịbe'jitidyes so'minac mi'in, judyeya' paj qui so'minac ma'jodye' ĉojtyi'ĉandyes mi'in. 4Yụ yejĉoij yoshoropaij jéte Jen' mi'indyes, ĉaĉaij na mu' ñịbe'jinac mi'in Jesucristoya'. 5Jen' anic ñútyinac mi'in ĉaĉaij na Cristoty mi'in, mu' räj so'minac ñịbe'yedyes, me' räj dyijyedye' mu' so'minac mi'in paj qui rụij voro'tacsi mi'in. 6Me'dyes qui mọ' Cristos p̂eyacdye' mu' taĉan bu'yim' ĉojtyi'ĉan mi'in, 7mọ'dyes jam jun' jayej mi'indyes Jen'si' ñịbe'yedyes mu', mu' räj so'minac carijtacdyes mi'indyes, paj qui yejĉoij mi'in jun' qui' chuc ayijya' tupudye' atsijbanya' mu' Jesucristo Ayo' tsun, mu' bisva'tintety mi'in. 8Mu' ra' fer bu'yi yu'tyinac mi'in paj qui rụij bä'yi mi'in jun' qui' chuc jadyiquis tupudye', atsijbanya' mu' Jesucristo Ayo' tsun, paj qui jam jụ'ñiij daquishunac ĉụi'si'ya' vej mu'. 9Jen' nash jị'cätsety p̂eyacdye' mu', mu' fayinactyi' mi'in, judyeya' yu'tyinac paj qui Jesucristoty mi'in Ạva' mu', mu' Ayo' tsun. 10Vojity, Jesucristosche' tịj mu' Ayos tsun, yụ ferdye'tum jéyac mi'in: vaj cäts dyijyejam' mi'in, jam ra' yoc yoc dyijyi mi'in, mijam ra' fáquitidye'tum bä'yi mi'in, vaj me' dyijyejam' ĉojtyi'ĉan mi'in. 11Vojity, pạrej Cloétyi' chätidye' mọ' ji'chäquiyin yụ in jin yụ in mi'in ca jam cäts dyijyi mi'in. 12Me' ca bä'yi mi'in, yoc yoc ca dyijyedye' me'chutiñe' mi'in. Pạrej ca mu'ya' yi mi'in: “Yụ cäc̣hä'chutety Pablo”, yi mi'in, pạrej ca yi mi'in: “Yụ cäc̣hä'chutety Apolos”, yi ca mi'in, pạrej ca yi mu'ya' mi'in: “Yụ cäc̣hä'chutety mu' Pedro”, judyeya' chime' pạrej ca yi mi'in: “Yụ cäc̣hä'chutety mu' Cristo”, me' me' ca yi mi'in. 13¿Dai' buty ĉọ́tinte mi'in Ji'c̣honsin'tyi' tsun? ¿Yụ adac ijac croshche' mi'indyes? Me'dyes qui buty me', ¿yụsche' tịj ji'chojti mi'in? Mijam méqui' me'. 14Yoshoropaij jéte Jen' yụ, yụ jam chojtyeyac mi'in, me'dye mu'in mọmo' chojtacsi yụ Crispo judyeya' Gayo. 15Mijam yoctyi' chojtacsi yụ, vatyquej ra' yi mi'in: “Mu' Pablo chojtacsi muntyi' in ĉụi'si'che' tịj ji'jäcdyi”, vatyquej ra' yi mi'in. 16Jäqui've dyijyeban yụ, yụ́dye jiquej chojte mu' Estéfanas räjen'dye aca'ĉantyi' chätidye' mu'. Pạrej aty jam dyijyeban yụ, vatyquej ra' mu'ya' yoctyi' chojtacsi jiquej yụ. 17Jen' jam me' jutin yụ paj qui yụ chojtacsi mọmo' muntyi' in, mu' jutin yụ paj qui voro'tacsity mọmo' yụ muntyi' in, jị'chiqueyacsity yụ jäm'si' p̂eyacdye' mu', me' bu'yi' yụ'tacdyeij. Voro'yedye'ya' yụ p̂eijte yụ mu' Cristo, jam qui nam' ji'ma'jotacdyes p̂eyacdye' dạque' yụ, paj qui mọ'ya' se' ja'yacsi yụ. Me' jụijya' yụ, a vuty fibis shupqui' p̂eyacdye' Jesucristos u mu', mọ' p̂eijbites yụ, yi' jun' chuc ijac croshche' jiquej mu'. 18Mu'in va'tacdyety in fibis ĉọi' in mọ' p̂eyacdye' voro'tacsejas tsun q̂uin', mọ' p̂eye' jun' chuc ijac croshche' mu' Cristo. Tsun na c̣honjaty chị́yeja' tsun mọ'dye p̂eyacdye' jorojĉanjepte Jen'si' ferdye' mu', 19rụijdye yi' sánacdye': “Yụ ra' jị'motsacsebi chị́dye' mu'in dyijyedye'tumtyis in, yụ ra' fibis yụ'tacsebi dyijyedye' mu'in”, yi mu' Jen'. 