Matius 25

1“Ba diamut Alat Ahamo Boehàdateli Dam vuusu im vahokedam di dam adidate Aho uledi Am Damali Aho vuusu im vahokedàla?” laham bak lam Yesusat vahokedalo im totobe nidi nim ab faasi fi koadamam. “Eho ba fa Boehàdateboli li Em damalehe dam laba vuusu im vahokedam di gi im totobe Eho etei fi koadalo modemda nimti uloho bak. Lahi soaona sepuluh zi labe ozo, ‘Dat nam etei valo modemda lam damat vou dozeadume dokbuedam labe vi vihitoadam dam zi lam imo doait le gut tau vou lase,’ lahame ozome im vua fauhaedamna zohobubeà ahala vuusu vuusuiame doait ab laham. 2Ame lahi soaona sepuluh lam fàsi auohole totbaho ahusobu lahi soaot moz. Labi lahi soaona auohole totbaho lamota im ozobohu lahi soaot moz. 3Laham lahi soao ahusobuda labe vedi vua fauhaedamna ibida abo zaitun oo modi minyaklehena folem di ba fedeme fauhaedam bake ozome fetehesu vame vou ladam kai. Vedi gi iho etei lab fedeme fauhaedamda lamota labihasu vou lada. 4Lahana lahi soao im ozobohuda labe im vua fauhaedamna ibida amu fedeme fauhaedamda lamota ahumdi tu vou ladam vaba abo ba neo minyak folem di fedeme fauhalem bakti ozome fetehesu vame ab vou ladaham. 5Labiham lahi soaona sepuluh labe le vou faodaha ame dat nam etei valo modemda lam taho vou fuhu vaba kehàdume modeha ame lahi soaona lam iho izeo àhàki lavoidume ab idaomam. 6Labi idaomeam usi neisoat damat ab buteham. ‘Dat nam etei valo modemda ledalo. Imo nasi doait le gut tau vazisi vou ladase,’ lahame butedam bak aihemu keeddume im vua fauhaedamna lam vabiedume neàdi fa neo usidume ab fauhaedamam. 8Lahana lahi ahusobuda labe vua ibida minyak vabali sutelo meedàmu fa lahi im ozobohuda laba ab gagoham. ‘Iba minyak zohovat vàle. Vua fau ibida suti seddalo mozo,’ lahame tauleda. 9Lahahat lahi im ozobohuda nibe fa gago, ‘Vabo. Minyak ibida uba lomeam ibida ba uloholem vabak. Labiham bake ibida ba uba lom kaio. Uho nasi minyak ot loiam bak laba le doit vale.’ 10Lahame labi gagohemu ame lahi ahusobuda auohole lam fa minyak valo ab ladaham. Gi etei iumà ium ladam di labe dat nam etei valo modemda ab lefuham. Labihàmu lahi soaona im ozobohuda labe im vua fauhaedamna lam fetehesu modi ahumdi vou faodam labe ame da lefuhemu vi tauidume ame na vahi àdalo modem num laba ab vi oedaham. Labi vi oedume neàdi num doo lam ab it baguamdi teudeham. 11Labihadam di labe lahi soaona ahusobuda labe minyak vame neàdi fa vou li aaha dam num doo teude. Doo teudehemu bako laba dozeadume budda. ‘Ai oa, doo fi stole. Im vi tau oedase.’ 12Lahame butidaha dat nam etei valo modemda labe fa ab gagoham. ‘Imbote. Em um biehemu ba doo fi stom vabak.’ ” 13Lahame Yesusat ame im totobe lam fi koadume neàdi ab vi gagoham. “Ame bak lam labihahemu uho mahate it vou faovoi ozodam labe ahumdi vou faodam labe ibzidale. Eho ba fa lem digat labe am jamti um vabilem bake labihadale,” lahame Yesusat fet ab vameadume esuham. 14Labi im lada lam vameadume neàdi Yesusat Aho ba Boehàdateboli bak niba fa li Am damalehe dam vuusu im vahokedalo modem di Aho li aameam, “Dam bakda Aho gagoho im uledi meedào? Meedam vabao?” lahame vi gagu aim bak ehedaleàmu im totobe nidi nim neo nehame ab vi vameadamam. “Eho ba fa lem di gi im totobe Eho etei uba fi koadalo modemda nimti uloho bak. Dat am soa maehe nazoh duada labe aho bak mei bake le ibzidalo modemu am na meedam dam gagome li dozeadume neàdi fet ab vameadamam. ‘Em soa maehe nazoh abo emas nim uho omozit iademe meedume emas fa duali vou faodale. Em bak iuba le koena azibehamdi fa le tame.’ 15Lahame labi gagu neàdi ahamo ozo, ‘Da lada lam na meedam di keàteda ame. Da nidi nim na meedam di keàtet meedam vabda ame?’ laham bak laba ozome doi oona emas ab ahaladi ahaladiame lodume ab vou esmoham. Nehasu faheme loda: Am na meedamda meida laba doi oona emas dom abo auohole loda. Labi am na meedamda meida laba neo doi oona emas dom behàsu loda. Labi am na meedamda meida laba neo doi oona emas dom gi vàmtea lo. Labihasu am emas lam lodume esmozi ab laham. 