Fizeam Bitoho Im 14

1Labi im lada lam aadume neàdi eho neo vi aaha Domba Adat labe Aho vuusdam dam abo seratus empat puluh empat ribu ehe dam zi feà Sion Sibu laba Aho vou dozeadam bak eho ab aaham. Ame dam zi fai lam Yesus bake tu vuzehi im Abada meedam dam ame. Labi Alam damali Aho naedat vou aasdam bak ame. Labihasu, “Dam giidat fà ozobohudese,” lahame im dauha laba Domba Adat Yesus ozomomna labe Am ee lamti labi Am Ai Ala labe Am ee lamti laba itoedaha bak lam eho ab vi aaham. 2Labi ame bak lam aadam di labe eho neo vi aiha na daevat asum ahoba iuba ab aidamam. Ame na dae lam budua labe gi vao gum feàna dae lamti labi asum gilidume lautoidam dae lamti ulohona aida. Labi laha abo dogoit aim neà labe gi dam duana gitarti ulohona kecapi vuusualadume foadam labe muudam daeti ulohona aida. 3Ame na dae lam eho vi aidam di labe ame seratus empat puluh empat ribu ehe dam labe iho ame Nusumnabu Alabada modesdam bak lamti na ohemna ahia lamti dam meia im gagu modiam dam dua puluh empat ehe dam lamti labihasu iho avaesdam laba dozeadume ladeedam dae gàhàda faasi vou ladeedam bak eho neo ab vi aidamam. Lahana ame ladeedam dae gàhàda lam ba meia vouhome meit ozobohudem biem ladeedam daet modem bak. Gi ame seratus empat puluh empat ribu ehe dam labe abo Domba Adat aho dam bakda ahebu totbahota fàsi ibi iho faina meedam bak laba ozome gohali eloi am vasea veàtoho labe aho ot vai fa Ala bake loho dam lamota ihimo vouhodume ozobohudi ladeedam daet modem bak. 4Ame dam zi fai lam faina meedam bak voou fa tomba neàt meedam damat modem bak. Gi lahi dat amu modehe vab nam alimna modeo, dat lahi amu modehe vabda alimna modeo, lahadam bak lamti uloholi abo tomba neàt meedam labe ba na amomoi alalehena giomimna laba ahu adat iedi, “Feàte,” lahame vou baedume vàhàdedam vaba gi Domba Adat laba ahu adat iedi, “Feàte,” lahame vou baedam damat modem bak. Labi Domba Adat labe Aho gagoho bak lamota vuzehi uledi Aba vi duzu vi vuladam dam am bak. Ame dam lam ibi iho faina meedam bak laba ozome gohali Domba Adat labe am eloi am vasea veàtoho labe aho dam bakda ahebu totbahota fàsi Domba Adat labe Am Ai Alati iho vadaha dam am bak. Abo Israel dam aham di iube iho na dehena ahamte soaleheda fi hasi Ala bake lodam bak lamti ulohona meedaha bak. 5Labi ame dam lam laha im vameadam di ba vagedam vabak. Labi laha meit ame dam laba, “Uho git modeho,” lahame ba vàlu gagodam bak na vabak. Labihadaha dam zi eho ab vi aadaham. 6Labi im lada lam aadume neàdi eho neo vi aaha Alat Am im gagu vou usemda meida labe mahate asum gae toolehe vaba gi donibu laba boiadam bak eho ab aaham. Aho Alam Im Neàna abo veimdem bi ba setem biem Im lam dam bakda ahebu abo bak feàna meidati bak feàna meidati ahaladiame esuiaha dam zi ame. Labi dam debu mei debu meime dae ahaladiaha dam zi ame. Lahadaha dam zi feà laba ahate vou vameatedam bak ozome vou nom boiadam bak eho ab aaham. 7Ame Alat Am im gagu vou usemda labe gi dae buduana nehame vou buteme vameadam labe boia lada. “Alat Aho dam bake uloome aime neàdi fahedam di ab vou fuseo vabaleham tame. Labihàmu asum ahoba iuba modealahana lamti labi bak niba modealahana nimti labi itea ad laba modealahana lamti vao aana laba modealahana lamti labihasu na zi lam modi esuhu Ala laba um ahu adat iedi, ‘Am abo feàte,’ lahame Am ee vousai vou baedale,” lahame buteme gagodam bak lam eho ab vi aiham. 