20Mu' Jen' jorojĉanjeyacsi anic fibis dyijyedye' mu'in jacchetysi' muntyis in, mọ' fibis shupqui' Jen'si'ya' vej mu'. Me' tsan' dyijyedye'tumtyi' ĉúti in, judyeya' ji'chäyitity in, judyeya' chịj p̂eyaquity in judyeya' chịj chutity p̂eyacdye'ya' in jacchesya' jedye', räj jo'mes in mọ' fibidyes shupqui' Jen'si'ya' vej mu'. 21Jen' dyijyedye'tumtyi', mu' yi úchety jacchety muntyi' in ĉụi'si'ya' dyijyedye' mu'in jam tupuj chị́yete Jen' in. Jen' ĉụi'si'ya' dyijyedye' mu', dyijyi mu' ra' ji'c̣honacsi tyi chuc anicje'tyi' in mọ' p̂eyacdye' voro'tacsejas tsun. Me' tsan' mu'in muntyi' in fibis ĉọi' in, mọ' qui nam' tupuj ji'c̣honacsi'. 22Jesha' mu'in judío in mọ' chum dyijtui' in mạ'je' tashche' cạvepte ferdye' in, chat q̂uin'dyem' qui ra' anicyi in. Mu'in na griego in jam judío in, jam me' mu'in in, mọm' dyijtui' in muntyis dyijyedye' mu'insi' dyijyedye'tumtyis ĉútity in. 23Tsun na jam me', voro'tacsi tsun Cristos p̂eyacdye' mu', jun' chuc mu' ijac croshche'. Mu'in na judío in äcäijjepte in sän'dye' mu', mu'in na jam judío in fibis mu'in ĉọpte in. 24Mu'in na fayactyi' Jen'tyi' mu', me' tsan' judío in, me' tsan' jam judío in, räj mu'in anicjetety in chịj in mu'dye Cristo me'chupte Jen'si' ferdye' mu' judyeya' dyijyedye' mu' chime'. 25Me' tsan' jacchety muntyi' in fibis ĉọpte in Jen'si' dyijyedye' mu', mọ' qui nam' mọjo'chas dyijyedye' mu', ọya'ya'dye muntyis dyijyedye' mu'insi' dyijyedye'tumtyis ĉútity in. Jacchety muntyi' in itŝi' ferdye' ĉọpte in, mu'si' na ferdyem' jam tyi cha'shepte cätsbite in, itŝi' méquis muntyis ferdye' mu'in. 26Vojity, mi'in chịj jun' chuc bä'yi mi'in yoqui'dyem' Jen' fayinacya' jiquej u, jam dai' mu'ya' dyijyedye'tumtyi' mi'in. Muntyisya' vej mu'in, mijam dai' mu'ya' fer bu'yity mi'in mijam dai' muju'chatytyi' ạva' mi'in. 27Jen' jam mu'in tsim'tacsi, mu' tsim'tacsi mu'in jam dyijyedye'tumtyi' in muntyisya' vej mu'in, paj qui mu'in jorojĉanjeyacsi in jun' chuc fibity mu'in dyijyedye'tumtyi' ĉútity in. Chime'dye tsim'tacsi mu'in jam fer bu'yity in muntyisya' vej mu'in, paj qui mu'in jorojĉanjeyacsi in itŝi' mu'insi' ferdye' in mu'in fer bu'yi ĉútity in. 28Chime'dye mu' Jen' tsim'tacsi mu'in uya'yaty in äcäijjeyactyi' in úchetyya' muntyi' in, jam jedyedyety ĉọcsity in. Mu'in tsim'tacsi mu' Jen' paj qui mu'in jorojĉanjeyacsi in jun' chuc fibis dyijyedye' mu'in, mu'insi' fer bu'yitysi' in, mọ' jam ya'i' Jen'si'ya' vej mu'. 29Mu' Jen' yi paj qui jam yirity muntyi' va'bunyi Jen'si'ya' vej mu'. 30Jen' yi Cristoty mi'in, mu' so'minac anicsis dyijyedye' mu', judyeya' rụij yu'tyinac chime', judyeya' Jen'dyety yu'tyinac, judyeya' ji'c̣honnac chime'. 31Me' cạ̈tsi' sánacdye', yi': “Jam ra' ĉụi' tima'quiti mi'in, Ayo' mọmo' tima'quemac”, yi' sánacdye'.

will be added

X\