16Dat naeda labe gi etei le setehe omozit am na meedamda ame emas dom auohole vahada labe ozo, ‘Em akati modem labe em aiam emas dualela?’ lahame le nabime aaha emas modi dualem bak aahemu laba meedume doi oona emas dom auohole amomoi neo ve vi tau ab sepuluhleham. 17Labi dat meida ame emas dom behàsu vahada labe aho neo abada vou le meedume doi oona emas dom behàsu neo ve vi tau ab ahialeham. 18Lahana dat meida ame emas dom gi vàmtea vahada labe aho am aiam emas lam meedume dualem bake nabidam vaba vedi gi ve bak sime baumsu ab esuham. 19Labi ibzidume aaha dat naeda fa ab leham. Fa li ozo, ‘Eho dam niba ahumdi esuhu bak lam em emas iademe na meedume dualeheo?’ laham bak gagu vi ailo am na meedam dam làtela niba ab gagu fet lei fet leidamam. 20Leidam di labe dat ame emas dom amu auohole vahada lam aba aho ba meedume ve vi tauhuda auohole lamti vahi sepuluhlehena lam am ai bake ab vou li duzu gagoham. ‘Ai oa, oho nasi aamale. Oho amu eba lodume vou esmoho emas dom auohole lam eho ve fa omozit meedume emas dom auohole amomoi neo vi tau ab sepuluhleham tame.’ 21Lahame labi gagoha dat naeda labe fa gago, ‘Lo, neàte. Eho oba lu vou esmohona lam oho abo iademe vuusu vou meedaha bak lam abo neàte. Eho oba gi koena lohona oho iademe vamdesu meedaha bake eho oba neo na buduada neo oba lu oho neo vou aasdalo mozo. Oho nasi ebe eho deelehat azim neà bak niba vi tau azile,’ lahame gut gagu ve aba ab tau aziham. 22Labi vou faodameilahit dat meida emas dom amu behàsu vahada lam aba aho ba meedume ve vi tauhuda behàsu lamti vahi ahiali am ai bake ab vou li duzu gagoham. ‘Ai oa, oho nasi aamale. Oho amu eba lodume vou esmoho emas dom behàsu lam eho ve fa omozit meedume emas dom behàsu amomoi neo vi tau ab ahialeham tame.’ 23Lahame labi gagoha dat naeda labe fa gago, ‘Lo, neàte. Eho oba lu vou esmohona lam oho abo iademe vuusu vou meedaha bak lam abo neàte. Eho oba gi koena lohona oho iademe vamdesu meedaha bake eho oba neo na buduada neo oba lu oho neo vou aasdalo mozo. Oho nasi ebe eho deelehat azim neà bak niba vi tau azile,’ lahame gut gagu ve aba ab tau aziham. 24Labi neo vou faodameilahit dat meida emas dom amu vàmtea vahada lam neo ab li duzu gagoham. ‘Ai oa, oho iba meedam bak lam em ozobohu bak. Om abo dae teuna meedam dàt iba vuusu meeda. Om bisi meit debe soalehena gi ahum gagome vada. Meit ahamo meedume vanamai nuhatehena oho vedi gi ahum vada. 25Labihàmu oho eba loho emas dom lam eho meedume ame emas lam dualehe vaba setemeam làhà oho eba faki beom bak labna zohàme em fa iedi oho eba loho emas dom vàmtea lam eho le bak sime fa baumsuhu bak. Ame emas dom neam tame. Oho naedat nasi fa vale.’ 26Lahahat dat naeda labe ame lab gagoho bak lam aime faki ab gagoham. ‘Om abo eho na gagom di au vabali odohabulehe dàt modem labe bisi faina meedam dat om am bak. Oho eba neha, “Em bisi meit debe soalehena gi ahum gagome vada. Meit ahamo meedume vanamai nuhatehena eho vedi gi ahum vada.” 27Laham bak lam om ozobohudehena akati eho oba loho emas lam oho neo ve damat mei emas modi duaedam num laba vou oli esu eho fa lehezobe ame emas fa dualehena oho eba gut lom vaba modela?’ 28Lahame gagu neàdi am im ot vai meedamda meida laba ab gagoham. ‘Oho nasi da labe vuusuhu emas dom vàmtea lam si vietoi fa em na meedamda meida labe aho em emas modi sepuluhleheda laba taho fa lole. 29Neham bak. Eho meia neha, “Em na nimota oho vou aasdale,” lahame gagu ame da labe aho iademe vuusu vou aasdameam làhà eho ame da laba neo neha, “Em na nidi nim oho laha vou aasdale,” lahame gagu ame na vi tau duali feà bak fusi vuusu vou aasdam bak. Laham vabameam eho meia neha, “Em na nimota oho vou aasdale,” lahame gagu ame da labe aho iademe vuusu vou aasdam vabameam làhà eho naedat ame da laba gagu meedam im lam gi fa faatoi vei setem bak. 30Labihadàmu oho nasi em na meedamda nim abo na im vi ozome modem biemda nim nasi si vou futoi bàhàgo bak iuba bisi aibu feà bak laba voou ame da nibe fà kikezi geàdam labe ahu faidi meb dae feàna faasi meddase,’ ” lahame Yesusat im totobe lam ab fi koadaham. 