Matius 26

1Labi ame im zi lam ahebu vahokedume neàdi Yesusat Aba vi tau meedam dam duabelas laba ab gagoham. 2“Uho neham bak ozobohudehena taia? Im Yahudi dam bada nibe iho im tai ahobada zi labe Im Adam Datahida Alat Oddaha Vabat Labohotehe Bake Vi Ozome Roti Fikidehe Vabna Àme Iziam di ee gagom Paskah lam neo fa ab vou fuseo vabaleham bak. Abo etei usi behàsdi ab fumam bak. Labi ame di labe Em Abo Asum Ahoba Iubet Bak Niba Li Dateleheda nim damat si meia ub lu damat ut tetehesuhunaso laba esu paku dodume elo tame,” lahame fet ab vameadume esuham. 3Labi ame di labe damat Ala bake lomna ve vua vahudam toheda zi laba vuusu im vameame faheme modiam dam lamti Yahudi dam bake vuusu im vameame faheme modiam dam busaoda zi lamti labihasu vazisi neàdi damat Ala Bake Lomna Ve Vua Vahudam Tohe Dam Zi Labe Bisi Boehàdatebo Kayafas labe aho azihi num feàda laba ab laham. 4Laba le vazisi im aa ab odoadamam. “Uho ozom, iho akatihasu modi zila audume Yesus si otela? 5Lahana ibi iho dam vahi na àme iziam di nim imo nasi Yesus a simule. Aba tu vuzehehe dam duada kota Yerusalem niba esdamda ehete. Iho di nibe aba simeam làhà dam dae gai fai ziddume iba beomo. Gi ba digat meit sise,” lahame im aa ab odoadaham. 6Amu Yesus num debu Betania laba le dat amu sokba faidi vàhàdem bohu vuusdamda modi fa neàdeheda Simon labe am num laba le aidam di labe nam meida vàmtea iba ab leham. Labi Yesus ame num laba vahi na àdam di labe ame nam labe aho doi duana vaha minyak ahana neàna amu ke fauhana ee gagom pualam meit modeme botolilehena laba fedehena aho vou le Yesusam ohu laba ab nom veàtoham. “Yesus abo feàte,” lahame ame bak laba vi ozome ab modeham. 8Veàtoi modeha Yesus Aba vi tau meedam dam labe iho ame bak lam aahemu faki dam ihimo aa ab voe voedamam. “Oo, akati modi doi feàna vaha minyak labi gi vàhàdedàla? 9Gi meia doi feàna ot loiame neàdi fa ame doi lam dam na vab dam laba fa lodam vaba mode?” 10Lahana ame lab voe voedam bak lam Yesusat Ahamo ozobohudi fa dam laba ab gagoham. “Um ana modi nam niba faki vabidàla? Um ozom vaba? Aho Eba lab modehe bak lam gi neàna modehe bak. 11Um dam na vab dam gi labaha bohu tau esdam labe vi taui vi tauidam labe esdam bohu meedam bak. Lahana Em etei nim ba uba tau azim bohu meedam vab Dàt modem bak. 12Eho ozoha, Em ba elom di koei noimna noime afoezobe ke bumata vou oli esum bakti uloho bak laba ozome Em so niba na lam ahit nasi fet veosi ahumdi esulo modem bake ahole modehe bak. 13Aho neàna modehe bakta imbote. Lahana Eho etei uba neo gagolo modem im imboda nidi nim laha nasi aima. Eho meedaha Im Neàna lam meit bak iudu iuba le vameadào? Bak iudu iuba le vameadào? Labihadam di ame nam nibe aba aho etei Eba lab modehe im lam damat laha aime ozobohudi fa ame im lamti vou vameatedam bak. Ba setem vaba gi labaha bohu vou aid ledam bak,” lahame Yesusat Aba vi tau meedam dam laba fet ab vameadaham. 14Ame di labe Yesus Aba vi tau meedam dam duabelas labe dat meida Yudas Iskariot labe aho damat Ala bake lomna ve vua vahudam toheda zi laba vuusu im vameame faheme modiam dam laba le vi ailo ab gagoham. “Eho Yesus vou fohome uba ub lomeam uho eba ana loela?” Lahame labi gagoha ame dam labe uledi iho doi oona perak ibida debe tiga puluhli ab loham. 