Arufudúni 20

1Lárigiñe, aba narihin aban ánheli lararirun siélugiñe lau ligelein fusu le mébehabei, luma aban óunwenbu güringüri lúhaburugu. 2Aba lárügüdüni ánheli ligía düragón, le binadu hewe, le Máfiabei le Satanási, aba lagüraguni luagu milu irumu. 3Aba láguruni lidoun fusu le mébehabei le ñein lubéi ladaürei. Aba líchugun aban seyu luagu bena lun meyeehandigia laaña lan néchanigu darí lásügürün milu irumu. Lárigiñeme milu irumu ligía, lígiragüdüwaba luagu murusun dan. 4Aba narihini hala burí ha ibihubaña ubafu lun haguseragüdün, ñun haña luagu. Ariha numutu giñe hawani ha meha adürürǘbaña ichügü luéigiñe hapurichihani Lererun Bungiu luma luéigiñe hadimurehan luagu Hesukrístu, ha máhuduragunbaña lun mónsturu ni tun liyawa, mígirun hagía lun lichugún liri hereberugu o luagu lan harüna. Aba narihin hásaarun lídangiñe óunweni lunya habagaridun, aba harúeihan úara luma Kristu luagu milu irumu. 5Ánhañati ha híbiri hilaguaaña, másaaruntiña lídangiñe óunweni darime lárigiñe milu irumu. Anihán furumiñetibei ásaaruni lídangiñe óunweni. 6Fuleseiwatiña sun ha gafanranbaña lidan furumiñeti ásaaruni lídangiñe óunweni! Mabafuti libiaman óunweni hawagu; lubaragiñe lira, lufadirinigubaña Bungiu luma Kristu; ábame harúeihan úara luma luagu milu irumu. 7Danme sügühali milu irumu ligía, ligíame lígirawagüdün Mafia lídangiñe ladaürǘniwa, 8ábame láfuridun lun leyeehaniña néchanigu lidan sun ubóu. Láfuriduba eyeedaña ubafu burí le Gogu luma Magogu; ábame lóundaraguniña hánigu lun wuribu, ani gíbebaña kei lisagounte barana. 9Ítara liña lubeiti, aba háfuridun súdaragu hagía lídangiñe sun ubóu, aba hegeyedaguni fulasu le ñein habéi lumutuniña Bungiu luma uburugu le hínsiñebei lun, le Herusalén. Aba lóunahan Bungiu watu gemeti siélugiñe, aba láguduniña sunsuinagubei. 10Máfiati le eyeedubaliña, aba lagurúniwa lidoun lagunu le laubei watu gemeti luma súfuru, le ñeinhin lubéi lagurúa mónsturu luma profeta yeeti. Hasufuriruba ñein áriebu wéyuagu lun sun dan. 11Ábati narihin aban óunwenbu lálana arúeihani haruti, luma le ñunbei luagu. Aba lagumuchagun sielu luma ubóu ligibugiñe, aba marihínhali lan. 12Aba narihiniña hilaguaaña, wéinamuhaña hama ñǘbürigiña rara ligibugiñe Bungiu; aba tadaarawagun burí líburu tuma ábanya líburu, tomeme líburu to lánina ibagari. Aba haguserawagüdün hilaguaaña luagu burí katei le meha hadügübei, según le bürüwañubei tidan burí líburu tuguya. 13Derege lumutiña barana sun ha óunwegubaña lidan; derege laña giñe óunweni luma habara hilaaña sun hilaguaaña ha lábugiñebaña lubafu, ábati haguserawagüdün luagu burí katei le meha hadügübei. 14Aba lagurúniwa óunweni luma habara hilaguaaña lidoun lagunu le laubei watu gemeti. Lagunu lauti watu gemeti ligía, ligía libiamanbei óunweni. 15Ha mabürüdünbaña iri tidan líburu to lánina ibagari aba hagurún lidoun lagunu lauti watu gemeti.

will be added

X\