Adügaü 2

1Dan lachülürünbei luéyuri fedu le Pentekosutesi, óundaragu haña sun lánigu Hesusu lidan aban fulasu. 2Sódini aba laganbún aban areinchuni ñǘbuinti siélugiñe kei dan le láfurun aban garabali héreti, aba laganbún tidan sun muna to ñein habéi. 3Ábati lasaliragún watu gemeti kamá hamuga iñeñein lóugiñe hachügü, afanreinhóuañu lóugiñe kada aban hádangiñe. 4Aba habuinchun sun hagía lau Sífiri Sandu, aba hagumeserun adimureha lidan burí amu luwuyeri iñeñein luéi hererun según ladimuregüdüniña Sífiri Sandu. 5Lidoun burí dan ligía, ñéinburiñanu huríu Herusalén ha gúnfulitiña lidan hafiñen; ñǘbuintiña lídangiñe sun fulasu ubouagu. 6Dan le haganbunbalin areinchuni ligía, aba hóundaragunga gürigia, ibidiñeha houn kaba lan hasaminara ladüga kada aban hádangiñe gürigia hagía aganba hamuti le ariñawagúbei lidan hererun guánarügü. 7Aba taweiridun hanigi, aba hariñagun hámagua: —Ma funagia Galiléana ha adimurehabaña? 8Ida liñati waganbunbaliña adimureha lidan lererun kada aban wádangiñe? 9Añahein gürigia Párütiana ya, Médiana, Elamüna; Mesopotámiana, Hudeana, Kapadósiana, Póntuna hama Ásiana; 10Fürihiana, Panfiliana, Ehiptuna luma lídangiñe burí fulasu Áfürika le yagürounmémebei luéi Sirene. Añahein giñe Rómana aganóutiña ya; 11añahein hádangiñe huríu ladüga huríu hamá hagübürigu; híbiri, barǘ hamaali ligaburi hafiñen huríu. Añahein giñe gürigia Küretana hama Arawiana; sun wagía aganba wamutiña adimureha luagu luéirigun Bungiu lidan wererun guánarügü. 12Wéiritu hanigi súngubei, ibidiñeha houn kaba lan hasaminara; aba burí hálügüdagun hámagua: —Ka san mini lan sun le? 13Híbiri, aba héherahan hau lánigu Hesusu, aba hariñagun: —Bacharuañanúrügü haña. 14Ábati lararamun Féduru hama ha híbiri unsu apostolugu, aba lariñagun lau umalali héreti: «Wügüriña Hudeana hama sun ha aganóubaña Herusalén, aganba huméi le lunbei nariñaguni hun buidu, subudi humaamugei ka lan lílabei katei le harihubei: 15Mabacharuántiña wügüriña ha kei haritagun; ladaünrüngubeigili nefu binaafin guentó. 16Katei le, le harihubei, ligía le meha uágubei ladimureha Hoeli, le profeta, dan le lariñagunbei: 17“Lídounburime lagumuhóun weyu, liña lariñagun Bungiu: Nóunahabei nani Sífiri hawagun sun gürigia, hadimurehaba hisaanigu luéigiñe nóubadina, gewenedübaña wéiyaaña mutu, harihuba nibureintiña arufudúni. 18Lídounburime weyu ligía, nóunahabei giñe nani Sífiri hawagun idamuni, ábame nadimurehan hayumulugugiñe, 19narufuduba óunwenbu burí katei buiti sielu, adüga nuguyame milaguru lidan múa, narufuduba giñe hitaü, watu gemeti, luma dúeri lau gumuleli ubouagu. 20Laburigaduba weyu, láfunaduba hati kei hitaü, lubaragiñe lachülürün luéyuri Wabureme, weyu wéiriti ani hanarimeti. 21Ani sunme ha agúaruti liri Bungiu, hasalbaruba”. 22«Aganba huméi lubeiti le lunbei nariñaguni, huguya wügüriña Ísüraelina: Kei le hisubudin, Hesusu le Nasarétüna, aban meha wügüri le anuadirúati ani arufuda lumuti Bungiu luagu gabafu lan lau milaguru luma burí seini le ladügübei haganagua lídangiñe. 23Lau sun lira, dan le lederegerúnwabei hun, aba háfaruni hilagubei lau hederegeruni houn wügüriña gafigountiña lun hádaraguni luagu gurúa ítara kei ligaburi aransehani le laritagubei Bungiu lúmagiñe furumiñeti dan. 24Aba lesefuruni Bungiu lídangiñe lubafu óunweni, águyuguagüda lumuti hádangiñe hilaaña; ladüga siñá lan gabafu lan óunweni luagu. 