16Labi Yudas ame doi lam ve neàdi aho ahit neà dateli le, “Yesus adi diat vou fohome dam bake ub loela?” lahame gi vou faoda. 17Labihadam di labe vou faodameilahit Yahudi Dam Vahi Ame Roti Fikidehe Vabna Àme Iziam di ab vou fuham. Vou fuhemu digat ahamteda labe Yesus Aba vi tau meedam dam labe Aba li ab gagoham. “Boehàda oa, im Paskah fuhemu iho vahi na àm bake iho ake le na modeme vaheme ahumdi esuela?” 18Lahahat Yesusat fa ab vi gagoham. “Uho kota Yerusalem laba le dat eho amu na àm bak gagu esuhuda laba nehi gagole. ‘Im gurut oba neha, “Am geàdume elom bak ab vou fuham bak. Labihàmu Aho Aba vi tau meedam damti vahi om num laba na àme iziam di Paskah fuhemu vahi na àlo modem bake na àmna modeme vahedume ahumdelo mozo,” lahaho,’ laham bake laba le gagole.” 19Lahame labi gagohemu Aba vi tau meedam dam labe Yesusat etei iba lab gagoho bak lam le ame Paskah vi ozome àdamna lam modeme vaheme ahumdi neàdi ab esuham. 20Labi disi aibulehemu Yesus Aba vi tau meedam dam dua belas lamti vahi ame num laba le na ab faasi àdamam. 21Faasi na àdam di labe Yesusat ab gagoham. “Um nasi iademe aima. Um etei niba na vahi àdam dam nim meida vàmtea labe Em vou fohome meia ub lomda niba ehete.” 22Lahame labi gagoha Aba vi tau meedam dam nibe im ahu faidi Yesus bake neha, “Ai oa, Oho ozom, eho modem im Oho gagohe?” lahame meit Yesus bake vi gagu ai. Meit neo vi gagu ai. Lahada. 23Lahahat Yesusat fa gago, “Ne, ame Eba vou fohomda lam gi Eba neab tau na vaksa fi lihibabu niba roti zoho ekeme ab àdamam bak. 24Lahana gi labihasule. Em Abo Asum Ahoba Iubet Bak Niba Li Dateleheda nim Eho ba modem im meit Alat Vameadaha Im Toedahana laba im meida nehasu toehe bak. ‘Elo tame,’ lahame fet toeme vàmadi esuhu labe ame bak ab imbodelo modemam bak. Aiee! Lahana ame da Em vou foholo modemda nim am oiat am faaha bak feidam vabate. Ame da nim Alat ba gi fai bak bohu tadelo modemda am bak.” 25Lahame labi gagoha Yudasat abo Yesus etei vou foholo modemda labe ab gagoham. “Ai Guru oa, Oho etei lab gagoho im lam eho modemna Oho nasi fet gagohe?” Lahahat Yesusat fa neha, “Lo, ohomo ab ozobohudi gagoham taia?” lahame ab gagoham. 26Labi ame lab vazisi na àdam di labe Yesusat neo roti ve Am Ai Ala bake, “Neàte,” lahame tom gagu neàdi ame rotibu lam agube faheme Am dam bake ab lodaham. Lodam labe nehame vi vameada. “Roti nim Em so am tame. Uho roti nim ve àm di Eba vi ozome àdale.” 27Labi roti lam àdume neàdi Yesusat neo anggur oo vaksa mokzoho fedehena ve Am Ai Ala bake, “Neàte,” lahame tom gagu neàdi dat meidate lu vuusu vameada. “Uho ame anggur oo vaksa nim um ahebu uddam labe ototo vaidale. 28Uho etei uddamna anggur oo vaksa nim nehi vi ozomna vaksa am tame. Amu Alat dam amudate gagu gohalemna lam fa vei seti etei nim Em vasea veàtolo modemna nim fa dam bakdate gohalemna Alat ab modi gàhàdeham bak. Dam bakda dua totbaho labe ibi iho faina meedam bak lam Alat ozahigeàmu im beodam vaba fa vei neàdedam bak vi ozome veàtolo modem vasea am bak. 29Lahana im imboda nidi nim iademe aime tu ozodale. Iho etei vahi uddam anggur oo vaksa nim Em etei nib udehe tade tame. Lahana ba diamut Em Ai Alat Eba modi Boehàdateboli dam bake abobo vuusu im vahokedam di labe ba udem bakti gagom kaio.” 30Lahame labi vameadume neàdi vou ladeedaha bak vàmadi ame num labe futoi kota Yerusalem vou esmozi Zaitun Dee Dozeadaha Bak Buzoho laba laitelo ab ladamam. 