Rómana 8

1Guentó, úaali asiadirúni houn gürigia ha lídanbaña aban luma Hesusu. 2Ru laali Kristu lani Sífiri woun, ani Sífiri ligía, ruti iseri ibagari woun; furigüda láadiwa lábugiñegiñe lubafu figóu le anügübaliwa lidoun óunweni. 3Lugundun adüga laali Bungiu le lásiñarubei lilurudun Moisesi adüga, siñá lumuti meha lúrudu adüga, ladüga hadebilin gürigia. Aba lóunahani Bungiu Liráü keisi wügüri débiliti le giñe gayaraati lafigouhan (lau sun mafigounhan lan) lun lederegeragun lungua keisi adagaragüdüni luagu figóu. Ítara liña lasiadiruni figóu le wádanbei lau idebilini le gádanbalin. 4Ladügünbalin Bungiu lira, lun gayaraabei lan wagunfulirun lau le labusenrúbei lúrudu, ladüga mabagaridunhadiwa según igaburi lánina figóu le wádanbei, wabagariduña guentó keisi lugundan Sífiri Sandu. 5Ha abagaridubaña según igaburi lánina figóu, luágunrügüñein katei le lánina ubóu haritagua; ánhaña ha abagaridubaña keisi lugundan Sífiri Sandu, luagun katei le lánina sífiri haritagua. 6Dan le habagaridun gürigia según igaburi lánina figóu le hádanbei, barǘ lumutiña lidoun óunweni; ánheinti dan le habagaridun keisi lugundan Sífiri Sandu, barǘ lumutiña lidoun ibagari tímatimaati luma darangilaü. 7Ha aritagubaña luagu katei le lánina ubóu le, láganiñu Bungiu lugundun maha haña, ani siñá ligía híchaagun houngua labun lilurudun Bungiu. 8Ligía, ha lubéi abagaridubaña según igaburi lánina figóu le hádanbei, siñati hadügüni lugundan Bungiu. 9Ánheinti huguya, mabagaridunhadün lidan hugundan, habagariduña lidan aban luma lani Bungiu Sífiri, keisi laganóuña lubéi hidan. Le úabei lani Kristu Sífiri luma, mama lánigu Kristu. 10Anhein winwan lubéi lani Kristu Sífiri hidan, wínwanboun huani ladüga richaguagüda laadün Bungiu, lau sun lóunweba lan húgubu ladüga figóu le lídanbei ubóu le. 11Anhein winwan lubéi lani Sífiri hidan, Búngiumeme le ásaaragüdübalin Hesukrístu lídangiñe óunweni, líchuguba iseri ibagari lun húgubu le góunwedadibei, lídangiñe lani Sífiri le hídanbei. 12Ítara liña lubeiti niduheñu, anihein katei lunti wadügüni, gama lumoun mama lun wabagaridun según igaburi lánina figóu le wádanbei. 13Lugundun anhaün abagarida según igaburi ligía, hóunweguba; gama lumoun anhein háfara igaburi lánina figóu le hídanbei lau lubafu Sífiri Sandu, habagariduba. 14Sun ha ladundehabaña lani Bungiu Sífiri, lirahüñü Bungiu hagía. 15Sífiri Sandu le heresibirubei, mama aban sífiri lánina idamuni lunya hanufudedun; Sífiri le heresibirubei, ligía le adügübalün lun lirahüñü humá Bungiu. Ligía gayara lubéi wagúaruni Bungiu Baba: 16Gefenti lani Bungiu Sífiri woun luagu lirahüñühadiwa lan Bungiu. 17Ani ladüga lirahüñü wamá Bungiu, garichatiwa giñe lun alagan le uágubei lariñaga Bungiu woun, le lunbei gafanran wamá lídangiñe, luma Kristu. Anhein súfuri wabéi luagu ya ubouagu, gafanranbadiwa lidan luéirigun yágüta sielu. 18Haritaguatina luagu ni kata lan le wasufurirubei ya ubouagu lumoun uéiriguni le lunbei wabihini. 19Lauñein saragu óurabahouni luma emenigini sun ubóu, agurabei dan le lunbei heresibiruni lirahüñü Bungiu halagante. 