Lúkasi 16

1Ariñagati giñe Hesusu houn lani disipulugu: «Ñeinñein meha aban iyubudiri rísiti, ñeinñein giñe aban lúniri lumegen; aba hayabin ariñaga lun luagu lachagaruñein lan óunigiruti ligía lirisin. 2Ábati lagúarun iyubudiri lun, aba lariñagun lun: “Ida liña san katei le ariñawagúbei nun buagu? Ariñagabéi nun ida liña lan léibugun buadigimari, ladüga masigihadibu óunigirei numegen”. 3Ábati lerederun óunigiruti ligía asaminara, lariñaga lúnguarügü: “Kábati nadüga guentó lárigiñe gidala lan niyubudiri wadagimanu nuéi? Méretina lun nuadigimariduni múa, ani nibusigaritina lun namuriahan. 4Subudi naali kaba lan nadüga lun ñein hamá eresibirutina hábiñe danme mawadigimarihadina”. 5Aba lóunahan hawagu ha adúeirubalin liyubudiri lun hayabin lun aban aban. Aba lálügüdüni le furumiñeti, lariñaga lun: “Átiriñein badúeiruni niyubudiri?” 6Aba lariñagun lun: “Dúei numuti san barín garaba”. Ábati lariñagun óunigiruti ligía lun: “Anuhán bigaradan, ñuruba furese, badügame aban luágurügü dimí-san”. 7Lárigiñe, ábaya lálügüdün aban, lariñaga lun: “Angia buguya, átiriñein badúeihan?” Lariñaga lun: “San sagü türigu”. Lariñagati lun: “Anuhán bigaradan; adügabá aban luágurügü gádürü-wein”. 8Aba lasubudiruni iyubudiri luagu chu lan lau óunigiruti ligía lidan ligaburi ladügüni katei. Ábati lasigirun Hesusu ariñaga: 9ariñagatina lubeiti hun lun hayusuruni hirisin le ubouaguna lun hadügün buiti, lun danme lan le lagumuchun irisini lun ñein hamá eresibirutün tidan muna to lánina sun dan. 10Le gúnfulibei lidan le míbebei, gúnfulibei giñe lidan le gíbebei; le maricharagunbei lidan le míbebei, maricharagunbei giñe lidan le gíbebei. 11Anhaün lubeiti magunfulirun lau burí irisini le mámabei tímatimaati le lánina ubóu le, kábagia afiñera huagu lun lederegerun irisini le tímatimaati le lánina sielu lábugiñe haríaahan? 12Ánhaünti magunfulirun lau hamegen amu, kábagia íchigei le hani guánarügü hun? 13«Siñati leseriwidun aban gürigia houn bián iyubudirigu, ladüga liyereeguduba aban lun, línsiñedame le aban lun; o úarabei lan lun aban, lanügeime le aban kei ni kata. Siñati leseriwidúniwa lun Bungiu luma lun irisini». 14Aganbagu haña fariséugu lun sun katei le, aba héherahan lau Hesusu, ladüga hínsiñe lan seinsu houn. 15Ábati lariñagun Hesusu houn: «Huguya arufudagubaña hungua kei buítiña hagibugiñe gürigia; ánheinti Bungiu, subudi lumutu hanigi. Le katei le hanügübei gürigia kei katei wéiriti línsiñe houn, iyereeguti lun Bungiu. 16«Lúmagiñe lilurudun Moisesi luma harufudahan profetagu darí lumoun lidaani Huan, lapurichihóuña uganu buiti le luáguti larúeihan Bungiu; ani sun gürigia hóuchatiña lun hebelurun lidoun. 17«Ménrenguntimati lun lagumuchagun sielu luma ubóu, lubaragiñe magunfulirun lan aban létüra lídangiñe lilurudun Bungiu. 18«Anhoun lígira aban wügüri lúmari, lun lagamaridun amu, ladügüñein figóu le gíribei agabarahani; le giñe agamariduti aban würi to ígiraguaaru, ladügüña giñe agabarahani. 19«Ariñagati giñe Hesusu: —Ñeinñein meha aban wügüri rísiti, daüguaü fínutu to wéndegutu ladaüraguboun; ságüha weyu ladineragüdün lau saragu wéndegu. 20Ñeinñein giñe aban gudemeti gíriti Lásaru; sun lura lau guméi, 21lañuurati burí múarugu tubenari luban rísiti ligía áluga léigini life éigini le éiguaduti luéigiñe lidabulan rísiti. Ábatiha hayabin ounli éheluhei lugumein. 22Luagu aban weyu, aba lounwen gudemeti ligía, aba hanügüni ánheligu lumoun Abüraámü; aba giñe lounwen rísiti, aba labunún. 23«Dan le lasufuriruña lan rísiti ligía lidan fulasu le ñein habéi hilaaña, aba liñuruni larihin, aban larihini Abüraámü dísegiñe, luma Lásaru ñun lóubagiñe. 24Ábati lagúaragun, lariñaga: “Núguchi Abüraámü, gudemená bun! Óunahabei Lásaru lun ladüdüragüdüni ligibu lúhabu lau duna, ñübuin láamuga éderei tuagu niñeñe, ladüga nasufuriruña saragu lidan watu gemeti le”. 25Aba lariñagun Abüraámü lun: “Niráü, haritaguabá luagu buidu lan meha dan bun lidan bibagari; anhein lun Lásaru, wuribati meha dan. Guentó, buiti dan lun ya, buguya asufurira. 26Bóugudin giñe luéi lira, anihein aban gudungu afanreinraguáwa huma; ha hamuga busentiña houdin yáagiñe lun ñeinhin, siñati; ni ha ñéinbaña, siñati hayabin ñahoun”. 27«Ábati lariñagun rísiti: “Amuriahatina buma, Núguchi Abüraámü, lun bóunahani Lásaru lúbiñe núguchi; 28añahein seingü namulenu ñein, lun ladimurehan houn, miabin hamaamuga giñe lidoun fulasu lánina asufuriruni le”. 29Aba lariñagun Abüraámü lun: “Anihein le labürühabei Moisesi hama profetagu hama ñein; adüga hamá gasu lau!” 30Aba lóunabun rísiti, lariñaga: “Binarün, núguchi Abüraámü; gama lumoun, anhein ñüdün aban hádangiñe hilaaña adimureha houn, hasakürihaña hamuga”. 31Lariñaga Abüraámü lun: “Anhein maha habéi hadügün gasu lau le lariñagubei Moisesi hama profetagu, mafiñenbaña giñe ni anhein ásaara aban hádangiñe hilaaña lun lidin adimureha houn”. »

will be added

X\