Roma 1

1Um Kristus bake tu vuzehi vahi meedam dam abo num debu Roma laba azihi dam oa, eho Paulusat sunit nim toedume uba oluho. Em abo Kristus Yesus labe Aba Aho gagoho im uledi meedamda meida em am bak. Labi laha Alat eba neha, “Yesus labe Aba Aho meedaha Im Neàna lam eho fa vou vameatedale,” lahame eba gagu fi hasi esuhemu eho fa Kristusat Aho gagu olu Am im vameadume esmozi laiam dateli ab meedamam bak. 2Yesus bak niba lehe vab di iube Aba Aho ba meedalo modem Im Neàna lam Alat aham di iube gi Aho vameadaha im aime fa dam bake ahate vameaidaha dam laba modi ozobohudi iho Alat Vameadaha Im Toedahana Aabo laba fet toeme vàmadi esuhu imot moz. 3Abo Alam Adat im Boehàda Yesus Kristus labe Aba Aho meedaha Im Neànat modem bak. Ame Da labe im bakda aliholi faaha bak ozom di Am abo gi dat ahamdat Boehàda Daud vou faat leheda meida am. Lahana Aba Aho Alati vahi esdam ahoba iube fa bak niba lehe bak ozom di Am abo Alam Adat modem bak. Labi laha Alat Am feà bak lam fa Yesus Am eloho bak labet modi fa ahedi usahemu iho ozo, “Da lam abo Alam Adàt modem bak,” laham bak modi tombali im ab ozobohudeham bak. 5Yesus Aba Aho eba lab modi fi zeam bitoho bak labet Alat ozahit eba deeli im neà bak ab modi esuham bak. Aho eba neha, “Im Abada vou vameatedale,” lahame eba gagu fi hasi eho ame im ab vou vameatedamam bak. “ ‘Ame Yahudi damat modem vab dam iho Boehàda Yesus bake tu vuzehi im Aho gagohoda lam uledi meedam labe Yesusam ee vousai vou baedase,’ lahame eho ame Im Neàna lam fa Yahudi damat modem vab dam abo bak iudu iumti iudu iumti ahebu vou vameatedale,” lahame eba fi hasi gagu oluhu bak. 6Gi dam lamota, “Fà Em Adat Yesus Kristusti vou ali meedam labe Am damali Aho ame dam laba vuusu meedase,” lahame Alat amu fet ozome esuhu vabak. Abo um Kristus bake tu vuzehehe dam dua bak num debu Roma laba azihi dam lam um laha, “Ame baket meedase,” lahame Alat amu fet ozome esuhemu uho ame baket modehe bak. 7“Eho uba im Abada vou vameatedase,” lahame eba gagu fi hasi esuhemu eho ame baket meedam dàt uba num debu Roma laba azihi dam ahebu abo Alat amu neha, “Am damalese,” lahame deeli fet ozome esuhu dam laba sunit nim toedume uba oluhu bak. Eho gi uba ozome neha, “Im Ai Alati im Boehàda Kristus Yesusti ahili uba ozahit deeli im neà bak modi esuidase. Labi uba modi um ahu faheme fi goaitom vaba gi vabademsuse,” lahame eho ozodume Ala bake labihasu tom gagodam bak. 8Eho ahamte uba im nehasu gagolo. Uho amu im Boehàda Yesus bake lab tu vuzehi meedam bak lam eho num debu iudu iube gagodam bak ai. Num debu iudu iube gagodam bak ai. Abo Kaisarleheda labe aba aho vuusdam dam ahebu ai. Lahadam bak labet eho uba vi ozodam di eho gi Ala bake, “Am abo neàte,” lahame deeli tom vou baedam bak. Abo Yesus Kristus labe Aho iba lab meedaha bak laba vi ozome Ala bake deeli tom vou baedam bak. 9Alat neha, “Em Adat labe Aba Aho meedaha Im Neàna lam oho dam bake vou vameatedale,” lahame eba labihasu fi hasi gagoho im lamota em gi ahu vàmadi vou vameatedam bak. Labi eho uba vi