Matéu 13

1Weyu ligía, aba láfuridun Hesusu múnadagiñe, aba lañuurun laru duna. 2Kei hagibedagun gürigia le ñein lubéi, aba ládinun tidoun aban ugunei, aba lañuurun, aba herederun sun gürigia laru duna. 3Aba larufudahan saragu katei houn lau hénpulu. Aba lariñagun: «Ñeinñein aban ábunaguti ilaü, aba láfuridun ábunagua. 4Lidan afuruheina lani lila nadü, aba lábürühan lídangiñe luagun üma, aba hayabin dunuru, aba héigini. 5Líbiri, aba lábürühan labadinaguóun dübü le ñein lumuti ua lan saragu múa; aba labouchun furese ladüga mahulilin lan múa. 6Dan le lásüdün weyu, aba lásaürün; keiti málagüle lubéi, aba lounwen. 7Aba lábürühan líbiri ilaü labadinaguóun hiiyu, aba laweinamudun hiiyu úara luma, aba láfaruni. 8Ñeinñein lídangiñe, ábürühati lidoun múa buiti, alubahóuati buidu; anihein lídangiñe, íchuguti san in luagu kada aban ilaü, líbiri ruti ǘrüwa-wein, líbiri darandi. 9Ha garigeirugutiña lun haganbun, aganba hamá». 10Ábati hayabin disipulugu, aba hariñagun lun Hesusu: Ka san uagu badimureha houn gürigia lau hénpulu? 11Aba lariñagun houn: «Huguya, subudigüda laali Bungiu sun katei aramudaguati le luáguti larúeihan hun; anhein houn, masubudiragüdün lumuti. 12Le gámati, lichugúba lanwoun lun, darime lagibedun luma; anhein le mámati, íbini murusun le lúmabei lagidarúba luéi. 13Ligía nadimurehanbei houn lau hénpulu ladüga ariha hamani le nadügübei, aba herederun kamá marihintiña; aganba haméi le nariñagubei, aba herederun úouga gunfuranda hamá kamá hamuga maganbuntiña. 14Hawagu lagunfulira le meha lariñagubei profeta Isaíasi dan le lariñagunbei: “Huguya, haganbuba, gama lumoun úabei gunfuranda humá; harihuba, gama lumoun ibidiñebei hun ka lan lílabei le harihubei; 15ladüga dereeru hanigi gürigia ha, daruhali lau haganbun, ani daruhali giñe hagu. Anhein hamuga mítaranti, arihatiña hamuga lau hagu, aganba hagía hamuga lau harigei, gunfurandatiña hamuga tau hanigi, aba hamuga hayabin nun, aba hamugati nagaranihan houn”. 16«Ánheinti huguya le nánigubei, fuleseiwatün ladüga arihatün lau hagu, aganba huguya lau harigeirugu. 17Ninarün hau, saragu haña meha profetagu hama amu gürigia gúnfulitiña luma Bungiu abusenrutiña hamuga harihini le harihinibei guentó, gama lumoun marihin hamuti; busentiña hamuga meha haganbuni le haganbubei, gama lumoun maganbun hamuti. 18«Aganba humeiti le lílabei hénpulu luáguti ábunaguti ilaü: 19Ha aganbubalin uganu luáguti arúeihani le lánina sielu ani úati gunfuranda hamani, ítara haña kei lila nadü le ábürühabei lidoun üma; aba liabin Mafia, aba lasagaruni uganu buiti le abunúbei tídangiñe hanigi. 20Ilaü le ábürühabei lidoun dübü, ítara liña kei gürigia ha aganbubalin uganu, aba heresibiruni lau ugundani; 21gama lumoun kei málagüle lan, madurati hadan. Danti le lachülürün dan lun hóuchawagun luma héibaahoun luéigiñe uganu ligía, aba hachugeragun. 22Ilaü le ábürühabei lidoun hiiyu, ítara liña kei gürigia ha aganbubalin uganu, gama lumoun wéiritimati hafuudun luagu katei le lánina ibagari le, aba leyeeduniña irisini. Sun le, aba láfaruni uganu tídangiñe hanigi; mígiruntiti lun lalubahóun hadan gürigia hagía. 23Gama lumoun ilaü le ábürühabei lidoun múa buiti, ítara liña kei gürigia ha aganbubalin uganu, aba gunfuranda hamani, aba híchugun aban alubahóuni buiti. Añahein, ítara haña kei ilaü le íchugubei san aguu luagu aban, híbiri kei le íchugubei ǘrüwa-wein, híbiri kei le íchugubei darandi». 24Ábaya líchuguni Hesusu hénpulu le houn, lariñaga: «Ítara liña arúeihani le lánina sielu kei aban wügüri le ábunagubei ilaü buiti licharirugu; 25dan le añaha lubéi sun ha ñéinbaña arumuga, aba lebelurun aban lágani labureme fulasu ligía, aba lábunun híduru wuribati labadinagua türigu, aba lidin. 26Dan le laweinamudunbei türigu aba legelewehan, aba giñe lachülaagun híduru wuribati. 27Aba houdin musu, aba hariñagun lun hayubudiri: “Wayubudiri, anhein buidu lubéi ilaü le bábunagubei bumúanrugu, halíagiñe san lasalira híduru wuribati le?” 28Aba lariñagun iyubudiri houn: “Ladüga aban ágani le”. Ábati hariñagun musu lun: “Busentibu lun wáhulahani híduru wuribati le?” 29Aba lariñagun houn: “Uá, ladüga danme háhulahani híduru wuribati, hulahiñalin giñe türigu úara luma. 30Ígiragubei huméi lun laweinamudun úara darime lidaani alubahani; ábame nariñagun houn nadagimeintiña lun háhulahani híduru wuribati furumiñe, ábame hagüraguni lun lagudúniwa; lárigiñeme, ábame hareiduni türigu tidoun lagei” ». 