31Labi ladam di labe Yesusat Aba vi tau meedam dam laba ab gagoham. “Etei aibu nim damat Em simeam làhà Eho geàdam bak lam uho aahemu um ahu gelevai ubu uho amu Eba lab vi tau meedam bak lam fa seti Em vou esmozi ili tame. Eho meit Alat Vameadaha Im Toedahana laba im meida nehi toehe labe uba labi gagoho bak. ‘Ame da domba fi ho vou aasdamda lam Eho dam bake modi damat ote tame. Labi am domba gi fi goaitoi sete tame.’ Lahame labihasu toehe bak ehemu uba labi gagoho bak. 32Lahana Em eloho bak labet Alat modi fa ahedi usai Em Galilea bak laba nasi le uho ba vulem bake vou faoda tame.” 33Lahame labi gagoha Petrusat fa ab vi gagoham. “Vabà! Dat Boehàda oa, dam totbaho nibe im ahu gelevai ibi iho Oba tu vuzehi meedam bak lam fa seti Om vou esmozi ili tame. Lahana em vàmtea nim ba Om vou esmozi itam bak em ba vi ozom vabak.” 34Lahahat Yesusat fa gago, “Lo, oho lab gagoho bak ame. Lahana im imboda nidi nim nasi aima. Om ba labiham vabak. Om etei ba diham ozoh aibubet meit oba neha, ‘Om Eba vi tau meedamda am tame,’ lahame aame labi gagom di om fa vei iedi tem veibam bak làtelademeam kuk ab aaumam tame,” lahame ab fet gagu esuham. 35Lahahat Petrusat fa neo vi gago, “Dat Boehàda oa, Omti emti damat amediat otemta neàte. Em ba àvodem vabak. Lahamnàme em ahe lahasuhu di nim em ba meia neha, ‘Em Om bieho,’ lahame vageme Om mom vabak,” lahame labi gagoha Yesus bake vi tau meedam dam totbaho labe ame im lam aihemu gi Petrusat lab gagoho bak lamti ulohona Yesus bake neo ab vi gagodaham. 36Labi Yesus Aho neo Aba vi tau meedam dam lam ve Getsemani laba ab vou laham. Laba lafusi gago, “Uho niba nusualadume faode. Em iumà iuba le Em Ai Ala bake tom gagodalo mozo.” 37Lahame labi gagu neàdi Aho Petrusti Zebedeusam adam behàsu lamti labihasu dam làtela lamota, “Aba tau lele,” lahame gagu dam totbaho laba vou esmozi ab laham. Labi laba le lafusi modeha Yesusat Am ahu faidi feà bak fusi admahi ab meedamam. 38Làhàmu Aho Am dam làtela niba ab gagoham. “Em ahu faidi feà bak fuho. Em gi ab elom ahulaleham tame. Um niba faode. Em Ehemo iumà iuba le tom gagodalo mozo. Labi um niba esdam di a imule. Gi vou faovoi aasdale.” 39Lahame labi gagu neàdi Ahamo iumà iuba le ogomasu bake biti Am Ai Ala bake ab tom gagodamam. “Ai oa, em geàdalo modem bak nim Oho fa faatoi vei setem neào?” lahame gagu ozoha vabamu fa neo gago, “Vabo. Ebe Eho ozom bak fa feidate. Gi Obo Oho ozoho baket modem neàte,” lahame ab tom gagoham. 40Lahame labi tom gagu neàdi usai fa Aba vi tau meedam dam làtela laba fa le aaha dam gi beilame idaomna le aa. Le aame Petrus bake ukeme ab gagoham. “Petrus, Em kehàm vabna gi jam vàmteadehena um akati vou faovoi aasdam vaba idaoe? 