ozodam bohu meedam labe abo gi aibu diat modeo, digad diat modeo, um ee gagodume Ala bake tom gagodam bak. Eho uba ba giomim vameadam vaba abo gi im imbona uba vameadam bak lam Alata ozobohu bak. Labi eho Ala bake bisi tom gagodamda meida neha, “Eho uba ilahu le aam bake Alat uledemta Aho taho etei nibe modi em uba oluse,” lahame tom gagodam bak. 11Em abo uba ilahu modem bak. “Alam Aha Nutabe Neàna labe Aho uba modi vizemna fà vizi teudese,” lahame eho uba tàhi taulo àhàki meedam bak. 12Abo uho Yesus bake lab tu vuzehi meedam bak labet eba modi vabededume em ahu vi modi teudeda. Labi eho Yesus bake lab tu vuzehi meedam bak labet uba laha modi vabededume um ahu vi modi teudeda. “Gi labihasu ot vabdi ot vabdidase,” lahame em uba tàhi alihi aalo àhàki meedam bak. 13Emti vahi Kristus bake tu vuzehi meedam dam oa, um biem bake um ahebu nasi ozomale. Em abo uba lesome modidaha naat ausidam labe uba lem bi modidalo. Lahana etei nim uba lem bak fota neàdehe labe fa uba lem bak ab vi ozodamam bak. Nehaha bak. Eho amu Yahudi damat modem vab dam labe ibi iho esuhu bak mei bak meime lahadume ame dam labe iho amu Kristus bake tu vuzehi meedam bak lam eho modi ame dam labe fa keàtedi meedam bak. Eho labihasu meedam bak lamti ulohona, “Eho etei fa uba le ame baket neo meedase,” lahame uba lelo àhàki meedam bak. 14Em uba lelo ozodam bak ba mom vabak. Abo Alat eba gagu vàmadi esuhu bak. Abo Yunani dae vameadam dam labe ibi iho modi baleàhà im lamti ozobohu dam modeo, Yunani dae vameadam dam labe ibi iho modi baleàhà im lamti biem dam modeo, labi laha sekolah modeme ozobohudehe dam lam modeo, sekolah modehe vab dam lam modeo, labihasu Yahudi damat modem vab dam ahebu eho ame Im Neàna lam vou vameatedalo modem dam am bak. 15Labihàmu eho gi amu di iube nehi ozo, “Eho ame Im Neàna lam uba num debu Roma laba azihi dam laba laha le vameadase,” lahame modelo àhàki ozome esuhu bak. 16Kristus labe Aba Aho lab meedaha Im Neàna lam eho vou vameatedam di em ba ladehebeat vameadam vabak. Ame im lam feà imot modemu eho ozobohudi keàtet vou vameatedam bak. Neham labe labihaha bak. Meit ame Im Neàna lam aime fa Kristus bake tu vuzehi meedam labe Alat ame bak labet modi ame da labe aho faina meedàmu Alat Aho beolo ozoho bak lam fa mu soat vausu fa vei neàdedam im am bak. Abo amu nasi ame Im Neàna lam Yahudi dam bake vou vameatedaha di labe ame dam labe iho Kristus bake tu vuzehi meedàmu Alat soat vausu fa vei neàdeda. Labi ba neo Yahudi damat modem vab dam laba neo ame baket meeda. Labihadam imot modemu eho keàtet vou vameatedam bak. 17Meit ame Im Neàna lam iba vameadam bak labet modi iho im nehasu ab ozobohudeham bak. “Iho akatihasu meedam labe Alat iba neha, ‘Im im vamdesu meedam damat modem bak,’ lahame ozahit deeli gagu vàla?” laham bak im biem bake iba modi im ab ozobohudeham bak. Iho gi Kristus bake tu vuzehi meedam bak labet modi Alat iba deeli vam bak am bak. Ba im amomoi modi Alat iba deeli vam bak na vabak. Eho gi Alat vameadaha im aime fa dam bake ahate vameaidahada labe aho Alam im ot vai nehi toehe bak laba ozome uba labi gagoho bak. “Alat neha, ‘ “Im vamdesu meedam damat modem bak,” lahame Ebe Eho ozahit deeli gagu vadam dam lam Eba tu vuzehi meedàmu Eho ame dam laba modi Emti vahi gi ahe neàna bohu vuusdam bak.’ ” Lahame labihasu toehena lamti uloho bak laba vi ozome uba gagodam bak. 18Alat Aba Aho gagoho im lam dam bakda ahebu iho uledi meedaha vaba mu gi fai bak meedam bak ame. Labi neà bak vamdesu meedaha vaba faina meedam bak ame. Labihasu meedam dam lam Alat neha, “Beodase,” lahame faki gagu esuhu bak lam damat biem bake Aho gi asum ahoba iube dam bake modi ozobohudi ab fi gatedamam bak. Ame dam labe iho neà bak vamdesu meedaha vab labet modi, “Ala akatihasu meedam Alat modela?” laham im imbona lam im ozobohuna fa baguamdehe labe dam amomoit fa im imbo bak modelo ozodam bak lam fa ab ozome modem bieham bak. 19“Ala akatihasu meedam Alat modela?” laham bak lam Alat gi amu dam bakdate modi ozobohudi fi gatehe labe etei dam ahebu ab ozobohu neàdeham bak. 20Neham bak. “Ala akatihasu meedam Alat modela?” laham bak lam im biemnàme bak nimti na ahebuti alimeat modi debulehe di labet faasi bak niba modealahana zi nimti asum ahoba iuba modealahana zi lamti labihasu Alat modehena zi lam iho bak damat aham di iube faasi vou aa ledam bak. Labiha labe, “Aba Aho im feà bak meedam bak lam gi labaha bohu meedam Alat modem bak,” laham bak lamti, “Am akatihasu meedam Alat modela?” laham bak lamti im ab ozobohudeham bak. Labihàmu ba meit neha, “Em Ala biem dàt modem bak,” lahame ba labi gagom biem bak. Ab ozobohudi vàhàdeham bak. 21“Ala akatihasu meedam Alat modela?” laham bak lam dam bakda ahebu ozobohunàme ba, “Imbote. Om abo Ala bisi feàda am tame,” lahame ba ahu adat iedi vou baedam kaio. Ba, “Oho iba neà bak modehe bak abo neàte,” lahame ba vou baedam kaio. Vedi ibi iho ozom bak lam ostame faasi Ala bake vàlu la gagoi le gagoidume vanamai mu voom im meeda. Labi im ahu aibuna ozohomu ba ame im imbona lam ozobohudem bi ab vabileham bak. 22Vedi, “Im bisi im ozobohu dam im am bak,” lahamnàme ame dam lam gi ahusobuli meedam damat modem bak. 23Vedi nehame meedam damat moz. Ba, “Ala abo feàte. Am Abo elom giki labe gi labaha bohu vuusdam Alat modem bak,” lahame vou baedaha vaba vedi gi na ostamna ve modi dam ekda aliholi, “Ala am tame,” lahame vou baeda. Abo bume modeo, nohubake azimna modeo, na sobosobomna modeo, labihasu ame na lam aliholi, “Ala am tame,” lahame ab vou baedaham bak. 24Labihàmu dam bakda labe iho Ala imboda laba vou baedam mohemu ame dam labe ibi iho im ahu adat faina modelo àhàki ozodamna labet iba ootedume fi loholi ahate modem bak ba ladem vaba aam ahasbeam im ahebu meedam bak lam Alat gi, “Fà meedase,” lahame uledi ab aalahigeàmoham bak. Labiham labe ame dam labe bisi im imbo bak modehe vaba vedi ihimo fa ot modi ot modidume ab vàhàdedamam bak. 25Neham labe labihaha bak. Ame dam labe vedi neha, “Ala nehasu meedam Alat modem bak,” laham im imbona lam ahit mu voou fa im giomimna laba fa vuzehi meeda. Vedi Na Debu Modeheda bisi feàda laba ahu adat iedi vou baedaha vaba vedi gi Alat Aho modehena zi laba fa feà damali ahu adat iedi ab vou baedamam bak. Bisi neà bak gi neham vaba? Na Debu Modeheda abo Ala bake vou baedam bohu meedam bak lam bisi neà bak am bak. Imbote! 