Lúkasi 15

1Luagu aban weyu, aba hayarafadun saragu aguburahatiña liseinsuna gumadi hama gafigountiña lun Hesusu lun haganbuni. 2Aba hadimurehan fariséugu hama arufudahatiña lilurudun Moisesi luagu Hesusu luéigiñe katei le, hariñaga: —Wügüri le, resibi lumutiña gafigountiña, hou ligía hama. 3Ábati líchuguni Hesusu hénpulu le houn, lariñaga: 4Ka hídangiñe, lun hamuga galügüniña lan san mudún, teferidira hamuga aban hádangiñe, mígirun lubaña funagia gádürü-wein-disinéfu ñein, lubarua, lun lidin áluahoun mudún to eferidiruboun darí ladarirunu? 5Dan le ladarirunu, aba lanügünu légewagu lau ugundani. 6Dan le lachülürün lúbiñoun, aba lóundaruniña lumadagu hama lubesinanigu, lariñaga houn: “Gunda humá úara numa, ladüga darina nilügün mudún to yebe eferidiruboun nuéi”. 7Nariñahare hun luagu ítarameme liña wéiritima lan ugundani sielu luagu aban gafigounti le asakürihati, sügǘ lau hawagu gádürü-wein-disinéfu gürigia richaguatiña ha memegeirúnbaña hasakürihan. 8«Ka hamugagia würi to aniheinti hamuga diisi murusun seinsu tuma, leferidira aban lídangiñe tuéi, lun mébedunboun lan lanpu, aba tabuidahanu muna áluahei buidu darí tadariruni? 9Dan le tadariruni, aba tóundaruniña tumadagu hama tubesinanigu, tariñaga houn: “Gunda humá numa, ladüga darina seinsu le yebe neferidirubei”. 10Nariñahare hun luagu ítara liña lan giñe ugundani hadan lani Bungiu ánheligu luagu aban gafigounti le asakürihati». 11Ru lumuti giñe Hesusu hénpulu le houn, lariñaga: «Ñeinñein meha aban wügüri biámañanu lirahüñü. 12Aba lariñagun le amuleñein lun lúguchi: “Núguchi, rubei alagan le yuubei nun guentó”. Aba lafanreinhani úguchili alagan hadan biángubei. 13Málüti lúmagiñe, aba laluguruni amuleñein lufanran, aba lidin dise lidoun amu fulasu; aba lachagaraguni liseinsun ñein lidan aban ibagari mabuidunti. 14Dan le gumuhali sun liseinsun, aba ladagarun aban ümi lidan fulasu ligía, aba ladariragun lungua lidan aban óunwenbu mégeiguaü. 15Ábati lidin áluaha wadagimanu luma aban lílana fulasu ligia; aba lóunahani wügüri ligía óunigiraña lilügüniña buíruhu. 16Keiti weiri lan lilama darí lun lawamaadun lun lun léigini heigin buíruhu, gama lumoun michugúnwati lun. 17Yágütaguarügü ligía lasaminarun, lariñaga: “Saragu haña nadagimeintiña lúbiñe núguchi géigintiña darí lun lígiragun houn; auti ya, ounwe nilama! 18Nagiribuda lubeiti lúbiñoun núguchi, nariñagame lun: Núguchi, afigouhaadina ligibugiñe Bungiu luma bigibugiñe. 19Madünaadina lun nanaagun nungua keisi biráü; barübana kei aban hádangiñe nadagimeintiña buma”. 20Aba lárügüdün üma lun lagiribudun lúbiñoun lúguchi. Dísegi liña, aba larihini úguchili irahü le, aba lagudemedagun lun. Aba léibaagun lubaroun, aba lóuburuni, aba lachuuruni. 21Ábati lariñagun isaani lun: “Núguchi, afigouhaadina ligibugiñe Bungiu luma bigibugiñe; madünaadina lun nanaagun nungua keisi biráü”. 22Aba lariñagun úguchili houn lubúeingu: “Sagá humoun tubuidun-agei daüguaü furese, dáüguagüda huméi. Daü humá giñe aban bagü luagu lúhabu tuma geidi luagu lugudi. 23Áfara huméi liraüraü bágasu le dibunetimabei. Wefeduhaali katei le lau aban adineruni! 24Ladüga anihán niráü le, hilaali yebe gama lumoun nibagariya; féridihali yebe gama lumoun darí wamá”. Aba hagumeserun efeduha. 25«Sunti buga dan le, anihein buga íbugañaü áraabu. Danti le lagiribudúnbei, dan lachülürün tubadun muna, aba laganbuni áfaruni luma abinahani. 26Ábati lagúarun lun aban hádangiñe musu, aba lálügüdüni ka lan suserebei. 27Aba lariñagun lun: “Chülühali bamulen; áfaragüdala búguchi liraüraü bágasu le dibunetimabei, ladüga lachülürün lau magadiñein”. 28Aba lagañidun íbugañaü, máhaali lebelurun. Aba láfuridun lúguchi, aba layumuragun lun lun lebelurun. 29Aba lariñagun lun lúguchi: “Subudi bumuti luagu seriwihadina lan bun saragu dan, madüraagunganei le bubeibei ni aban wéiyaasu; ani lau sun lira míchugidibu ni aban liraüraü gábara nun lun nefeduhan hama numadagu. 30Guentoti, lau lagiribudun biráü le, le achagarubalin biseinsun hama horu, áfaragüdaba bágasu le dibunetimabei!” 31«Ábati lóunabuni lúguchi: “Niráü, buguya númañadibu súnwandan; sun le nani, bani. 32Gama lumoun lunti buga wefeduhani le asuseredubei guentó lau adineruni luma lun wagundaarun ladüga bamulen le yebe hilaalibei, gama lumoun nibagariya; féridihali yebe, gama lumoun darí wamá”. »

will be added

X\