31Ru lumuti giñe Hesusu hénpulu le houn, lariñaga: «Ítara liña arúeihani lánina sielu kei aban tila mosutása le lábunubei aban wügüri licharirugu. 32Tila mosutása, ligía ilaü le ñǘraütimabei lídangiñe sun ilaü, gama lumoun dan labouchun, ligía wéiritimabei lídangiñe sun nadü; aba liabin lun ábanbei lan wewe wéiriti darí lun hayabin dunuru adüga hamasa luagu lilimun». 33Ru lumuti giñe hénpulu le houn: —Ítara liña arúeihani le lánina sielu kei lébini le tagubudubei aban würi tidan ǘrüwa líburu fulúaru, aba teresirun sun fulúaru tuguya. 34Lau hénpulu lariñagei Hesusu sun katei le houn gürigia, mariñagunti ni kata houn mayusurunga hénpulu. 35Sun katei le, lun lagunfulirun le lariñagubei meha Bungiu liyumulugugiñe profeta: «Nadimurehaba lau hénpulu hun; nafuranguagüdübei katei le burí meha aramudaguabei hun lúmagiñe ladügǘn ubóu». 36Aba lóunahaniña Hesusu gürigia hábiñoun, aba lebelurun múnadoun; aba hayabin lani disipulugu, aba hariñagun lun: —Furanguagüdabéi hénpulu le luáguti híduru wuribati woun. 37Aba lariñagun Hesusu houn: Au le Wügüri Garaüwarügüti, au le ábunagubalin ilaü buiti; 38múa, ligía uboubei; ilaü buiti, hagía gürigia ha lílana larúeihan Bungiu; híduru wuribati, hagía gürigia ha lánigu Mafia; 39áganiti le ábunubalin híduru wuribati, Máfiameme; alubahani, ligía lagumuchunbei ubóu; ha alubahabaña, ánheligu. 40Ítara kei labudahóuniwa híduru wuribati aba lagurún wáturugun lun lágudun, ítara luba giñe lasuseredun danme lagumuchun ubóu; 41au le Wügüri Garaüwarügüti, nóunahabaña nani ánheligu asagaraña sun ha afigougüdübaña amu, hama ha adügübaña wuribati, lídangiñe narúeihan, 42ábame hácharaguniña lidoun watu gemeti lánina máfiougati. Ábame hayahuahan ñein, ábame lakünrinhan hari. 43Hámeti adügübalin le lubeibei Bungiu, ábame hámiridun kei weyu lidan larúeihan Wáguchi Bungiu. Aganba humana, huguya le garigeirugubei lun haganbun. 44Ítara liña arúeihani le lánina sielu kei irisini le aramudúañubei lábugiñe múa. Ladarirei aban wügüri irisini ligía, ábaya laramuduni ñeinmeme; le lueirin lugundan, aba lidin, aba laluguruni sun le lúmabei, aba lagañeihani fulasu ligía. 45Ítara liña giñe arúeihani le lánina sielu kei aban alugurahati le éibugañahabei áluaha pérüla fínuti; 46danti ladarirun aban le wéiriti lebegi, aba lidin, aba laluguruni sun le lúmabei, aba lagañeihani pérüla ligía. 47«Ítara liña giñe arúeihani le lánina sielu kei aban seni to agurúboun baranaha, aba tañugun sun hawuyeri úduraü. 48Dan tabuinchun, aba hachawarunu esenihatiña larun beya, aba hañuurun ñein anúadahaña úduraü; aba hareiduniña ha buídubaña, aba hachagaruniña ha wuribabaña. 49Ítara luba danme lagumuchun ubóu; hayabiba ánheligu lun hafanreinruniña ha buídubaña hádangiñe ha wuribabaña. 50Ábame hádaruniña ha wuribabaña lidoun watu gemeti lánina máfiougati; ñeinba lubéi hayahuaha, akünrinhame hari». 51Ábati lálügüdüniña Hesusu, lariñaga houn: —Gunfuranda humuti san sun katei le? Aba hariñagun: —Anha, Wabureme. 52Ábati lariñagun houn: —Dan ñein lan aban arufudahati lilurudun Moisesi lun gunfuranda lani luáguti arúeihani le lánina sielu, ítara liña kei aban tabureme muna le areidahaali ani lídangiñe le lareidubei, asagahati katei iseri luma katei binadu. 53Dan lagumuchunbei líchuguni Hesusu hénpulu burí le, aba lidin ñéingiñe, 54aba lachülürün lageiroun. Aba lagumeserun arufudaha tidan haligilisin huríu to lídanboun fulasu ligía, aba laweiridun hanigi gürigia; aba hariñagun: —Halía san lafurendeirei wügüri le sun lichú au le? Ida liña san gayara lubalin milaguru burí le adüga? 55Liraüga sarafangei le, María lúguchuboun, líbugaña Hakobu, Hosé, Simón luma Húdasi; 56ya giñe haganawa lamulenu hama lítunu waganagua. Halíagiñeti lasubudirei sun le? 57Aba hamaharun lun heresibiruni. Aba lariñagun Hesusu houn: —Gúndaatiña sun gürigia lau aban profeta, mámarügaali ligía lídangiñeti fulasu le ñein habéi o tílana lan haban. 58Madügüntiti saragu milaguru ñein ladüga mafiñen hamá luagu.

will be added

X\