Huan 8

1Ánheinti Hesusu, aba lidin luagun wübü le gíribei Oliwu. 2Larugan binaafin, aba lagiribudun ténpulurugun; aba hayabin sun gürigia lubadun, aba lañuurun, aba lagumeserun arufudaha houn. 3Ábati hanügün arufudahatiña lilurudun Moisesi hama fariséugu aban würi hadariragun agabarahei túmari. Aba híchugunu hamidangua hámagua ha ñéinbaña, 4aba hariñagun lun Hesusu: —Máisturu, anuhán würi to, dariguawaaru agabarahei túmari. 5Lariñahare lilurudun Moisesi hawagu hibe würiña ha, lun lachamurawagún dübü hawagu darí hóunwegun. Angia buguya ka bariñagubei? 6Hariñagunbalin lira lun hóuchaguni, lun gébuna lan híchugun lidurun. Ábati lélemuchun Hesusu, aba labürühan múarugu lau lúhabu. 7Keiti hasigirun álügüdaguei, aba lararamun, aba lariñagun houn: —Furumiñeguarügü hídangiñe le mafigounti, chülei furumiñeti dübü tuagu. 8Ábaya lélemuchun, aba lasigirun abürüha múarugu. 9Dan haganbunbalin le lariñagubei, aba háfuridunga aban aban, hagumesera hámagiñe ha wéinamutimahañabaña. Hesusurügüñein eredera tuma würi tuguya. 10Ábati larihin tuagun, aba lariñagun tun: —Hagaña san buga ha íchugubaña bidurun? Úati san ni aban asiadirutibu? 11Aba tariñagun lun: —Uá, úati ni aban Nabureme. Ábati lariñagun Hesusu tun: —Ni au, masíadirun nubadibu; beiba, mafigouhadigiabá.] 12Ábaya ladimurehan Hesusu houn gürigia, aba lariñagun: —Au lilanpunbei ubóu; le afalarutina, méibugunbei lidan luburiga, ibiharügü lubéi larugounga le íchugubei ibagari. 13Ábati hariñagun fariséugu lun: —Buguya, badimurehaña buiti buougua, mebegiti lira. 14Aba lariñagun Hesusu houn: —Lau sun au lan adimurehabei buiti nuougua, gebegiti le nariñagubei. Au, subudi numuti halíagiñe lan niabin luma haliñounba lan nidin; anhein huguya, ibidiñeti hun halíagiñe lan niabin ni haliñounbadina lan. 15Huguya, haguseragüdün kei hasaminarun ubouaguna; au, maguseragüdüntina ni aban. 16Ánhana hamuga aguseragüda, nadügüñein hamuga lau úarani, ladüga mámarügüba au aguseragüda, Núguchi le óunahabalina laguseragüdüba giñe numa. 17Bürüwati lidan hilurudun luagu dan lan gefén hamá bián gürigia luagu ábanmeme katei, gebegi lan le hariñagubei. 18Ítara liñati au adimurehabei luagu nufulesein; Núguchi le óunahabalina, adimurehati giñe luagu nufulesein. 19Ábati hariñagun lun: —Hageigia Búguchi? Aba lariñagun houn: —Ibidiñetina hun, ni Núguchi, ibidiñeti giñe hun; lun hamuga subudi humanina, subuditi hamuga giñe Núguchi hun. 20Lidan lariñagunbalin Hesusu katei le, larufudahaña ténpulurugu lidan fulasu le ñein tubéi burí gafu to lagei seinsu. Madaürün lumuti ni aban ladüga machülügili lan lidaani. 21Ábaya lariñagun Hesusu houn: —Au, néibuga, ani háluahabadina, gama lumoun hóunweguba lidan hifigoun; siñati hidin le ñéinhinba lubéi nidin. 22Ábati hariñagun huríu: —Láfaragua funa san lungua, lariñagunbei: “Siñati hidin le ñéinhinba lubéi nidin?” 23Ábati lariñagun Hesusu houn: —Ǘnabuna huguya; anhein au, yágütana iñu au. Lani ubóu le huguya; anhein au, mama lani ubóu le au. 24Ligía nariñagunbei hun luagu hóunweguba lan lidan hifigoun, ladüga anhein mafiñen hubéi luagu au lan au, hóunweguba lidan hifigoun. 25Ábati hariñagun lun: —Kátabuti? Aba lariñagun houn: —Le nariñagubei hun lúmagiñe binarü. 26Gíbeti katei lunti nariñagun hun luma lun naguseragüdün hidan; le óunahabalina ariñaga lumuti inarüni, ani káteirügübei le naganbubei lúmagiñe le óunahabalina nariñaga houn lílana ubóu. 27Gama lumoun úati gunfuranda hamani luagu lan Úguchili ladimureha houn. 28Ligía lariñagunbei houn: —Danme le hiñurunina, au le Liráü Wügüri, ligíame hasubudiruni luagu au lan au, ani madügün nan ni kata lidan niri, luéidigia le larufudahabei Núguchi nun. 29Ladüga númañein le óunahabalina; mígirun lágidina Núguchi nábugua, ladüga adüga nani le aubei lagundaara súnwandan. 