Roma 13

1Im Kristus bake tu vuzehi vahi meedam dam ahebu iba vuusdam pemerintah labe ibi iho gagom im lam a voomule. Abo aime uledi meedam tadele. Eho gi neham bak ozome uba labi gagoho bak. Ame dam labe im ee damali dam vuusu meedam bak lam ba gi modemnat modem vabak. Abo Alat gagu ee damalehe bak. Ba meit gagu ee damali vuusu meedam bak amomoi vabak. Ame bak lam ehelemeam làhà gi Alat gagu meedam labe ame dam eeda zi labe ame baket meedam bak. 2Labihàmu meit ame dam eeda laba mu odohali meedameam làhà ame da labe aho gi Alat Aba Aho gagu modesu esuhu bak lam laha mu odohali meedam bak. Uho labihameam dam eeda zi labe um beome vataum bak lam debu uho modehe bak. Alat gi, “Ahole beome vatauho,” lahame gagom bak. 3Uho mahate it ozodale. Dam im neà bak meedam dam lam, “Fà iedese,” lahame Alat ba ozome ame dam laba ee taudume modesu esuhu vabak. Gi im fai bak meedam dam lam, “Fà iedese,” lahame ozome ee taudume modesu esuhu bak. Labihàmu um ba ame eeda zi laba iedem vabake im neà bak meedam tadele. Uho labi modemeam làhà ame eeda zi labe ba uba, “Fà iedese,” lahame uba vabidam vaba gi, “Um abo neàte,” lahame um ee vousai gagodam bak am bak. 4Neham bak. Ame eeda zi labe iba tau modi im neàt esdam bak modelo gi Alat Aba Aho gagoho im uledi meedam damat modem bak. Labiha labe uho fai bak modemeam làhà um iedem bak ahole iedehe bak. Belu fa vataum bak ehe bak. Um ozom vaba? Ame dam eeda zi labe, “Iho meia beom neàte,” laham bak lam Alat iba gagu im dedamali neàdehe labe belu vataum meo bak. Neham bak. Ame dam eeda zi lam gi Alat im gagu modiam dam zi am bak. Dam fai bak meedam dam laba belu fa vataum bak lam gi Alat gagoho im ot vai meedam dam eeda ziat modem bak. 5Labihàmu ame eeda zi labe ibi iho gagoho im lam uho mahate aime uledi meedam tadele. Neham bak. Ame im lam uho meedam vabameam uba belu fa vataum bak ame. Labi laha uho amu ahu ad labe ozo, “Bisi neà bak ame?” lahame ozobohu aabodehe bak ame. Labihàmu ame im lam mahate aime uledi meedam tadele. 6Labi laha gi ame bak behàsu laba vi ozome pemerintah bake gi teo vi vadam doi pajak lam laha dam eeda zi laba lodale. Neham bak. Ame eeda zi labe ibi iho dam bake labaha bohu vuusu im vameame faheme modidam bak lam gi Alat Aba Aho gagoho im ot vai meedam damat meedàmu labihadale. 7Dam eeda labe gi vi vaiam doi uba vam bake modi duzumeam làhà taho ame baket lodale. Neha: Pemerintah dam labe uba neha, “Meia gi teo vi gagome vaiam doi pajak iba lodale,” lahame gagom bak duzumeam làhà mom vaba ame doi pajak lodale. Labi laha pemerintah uba neha, “Ame na gohali lodale,” lahame gagom bak duzumeam làhà mom vaba ame na lodale. Labi laha meia ahu adat iedi gagom bak duzumeam làhà mom vaba abo ame baket meedale. Labi laha mei ee taluhuda laba, “Feàte,” lahame vou baedam bak duzumeam làhà mom vaba ame da laba am ee vousai vou baedale. Gi labihadale. 