8Labi im lada lam aame aidume neàdi modeha Alat Am im gagu vou usemda meida labe neo ahamteda laba vi tusu boiadam labe im nehame vameadamna eho neo ab vi aiham. “Vàhàdeho. Vàhàdeho. Kota Babelti ulohona modesdam kota zi laba esdam dam lam modi vàhàdeho. Nam fi lohona labe, ‘Meit fà aba modese,’ laham bak laba ozome dam bake vou fohom anggur oo vaksa lam abo vao meona meia lu uddume bak vabilehezobe ostame fi loholehe bak lamti ulohona ame Babel dam labe iho dam bakda ahebu abo dam debu mei debu mei laham dam laba vou fohome ba Ala bake tu vuzehem vaba gi mu fa gi ibi iho bak niba modelo àhàkedam bak lamota meedàmu ab vàhàdeham tame,” lahame buteme gagodam bak lam eho neo ab vi aiham. 9Labi im lada lam aadume modeha Alat Am im gagu vou usemda làteladeheda labe dae buduana nehi bisteat vameadamna eho neo ab vi aiham. “Meit ame itea labe lehena meonabu lamti damat am it auet modehena lamti labihasu ahu adat iedi, ‘Am abo feàte,’ lahame am ee vousai vou baeda. Labi ame nabu labe am toheda zi laba uledi neha, ‘Iba laha am ee nohaeme itoedume esuse,’ lahame gagu im anekehà modeo, im dauha modeo, laba nohaeme itoeda. Labihasu meedam dam lam Alat gi meit meia tet ootedume tamao tet vao tauhu vabda udeme beom bakti ulohona Aho ame dam laba bisi faki feà bak fusi ba koena beodam kaio. Abo Alat Aho gagu am im vou usem dam zi lamti labi Domba Adat lamti iho nom aasdahit Alat ame dam lam vua gazihi feàna laba voedume galihasi geàda tame. 11Labi ame dam laba vabidume modi geàdam vua labe am vuahubu lam gi labaha bohu modesu bukeda tame. Ame dam labe iho ame itea labe lehena meonabu lamti labi damat am it auet modehena lamti labihasu iho im ahu adat iedi, ‘Abo feàte,’ lahame im ee vousai vou baeda. Labi ame nabu labe am toheda zi laba uledi neha, ‘Iba laha nohaeme itoedume esuse,’ lahame gagu nohaeme itoeda. Labihasu meedam dam lam iba lab modi vabidume geàdam bak lam ba vaitom kai. Abo digad diat modeo, usehe diat modeo, gi labaha bohu modi geàdamna tade tame,” lahame buteme gagodam bak lam eho ab vi aiham. 12Labihàmu eho Yohanesat ozoha, Alam damalehe dam nim abo Alat gagohona uledi meedam dam nim abo Yesus bake gi labaha bohu tu vuzehi meedam dam nim naat iba vabidam di gi ozahit keàtedi ibi iho meedam bak lam gi neo vi meedam bohu meedam bak. 13Labi im lada lam aadume neàdi eho neo aiha asum ahoba iubet na daevat nehame gagodam bak ab aiham. “Eho etei gagolo modem im nim oho laha toele. ‘Etei di nibe faasi im Boehàda Yesus bake tu vuzehi Amti vou ali ahu vàmadi bisi keàtedi lahasdume elodam dam lam deelehe bohu vuusdam dam am bak,’ laham bak lam oho laha toele.” Lahame eba labi gagoha Alam Aha Nutabe Neàna labe eba ab vi tau gagoham. “Imbo bak! Ame dam labe iho bak niba gi keàtet meedahemu ame bak lam Alat ba fa biem vabak. Abo ozobohudi gohali vamna lam ame dam laba asum ahoba iuba lolo modemu ame dam labe iho ba na meedume vanamadam vaba gi esdam bak,” lahame gagohona eho ab vi aiham. 