Titus 2

1Titus oa, ame dam labe im imbona tu vuzehem vaba git dehozi mu vooho dam labe ibi iho meedam bak lam om a vi tau meedamule. Oho gi fa dam Kristus bake tu vuzehi vahi meedam dam laba im vahokedalo modem di gi neha, “Uho Alam im imbona vahokedahana laba vi ozodume ulohodesu meedale,” lahame dam bake vahokedale. 2Labi laha oho dam busaoda laba im vahokelo modem di im nehasu vahokedale. Uho na im ahebu meedam di uhumo naedamat um ahu it vou faovoi iademe meedam bak ame. Labi laha um na im ahebu meedam di gi damat uba vàlu feàtàm vaba gi ahu adat iedi uba vou baedam baket meedam bak ame. Labi laha na im ahebu meedam di uhumo nasi vi ozodume ozobohudi neàdi ame im ba meedam bak ame. Labi laha ubu uho ame Alam im imbona vahokedahana lab tu vuzehi meedam bak lam mahate meedam bohu modesdam bak ame. Labi laha meia deeli meedam bak lam ba gi ahobat deelem vaba abo imbodi deelehe bohu vuusu meedam bak ame. Labi laha ame im imbona lam tu vuzehi meedam labe na im iba modi duzum di im ahu bedem vaba gi ozahit ahu teudi keàtedi meedam bohu vuusu meedam bak ame. Titus oho ame dam busaoda laba, “Im labihasu meedale,” lahame vahokedale. 3Titus oa, oho neo lahi busaoda im vahokelo modem di gi amu dam busaoda laba vahokedaha baket neo ozome lahi busaoda zi laba laha im nehasu neo vi vahokedale. Ame lahi labe amu neha, “Iho Ala bake tu vuzehi im Abada meedam lahi im am bak,” lahame labi gagodam baket ahu vàmadi meedam labe, “Alat iba fà vou baedase,” lahame meedam bak ame. Labi laha meia feàtàdam vabak ame. Labi laha vao meona lam ba duana uddume fa vao meona udemoho nameledam vabak ame. Labi laha fa meia, “Na im neà bak nim meedale,” lahame meia vahokedam bak ame. Titus, oho ame lahi busaoda laba, “Im labihasu meedale,” lahame vahokedale. 4Ame lahi busaoda zi labe oho lab vahokedaha bak lam uledi meedameam làhà iho fa lahi gàhàda laba fa vahokedam bak labet modi ame lahi gàhàda labe fa im nehasu meedam bak am tame. Im datti im datati deeli iademe meedam bak ame. 5Labi laha iho na im ahebu meedam di ihimo nasi vi ozodume ozobohudi neàdi ame im ba meedam bak ame. Labi laha faina meedam vaba gi neà bakta meedam bohu meedam bak ame. Labi laha im datti im datati labihasu iademe vabiedam bak ame. Labi laha iho meia aame faobekesi neà bak meedam bak ame. Labi laha im dat iba gagoho im lam aime vuzehi uledi meedam bak ame. Lahi busaoda fa lahi gàhàda laba iademe vahokedam labe im labihasu meedam bak am tame. Eho etei oba lab vameadaha im lam ame lahi gàhàda labe meedameam làhà dam giida labe ame bak laba vi aame iho Alam im vahokedahana laba ba feàtàm vaba fa, “Ame lab vahokedam im lam abo imbote,” lahame vou baedam bak. 6Titus oa, oho neo dam gàhàda im vahokedalo modem di gi eho amu lab gagodaha bak labet neo ozome dam gàhàda laba vi vahokedale. “Ame dam gàhàda labe laha iho na im ahebu meedam di ihimo nasi vi ozodume ozobohudi neàdi ame im ba meedale,” lahale. Im labihasu oho dam gàhàda laba vahokedale. 7Labi Titus, oho na im ahebu meedam di gi neà bakta vouhodam labe meedam bohu meedale. Labi damat obo ohomo nasi vouhodam bak fà vi aame ame baket vi tau meedase. Labi oho Alam im lam dam bake vahokedam di lam damat oba aame ozo, “Ahole meedam bak,” lahame im ahu adat iedi vou baedam bak laba ozome om ahu abo vamdesuhuna imbo bakta modesu dam bake vahokedale. 8Labi laha ibi iho vou vameatedaha Alam im imbona lam abo meit neha, “Im meit modem bak,” lahame ozome feàtàm biemda laba vi ozome ulohodesu dam bake vahokedale. Oho labi modem labe ba iba faki ot odosiaha dam labe iba ba neha, “Im git vahokedalo,” lahame ba feàtàm bi gi ladem bak am tame. 9Titus oa, oho dam mei na teo meedam dam laba im vahokedam di gi im nehasu vahokedale. “Uba na gagu meedam dam labe im na uba gagom di gi ozahit na ahebu uledi meedam tadele. Ame bak lam meedam di, ‘Iba na gagu meedam dam nibe fà deelese,’ lahame it ozodam labe ame na ahebu uledi meedume neàdedale. Ba a ot vai vi gagu odohali momule. 