8Meit gi vi vaiam doi uba vam bake modi duzum bak ehelemeam làhà taho ame baket lodale. Lahana uho meit gi vi vaiam doi lu fa neàdem vaba abo vi meedume bohu vuusdam bak lam gi vàmtea bak. Ame bak lam gi meia deelem bak am bak. Gi ame bak vàmtea laba meedam bohu vuusdale. Neham bak. Meit meia deelemda lam aho gi ame bak vàmtea meedam labet modi Alat gagu fi hasi vàmadi esuhu im zi ahebu gi ab imbodi ab meedamam bak. 9Eho gi neham bak ozome uba labi gagoho bak. Alat gagu fi hasi vàmadi esuhu im abo zi duat. Ame im totbaho neha: “Nam dat eheda modeo, dat nam eheda modeo, a modemule.” Labi, “Mei a otemule.” Labi, “Mei na a aa vamule.” Labi, “Na meit vahana a teidemule.” Lahame Alat gagu fi hasi vàmadi esuhu im totbaho am bak. Lahana eho etei lab vameadume fi hasi vàmadi esuhu im lamti Alat Aho gagu fi hasi vàmadi esuhu im zi totbaho ahebu lamti labihasu meedume neàbodem bake gi gagu fi hasi vàmadi esuhu im nidi nim meedam labe ame fi hasi vàmadi esuhu im zi lam ahebu meedume ab neàbodedamam bak. “Uho meit aba it deeli vou faovoi vabiedam bak lamti ulohona vi ozome fa meia laha deeli vou faovoi vabiedale.” Lahame labihasu ba gagohoda lam uho modem labe bisi ame fi hasi vàmadi esuhu im zi lam ahebu meedume neàbodem bak am bak. 10Neham bak. Iho meia deeli meedameam làhà iho ame da laba ba fai bak modem vabak. Labihàmu eho uba ab gagoham bak. Meit meia deeli vabiedamda lam Alat gagu fi hasi vàmadi esuhu im ahebu lam gi ame da labe aho meia lab deeli vabiedam bak labet modi ame im zi lam ahebu meedume ab neàbodedaham bak. 11Eho etei uba, “Iademe im vamdesu meedam tadele,” lahame lab vameadaha im zi lam mahate vi ozome meedam tadele. Nehaha bak. “Etei di nimodam di nim iho im akatihasu meedam labe ahole meedamna mode?” laham bak lam um ozobohu bak. Um ba biem vabak. Etei di nim uho ihi tamzohobuli modesdam bak nasi fa keele. Iho amu Kristus bake tu vuzehehe di lam im Boehàda Yesus ba li iba abobo soat vausu fa vei neàbodedam bak lam bohu lahasuhu bak. Lahana iho ahamte lab tuhu di labe faasi vou mode ledume etei ab netàdi vou fuham bak. 12Iho bak niba esdam di digat ab folelo modemam bak. Abo aibuli dihalo vabalehe bakti uloho bak. Abo Kristus fa lem digat ab vou netàdeham bak. Labihàmu imo faina meedam bak abo aibut meedamna ozomom bak lam ahebu nasi mu voedase. Fa gi digad diat esdamna ozomom damalese. Abo Iblisit iba modi im bedem vabak laba ozome im neà bak bohuta ozome meedase. Abo tentarat digad diat im so laba modealahana fo bogozemna lamti ulohona modealadase. 13Imo gi digad diat esdamna ozohomu abo gi iademe neà bak bohu tadi vuusu meedase. “Kristusat fa lem bak ab vou fuham bak,” laham bak lamota esu vi ozodase. Labi laha a im nehi meedamule. Damti lahiti vazisi vao meona duana uddume bak vabili sikitaom labe fa ostame la modi le modidam bak ame. Labi laha ostame fi loholi ot vai ot vaidam bak ahebu ame. Labi laha damat gagu fi hasi esuhu bak ehelahit ahole meedam vaba vedi neha, “Iho faina meedahe?” laham bak naedat it ozom vaba ahusobuli ostame la modi le modidam bak ame. Labi laha ot fakiame daet ot beidam bak ame. Labi laha ahu adat faki teidemoholedam bak ame. Labihasu a meedamule. 14Fa gi nehale. Uho bak niba esdam di gi im Boehàda Yesus Kristus labe Aba Aho lab meedaha bak lamti ulohona vouhome meedale. Ubu uho modi baleàhà bak lam abo faina modelo àhàki ahulat ozodamna labe uba vi ootedume uho vi uledi meedam bak lam nasi voedume seddale.

will be added

X\