25Lariñahare urúei Dawidi, dan le ladimurehan luagu Hesusu: “Súnwandan narihini Nabureme nubá nubá, lau Bungiu luéigiñe nóunwenren, úabei éiguadagüdütina. 26Ligía tagundaarunbei nanigi, eremuha tugía niñeñe buin lau ugundani. Labagariduba sun núgubu lau emenigini, 27ladüga mígirun bubadina lidan umúahaü, mígirunbadibu lun lañaladun lúgubu bubuein le sándubei! 28Barufudubei lémeri ibagari nun, ani bagundaaragüdübadina lau biñuarü”. 29«Niduheñu, lunti nadimurehan hun furangu luagu urúei Dawidi. Ladüga hilá lan meha wagücha Dawidi, bunawa ligía ani gayaraagili warihini lumuaha chülǘ lumoun weyu le. 30Dawidi, aban meha profeta ligía, ani subudi lumuti meha luagu füramase laali lan Bungiu lun lau áfiñuruni luagu líchuguba lan aban hádangiñe ladügawagun lun urúeime. 31Adimurehati lubeiti Dawidi luagu lásaarun Kristu lídangiñe óunweni, luagu giñe meredeboun lan luani lidan habara hilaaña, mañaladun ligíame lúgubu. 32Saragüda lumuti lubeiti Bungiu Hesusuméme ligía lídangiñe óunweni; ani sun wagía gefentiwa luagu lira. 33Lárigiñe lañuuragüdüni Bungiu luéigiñe lóunwenren lau saragu uéiriguni, aba leresibiruni Sífiri Sandu le füramase lubéi woun lúmagiñe Úguchili, ábati lóunahani Sífiri Sandu ligía wawagun. Ligía katei le ariha humaalibei luma le aganba humaalibei guentó. 34Mama Dawidi amudeirubei sielun; ariñagati Dawidi guánarügü: Lariñahare Bungiu lun Nabureme: “Ñuruba luéigiñe nóunwenren, 35darí níchuguniña báganiñu lábugiñoun bugudi”. 36«Lunti hasubudiruni sun huguya Ísüraelina luagu Hesusuméme lan le hádaragubei luagu gurúa, adüga laali lan Bungiu lun ligíaba lan Wasalbaragüle, ligíame giñe Wabureme». 37Dan haganbunbalin katei le, aba lebelurun igarigu tidoun hanigi, aba hariñagun lun Féduru luma houn híbiri apostolugu: —Waduheñu, kaba san wadüga? 38Aba lariñagun Féduru houn: —Asaküriha humá, badisei huguyame kada aban lidan liri Hesukrístu, ferudunawa láamuga hifigoun, ru láamugei Bungiu Sífiri Sandu hun. 39Ladüga füramasehali Bungiu luagu líchugubei lan giñe Sífiri Sandu hun, luma houn hadügawagun, luma houn ha aganóubaña dise, luma houn sun ha lagúarubaña Bungiu lun lánigu hamá. 40Lau burí dimurei le luma burí amu, ladimureha Féduru houn; aba lariñagun houn: —Direi humá hawéi hagübüri gürigia salufuritiña ha. 41Ítara liñati aba habadiseirún, ha adügübaña gasu lau lererun; aba hayabin kei burí ǘrüwa-milu gürigia lun hafiñerun luagu Hesukrístu weyu ligía. 42Aba hederegeragun houngua lun hafurendeiruni le harufudahabei apostolugu houn, afanreinha haméi hámati, óundaragua hagía lun héiginu fein luma lun hafurieidun. 43Láuñanu tueirin anigi súngubei luagu burí seini luma burí milaguru le ladügübei Bungiu hádangiñe apostolugu. 44Sun ha afiñerubaña, lídanñanu aban; aba buriti hafanreinhani le hámati hádangua. 45Halugurahéi burí hafulasun luma le hámati, aba hafanreinhani lebegi según lemegeirun kada aban. 46Sagü weyu hóundaragun ténpulurugu lun háhuduragun lun Bungiu. Lárigiñe, aba hóundaragun lúbiñe aban hádangiñe lun héiginu fein lidan aban lau ugundani luma ǘnabuguni. 47Ábaha halawahani Bungiu, ábati hínsiñe hamá houn gürigia; ábatiha anaaheina lániña Bungiu ha asalbareinabaña hanwoun.

will be added

X\