20Lugundun siádiwaali meha sun ubóu, mama hamuga ladüga labusenrun, ladüga ítara liña lan labusenruni Bungiu; 21lau sun lira, súnwandan anihein lan emenigini luagu lesefuruba lan ubóu lídangiñe asufuriruni luma agadeiruni le gádanbalin lun gafanranbei lan lidan haweirigun lirahüñü Bungiu. 22Subudi wamuti luagu chülǘ lan lumoun dan le, sun ubóu le ladügübei Bungiu ayahuati lau igarigu kamá aban würi to agaridutu lubá tágurahan. 23Ani mámarügüñein ubóu asufurira, súfuritiwa giñe, wagía le aniheinhalibei Sífiri Sandu wama keisi lagumeseha katei le lunbei weresibiruni. Sanditiwa aban óunwenbu igarigu, ani aguraba wamuti dan le lunbei wayabin lun lirahüñühadiwa lanme Bungiu le tímatimaati, danme le laseridagun wágubu. 24Lau emenigini ligía wasalbara. Gama lumoun emenigini le arihúabei mámaali emenigini, kagia agurabubalin katei le ibiha láalibei? 25Gama lumoun anhein waguraba le marihin wabéi, aguraba wamuti lau gurasu. 26Ítarameme giñe, íderagua lumutiwa Sífiri Sandu lidan wadebilin. Lugundun mayumuraguaditiwa kei lubudubu, gama lumoun ayumuraguati Sífiri Sandu wawagu lun Bungiu lau amumehani le siñati lariñawagúniwa lau dimurei. 27Ani Bungiu, le arihubarun wanigi, subudi lumuti ka lan labusenrubei Sífiri Sandu lariñagun wádangiñe, lugundun ayumuraguati Sífiri keisi lugundan Bungiu. 28Subudi wamuti luagu aranse lani Bungiu sun katei lun lanügüba lan buiti houn ha hínsiñehabubaña lun, houn ha únbaña lagúara lun lánigu hamá keisi laritaguni. 29Lugundun ha lasubudirubaña Bungiu lúmagiñe lubaragiñe ladügüni ubóu luagu lánigubaña lan, fanrein lumutiña lun ítara hamá keisi Liráü, lun Liráü lan íbugañaü haganagua saragu íbirigu. 30Hati lanúadirubaña lúmagiñe lagumeseha dan, wati giñe houn, richaguagüda lumutiña giñe; ani ha laricharaguagüdübaña, ruti giñe hafanran lidan luéirigun. 31Kábati wariñaga luagu burí katei le? Anhein luéigiñeñein lubéi wafulesein Bungiu, kábagia habafu wáganiñu wawagu? 32Derege lumuti Bungiu Liráü guánarügü lun lounwen luagu wafulesein, sun wagía; ida lubati míchugun lani sun líbiri katei woun keisi líchuguni Liráü woun? 33Kagia gayaraabei líchugun hadurun ha anúadira láañabaña Bungiu? Bungiu arufudubaliña kei richaguatiña. 34Káteiti gayaraabei lasiadiruniwa? Kristu guánarügü óunwebei wawagu, aba lásaarun lídangiñe óunweni; guentó anihein ñun luéigiñe lóunwenren Bungiu Úguchili afurieida wawagu. 35Kábati gayara lafanreinraguniwa luéi línsiñehabu Kristu? Liyaraabadiwa funagia asufuriruni, o lénrengunga, o éibaahouni, o ilamaü, o madaüraguni, o denchaü, o óunweni? Uá! 36Lariñahare tidan Lererun Bungiu: Yarafatiwa lun wounwen buéigiñe súnwandan; óusera hamutiwa keisi mudún anügǘtiña lun háfarawagun 37Gama lumoun lidan sun katei le, sügütiwa hau agañeirutiña lídangiñe le hínsiñehabubei woun. 38Chouru numuti lubeiti luagu ua lan ni kata lun lafanreinraguniwa luéi línsiñehabu Bungiu —ni óunweni, ni ibagari, ni ánheligu, ni máfianu, ni katei le guentobei, ni le lunbei liabin, 39ni le siélubei, ni le ubouagubei, ni burí amu katei le ladügübei Bungiu —siñati lafanreinraguniwa luéi línsiñehabu le larufudubei woun lidan Wabureme Hesukrístu.

will be added

X\