41Iblisit uba li, ‘Um faina modem bak modeo,’ laham bak uba li um ahu ozolo modem di um ahu a bedemule. Gi mahate it vou faovoi Ala bake tom gagodale. Neham bak. Im ahu it ozomta gi neà bak modelo àhàki vi ozodam bak. Lahana im ahu nibet ihimo fatahivai bedem meo bak.” 42Lahame labi im vahokeme neàdi Yesusat Am dam làtela lam fa neo vou esmozi iumà iuba le Am Ai Ala bake Aba Aho amu tom gagoho baket neo ab tom gagodamam. “Ai oa, Em geàdalo modem bak nim Oho fa faatoi vei setem bak momeam làhà gi labihasuse. Ebe Eho ozoho bak fa feidate. Em geàdam neàte. Obo Oho ozoho baket modem neàte.” 43Lahame labihasu tom gagu neàdi usai fa Aba vi tau meedam dam làtela laba neo le aaha dam gi neo izeo àhàki feà bak fusi lavoidume fa idaomna le aa. 44Làhàmu gi le aame vou esmozi fa le Am Ai Ala bake Aba Aho amu tom gagoho bak lamti ulohona fa neo ame baket tom gagu ab làteladeham. 45Labi tom gagodume neàdi usai fa Aba vi tau meedam dam làtela laba fa neo le aaha dam gi beilame idaom lahasuhuna le aa. Làhàmu ukeme ab gagoham. “Ne, um akati bedali idaom lahasuhela? Nasi keesi usnadale. Asum Ahoba Iubet Bak Niba Li Dateleheda nim vou fohome dam faina meedam dam laba ub lomda iba ab fuseo vabaleham bak. 46Nasi usnadume ladase. Em vou fohome meia ub lolo modemda etei iubet ab ledamam bak.” 47Lahame Yesus gi etei vameadam lahasuhu di labe Aba vi tau meedam dam dua belas meida Yudas lam ab lefuham. Ahamo lem kai. Dam ae tot mo tot mo lahamna vuusualaha dam zi lamti labi eobu vuusualaha dam zi lamti labihasu aba tau mitaedume ab lefusi dozeadaham. Ame dam lam gi damat Ala bake lomna ve vua vahudam toheda zi laba vuusu im vameame faheme modiam dam lamti Yahudi dam bake vuusu im vameame faheme modiam dam busaoda zi totbaho lamti labihasu amu vameame ahumdi oudaha labe ame dam zi lam ab le omsuham. 48Yudas amu aho gi iumà ium ledam labe ame dam zi laba nehame fet gagu esu, “Uho aameam im Yahudi damat meia tàm di oode totti totti tomoamdem bak lam eho ame Da laba modehe bak uho aameam làhà ame Da am tame. Uho ame Da lam nasi sile,” lahame amu fet gagu ahumdi esuhu bak ehete. 49Labihàmu etei li dozeadaha di labe Yudasat gi taho Yesus bake ub fetu duzu ab gagoham. “Ai Guru oa, Om abo neàte,” lahame gagu Am oode totti totti ab tomoamdeham. 50Labi modeha Yesusat fa ab gagoham. “Oo làhà! Om Emti vou alemda om labihalo ozome Eba ab lehame? Làhà ame bak lam taho modele.” Lahame labi gagoho di labe dam duada zi labe vi feddume Yesus ab siham. 51Labi modeha Aba vi tau meedamda meida labe ae goha dusuhuna vuu vihitoi Damat Ala Bake Lomna Ve Vua Vahudam Tohe Dam Zi Labe Bisi Boehàdatebo labe am na meedamda lam beoha biou gi dogoi baata fatoi bake ab biteham. 52Labi modeha Yesusat fa ame da laba mali ab gagoham. “Aa! Ba meia a beomule. Neàdeho. Meit am ae tot mo tot mo lahamna labe meia belu elomeam làhà meit fa neo ame ae labe fa ame da laba belu eloi vi vataum meote. Gi feidate. 53Um ozom vaba? Eho Em Ai bake nehi tauleme gagomeam, ‘Eba taule,’ lahame gagom di Aho gi uledi Eba Am im gagu vou usem dam meo dam zi feà abo tujuh puluh dua ribu oudume Eba taum bak. 54Lahana Em Ai bake tom gem bak moho bak. Neham labe labihaha bak. Eho ame bak lam meedameam làhà meit Alat Vameadaha Im Toedahana laba im nehasu toehe im nim ba akati modi imbodela? ‘Alat Gagu Fihasi Vimteme Oluhu Dat Boehàda lam damat nehasu Aba mode tame,’ lahame lab toehe im lam ba akati modi imbode? Eho