Matius 9

1Labi iheba ziddume neàdi Yesusat Aba Aho amu li esdam bak laba abo num debu Kapernaum laba lam bak ozome fa ab bioham. Labi biou zitu aaha dam duada zi labe Aba li vou faodam bak ab aaham. 2Ame di lam dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi laha laba tau dozeada. Labi Yesus zitu duzu modeha dam aheda labe dat nao zoho nutabedeheda ileba esu Yesus Aho avaesdam laba esum bak ozome ab vou li esuham. Dam labe ozo, “Im dat nao zoho nutabedeheda nim Yesusat modi fà neàdese,” lahame labi ozoho labe Yesus Aho avaesdam laba ab vou li nom esuham. Labi nom esuha Yesus ame dam labe iho ozom bak lam am ozobohudehemu dat nao zoho nutabedeheda niba ab gagoham. “Em adat ozomomda oa, om bisi a vi ozodamule. Obo oho faina meedàmu Alat beolo modem bak lam Eho gi vei mu fa faamome vei neàdeho.” Lahame labi gagoha netà niba dozeadaha guru zi labe ihimo ahulat aa nehi ozoda. “Oo, Da nim gi imti ulohoda baka ana modelo Aho ame da laba neha, ‘Obo oho faina meedàmu Alat beolo modem bak lam Eho gi vei mu fa faamome vei neàdeho,’ lahame labi gagodàla? Ame bak lam gi Alat Ahamo gagom bak akati Da nibe labi gagodàla? Da nibe gi Ala bake feàtàdam dàt mode taia?” lahame ab ozodamam. 4Lahame aa ozodaha bak lam Yesusat Ahamo ozobohudi dam laba ab gagoham. “Um etei baka ana Eba faki, ‘Em git gagoho,’ lahame Eba ozomsu meedà? 5Uho ozom, Eho ame nisileheda niba im gagom di im adida bisi damat aame ozobohudela? Eho nehameam, ‘Obo oho faina meedàmu Alat beolo modem bak lam Eho gi vei mu fa faamome vei neàdeho,’ lahame gagomeam damat aame ozobohudeo? Laham vabameam Eho gi neha, ‘Om nao zoho eloi nutabedehe bak lam Eho modi fa neàdeho. Nasi usai om ileba giame vuusu fa num bake lale,’ lahame gagomeam làhà damat aame ozobohudeo? Adida bisi damat aame ozobohudela? 6Lahana Em Abo Asum Ahoba Iubet Bak Niba Li Dateleheda nim Ala naedat Eba gagu olu Eho fa im dedateli ot vai meit faina meedàmu Alat beolo modem bak lam Eho gi vei mu fa faamome vei neàdem meoda Em am bak. Lahana Eho labihasu meedam bak lam um biem bake Ebe Eho etei modelo modem bak nim um nasi aasu vou faomale. Labi dat nao zoho nutabedeheda nim Eho modi fa neàdi usam bak uho aameam làhà um laha neo, ‘Em meit faina meedàmu Alat beolo modem bak lam Eho gi vei mu fa faamome vei neàdem meoda Em am bak,’ laham bak etei um laha aame vi ozobohudem bak.” Lahame Yesus labi vameadume neàdi ame dat nao zoho nutabedeheda laba ab gagoham. “Om usai om ileba visoi vuusu fa om num bake vou lale.” 7Lahame Yesusat gi etei labi gagoha ame da labe fa neàdi damat aasdahit amti usai am ileba visoi giame vuusu am num bake fa ab vou laham. 8Labi ame bak lam ame dam duada zi labe aahemu àvodi anekehàso it gaadam labe ahu adat iedi Ala bake ab vou baedamam. “Im amu na im feàna lamohona ba aaha vabak. Gi etei alimeat Alat Am feàna dat bakdate vizi im dedateli fa dam bake im feàna meedam bak im ab aaham tame,” lahame àvodi Ala bake ab vou baedamam. 9Labi Yesus ame bak lam vou esmozi ladam di labe aaha dat ee gagom Matius abo Yahudit modemda ab aaham. Im aho meedamda gi nehadam bak. Am Yahudi dam totbaho laba gagodume gi teo vi vaiam doi abo pajak lam aho vame fa Kaisarleheda laba loida. Ame doi lam atem dam meida Matius am bak. Am gi ame doi vadam num buà laba aidamna Yesusat am alihi aahemu ab gagoham, “Om Ebe Eho vahokedam im ozobohudelo vi tau meedam datelele,” lahame labi gagoha Matiusat usai Yesus bake ab vi tau meedam dateleham. 