Huan 18

1Lárigiñe lariñaguni Hesusu katei le, aba láfuridun hau lani disipulugu lun houdin loubafurugun duna le Sedurón. Ñeinñein aban fulasu le burí ñein lubéi tídibu oliwu, ñeinhin lubéi lebelura Hesusu hau lani disipulugu. 2Subudi lumuti giñe Húdasi le alugurubalin Hesusu, fulasu ligía, ladüga óundaraguañahaali Hesusu ñein hama lani disipulugu. 3Aba lubeiti lachülürün Húdasi ñeinhin hau saragu súdaragu, hóunahan hábutigu fádirigu hama fariséugu. Gárumatetiña, barütiña giñe lanpu luma tochi. 4Kei subudi laali lan Hesusu le lunbei lasuseredun lun, aba láfuridun, aba lariñagun houn: —Ka háluahabei? 5Aba hariñagun lun: —Wáluahañein Hesusu le Nasarétüna. Lariñaga Hesusu houn: —Au Hesusu le háluahabei. Ñéinñeinti Húdasi le ederegerubalin hama. 6Dan lariñagunbei Hesusu houn luagu ligía lan le háluahabei, aba houdin hárigoun aba héiguadunga. 7Ábaya lariñagun Hesusu houn: —Ka háluahabei? Aba hariñagun lun: —Wáluahañein Hesusu le Nasarétüna. 8Ábati lariñagun Hesusu houn: —Ariñagaadinatia hun luagu au lan. Anhein au lubéi háluahabei, ígira humaña ha lun houdin. 9Lasuseredunbei lira lun lagunfulirun le lariñagubei Hesusu guánarügü: «Meferidirunti ni aban hádangiñe ha bíchugubaña nun». 10Ábati lasagarunu Simón Féduru lefeinte, aba líbuguni larigei aban lumusun fádiri le íñutimabei gíriti Maluku. 11Aba lariñagun Hesusu lun Féduru: —Daboun befeinte tárigoun. Anhein ru laali lubéi Núguchi uniñein gífiti le nun, moun lumuti funagia nátuni? 12Ábati hanügüni súdaragu, gumadan hama hasudaranigu huríu, Hesusu adaüra, aba hagüraguni. 13Lárigiñe, aba hanügüni lúbiñoun Anasi. Anasi ligía limedamurubei Gáifasi, fádiri le íñutimabei lidan irumu ligía. 14Gáifasi ligía, lememe meha ariñagubei houn huríu luagu buítima lan houn lun lounwen aban wügüri hawagu sun gürigia. 15Aba lidin Simón Féduru luma amu disipulu, lárigi lárigi Hesusu. Keiti subudi lani fádiri le íñutimabei disipulu ligía, aba lebelurun luma Hesusu lidoun tibürürün luban fádiri; 16ánheinti Féduru, aba lerederun bóugudi lubadu bena. Ligía láfuridunbei disipulu ligía adimureha tuma to óunigirubalin bena, lun lebelaagüdüni Féduru. 17Ábati tálügüdüni óunigirutu bena Féduru: —Ma buguya aban hádangiñe lani gürigia le disipulugu? Lariñaga Féduru: —Mama au. 18Keiti diliga lubéi, aba háfuragun musu hama súdaragu watu, rara hañati ñein abacharagua. Ñeinñein giñe Féduru hama, abacharagua larügürügü watu. 19Aba lagumeserun fádiri le íñutimabei álügüdaguei Hesusu kátaña lan lánibaña disipulugu, katei lan giñe larufudahabei. 20Lariñaga Hesusu lun: —Bóugudi nadimureha ligibugiñe sun ubóu; súnwandan narufudahan tidan ligilisi luma ténpulurugu le ñein lubéi hóundaragua sun huríu; madügüngidina lubeiti ni kata aramudaguarügü. 