26Labihàmu bak damat Ala imboda laba vou baedam mohemu Alat faki damat ibi iho bak niba ahate modem bak ba ladem vaba aam ahasbeam im modelo àhàki meedam bak lam Alat gi, “Fà dam ibi baket meedase,” lahame mu ab ozahigeàmoham bak. Labiha labe bakda lahit ibi iho dat bake vi tauleme modeme baleàhà bak lam fa voou vedi lahit ihimo fa ahu gukeme ot modida. 27Labi dam aabot laha ame baket neo meeda. Ibi iho lahi bake vi tauleme modeme baleàhà bak lam vedi fa voou damat ihimo modelo àhàki meedam bak labet fa ahu gukeme ot modida. Labihàmu damat ihimo fàsi ostame fi loholi ladem im ot modi ot modidàmu Alat faki ame dam labe iho faina meedam bak laba ozome Aho gi ulohona im so laba fa beodam bak. 28Labi laha ame dam labe vedi neha, “Iho Ala bake vi ozodameam làhà im gi vanamai voomnat modem bak,” lahame im ahulat ba Ala bake vi ozodam vabak. Labihàmu ame dam labe ibi iho ostame ozome meedam bak bohu laba Alat faki, “Fà vàhàdedase,” lahame ab uledeham bak. Labi modehemu ame dam labe Alat malehe im nehasu ab faasi meedamam bak. 29Im vamdesu modehe vaba vedi im fai bak mei fai bak meime meedam bak ame. Labi, “Nazoh dualese,” lahame meia mali soat ziemausi vadam bak ame. Labi laha, “Mei beose,” lahame ahu gukeme fai bak la modi le modidam bak ame. Labi laha na im meedam di gi ahu adat faki teidemoholi meedam bak ame. Labi laha ame dam labe im ahu gukeme mei otelo àhàki meedam bak ame. Labi laha, “Mei fà meolese,” lahame modi bohudidam bak ame. Labi laha meia vagemoholi meedam bak ame. Labi laha meia faki bisi fai bak la modi le modidam bak ame. Labi laha meit modehe im fa aime meia vameadam bak bohu ame. 30Labi laha meia feàtàdam bak bohu ame. Labi laha Ala bake fakemoholi meedam bak bohu ame. Labi laha meia tozodam im meedam bak bohu ame. Labi laha, “Mei fa ahu faidi ladese,” lahame meia faki gagodam bak bohu ame. Labi laha aba it daetbadam bak bohu ame. Labi laha, “Fai bak amu modehe vaba alimna nim neo modi aase,” lahame la ozoi le ozoidam bak bohu ame. Labi laha im aiti oiti gagom im voedam bak bohu ame. 31Labi laha ahusobuli faina ostame meedam bak bohu ame. Labi laha ame dam labe iho meia gagu vàmadi esuhu im fa faamodam bak bohu ame. Labi laha meia ahu deelem vabak bohu ame. Labi laha meia faobekesi taum mom bak bohu ame. Ame im zi lam labihasu meedam bohu meedam damat modem bak. 32Ame dam labe Alat amu neha, “Im labihasu meedameam làhà Eho ame dam laba beodume eloda tame,” lahame gagu vàmadi esuhu im lam ame dam zi labe ozobohunàme vedi ozahigeàmu meedam bohu meedam bak. Gi fai bak lada lamota meedam vabak. Dam amomoit ame im zi lam meedam di lam vedi ame dam laba neha, “Ahole meedalo,” lahame vi tau uledi gagodam bohu meedam damat modem bak.

will be added

X\