Márükosu 1

1Anihán uganu buiti luáguti Hesukrístu, le Liráü Bungiu. 2Bürüwañu liña tidan liliburun profeta Isaíasi: «Nóunahañein nóunagüle bubaragiñe, lun laransehani üma lubá biabin. 3Aganbúati aban umalali lidan fulasu mageirawati, lariñaga: “Aranse humá üma lubá Wabureme, dará humá üma suruti lubá” ». 4Ani ítara liña liábinbei Huan lidoun fulasu mageirawati, apurichiha houn gürigia lun hasakürihan lun ferudunawa lan hafigoun, badiseiwa hagíame. 5Ábatiha hayabin lídangiñe sun Hudéa luma sun Herusalén aganbei lapurichihan. Dántiha le hagufeseruni hafigoun, ábahei labadiseiruniña Huan lidan duna le gíribei Hordán. 6Lautu meha lura kameyu ladaüragun Huan, lauti gueru lagürüga liranaagua; chagagaru léigibaña luma sírudu le áraabuna. 7Lariñagaha houn gürigia lidan lapurichihan: «Anitebei aban le gabafutimati nuéi, darí lun madüna nan ni lun nélemuchun afaragadei tagürüga ligeidin. 8Au, lau duna nabadiseiraün; anhein ligía, labadiseirubadün lau Sífiri Sandu». 9Lidoun buga dan ligía, aba lidin Hesusu Nasarétügiñe, fulasu le lídanbei lumúan Galiléa, aba labadiseiruni Huan lidan duna le gíribei Hordán. 10Dan le láfuridunbei Hesusu dúnarugugiñe, aba ladaaragun sielu, aba larihin lararirun Sífiri Sandu luagun kei hamuga aban unhun. 11Aba laganbúniwa lariñagun aban umalali siélugiñe: «Buguya niráü le hínsiñebei nun; le aubei óunwenbu lan nugundan». 12Lárigiñe, aba lanügüni Sífiri Sandu Hesusu lidoun fulasu mageirawati, 13aba lerederun Hesusu bián-wein weyu ñein haganagua animaalugu gáñitiña, ábati lóuchaguni Mafia ñein; lárigiñe, aba hayabin ánheligu lun heseriwidun lun. 14Lárigiñe ladaürǘniwa Huan, aba lidin Hesusu Galiléa apurichihei uganu buiti lúmagiñeti Bungiu. 15Aba lariñagun: «Chülühali dan, yarafaali larúeihan Bungiu; asaküriha humá, afiñe humá luagu uganu le lánina asalbaruni». 16Luagu aban weyu, éibugeina liña Hesusu laru laru duna le gíribei Galiléa, aba larihini Simón luma Andürési le lamulen. Esenihani lubeigia hawadigimaribei, háguruñati oura ligía. 17Aba lariñagun houn: —Higougu, falá humana; ábame nadügün lun hadiahan gürigia nun. 18Aba hígirunu hasenin furese furese, aba houdin luma. 19Ábati léibugun Hesusu murusunraüya, aba larihini Santiagu le liráü Sebedéu, luma Huan le lamulen; tídanñanu aban ugunei aramadahoun hasenin. 20Aba lagúarun houn, aba hígiruni háguchi tidan ugunei hama ha íderagubaliña, aba houdin luma Hesusu. 21Aba hachülürün lidoun fulasu le gíribei Kafarünaumu lidan luéyuri emeraaguni, aba lebelurun Hesusu tidoun haligilisin huríu, aba lagumeserun arufudaha houn. 22Wéiritu hanigi gürigia lau sun le lariñagubei Hesusu houn ladüga larufudahan houn lau ubafu, mama kei harufudahan arufudahatiña lilurudun Moisesi. 