Lúkasi 17

1Aba lariñagun Hesusu houn lani disipulugu: «Súnwandan aniheinbei lan burí katei afigougüdüti gürigia; gama lumoun fugiabu gürigia le afigougüdüti amu! 2Buítimati hamuga lun, lun lagurún baranahoun lau aban dübü gürañu luagu ligiina sügǘ lau lafigougüdün aban hádangiñe ñǘbürigiñabaña ha. 3Góunigi humá lubeiti! «Anhein adüga bamulen o bíbugaña wuribani bun, wéridibei; anhein asaküriha, ferudunabéi; 4anhein adüga wuribani bun sedü wéiyaasu lidan aban weyu, sedü wéiyaasu liabin ariñaga bun luagu asakürihaali lan, lunti feruduna bani». 5Aba hariñagun apostolugu lun Hesusu: —Wabureme, ruba lanwoun wafiñen. 6Ábati lariñagun Wabureme Hesusu houn: —Lun hamuga anihein lan murusunraü afiñeni hidan—íbini hamuga ñǘraüraü lan keisi aban tila mosutása—gayaraati hamuga hariñagun tun tídibu wewe to: “Gidaba yáagiñe lau sun bílagüle, beiba áhücha baranaha”, ani lasusereduña hamuga. 7«Anihein funagia aban hídangiñe ariñaguti lun lumusun, dan le lagiribudun áraabugiñe lárigiñe lawouhan o lóunigiruniña ibiñanigu: “Beluba, ñuruba eiga”? 8Uá, ariñagarügübéi lun: “Aransebéi neigin, aranseñu buguyame lun betenirun nun sun anaha lan eiga luma ata; lárigiñeme, gayaraahalime beigin luma batun”. 9Seremei lumuti funagia iyubudiri musu luagu ladügüni le lubeibei lun? Uá. 10Huguya giñeti, danme lásurun hadügüni le uágubei lariñaga Bungiu hun lun hadügüni, lunti hariñagun: “Musu móunitiña wagía, ladüga lérügüñein lunbei wadügüni wadüga” ». 11Lidan lasigiruni Hesusu luéiyasun Herusaléun, aba lásügürün labadinaguagiñe Samaria luma Galiléa. 12Dan le lachülürünbei lidan aban liraüraü fulasu, aba hayabin diisi wügüriña gawagutiña lépüra, lubaroun. Aba herederun dise luéi, 13aba hagúaragun lun ítara: —Hesusu, Máisturu, gudeme wamá bun! 14Dan le larihinbaliña Hesusu, aba lariñagun houn: —Heiba arufudagua hungua houn fádirigu. Danti le hóudiña lubéi, aba hareidagun. 15Ñéinñeinti aban hádangiñe, dan le larihinbei luagu areidaguaali lan, aba lagiribudun le ñeinhin lubéi Hesusu, adimureheina buiti luagu Bungiu lau umalali héreti. 16Aba láhuduragun darí ladagarun ligibu múarugu lun líchugun eteingiruni lun. Ani Samariana wügüri ligía. 17Ábati lariñagun Hesusu: —Ma díisiñanu areidagutiña? Hagañagia ha híbiri nefu? 18Anihángubeirügü lubéi terencha le agiribuda eteingirei Bungiu? 19Ábati lariñagun lun wügüri ligía: —Saraba, beiba; areidaguaadibu ladüga bafiñen. 20Aba hálügüdüni fariséugu Hesusu ídaba lan lagumesera larúeihan Bungiu; aba lariñagun houn: —Danme le lagumeserun larúeihan Bungiu, marihínbei; 21mariñawagúnbei: “Anihán”, o “aningitán”; ladüga lidan linarün katei, aniheinhali larúeihan Bungiu haganagua. 22Ábati lariñagun houn lani disipulugu: —Lachülürüba dan lun memeniha lanme hanigi lun húmabadina lan, íbini luágurügü aban weyu; gama lumoun masuseredunbei lidan dan ligía. 23Lariñawagúba hun: “Anihán Kristu ya”, o “aningitán yágüta”. Midin humá hárigi, mafalarun humañame. 24Ladüga ítara kei larihín aban labirihaniga luéigiñe aban louba sielu lun luagun le aban, ítara luba danme le nagiribudun ubouagun, au le Wügüri Garaüwarügüti. 25Ani lunti nasufurirun saragu furumiñe, meberesen hagíame gürigia ha lánina dan le nau. 26Kei meha lasuseredun lidan lidaani Noé, ítara luba giñe lasuseredun lidan burime weyu le niábingüle, au le Wügüri Garaüwarügüti. 27Dan meha ligía, heredera meha gürigia eiga, ata, amarieida, íchaahaña harahüñü lun hamarieidun darí weyu le lebelurun Noé tidoun ugunei. Aba liabin guran, aba hañaradagun súngubei. 28Ítara luba giñe kei lasuseredun lidan lidaani Lotu: Heredera gürigia eiga, ata, agañeiha, aluguraha, ábunagua, adaagua muna. 29Dan le láfuridunbei Lotu uburugugiñe Sodoma, aba lábürühan watu gemeti luma súfuru siélugiñe, aba láfaraguniña súngubei. 30Ítara luba danme le niabin, au le Wügüri Garaüwarügüti. 31Lídanme weyu ligía, le gürigia le bóugudibei tuéi luban, anhein anihein lubéi lumegen múnada, mebeluralá asagarei. Le gürigia le áraabubei lidan oura ligía, magiribudalá lúbiñoun. 32Haritagua humá luagu le asuseredubei tun lúmari Lotu. 33Le áluguti lesefuruni libagari ya ubouagu, leferidirubei; le eferidiruti libagari ya ubouagu, nuéigiñe, libihuba ibagari magumuchaditi. 34«Nariñahare hun luagu áriebu lanme ligía, ñéinbaña bián gürigia arumuga tidan ábanmeme gabana, lanügǘba aban hádangiñe, igirúame le aban. 35Ñéinbaña bián würiña amuliha lidan aban; tanügǘba aban hádangiñe, igirúame to aban. 36Ñéinbaña bián wügüriña áraabu; lanügǘba aban hádangiñe, igirúame le aban». 37Dan le haganbunbalin katei le, aba hálügüdüni, hariñaga lun: —Halíaba san lasusereda katei le, Wabureme? Lariñaga houn: —Le ñein lumuti lúgubu hilaali, ñeinba hóundaragua wadubi.

will be added

X\