Márükosu 10

1Aba láfuridun Hesusu Kafarünaumugiñe, aba lidin lóubawagun Hudéa luma luagun oubaü le ñéingiñe lubéi laboucha weyu libiti duna Hordán. Ábaya hóundaragun gürigia le ñein lubéi, ábaya larufudahan houn kéiñaha ligaburi. 2Ábati hayabin hádangiñe fariséugu luagun Hesusu áluga hóuchaguni lau hálügüdüni anhein mariban lubéi lun lígiragun wügüri tuma lúmari. 3Aba lariñagun Hesusu houn: —Ka méhagia lariñagubei Moisesi hun? 4Aba hariñagun lun: —Ariñagati Moisesi luagu gayara lan tichugúniwa gárada lánina ígiraguni tun úmari. 5Aba lariñagun Hesusu houn: —Líchugunbalin Moisesi gumadi lira hun ladüga tidere hanigi. 6Anhein meha, dan le ladügünbalin Bungiu sun katei, “wügüri tuma würi ladügaña. 7Ligía lígirubei lubéi wügüri lúguchi tuma lúguchu lun laganóuniwa tuma lúmari, 8ábame herederun kei ábanrügü gürigia”. Mámaaña lubeiti biama, ábanrügaaña. 9Ligía moun lubéi lafanreinraguni wügüri le lóundarubei Bungiu. 10Dan le múnada hamá, ábaya hálügüdüni disipulugu luagu katei le; 11aba lariñagun Hesusu houn: —Le ígirutu lúmari, aba lagamaridun amu, lagabarahañoun. 12Anhein giñe tígira würi túmari, aba tagamaridun amu, tagabarahañein giñe. 13Aba hanaahan gürigia irahüñü lun Hesusu lun laguurun hawagu; aba hagumeserun disipulugu adeinha houn ha anaahabaliña. 14Dan le larihini Hesusu, magundanti lau, aba lariñagun houn: —Ígira humá lun hayabin irahüñü numoun, mamahara humá, ladüga ha ítarabaña kei irahüñü, hagía lílanabaña larúeihan Bungiu. 15Ninarün hau luagu le lan marufudunti aban igaburi ǘnabugubuti keisi aban irahü, siñabei lebelurun lidoun larúeihan Bungiu. 16Aba lanügüniña larünarugu, aba labiniruniña lau líchuguni lúhabu hawagu. 17Dan le lasigirunbalin Hesusu luéiyasun, aba liabin aban wügüri éibaagueina lubaroun, aba láhuduragun ligibugiñe, aba lálügüdüni, lariñaga lun: —Máisturu buiti, ka san katei buiti lunbei nadügüni lun nibihini ibagari le magumuchaditi? 18Aba lariñagun Hesusu lun: —Ka uagu bariñaga nun “buiti”? Ábanrügüñein buiti, Bungiu. 19Subuditi gumadi bun: “Magabarahabá, máfarahaba, míweruhaba, madimurehabá iyeeni luagu ni aban, meyeedabaña gürigia, inebe hamá bagübürigu bun”. 20Aba lariñagun wügüri ligía: —Máisturu, gúnfulitina lau sun le lúmagiñe ñǘraügidina. 21Aba laríaguni Hesusu lau ínsiñeni, aba lariñagun lun: —Aban katei mégeibei lun badügüni: Beiba, alugurabéi sun le búmabei, ábame bíchuguni lebegi houn gudemetiña, ábame bibihin irisini sielu. Lárigiñe biábinme, ábame bafalarunina. 22Dan le laganbunbalin wügüri ligía katei le, aba lírudagun, aba lidin lau íruni ladüga gíbeti buga lirisin. 23Aba larihin Hesusu hawagun súngubei, aba lariñagun houn lani disipulugu: —Lanarime san lénrengu hebelurun rísitiña lidoun larúeihan Bungiu! 24Aba taweiridun hanigi disipulugu lau le lariñagubei; ábaya lariñagun houn: —Nirahüñü, lénrengu san lun lebelurúniwa lidoun larúeihan Bungiu! 25Mérenguntimati lun aban kameyu lun lásügürün lídangiñe luhuyun aban agusa sügǘ lau lebelurun aban rísiti lidoun larúeihan Bungiu. 26Dan haganbunbalin katei le, aba taweiriduntima hanigi, aba hálügüdagun hámagua: —Kábati asalbara? 27Ábati laríaguniña Hesusu, lariñaga houn: —Siñati hasalbaragun gürigia houngua; anhein Bungiu, gayaraati lasalbaruniña ladüga úati ni kata lásiñarun Bungiu. 28Ábati lariñagun Féduru: —Wabureme, wagía, ígira wamaalitia sun meha le wámabei lun wafalarunibu. 29Aba lariñagun Hesusu: —Ninarün hau luagu furumiñeguarügü lan le ígirutu luban, o lamulenu, o líbugañanu, o lítunu, o lúguchi, o lúguchu, o lirahüñü, o lufulasun nuéigiñe o luéigiñe lan uganu le lánina asalbaruni, 30leresibiruba san wéiyaasu sügǘ lau guentó lidan ubóu le: Muna, amulenu, íbugañanu, ítunu, úguchurugu, isaanigu, luma fulasu, lau sun léibaahouniwa; resibi ligíame ibagari magumuchaditi sielu. 