23Ñeinñein aban wügüri tidan ligilisi tuguya lau aban sífiri wuribati, aba lagúaragun, lariñaga: 24—Kame san bemetera wamoun, Hesusu Nasarétüna? Biábiña san lun bagünrinchaguniwa? Subudi numuti kátabu lan, luagu buguya lan Liráü Bungiu le Sándubei. 25Aba ladeinhan Hesusu lun sífiri wuribati ligía, lariñaga lun: —Maniba, furiba lídangiñe gürigia le! 26Aba lóunwehagüdüni sífiri wuribati ligía gürigia ligía, aba láfuridun lídangiñe, wágueina. 27Sun ha ñéinbaña, aba taweiridun hanigi, aba hálügüdagun hámagua: —Katei san le? Katei san iseri arufudahani le? Gürigia le, gabafuti giñe lun lagumadiruniña sífirigu wuribatiña ani aganba hamuti! 28Aba laganbahóuniwa luagu Hesusu lidan sun Galiléa furese furese. 29Dan le háfuridunbei tídangiñe ligilisi tuguya, aba lidin Hesusu, Santiagu luma Huan hábiñe Simón luma Andürési. 30Roun tiñati límedi Simón, tabiruahaña; aba hariñagun lun Hesusu luagu sándiñoun lan. 31Ábati lidin tuagun, aba lárügüdüni túhabu, aba liñuragunu; lídanmeme oura ligía aba tareidagun, aba tásaarun, aba tetenirun houn. 32Dan le lálüdün weyu, gúñeeli, aba hanügǘniwa sun sánditiña hama sun ha gawagubaña sífirigu wuribatiña lun Hesusu, 33aba hóundaragun sun lílana fulasu lubadu bena. 34Areidaguagüdati Hesusu saragu sánditiña ha láutiña ámuñegueinarügü luwuyeri sandi, sagá ligía saragu sífirigu wuribatiña hawéi gürigia. Mígirunti méhati lun hadimurehan sífirigu hagía, ladüga subudi hamani káteiñein lan. 35Lubá larugan, dan le búrigagili, aba lásaarun Hesusu, aba láfuridun bóugudin luéi uburugu lidoun aban fulasu le mageirawati lun lafurieidún lun Bungiu ñein. 36Aba lidin Simón hama líbirigu áluahei. 37Dan le hadarirunbálin, aba hariñagun lun: —Añaheintia saragu gürigia áluahabu. 38Aba lariñagun houn: —Keimoun lidoun burí líbiri fulasu le yarafabei, apurichiha náamuga giñe ñein, ladüga lun lira niabin ubouagun. 39Ítara liña lubeiti éibuga lumuti Hesusu sun Galiléa apurichiheina tidan burí haligilisin huríu lidan sun fulasu, asagaheina ligía sífirigu wuribatiña hawéi gürigia. 40Aba liabin aban gürigia sánditi lau lépüra, aba láhuduragun ligibugiñe Hesusu, aba layumuragun lun, lariñaga: —Gayaraati bareidaguágüdünina ánhabu busén. 41Aba lagudemedagun lun Hesusu, aba laguuruni lau lúhabu, aba lariñagun: —Busentina, areidaguabá. 42Kei lariñagun ítara, aba lareidagun sánditi ligía. 43Ábati lóunahani Hesusu ñéingiñe lárigiñegua, ariñageina lun: 44—Mabahüdaguabéitia ni ka un; ñǘdünrügüba arufudagua bungua lun hafadirin huríu, ábame bíchuguni badagaragüdün luagu barumadun keisi lariñaguni lilurudun Moisesi. Ítara luba harihini gürigia luagu areidaguaadibu lan. 45Ábarüga lidin, aba labahüdaguni sun le asuseredubei lun houn sun gürigia; ligía lébubei lásiñarun lan lerederun Hesusu furangu lidan ni aban fulasu; aba lerederun le ñein lumuti ua hamá gürigia. Lau sun lira, ñǘbuinmemetiña lídangiñe sun fulasu arihei.

will be added

X\