10Labi ba neo Matiusat am na àdehena zi àlo Yesus Aba vi tau meedam dam lamti gagome am numa na àm bake ab leham. Di lam Matius bake tau meia gi teo vi vaiam doi vadam dam totbaho zi lamti labi damat neha, “Faina modeho,” lahame ozomsum dam totbaho lamti labihasu ba li tau vazisi ame na àdehena zi lam ab àdamam. 11Laham bak lam Farisi dam labe aahemu Yesus bake vi tau meedam dam laba vi ailo ab gagoham. “Uba vuusdam guru labe akati modi meia gagu gi teo vi vaiam doi vadam dam zi lamti labi damat neha, ‘Faina modeho,’ lahame ozomsum dam lamti vazisi na zi vàmtea àdàla?” 12Lahame vi ailo gagoha Yesusat fa dam laba im totobe nidi nim nehame ab fi koadamam. “Uho ozom, dam aheda dokter abo obat vuusumdate lam meo? Vabà! Gi dam gaileheda ihimo obat vuusumdate lam bak. 13Ebe Eho bak niba li meedam bak um biem bake nasi meit Alat Vameadaha Im Toedahana laba im meida nim aame ozodale. Alat aham di iube Israel dam bake neha: ‘Uho bak niba esdam di bisi uho meedam im tombuda gi neham bak. Uho gi meia aame faobekesi im neà bak tau meedale. Uho labihasu meedam labe Em ahu bisi deelem bak am bak. Lahana ubu uho faina meedam bak fa faatom bak laba ozome na fi ho Eba lolo modemu oteme vua vahudam bak lam Em mahate deelem kaio.’ Lahame aham di iube toeme esuhu im lam uho mahate vi ozome ozobohudele. Neham bak. Eho bak niba lehe bak neham bak ozome lehe vabak. Damat neha, ‘Im abo Alat gagu fi hasi esuhu im zi ahebu ulohodesu vamdesu meedam dam im am bak,’ lahame ahobat neàdem dama Eho neha, ‘Uho faina meedam bak lam nasi voedume fa ahu neà bak vàmadi meedale,’ laham bak gagolo lehe vabak. Em gi damat neha, ‘Iho faina meedam damat modem bak,’ lahame it ozome gagodam dam laba neha, ‘Uho faina meedam bak lam nasi voedume fa ahu neà bak vàmadi meedale,’ laham bak gagolo lehe bak,” lahame Yesusat ab vameadaham. 14Labi im lada lam vahokedume neàdi ba neo Yohanes Mei Vuu Valo Baptisleiamda labe aba aho vahokedam im ozobohudelo vi tau meedam dam labe ihimo Yesus bake li vabi vi ailo ab gagoham. “Im Yohanesat aba aho vahokedam im ozobohudelo vi tau meedam dam nimti Farisi dam lamti iho Ala bake tom gagodalo modemu ahit na àm mu izidam meo bak. Ne lahana akati modi dam Oba vi tau meedam dam lam labiham vaba modela?” 15Lahame labi gagoha Yesusat gi damat Aba ba modem im laba ozome im totobe nidi nim nehame ab fi koadamam. “Dat soao labe nam soao valo na vahedam di labe ame da labe amti ot deeliam dam laba gagu vahi deelehat na àdam meo dam taia? Labi laha dat soao labe nam soao valo modemda ehe lahasuhu di lam am dam gi deeli na àm meo dam taia? Lahana ba diamut ame nam valo modemda lam modat li si utasi ve vou le setem di lam am dam totbaho labe im ahu faidi na àm mom di am taia?” lahame ab vi vameaham. 16Labi im lada lam vameadume neàdi Aho neo Yahudi dam labe im tai ahamda zi labe ibi iho vou vahoke usehe im lamti fa Aba Aho etei li vou vahoketedam im gàhàna nimti ulohodesu fa vahem biem bak laba vi ozome neo im totobe nidi nim ab vi fi koadamam. “Meit am sue amu soa dusumda vàusi bumatalemeam làhà ba sue gàhàna baa amu valo kikeme modi koedehe vabna zoho vaitoi ame sue vàuhu bak laba taasu tadem vabak. Labihameam ame sue etei tadeheda lam fa valo kikeme àga bake esu dehalem di ame sue gàhàna zoho lam gi ahamo fa koedi etei tadehena etehàso lam