21Ka uagu au lubéi bálügüda? Álügüda baña ha aganbubalina, hagialá ariñagei le uágubei nadimureha houn. Subudi hamuti le nariñagubei houn. 22Dan lariñagunbalin Hesusu katei le, aba liabin aban hádangiñe súdaragu ha tánina ténpulu, aba lagayuahan ligibuagun, aba lariñagun lun: —Ítara liña san bóunabuni fádiri le íñutimabei? 23Lariñaga Hesusu lun: —Anhein ariñaga nubéi wuribati, ariñagabéi halíañein lan luriban; ánheinti buidu lubéi le nariñagubei, kagia uagu bagayuaha nuagu? 24Ábati lóunahani Anasi güragu lun Gáifasi, fádiri le íñutimabei lidan irumu ligía. 25Sunti dan le, anihagua buga Féduru abacharagua larügürügü watu; aba hariñagun lun: —Ma san buguya aban hádangiñe lani gürigia le disipulugu? Aba leyeedagun Féduru, aba lariñagun: —Mama au. 26Ábati lálügüdüni aban hádangiñe lumusuniña fádiri le íñutimabei, aban liduhe le líbugubei Féduru arigei: —Ma funagia ariha numutibu luma lidan fulasu le burí ñein lubéi tídibu oliwu? 27Ábaya leyeedagun Féduru; lidan oura ligía, aba layuguruhan gayu. 28Ábati hanügüni Hesusu lúbiñegiñe Gáifasi lun lúbiñoun gumadan. Arugadeina liñati, mebelutiñati huríu palasiurugun luéi hawiyedun, siñaalime gadan lániña adineruni le lánina Luéyuri Esefuruni. 29Ligía láfuridunbei Pilatu lun ladimurehan hama, aba lariñagun houn: —Ka san lidurunbei gürigia le huma? 30Aba hariñagun lun: —Lun hamuga madügün lan wuribani, mederegerun wamuti hamuga bun. 31Ábati lariñagun Pilatu houn: —Barǘ huméi, aguseragüda huméi kei lariñaguni hilurudun guánarügü. Hariñaga huríu lun: —Wagia huríu, marichatiwa lun wasiadirun ni aban gürigia lun lounwen. 32Ítara liña lagunfulirún le lariñagubei Hesusu luagu ida luba lan lounwen. 33Ábaya lebelurun Pilatu palasiurugun, aba lagúarun lun Hesusu, aba lariñagun lun: —Buguya san Harúeitebei Huríu? 34Aba lariñagun Hesusu lun: —Luagu bani bungua bálügüdaha luagu lira, odi ladüga hariñaguni amu bun nuagu? 35Lariñaga Pilatu lun: —Huríu funagia au? Binasiñun hama hábutigu fádirigu, hagía ederegerubalibu nun. Kagia bidurunbei? 36Ábati lariñagun Hesusu lun: —Mama lánina ubóu le narueihan; lun hamuga ítara liña lan, hageindaguña hamuga nánigu lun mederegerúniwa nan houn lúrudugu huríu. Mama yaana narúeihan. 37Ábati lariñagun Pilatu lun: —Uruei lubeiti buguya? Lariñaga Hesusu lun: —Buguya ariñagubei luagu urúei nan. Lun le nágurahoua, lun le niabin lidoun ubóu le: Lun nariñaguni le inarünibei. Sun ha gaganbadibaña lun inarüni, aganba hamuti le nariñagubei. 38Lariñaga Pilatu lun: —Káteiti inarünibei? Lárigiñe ladügüni Pilatu álügüdahani le, ábaya láfuridun adimureha hama huríu, aba lariñagun houn: —Madaritina ni murusun duru luagu wügüri le. 39Kei hechu humá lun nígiragüdün aban adaürǘti hun lidan fedu le Luéyuri Esefuruni, busentün lun nígiragüdüni Hesusu le harúeite huríu? 40Ábaya hagúaragun sun hagía: —Mígiragüdabei le! Barawási lan bígiragüda! Barawási ligía, aban híweruti.

will be added

X\