1 Huan 4

1Niduheñu hínsiñetiña nun, mafiñera humá houn sun ha ariñagubaña luagu Bungiu lan adimurehabei hayumulugugiñe; houcha humaña lun harihini anhein Sífiri Sandu lubéi hádanbei o mama lan ligía. Lugundun buin liña ubóu hau profetagu yéetiña. 2Lau igaburi le, gayaraati hasubudiruni le gámabalin Sífiri Sandu: Sun le ariñaguti luagu kei lan gürigia le tímatimaati liabin Kristu ubouagun, anihein Sífiri Sandu lidan. 3Ánheinti le ariñaguti luagu iyeeni lan, luagu miabin lan Kristu ubouagun keisi gürigia, úati Sífiri Sandu lidan; sífiri le láganibei Kristu, ligía sífiri le lídanbei gürigia ligía. Aganbaadün luagu liábinba lan sífiri ligia; ani aniheinhali ubouagu. 4Nirahüñü, lánigu Bungiu huguya, gañei humaaña yéetiña hagía, lugundun gabafutimati Sífiri Sandu le hídanbei sügǘ lau lani Mafia sífiri le hádanbei lánigu ubóu. 5Ubouaguna hagía, lánina ubóu katei le harufudahabei; ligía lébubei haganbuniña ha giñe lánigubaña ubóu. 6Anhein wagía, lánigu Bungiu wagía. Le subudihabúbei lun Bungiu, aganba lumutiwa; le mámabei lánigu Bungiu, máhati laganbuniwa. Ítara liña lubeiti, gayaraati wasubudiruni Sífiri lánina inarüni lumoun sífiri lánina iyeeni. 7Niduheñu hínsiñetiña nun, lunti hínsiñegua wamá wámagua lugundun lúmagiñe Bungiu liabin ínsiñehabuni. Sun le hínsiñehabubei, liráü Bungiu, ani subuditi giñe Bungiu lun. 8Le mínsiñehabuti, ibidiñegili Bungiu lun, lugundun ínsiñeni Bungiu. 9Arufuda lumuti Bungiu wínsiñe lun lau lóunahani Liráü le ábanrügüti ubouagun gabagari wamaamuga lídangiñe. 10Anihán ínsiñenibei: Mama luagu wagía lan hínsiñehabubei lun Bungiu, luagu ligía lan hínsiñehabubei woun, aba lóunahani Liráü le ábanrügüti lun lounwen, lun lébuname ferudunawa lan wafigoun. 11Niduheñu hínsiñetiña nun, anhein hínsiñeediwa lubéi lun Bungiu ítara, lunti giñe hínsiñegua wamá wámagua. 12Úagili ni aban arihiti Bungiu; lau sun lira, ánhawa hínsiñegua wámagua, anihein Bungiu wadan, ani ítara liña warufuduni wínsiñehabu sunsuinagubei lun Bungiu. 13Anihán lébubei gayara lan wachoururuni luagu lídanñadiwa lan aban luma Bungiu, ani lídanñein lan giñe aban wama: Luagu ru laali lan lani Sífiri Sandu woun. 14Wagía guánarügü ariha wamaali Liráü Bungiu, ariñaga waméi luagu lun lan lasalbaruniwa lóunahei Bungiu ubouagun. 15Furumiñeguarügü le afiñerubei luagu Liráü lan Bungiu Hesusu, labagariduña lidan Bungiu, ani labagariduña giñe Bungiu lidan. 16Ítara liña wayabin asubudirei luma afiñera luagu hínsiñe wamá lun Bungiu. Ínsiñeni Bungiu ani le abagariduti lidan ínsiñehabuni, labagariduña lidan Bungiu, ani labagariduña giñe Bungiu lidan. 17Ítara liña wayabin lun hínsiñe lan Bungiu woun le gumuti, ábame manufudedun wamá lídanme luéyuri aguseruni, ladüga wagaburiduña lan ya ubouagu keisi Hesukrístu. 18Ñein lumuti ínsiñeni úati anufudei, bugá lumuti ínsiñeni tímatimaati anufudei, ladüga barüti anufudei abeichúni. Ligía, anhein hanufude lubéi aban gürigia, úagilirügü liña ínsiñeni le tímatimaati lidan. 19Hínsiñeti Bungiu woun ladüga wínsiñedun lun furumiñe. 20Anhein ariñaga aban gürigia: «Hínsiñeti Bungiu nun», ani mínsiñeti líbiri lun, yeeti gürigia ligia; lugundun anhein mínsiñe lubéi líbiri aban gürigia lun, le ariha lumuti, siñabei giñe hínsiñe lan Bungiu lun, le marihin lubéi. 21Ru laali Kristu gumadi le woun: Le hínsiñehabuti lun Bungiu, lunti giñe hínsiñe lan líbiri lun.

will be added

X\