14Labi im lada lam aadume neàdi eho neo vi aaha ulo fauhana eho aasdam laba ab li modesuham. Labi ame ulo laba nusdam datva ehet. Am alihi gi Asum Ahoba Iubet Bak Niba Li Dateleheda Alihoehena ààmomna eho ab aaham. Labi Am ohu laba dusuhuna lam abo emasat modehena Am ohu laba nom usu. Labi Am anekehà labe vuusdamna na modeme vahem ae kidesuhuna eimeona vuusda. 15Labi eho im lada lam aame modeha Alat Am im gagu vou usemda meida ame Fihasi Ala bake Vou Baedam Num Asum Ahobada iube futoi dae buduana ame da etei ulo laba nusdamda laba nehame ab vameadamam. “Dam bakda ibi iho bak niba meedaha im, ‘Neàna modeheo? Faina modeheo?’ laham bak uloome aime neàdi fahedam digat vou fuhemu om ae kidesuhuna lam ve om anekehàt ahamo bohulali nasi dam bakda ahebu vamateme ame baket nasi meedale. Abo bak adba niba dehe gandum amdi modeme vahedam bak vou fuhemu damat ae kidesuhuna ibida ve fi kbodume vahem bakti ulohona nasi modeme vahedale. Na ahebu amdehe di ab vou fuham bak,” lahame naat etei ulo fauhana laba nusdamda laba ab vameadamam. 16Lahame labi gagohoilahit ame ulo fauhana laba nusdamda labe aho am ae kidesuhuna labet bak adba niba anekehàt ahamo bohulali nom fi bovaha, bak niba dehena lam ahebu amdehemu ab modeme vahedaham. 17Labi im lada lam aame modeha Alat Am im gagu vou usemda meida labe neo ame Fihasi Ala bake Vou Baedam Num Asum Ahobada iube neo laha ae kidesuhuna eimeona neo vuusu vou futoi li duzuhuna eho ab vi aaham. 18Labi eho neo vi aaha Alat Am im gagu vou usemda meida abo ame Num Vàmteabu asum ahobada iuba modesdamna abo vuat usime vuahubuli ahana neàna feemna esum beahuba laba im dedateli vuusdamda labe ame bak labet li duzuhuna eho ab aaham. Aho li Alam im vou usi im vameadamda ame ae kidesuhuna eimeona vuusdamda laba dae buduana neo nehame buteme ab vameadamam. “Dam bakdate uloome aime neàdi fahedam digat vou fuhemu om ae kidesuhuna eimeona lam ve om anekehàt ahamo bohulali nasi dam bakda Ala bake fakemoholehe dam laba oho nasi beodale. Abo bak niba dehe anggur dee ahebu amdi modeme vahedam bak vou fuhemu damat ae kidesuhuna labe ame anggur labe am oo noha niz lamti fi kbodume vahedam bakti ulohona nasi modeme vahedale.” 19Lahame labi gagohoilahit Alat Am im gagu vou usemda labe am ae kidesuhuna labet bak adba niba anekehàt ahamo bohulali nom fi bovaha bak niba dehena anggur labe am oo noha niz lam ahebu amdehemu ab itezeadaham. Labi itezeadume neàdi vamateme na anggur oo vaheme damat nao nom gigime unamna feànabu laba ab vahedaham. Ame anggur oo vaheme damat nao nom gigime unamna feànabu lam gi Alat dam bakda faina meedam dam laba bisi faki feà bak fusi beodamna ozomomna am bak. 20Alam na im meedam dam toheda labe iho ame anggur oo zi lam ame nabu laba vahedam di gi kota bàhàgo bak laba modesuhuda laba vaheme nom gigime uname modeha am vaksa feà bak ab fuham. Abo ame dam laba beodume vasea feà bak fusi vao soaboti uloholi tà ladam labe ladume abo tiga ratus kilometer lamoho vou fuhu bak. Labi ame na vasea labe am nobu bak nom ulohom di abo dua meter lamoho nobu li modesdam bak.

will be added

X\