Roma 2

1Ame fai bak meedam dam zi lam Alat Ahamo ozome vàlu gagome beodam bak lam, “Ahole meedam bak,” laham bak lam im ozobohu bak. Am ba git meedam vabak. Lahana iho ba im dedamali meia vàlu gagodam biem bak. Umeme laha gi ahebu faidedahemu Alat uba beodam bak uho it ozom vab damat vedi meita vàlu neha, “Lo. Ahole beodaho,” lahame uhumo uba it vàlu gagom bak um vabili meedam damat modem bak. Uho labi modemeam làhà Alat ba diamut dam bakda labe ibi iho meedaha im lam, “Ame dam labe git meedào? Neàna meedào?” laham bak lam uloome aime neàdi gagom di ba ubu uho lab meedaha bak lam gi aalahigeàmu mom vabak. Abo beom bak. 3Lahana uho ozom, uhumo meia ozome nehi vàlumeam, “Da lam faina meedaho,” lahame gagodam bak lam neà? Vabà! Um laha gi ame fai baket meedam bak. Alat uba aame vi ozom di uho ozom, Aho ba uba vàlu vi gagu beom vaba mu voe? Beom bak. 4Ala gi im neà bak duana meia meedam Alat modem bak. Abo iho faina meedam bak ozahigeàmu laha vou faodam Alat modem bak. Labihadam Alat modem labe uho ba akati neha, “Vabà! Alat ba eba beom kaio. Em akati em ahu veimde?” lahame tozome voedàla? Um ozom vaba? “Uho faina meedam bak fa voou ahu vei neàdi vàmadi im neàna meedase,” laham bake Alat ahit uba neà bak vou mode ledume uba vou faodam Alat modem bak. 5Lahana um abo faina meedam bak voom mu odohali meedam damat modem bak. Lahana um ozom vaba? Uho lab voom mu odohali meedam bak labet modi Alat uba ba faki beome vataum bak fa duaedam bak lam um gi vabili meedam damat modem bak. Alat ba diamut dam bakda labe ibi iho meedaha im lam, “Ame dam labe iho git meedào? Neàna meedào?” laham bak lam Aho iademe vamdesu uloodume aime neàdi gagu fi zeam bitom di lam Aho uba faki bisi beome vataum di am bak. 6Ame bak lam meedam di Aho gi damat bak niba esdam di labe meedaha im laba vi ozome ame baleà vouhoda tame. 7Ame digat labe gi nehadam bak. Dam totbaho labe neha, “Alat fà im ee vousai, ‘Im abo feàte,’ lahame Aho iba vou baedume modi Amti vahi gi ahe neàna bohu vuusdase,” lahame fet ozome gi im neà bak bohuta keàtedi meedam dam lada lamota Alat ame dam laba ame bak gohali Aho modi Amti vahi gi ahe neàna bohu vuusdam bak. 8Lahana dam totbaho labe gi ihimo so ibidata it vabieme neàdem dam ehe bak. Ame dam labe ba Alat Aba Aho vameadaha im imbona laba tu vuzehi meedaha vaba vedi gi im ahu bisi fai bak meedalo àhàki meedam bak laba abo tu meedam damat modem bak. Dam lada lamota Alat bisi faki feàna beodume vataum dam am bak. 9Dam bakda bisi debu fai bak mei fai bak meime modem zidam dam lam ahebu Alat bisi duana beodume geàdam dam am bak. Ame bak lam meedam di Aba Aho amu neha, “Em dam neàda debu neame?” lahame gagu fi hasi vàmadi esuhu dam debu abo Yahudi dam laba amu nasi modi geàda. Labi laha neo Yahudi damat modem vab dam laba neo beodume geàda. Gi labihada tame. 10Lahana dam bakda iho gi im neà bakta bohu keàtet meedam dam lada lamota Alat ame dam labe im ee vousai, “Feàte,” lahame vou baeda. Labi fa neo ame dam labe im ahu modi faheme fi goaitom vaba gi vabademsu meeda. Labihada tame. Ame baket meedam di Aba Aho amu neha, “Em dam neàda debu neame?” lahame gagu fi hasi vàmadi esuhu dam debu abo Yahudi dam laba ame baket abo meeda. Labi laha neo Yahudi damat modem vab dam laba ame baket neo meeda. Gi labihada tame. 11Alat dam bake faki beodam di ba damat ibi iho ee taluhu bak laba ozome beodam vaba gi damat ibi iho meedaha bak laba ozome ulohodesu beodam Alat modem labe labihaha bak. 12Alat aham di iube Musa bake vameadume aho toedume fi hasi vàmadi esuhu Im Feàna zi lam Yahudi damat modem vab dam labe vi tau meedam vabnàme ame dam labe