ziambitoi vàusi bumat olozebalem bake ozome ahit moho bak. 17Labi laha meit anggur oo gi etei unaha vaksa gàhàda fi kidi neàdehe vabda lam ba kambing fi ho sokba amu buhaleme bugeahana modi esu dehalehena laba fedem vabak. Meit labi modemeam ame na vaksa lam ba fi kidem labe ame na sokba amuda lam gi modi fi fasi ame na vaksa lam gi bake veàtom bak. Labi ame na sokba lab fedehena lamti gi amait vàhàdeme setem bak. Labiham bake meit ame na lam ba ozome modem vabak. Gi ame anggur vaksa gàhàda lam fa ame na sokba gàhàda buhaleme bugeahana modi laba fedem bak. Labi modem labe ame na sokba lamti ame na vaksa lamti gi amait iademe fi kidi neàna modesdam bak,” lahame Yesusat ame im totobe lam ab vameadaham. 18Labi Yesus gi etei Yohanes Mei Vuu Valo Baptisleiamda laba vi tau meedam dam laba vameadam lahasuhu di labe dat meida abo Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba vou aasdamda meida labe Yesus bake lefusi ozo, “Yesus abo feàte,” lahame am ahu adat iedi Yesusam naba modesdam bak laba netàdi ogomasu ahit bake ab biteham. Ogomasu biti tauledume gago, “Om etei eba tau taho num ebedate lase. Em adnamat gi etei eloi bisdalo. Om eba tau le em adnamat koeiso laba Om anekehàt odosu gagomeam fat ahedi usam bak.” 19Lahame labi gagoha Yesusat usai Aba vi tau meedam damti ame da laba tau vahi ab ladamam. Labi ladam di labe gi dam duali bak kekesi gi mei soat osiddam labe lada. 20Labi ladam di labe zie doni laba nam abo bako itaha bak bohu vuusdume dua belas tahun fuhu nam nibe laha nem futoi tau Am ohuse duzu vi vueda. Vi vuedam labe ozo, “Em gi Yesusam sue ahoba dusuhuda sona bohu noma zoho aha obe laba ulameam làhà em bako itaha bak bohu vuusdam bak nim fa neàdem bak,” lahame ozome lehe labe Yesusam ohus tote aa vi vuli netàdi Am sue laba ab vi ulaham. 22Labi vi ulaha Yesusat it vaktesi ame nam laba ab gagoham. “Oi, om a bisi vi ozodamule. Oho neha, ‘Yesusat eba modi fa neàdem bak,’ laham bak oho nasi tu vuzehehe labe om fa ab neàdeham bak,” lahame gi etei labi gagoha am bako itaha bak bohu vuusdam bak lam fa ab neàdeham. 23Labi laha labe le ame da Yairus abo Yahudi damat ihimo fi hasi meedam num laba vou aasdamda labe am numa vou fusi oli aiha abo bisi dahobu bak ab aiham. Dam dua totbaho labe nimidam labe meb dae meeda. Labi dam totbaho labe im mabso fi stehena ee gagom suling lam laha vuusualame koei esulo modem di suling dae meeda. Labihadam dahobuna feà Yesusat ab aidamam. 24Ame bak lam aihemu ab gagoham. “Um ahebu nasi futodale. Bisi a medaomule. Um adnamat eloho vabak. Gi iddalo,” lahame labi gagoha ame dam labe im koei nim eloho bak ozobohu labe fa Yesus bake vi igeame ab tozodamam. 25Lahana ame dam futodume neàdi Yesusat gi ozahit ame num oula koei ousdamda laba vi oli koei laba netàdi am anekehà vuu visoi gago, “Ednamat oa, usale,” lahame labi gagoha adnamat nim it oazi lahana fa leheilahit ab ahedeham. 26Labi etei Yesusat damat ihimo modem biem im feàna lam abo data elohona Aho lab modi fat ahedehe im lam kehàm vaba damat aime fa ame bak laba ab vou fi desi uloholeham. 27Labi ame bak lam vou esmozi Yesus neo ladam di labe fako faidi na aam biem dam behàsu ame zie obe laba aidameam aiha Yesusat lebohotelo modem bak meit iba gagohemu fa nem futoi dam duada ohus laba vi duzu vulada. Vuladam labe Yesus bake vi budda. “Yesus abo Dat Ahamda Boehàda Daud Vou Faat Lehe Mekehàda oa, Om iba aame faobekesi im neà bak tau meedaleee. Alat Gagu Fihasi Vimteme Oluhu Dat Boehàda, ‘Om am tame,’ laham bak im ozobohuteee.” 