1 Chuwech re ruwach'ulew k'o k'a jun ri kan janila itzel ri nutz'eton ri nibanatej, y jare' ri más nibanatej chikikojolil konojel winaqi'. 2 Y ek'o k'a winaqi' ri k'o beyomel ri niya'ox chike roma ri Dios, y kan nuya' ruwaq'ijaj chike. Y ronojel ri nurayij ri kánima kan k'o kik'in. Jak'a ri Dios man nuya' ta q'ij richin nikikusaj ronojel re', xa kan ch'aqa' chik winaqi' ri ye'ukusan kan. Y ronojel re' xa kan q'axel y kan ruk'amon-pe q'axo'n. 3 Stape' jun achin xeralk'ualaj ta e wok'al ralk'ual y kan janila xyaloj xk'ase-el, ri rujuna' kan janila k'iy ri xukochij-el. Y man xuya' ta chire ri ránima janipe' ri xurayij, y kan man xmuq ta chi utzil. Yin ninch'ob chi k'o más rejqalen ri ak'ual ri kamineq xalex ri man xril ta ruq'ijul ke chuwech ri jun achin ri'. 4 Roma re ak'ual re' xa choj xok'oje-el juba' y man jun xutz'et kan y xtzolin chik pa q'equ'm, y ri rubi' xa nimestex. 5 Stape' man xutz'et ta ri saqil y man xretamaj ta el achike ri', jak'a rija' xril más uxlanen chuwech ri jun achin ri', 6 stape' ta ri achin ri' xk'ase' ta el 2,000 juna', y man rik'in ri' kan man xutej ta ni man xukusaj ta el juba' ri rubeyomel. Y xa kan junan k'a akuchi xkebek'oje' rik'in ri ak'ual ri kamineq xalex. 7 Ronojel ri samaj ri nuben ri achin xa kan xaxe richin niwa', y rik'in ri' man jun bey nikuqer ruk'u'x. 8 ¿K'o kami rukojol ri wineq aj-na'oj rik'in ri wineq ri man aj-na'oj ta? ¿K'o ta kami más retamabal ri wineq ri xa man jun k'o rik'in, richin nitikir nik'ase-el achi'el ri ch'aqa' chik winaqi'? 9 Más utz yakikot rik'in ri natzu' chi kan awichin, ke chuwech yaken chirij ri xaxe pan ach'obonik k'o-wi, roma re' chuqa' xa q'axel y xa man tikirel ta nawil ri nawajo'. 10 Ri niqatz'et chi k'o wakami xa kan k'o pe. Y chirij ri rubanik ri wineq xa kan etaman-wi, chi rija' kan man nitikir ta chirij ri jun ri kan k'o uchuq'a' pa ruq'a'. 11 Kan qitzij na wi ri nibix: Ri janila chi ch'abel nubij jun wineq, xa k'iy ri man pa rubeyal ta ri nubij. Y re' xa man jun nuk'en-pe chire ri nich'on. 12 Roma ¿kan k'o ta kami jun ri etamayon achike nik'atzin chire ri wineq chupan ri ruk'aslen ri xa kan chi'anin niq'ax-el, ri kan niq'ax-el achi'el jun muj? Y ¿k'o ta kami jun ri nik'utu chuwech ri wineq ri achike xtibanatej chuwech ri ruwach'ulew toq rija' xa maneq chik?