iho faina meedameam làhà Alat ba neha, “Ame Im Feàna lam ozobohudi iademe meedào? Iademe meedam vabao?” laham bak ba ozom vabak. Gi ozahit beome vataudume Amti vaitesu bohu vuusda tame. Labi laha Yahudi dam ame Im Feàna zi lam ozobohudemnàme iho zidazi faina meedameam làhà Alat laha gi ame dam laba beodume vatau tame. “Ame Im Feàna lam ulohodesu meedào? Ulohodesu meedam vabao?” laham bak laba ozome ame dam laba beodam bak. 13Neham labe labihadam bak. Dam ame fi hasi vàmadi esuhu Im Feàna zi lam gi aimta ai. Lahana ame im lam meedam vab dam lam Alat ba neha, “Im vamdesu meedam damat modem bak,” lahame ba ame dam laba ozahit deeli gagu vadam vabak. Gi ame Im Feàna lam ahebu aime ulohodesu meedam dam laba Alat nehasu gagom bak. “Lo. Im vamdesu meedam damat modem bak,” lahame ame dam laba ozahit deeli gagu vadam dam am bak. 14Nasi ozomale. Yahudi damat modem vab dam labe iho ame Im Feàna zi lam ozobohu vabnàme vedi ostame ulohodesu meedam damat modem bak. Labihadam dam lam iho nehi ozo, “Aa làhà! Ame dam labe ame Im Feàna zi lam ozobohu vabnàme im ahu adat ihimo fi hasi vàmadi esuhu labe, ‘Neà bak neame? Fai bak neame?’ laham bak ozobohu dam ame?” laham bak lam im ozobohudehe bak. 15Ame dam labe im ahu adat it ozomna labe iba it vàlu, “Git modeho,” lahame gagodam diale. Laham vabameam, “Lo, modem neàte,” lahame uledi gagodam diale. Labihadam labet modi im nehasu tombali damat aame ozo, “Làhà, Alat ame dam labe im ahu ad laba Aho gagu fi hasi vàmadi esuhu im ehe labe labihaha bak,” lahame vi ozobohudehe bak. 16Eho etei lab gagoho bak lam, “Dam faina meedàmu Alat faki beodume vatau tame,” lahame lab gagoho bak lam imbote. Ba diamut dam bakda ahebu ibi iho meedaha im lam ahebu abo iho ahatet modeheda modeo, abo dam im ahu adat aa ozome modeheda modeo, Alat ahebu ozome ozobohudi vàlu gagodume beodume vataudam digat ehe bak. Abo ame digat labe Alat Am Adat Kristus Yesus bake gagu Aho fa ot vai Am ahat vàlu gagodume beodume vataudam bak. Eho etei lab gagoho bak lam eho bak mei bake le Yesus labe Aba Aho meedaha Im Neàna vou vameatedam di vi vameadam im am bak. 17Lo. Neàde. Em etei fa em Yahudi dama im vameadalo mozo. Uho ozom, um Yahudi dam akatiha? Um Yahudi dam labe vedi neha, “Im Yahudi damat modem labe im Alati vou ali meedam dam im am bak,” lahame labi it daetbada. Labi uho vedi im nehasu ozome meeda. “Im abo Alat aham di iube Musa bake vameadume aho toedume fi hasi vàmadi esuhu Im Feàna zi lam aime tu vuzehi ulohodesu meedam labe Alat iba neha, ‘Im im vamdesu meedam damat modem bak,’ lahame ozahit deeli gagu vadam dam im am bak,” laham bak laba tu vi ozome meeda. 18Labi ame Im Feàna zi lam meit uba vahokedam labe uho vedi neha, “Alat Aba Aho ozoho im lam im ozobohudehe dam im am bak,” lahame daetbada. Labi, “Neà bak neame? Fai bak neame?” laham bak um ozobohu labe um gi neà bakta meeda. 19Labi uho laha vedi dam fako aubesuhu dam anekehà vuusu vou lam dam um am tiba. Labi dam aibu bake azim dam lam laha uho vuagat fauti ulohona fi sdam dam um am tiba. Abo ame Yahudi damat modem vab dam labe iho Alam im imbona biem bake uho vedi um Yahudi dam ozobohu labe fa meia vahokedume ame dam laba modi ozobohudeda tiba. 20Labi Yahudi damat modem vab dam lam uho neha, “Alam im biem labe ahusobu dam laba iho vahokedase,” lahame daetbadume gagodam dam um am bak. Labi um Yahudi dam labe uho neha, “Ame fi hasi gagu vàmadi esuhu Im Feàna zi lam abo Alam im imbona tombuda am tame,” lahame uho vuusu im dedamali modem labe vedi, “Yahudi damat modem vab dam labe Alam im imbona lam ahusobuli meedàmu data koenati ulohote,” lahame feàtàdam dam laba