28Lahame labi vi bute ladameam Yesus le numa ab oleham. Làhàmu ame dam fako faida behàsu nibe neo vi vule ab oleham. Labi oli modeha Yesusat gut ailo gago, “Uho nehi ozome Eba lehe? ‘Um fako faidehe bak Eho modi fa neàdem bak,’ laham bak lam uho ozome Eba labi tuhu labe lehe?” Lahahat ame dam behàsu labe fa gago, “Lo, imbo bak. Ai Elaidamda, Oho labi modem bak lam im tuhu bak.” 29Lahame labi gagohemu Yesus Am anekehà fa dam labe im fako laba odosu gago, “Uho Eba labihasu tu vuzehi meedàmu Eho ab modi neàdeham bak.” 30Lahame gi etei labi gagoha ame dam ahim labe im fako faidehe bak lam modi fa na aam bak ab neàdeham. Labihazobe Yesusat fa dae meobeat mali ab vi gagoham. “Eho etei um fako faidehe bak modi fa neàdehe bak lam meia a le fi demule.” 31Lahame mali gagoha ame dam ahim labe ame num labe futoi laha labe kehàm vaba dam bake ab vou fi det laham. Abo Yesusat iba im feàna modehe bak lam ame bak laba dam ahebu vou fi desi ab uloholeham. 32Labi ame dam behàsu futoi neàdi dam aheda labe neo dat amu setan oli veimai dae vabaleheda labe am anekehà vuusu Yesus Aho avaesdam laba ab vou le vou duzuham. 33Labi Yesusat ame da laba, “Setan taho futoi itale,” lahame labi gagoha ame setan lam futoi itame modeha ame da nibe fa dae faasi im ab vameadamam. Labi modeha dam duada zi labe ame bak lam aahemu àvodi ihimo im ab ot gagoi ot gagoidamam. “Aa làhà! Ibi iho Israel damat azihi bak niba im feàna lamohona im amu aaha vabak. Gi etei alimeat ab aaham bak.” 34Lahana Farisi dam labe laha ame bak lam tau aahanàme ba labiham kai. Vedi neha, “Mei ahu oli veimam setan zi labe im boehàda Iblisit aho ame Da laba modi vizi teudehe labe Aho ame setan zi lam gagu futodume ilidam bak,” lahame ab ozomsu gagodamam. 35Labi im lada lam modeme neàdi ba neo Yesus Aba vi tau meedam dam lamti iho vazisi ame bak lam vou esmozi num debu mei num debu meime godam di labe aho Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num dozeadaha bak laba olidume Alat Vameadaha Im Toedahana lam aame gagodume vi vahokeda. Labi laha, “Alat dam bake deeli vame Am damali vuusu im vahokedam bak lam, ‘Akatihasu modemna modela?’ ” laham Im Neàna lam vou vameatedume fi deda. Labi dam nisilehe bak ahaladi ahaladiame faidehe dam lamti labi dam ahaladi ahaladiame gailehe dam lamti ahebu Aho modi fa neàdeda. Labihada. 36Labihadam labe aaha dam dua bak Aba valadam bak aam faimu ab faobekesi meedamam. Aho nehi ozo. Dam lam domba na vou aasdamda vabalehe bakti uloho bak. Ame dam lam iba vuusumda vabali naat iba vabidam labe, “Bisi im vamdesu meedam bak akete?” lahame gi ladehena dauhali meedam bak aahemu Yesusat ab aame faobekeham. 37Faobekesi meedam labe Aba vi tau meedam dam laba ab gagoham. “Gandum dua bak amdi bozileho. Lahana ame gandum nim modeme vahedam dam koete. 38Labihàmu uho utoho deda laba abo Em Ai Ala bake nasi nehi tom gagodale, ‘Ai oa, Oho fa dam na modeme vahem dam totbaho laha gagodume Om utoho laba oudume Om gandum fi kbodume vahedase. Abo dam Oba tuhuda amomoi laha gagome fa dam Oba tuhu vab dam labe iho azihi bak iuba oluidume Om Adat meedaha Im Neàna lam vou vameatedume uloholele,’ lahame mahate dihasi tom gagoda. Labi neo dihasi tom gagoda. Labihadale,” lahame ab vameadaham.

will be added

X\