10Labi ame na gagu meedam dam labe na ibida meedam di uho ame dam labe im nazoh a aa vamule. Labi laha uho gi im iademe vamdesu meedale. Ame bak labet modi ame na gagu meedam dam labe iho uho lab meedaha bak laba aame um ahu ozobohudi ba, ‘Um git modem damat moz,’ laham bak vi ozome gagom vabak.” Im labihasu ahebu ame dam mei na teo meedam dam laba oho vahokedale. Neham bak. Ame dam mei na teo meedam dam labe im labihasu meedameam làhà dam giida labe ame dam labe ibi iho im iademe vamdesu meedam bak laba vi aame ozo, “Aa làhà! Dam laba Soat Vausu Fa Vei Neàdedam Ala labe Aba Aho meedaha im lam abo Paulus giida labe iba vahokedaha im lam abo imbote,” lahame vi ozome vou baedam bak am tame. Eho ame bak laba vi ozome neha, “Im labihasu ahebu ame dam mei na teo meedam dam laba vahokedale,” lahame oba vi vameadam bak. 11Titus oa, eho etei oba lab vameadaha im lam, “Dam Kristus bake tu vuzehi meedam dam labe ame im imbona laba tu vuzehi im neà bak vamdesu meedale,” lahame oba lab vameadaha bak lam eho gi neham bak ozome oba labi vameadaha bak. Alat dam bakdate ozahit deeli im neà bak modi esuidam Alat modem bak. Laham bak lam im dam bakda ahebu amu biem bake etei Alat Aho iba soat vausu fa vei neàdedalo modem bak lam fi zeam bitolo Am Adat Yesus Kristus iba ab oluham bak. 12Labi Alat iba ozahit deeli im neà bak modi esuidam Alat modem bak lam iho ozobohudehe labe iho neo neham bak nim laha vi ozobohudi meedam bak. Iho amu Ala bake, “Am abo feàte,” lahame ahu adat iedi vou baedaha vaba gi ozahigeàmu fa im mei meedam bak lam iho etei fa voedume fa sedda. Labi laha dam Kristus bake tu vuzehi meedaha vab dam labe ibi iho bak niba fai bak mei fai bak meime modelo àhàki meedam im lam iba vizi iho amu vi tau meedam bak lam iho laha etei fa voedume fa sedda. Labihasu seddaha labe iho bak niba azim di iho gi fa im nehasu meedam bak. Iho na im ahebu meedam di ihimo nasi vi ozodume ozobohudi neàdi ame im ba meeda. Labi laha gi iademe im vamdesu ozodume meeda. Labi laha iho Alat Aba Aho ozome gagodaha im lam im ahu vàmadi labaha bohu meeda. Aho iba fi zeam bitoho bak lam iho vi ozobohudehe labe im labihasu ahebu vi ozobohudi ab meedamam bak. 13Mahate it ozodale. Im etei Yesus Kristus fa lem bak labet iba modi deelemna lam iho nasi tu vi ozodume vou faodam bak. Ala bisi Feàda abo iba Soat Vausu Fa Vei Neàdemda Yesus Kristus lam ibi iho vou faodamda Am am bak. Labi Yesus Kristus ba bak niba nom ilum di Aho gi damat Aba, “Am abo feàte,” lahame ahu adat iedi vou baedam daeti nom ilu tame. 14Ame Da Kristus labe Aho fet nehi ozo, “Iho dam bakdat faina meedam bak bohu meedam vaba abobo vaitom baket meedase,” lahame fet ozome iho faina meedaha bake gohali, “Am elom neàte,” lahame Aho naedat ahit uledi iba ot vai ab eloham bak. Labi laha, “Iho fai bak meedam bak lam Aho iba vabiedume neàdi fa Am dam tadi iho im neà bakta meedam bak fà àhàki meedase,” lahame ame baket modehe bak. 15Titus, eho oba gagu oho im dedateli eho etei oba lab toedaha im ahebu lam oho Kreta touha azim dam laba mahate keàtedi vahokedale. Labi laha dam momna zohàme mahate ame im lam vi vahokedume dam bake vabededume im ahu teudedale. Labi laha ame im lam damat uledi meedaha vaba git meedameam làhà oho ame im lam ozahit vi vameadume fa vamdedale. Labi damat oba, “Om ee vab dàt moz,” lahame vàlu feàtàme oho lab vahokedam im lam mu tozomeam làhà ame dam laba mahate vi vahokedume modi dam labe fa oba uledele.

will be added

X\