uho fa vahokedam dam um am tiba. Labihasu ozom dam um Yahudi dam um am bak. 21Uho neha, “Im Yahudi damat modem labe ibi iho lab neà bak meedam bak lam ab modesuham bak,” lahame gagodam labe um akati nehasu meedam damat modela? Uho vedi dam bake neha, “Uho ame im toedume fi hasi vàmadi esuhu Im Feàna zi lam mahate aime ulohodesu meedale,” lahame meia vahokedam damat akati uho ame im lam ulohodesu meedaha vaba voedà? Labi laha uho ozobohudi dam bake vahokedam labe neha, “Mei na a aa vamule,” lahame meia vahokedam damat akati uho fa mei na aa vadàla? 22Labi uho ozobohudi dam bake vahokedam labe neha, “Mei dat a vamule. Mei nam a vamule,” lahame meia vahokedam damat akati uho fa mei dat aa vadà? Mei nam aa vadà? Labi uho ozobohudi dam bake vahokedam labe neha, “Na it auet modehena a ve alali vou baedamule,” lahame meia vahokedam damat akati uho damat auet modehena ve alali vou baedam num laba damat ame na laba vou baedam diat vahedamna zi lam uho aa vame vou itaidàla? 23Uho vedi neha, “Alat lab gagu fi hasi vàmadi esuhu Im Feàna zi lam iho aime ahumdi esuhu dam im am bak,” lahame daetbadaha damat akati uho ame im lam ulohodesu meedaha vaba voedà? Uho labihadam labe um gi Ala bake, “Am feà kaio,” lahame tozom dam am taia? 24Uho lab meedaha bak lam meit Alat Vameadaha Im Toedahana laba nasi fet nehi vàlu gagoho bak ehe bak. “Um Israel dam Ala bake tuhu dam um am bak. Lahana uho bisi fai bak meedam labe dam debu mei debu mei lahadam dam labe iho fa Ala bake vàlu feàtàdam bak lam debu uho Israel damat modehe bak.” Lahame labihasu fet vàlu gagom im lam uho ab meedamam bak. 25Um Yahudi dam nehi gagodam dam um am taia? “Iho im laso aubehà sokba ukbom bak lam iba modi neàdem bak ehe bak. Im Alam damalehe bak lam damat aame ozobohudemna am bak,” lahame gagodam dam um am taia? Lahana eho gi nehi ozo. Ame Alat lab gagu fi hasi vàmadi esuhu Im Feàna zi lam uho iademe ulohodesu keàtet meedameam làhà imbot. Uho lab ukboho bak lam uba vi tau modi neàdemna am bak. Lahana ame Im Feàna zi lam ulohodesu meedaha vaba zidazemeam làhà uho lab ukboho bak lam gi teolemnat modem bak. Abo Yahudi damat modem vab dam ukboho vab dam lamti ulohona ozohomu ba Alat deeli um vadam vabak. 26Um ozom vaba? Yahudi damat modem vab dam lam abo laso aubehà sokba ukboho vab dam labe ame Alat Aho lab gagu fi hasi vàmadi esuhu Im Feàna zi lam ulohodesu meedameam làhà Alat deeli vame Am damalem bak. Abo Alat Yahudi dam ukbohoda laba deeli vame Am damalehe bakti ulohona meedam bak. 27Neham bak. Ame Im Feàna zi lam uba Yahudi dam bake toedume fi hasi vàmadi esuhu bak ame. Labi um laso aubehà sokba ukbodam bak ame. Labihasu meedamnàme uho meidavat vedi Alat uba gagu esuhu im lam modehe vaba zidazemeam làhà Alat ame da laba beom bak. Labi ame Yahudi damat modem vab dam abo laso aubehà sokba ukboho vab dam labe iho ame Im Feàna zi lam ulohodesu meedaha damat modem labe neha, “Alat uba ahole beodalo,” lahame fa Ala bake tau gagodam bak. 28Gi damat aame ozobohudemna ahoba vouhodam bak labet modi um bisi Yahudi dam aabolem vabak. Labi laha ba um laso aubehà sokba ukbodam bak labet modi Alat uba deeli vame Am damalem vabak. 29Gi Alat mei ahu ad laba modi veimdi vei neàdeheda lam bisi Yahudi dam aabolemda am bak. Labi laha Alat meia deeli vame Am damalem bak lam gi ame Im Feàna zi laba vi ozome mei laso aubehà sokba ukbom bak labet modi ame da lam Am dam aabolem vabak. Gi Alam Aha Nutabe Neàna labe Ahamo ame da labe am ahu ad laba modi veimdem labe Am dam aabolem bak. Dam labihasu meedam dam lam damat iba vou baedam vabnàme Alat ame dam laba vou baedam bak.

will be added

X\