31Saraguhaña ha furumiñetiñábaña guentó, hagíaba agumuhóuni; ani saragu ha agumuhóunibaña, hagíaba furumiñetiña. 32Luáguñanu üma lun Herusaléun, Hesusu habá habá lani disipulugu; láuñanu tueirin anigi, ani híbiri gürigia ha afalarubaliña, láuñanu anufudei. Ábayati ladiñurun Hesusu hau lani duusu disipulugu hawéi híbiri gürigia, aba lagumeserun ariñagei le lunbei lasuseredun lun houn. 33Aba lariñagun houn: «Kei le aubei harihei, wamudeiruña lun Herusaléun, le ñeinba lubéi nederegerúa, au le Wügüri Garaüwarügüti, houn hábutigu hafadirinigu huríu luma houn arufudahatiña lilurudun Moisesi, ha lúnbaña hasiadirunina lun nounwen. 34Ábame hederegerunina houn ha mámabaña huríu lun héherahan nau, habeichubadina, hásueragubadina, ábame háfarunina hilagubei; luágume lǘrüwan weyu, ábame násaarun lídangiñe óunweni». 35Ábati hayabin Santiagu luma Huan, ha lirahüñü Sebedéu, aba hariñagun lun Hesusu: —Máisturu, busentiwa lun badügün aban fulesei woun. 36Ábati lariñagun houn: —Kagia habusenrubei lun nadügün hun? 37Aba hariñagun lun: —Lun danme lan barúeihan lau sun buéirigun, lun bañuuragüdüniwa, aban luéigiñe bóunwenren, aban luéigiñe bubaünan. 38Aba lariñagun Hesusu houn: —Ibidiñeti hun ka lan hamuriahabei. Gayaraabei funagia hátuni uniñein gífiti le lunbei nátuni, odi habadiseirún lau badisei le lunbei nibihini? 39Aba hóunabun, hariñaga: —Gayara wabéi. Aba lariñagun houn: —Lunti hátuni uniñein gífiti le lunbei nátuni, badiseiwa huguyame lau badisei le lunbei nibihini; 40anhein lun hañuurun aban luéigiñe nóunwenren, aban luéigiñe nubaünan, mama au lunbei níchuguni; lichugúba houn ha ubaabaña laranserei Bungiu. 41Dan le haganbunbalin ha híbiri diisi disipulugu, aba hagañidun luma Santiagu labu Huan. 42Aba lagúarun Hesusu houn súngubei lubadun, aba lariñagun houn: —Kei hasubudirun, ha agumadihabaña hadan ha mámabaña huríu, arufudaguatiña houngua kamá hamuga haburiña lílana fulasu ligia; hati wéinamubaña hadan, arufuda hamuti habafu. 43Anhein hidan, mama luba; le abusenruti lun wéirigu lan hidan, lunti leseriwiduniña híbiri. 44Furumiñeguarügü hídangiñe le abusenruti lun ligíaba lan furumiñeti, lunti idamuni lan houn híbiri, 45ítara kei mama lan niábiña, au le Wügüri Garaüwarügüti, lun neseriwidúniwa, niábiña lun neseriwidun luma lun níchuguni nibagari lebegime hasalbarun saragu gürigia. 46Ábati hachülürün Herikó. Dan le áfurideina lan Hesusu lídangiñe fulasu ligía hau lani disipulugu hama saragu gürigia, ñeinñein aban marihinti gíriti Barütiméu, liráü Timéu, ñun laru üma amuriaha. 47Dan le laganbunbei luagu yarafaali lan Hesusu le Nasarétüna, aba lagumeserun marihinti ligía agúaraha, lariñaga: —Hesusu, ladügawagun Dawidi, gudemená bun! 48Saraguhaña adeinhatiña lun lun lámanichun, ligíatima lagúaragun: —Ladügawagun Dawidi, gudemená bun! 49Aba lararamagun Hesusu, aba lariñagun: —Wa humá lun lun liabin nun. Aba hagúarun lun marihinti ligía, aba hariñagun lun: —Ragüba gurasu, saraba, lagúahaña bun. 50Aba lachüürünu lidáü, aba lachubarun, aba layarafadun lun Hesusu. 51Aba lálügüdüni Hesusu, lariñaga lun: —Ka babusenrubei nadügün bun? Aba lóunabun marihinti ligía, lariñaga: —Máisturu, águyugüdabei narihin nun. 52Aba lariñagun Hesusu lun: —Gayaraati bidin; areidaguaadibu ladüga afiñeedibu nuagu. Lidan oura ligía, ábaya gayara lan larihin marihinti ligía, aba lidin lárigi Hesusu.

will be added

X\