labiham bak vi ozome Em moho bak.” 55Lahame Yesusat Aba vi tau meedamda meida laba im vahokedume neàdi fa neo dam Aba silo lehe dam zi laba im ab vi vahokedamam. “Um Em otelo vabeddamna akati Eho amu Fihasi Ala Bake Vou Baedam Num Vàmteabu labe am ad oli aam bak tomba laba Eho Alam im vahokeme leidamehamdehena abo umti vahi meedamna akati ame di labe Em taho si otem vaba mode? Uho ozomta vedi Em dat aa li ausume mei beome im nazoh gelevai esmozi laiam dàt mode tiba uho etei aeti eobuti ab vou lehame? 56Lahana uho etei nib meedalo meedam im nim ahebu gi ahole meedalo modem bak. Neham bak. Dam ahamda Alat vameadaha im aime fa dam bake ahate vameaidaha dam zi labe iho amu fet toeme esuhu im lam imbodelo modem labe uho vabili etei ab meedamam bak.” Lahame labi vameadume neàdi modeha Aba vi tau meedam dam lam ahebu iedi Am vou esmozi fi goaitoi ab ilime seteham. 57Labi Yesus sihi dam labe Am vou duzu vou ladume Damat Ala Bake Lomna Ve Vua Vahudam Tohe Dam Zi Labe Bisi Boehàdatebo Kayafas labe am num feàda laba ab vou laham. Amu dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti Yahudi dam bake vuusu im vameame faheme modiam dam busaoda zi lamti labihasu ame num bumat laba amu le ahumdi vou faoda. Labi dam lam gi laba esdamna ahum Yesus ab vou fuham. 58Ame di labe Petrusat gi vaitesu ba aa vi duzu vulada. Labi ame num feàda labe am ad oli aam bak tomba laba vi fusi ame meo dam labe num feàda laba vou aasdam dam lamti gi aa valiheme laba vi tau nusda. “Damat Yesus bake akati modela?” laham bak aalo aa nusu vou faoteda. 59Ame di labe damat Ala bake lomna ve vua vahudam toheda zi laba vuusu im vameame faheme modiam dam abo Yahudit Ibi Iho Modem Im Gagu Vàmadi Esum Dam Debu labe im dam zi lam vahe vahedume Kayafasam num laba im neham bak gagolo àhàki bakamta vahi vou faoda. Damat neha, “Yesus git modeho,” lahame gagu Yesus bake giomim vàlum damat li im gagom bake aihizobe Roma eeda laba ub lu, “Yesus fà beome elose,” laham bak gagolo àhàki vou faoda. 60Labi vou faodaha giomim vàlum dam duanàme ame eeda zi labe ibi iho aime vàlum neàda aihizobe vàlusome vou faoha ba ame bak lam taho vi aim kai. Labi neo vou faodameilahit dam behàsu labe lehe labe ame dam eeda labe iho avaesdam laba li ab duzuham. 61Li duzu gago, “Iho aiha ame Da nibe Aho nehi gagoha. ‘Ame Fihasi Ala Bake Vou Baedam Num Vàmteabu nim Aho beodume fa faamome seti usi behàsdi Aho fa mo tame,’ lahame gagoho bak lam iho aiho.” 62Lahame labi vàlu gagohemu Damat Ala Bake Lomna Ve Vua Vahudam Tohe Dam Zi Labe Bisi Boehàdatebo labe am ahu gukeme usai tomba duzu Yesus bake netàdi vi ailo ab gagoham. “Om dam nibe etei Oba vàlu gagoho im nim Om taho veibame fa gagom vaba?” 63Lahame gagoha Yesus ba dae buhu vaba gi daleàdi vou faoda. Làhàmu ame Tohe Dam Zi Labe Bisi Boehàdatebot aho fa neo vi ailo gago, “Om, ‘Alat Gagu Fihasi Vimteme Oluhu Dat Boehàda abo Alam Adat am bak,’ laham bak lam imbodemeam làhà taho fa Ala elom giki Ala abo gi labaha bohu modesdam Ala labe Am ee gagu, ‘Om ame da am tame,’ laham bak taho gagu vàmadi esule.” 