30Dan le lariñagunbalin Hesusu katei burí le, aba hafiñerun saragu luagu. 31Aba lariñagun Hesusu houn huríu ha afiñeeñabaña luagu: —Anhaün agunfulira lau nererun, hiábinba lun nani humá disipulugu le tímatimaati. 32Ábame hasubudiruni inarüni, ábame lesefurunün inarüni. 33Aba hariñagun lun: —Ladügawagun Abüraámü wagía, ani meredegidiwa idamunime ni ka un. Ida liñati bariñagunbei luagu wesefuruba lan? 34Aba lariñagun Hesusu houn: —Ninarün hau, luagu sun lan ha adaagubaña figóu, lidamun figóu hagía. 35Aban idamuni, mama hádangiñeti tílana muna; ánheinti aban isaani, hádangiñeti tílana muna súnwandan. 36Anhaün lubeiti nesefura, au le Bungiu Irahü, hesefuruba le tímatimaati. 37Subudi naali luagu ladügawagun humá Abüraámü; lau sun lira, busentün háfarunina, ladüga maha humá lun le nubeibei hun. 38Au nadimurehaña luagu le larufudubei Núguchi nun, huguya hadügüñein le hafurendeirubei lúmagiñe húguchi. 39Aba hariñagun lun: —Abüraámü wáguchibei. Aba lariñagun Hesusu houn: —Lun hamuga inarüni lan luagu lirahüñü humá Abüraámü, hadügüñein hamuga le ladügübei. 40Lau sun ariñaga naali lan inarüni le larufudahabei Bungiu nun hun, busentün háfarunina. Madügünti meha Abüraámü ni kata libe lira! 41Lememe ladügübei húguchi, ligía hadügübei. Ábati hariñagun lun: —Mámatia wagía bástadi; ábanrügüñein wáguchi, Bungiu. 42Aba lariñagun Hesusu houn: —Anhein hamuga Bungiu lubéi húguchibei, hínsiñetina hamuga hun, ladüga lúmagiñe Bungiu niabin, ani anaha ya. Mama lau nani nungua niabin, Bungiu óunahabalina. 43Ka uagu lásiñarunbei gunfuranda humani le nariñagubei? Ladüga mabusenrun humá haganbuni nererun. 44Mafia húguchibei; lánigu huguya, ani busentün hadügüni lugundan. Gáfarahadigubeiñein Mafia lúmagiñe furumiñeti dan. Márügüdünti luéigiñe inarüni, mariñagunti giñe inarüni. Lidan le lariñagun iyeeni ladimurehaña kei ligaburi, ladüga yeeti ani ligía lúguchibei iyeeni. 45Ánheinti au, kei inarüni lubéi nariñagubei, mafiñentün nun. 46Ka hídangiñe gayaraabei larufuduni luagu gafigoun nan? Ánheinti inarüni lubéi nariñagubei, kati uagu mafiñen hubéi nun? 47Le lánibei Bungiu, aganba lumuti lererun Bungiu; ánheinti huguya, kei mama hubéi lani Bungiu, ligía maha hubéi haganbuni. 48Ábati hariñagun huríu lun: —Wanarün lau wariñagun luagu Samariana ban, luagu giñe anihein lan aban sífiri wuribati bidan. 49Aba lariñagun Hesusu houn: —Úati sífiri wuribati nidan. Le nadügübei, níchuguña inebesei lun Núguchi; huguya, íchiga minebeni nun. 50Máluahantina inebesei nungua, lau sun anihein lan aban áluga lumuti ninebese, ani ligía le aguseragüdübei. 51Ninarün hau luagu le lan adügüti gasu lau le nubeibei, móunwenbei lan. 52Ábati hariñagun huríu lun: —Anati guentó, chouru wamaali luagu anihein lan sífiri wuribati bidan. Hilati Abüraámü, hilagua profetagu, ani ariñagagidibu luagu le lan adügüti gasu lau le bubeibei, móunwenbei lan. 53Wéirigutibu funagia luéi wáguchi Abüraámü? Hilati Abüraámü, hilagua profetagu. Kátañadibugia? 54Aba lariñagun Hesusu houn: —Ánhana íchiga uéiriguni nuougua, málabei; ánheinti Núguchi, lememe uágubei hariñaga luagu ligía lan Hubungiutebei, ligía íchugubei uéiriguni nuagu. 55Huguya, ibidiñeti hun; anati au, subuditi nun, ani ánhana hamuga ariñaga luagu ibidiñe lan nun, yéetina hamuga giñe kei huguya. Gama lumoun subuditi nun le tímatimaati ani adüga numuti le lubeibei. 56Abüraámü le meha hagücha, gúndaati meha lau lasubudiruni luagu larihibei lan nuéyuri; ani ariha lumuti aba lagundaarun. 57Ábati hariñagun huríu lun Hesusu: —Úagubeigili ni dimí-san irumu bau, ani ariñagatibu luagu ariha bani Abüraámü? 58Aba lariñagun Hesusu houn: —Ninarün hau luagu lubaragiñe lan ñein lan Abüraámü, anaheinhadina meha. 59Aba habudahan dübü lun hachamuraguni luagu; aba laramudagun, aba láfuridun ténpulurugugiñe.

will be added

X\