64Lahame labi gagoha Yesusat fa ab vi gagoham. “Lo, oho etei Eba lab gagoho bak lam ohomo imbo bak ab gagoham bak. Alat Gagu Fihasi Vimteme Oluhu Dat Boehàda lam Em ame Da am bak. Lahana, ‘Em laha Alam Adàt modem bak,’ laham bak lam um biem bake Em ba diamut nehi meedam labe uho laha, ‘Imbote,’ lahame neo gago tame. Ba diamut uho Em Abo Asum Ahoba Iubet Bak Niba Li Dateleheda nim uho Eba aam di Em fa feà Dateli Ala Bisi Feàda labe Am ahi totbaho laba tau nusu na ahebu vuusdam bak lamti Em asum ahoba iube fa uloti bak niba lem bak lamti labihasu uho aa tame.” 65Lahame labi gagohemu ame boehàdatebo labe aho aime faki am sue ahoba dusuhuda lam gi ahamo naedat auet it vome geleme ab faheham. Faki dam eeda totbaho niba ab gagoham. “Um aim vaba? Da nim gi Ala bake feàtàhà bak. Aho vedi, ‘Amti Alati ulohote,’ lahame gagoho bak lam uhumo ab vi aiham taia? Ba akati meit neo li vàlu gagom im lam iho aie? Ame da nibe Aho gi Ala bake lab feàtàhà bak lam uho ozom, Da nim akatihà?” Lahame labi gagoha ame dam eeda totbaho labe vazisi fa ab gagoham. “Lo, ibi iho fi hasi baleàhà bak lam Da nibe vazidazehemu gi gagu otem neàdehe bak,” lahame ab gagu vàmadeham. 67Lahame labi gagu neàdi dam zi totbaho nibe Yesusam dauha laba keha beàdam labe aumbut vi foida. Labi dam totbaho nibe iho sue baa visoi Yesusat iba aam bak labna zohàme Am fakode laba baguamdi meit au baat Am oode laba vi fu tozome gago, “Hohoa. ‘Om Alat Gagu Fihasi Vimteme Oluhu Dat Boehàda am tame,’ lahamda Oho ozom, Oba amat beo. Taho iba fa gagoma,” lahame meit vi fu tozome gago. Meit vi fu tozome gago. Lahada. 69Ame di labe Petrusat gi ame num labe am ad oli aam bak tomba laba nusda. Nusdume modeha mei na meedam nam labe aba li netàdi ab gagoham. “Om Yesus Galileada bake vi tau meedam dam meida om am taia?” 70Lahame labi ahate gagoha Petrusat, “Damat fà aise,” lahame ab tem veibadamam. “Vabo. Oho etei lab gagoho im lam em ozom vabili mozo.” 71Lahame gagu neàdi aho usai ame num feàda labe am ad oli aam bak tomba ub futom doo obe laba le duzu modeha na meedam nam meida labe neo aame dam dua bak laba ahate fi desi ab gagoham. “Imbot. Ame da nim gi Nazaretda Yesus abo damat etei sihida laba vi tau meedamda meida am bak.” 72Lahame neo labi ahate gagoha Petrusat fa ohu vame tem ab veibadamam. “Ame Nazaretda lam em bieho. Eho giomim gagomeam làhà Alat fà eba beose.” 73Labi gagu neàdi neo duzu vou faodameilahit dam am obe laba dozeadaha dam labe aba neo li netàdi ab gagoham. “Mm, abo imbote. Om abo damat etei sihida laba vi tau meedamda meida am bak. Iho gi oho im gagom bak vi aim di om gi Galilea damat im gagom bakti uloho bak.” 74Lahame dam labe neo ahate gagoha Petrusat, “Damat fà aise,” lahame fa neo ohu vame ab tem veibadamam. “Uho etei gagohoda lam em bieho. Eho giomim gagomeam làhà Alat fà eba beose.” Lahame gi etei tem veibaha bak làteladeha kuk ab aauham. 75Labi kuk aauha Petrusat Yesusat aba amu nehame fet gagoho bak lam fa ab vi ozobohudeham. “Om etei ba diham ozoh aibubet meit oba neha, ‘Om Eba vi tau meedamda am tame,’ lahame aame labi gagom di om fa vei iedi tem veibam bak làtelademeam kuk ab aaumam tame,” lahaha bak lam ab vi ozobohudeham. Làhàmu dam dua bak vou esmozi futoi iumà iuba le ahu faidi nom bohusu bisteat meb dae ab faaham.

will be added

X\