31Labi im totobe lada lam Yesusat fi koadume neàdi ame im zoho lam Aba vi tau meedam dam niba neo nehame vi vahokeda. “Em Abo Asum Ahoba Iubet Bak Niba Li Dateleheda nim Em Aiat Eba gagu Eho ot vai Boehàdateboli fa bak niba lem di Em Aiat Am na fauha meona fako iedemna ogatei modealaha bak lam Eba modi vizi feà Dateli le tame. Labi Em im gagu vou usem dam zi laha Eba vi tau le tame. Labi ame di labe Eho Boehàdat nusumna abo Em Aiat Am na fauha meona fako iedemna ogatei modealahana nusumna laba Eho nusu dam vahi vuusu im vahokeda tame. 32Labi ame di labe Eho Em im gagu vou usem dam laba gagu le dam mei debuti dam mei debuti ahebu atetedume vou li Eho avaesdam laba dozeadume neàdehezobe Eho faheme dam debu behàsdelo mozo. Abo na fi ho vou aasdamda labe aho am domba zi fàsi bak mei bake vahe. Labi am kambing zi fàsi bak mei bake neo vahe. Labiham bakti ulohona mode tame. 33Eho ame bak lam meedam di labe Eho dam Alat Aho ozome gagoho im lam uledi meedaha dam lam abo dombati uloho dam lam Eho ve fi hasi fa Em anekehà ahi totbaho niba oumaheda. Labi dam Am im mu voedaha dam lam abo kambingti ulohoda lam Eho neo ve fa Em anekehà soi totbaho laba oumaheda. Labihada tame. 34Labi Eho Boehàdatebo nibe Eho dam Em anekehà ahi totbaho niba oumaheda zi niba nehi gagom bak. ‘Um abo neàte. Eho dam vuusu im vahokedam bak niba nasi oedale. Em Aiat Aho uba faobekesi neà bak ozome meedalo modemna zi uba etei ab modelo modemam bak. Abo Em Ai Alati ahili aham di iube na ahebu alimeat meedaha vab di iube iho im behàsut fet ozome ahumdi esuhuna ziat modem bak. Nasi oedume um naedamalele. 35Nehaha bak. Eho amu idoalehe di labe uho Eba na àmna lodume Eho ve àda. Labi neo Eho valo àhàki modehe di labe uho laha Eba vao noai Eba lu eho ude. Labi Eho bak mei bak iube fa uba lehe di labe uho Eba ule neàt gut ve um num laba ousu idda. 36Labi laha Em sue vabali so bozbulehemu uho Eba sue lome duada. Labi laha Eho gaili meedaha di labe uho Eba li faobekesi vabieda. Labi laha damat Em si sel ousuhemu uho Eba li Em ahu faidem bak labna zohàme uho Eba vabededa.’ 37Lahame Eho labi gagodam di labe ame dam Alat Aba Aho gagoho im vuzehi vamdesu meedam dam Em anekehà ahi totbaho labe fa Eba nehi gagom bak. ‘Ai Boehàda oa, Om adi diat idoali iho aame Oba faobekesi na lome àdàla? Om adi diat valo àhàkehemu iho aame Oba faobekesi vao noai Oba lu uddàla? 38Om adi diat bak mei bake iube iba li iho Om ule neàt gut ve num ibida vou oli iddàla? Om adi diat sue vabali so bozbulehemu iho aame Oba faobekesi sue lome duadàla? 39Om adi diat gaili meedàmu iho aame Oba faobekesi li vabiedàla? Om adi diat damat Om si sel ousuhemu iho Oba li om ahu faidem bak labna zohàme iho Oba vabededahela?’ 40Lahame ame dam labe labi gagodàmu Eho Boehàdatebo nibe fa nehi gagom bak. ‘Nasi ozomale. Bisi imbo bak gi neham bak. Dam Eba vi tau meedam dam nim abo Em dam nim abo gi ee feà vab dam meida buà niba uho ame bak laba vi ozome ame dam niba tauhu di labe uho gi ame bak lam Eba laha modehena ozomom bak.’ 41Lahame labi gagu neàdi Eho dam Em anekehà soi totbaho niba oumaheda zi niba Eho nehi gagom bak. ‘Um Em Aiat amu gagu uloodume esuhu dam nim uho nasi bak nidi nim vou esmozi ilile. Abo gi vua eludamna sutem gikina bohu laba nasi le beodume geàdale. Ame bak lam Em Ai Alat Aho aham di iube nehi fet ozo, “Gi Iblisti Em im gagu vou usem dam totbaho aba tauhu dam lamti labihasu gi Eba vaitesu nasi vua eludamna sutem gikina bohu laba le beodume geàdase,” lahame ozome ahumdi esuhu bak laba le geàdale. 42Nehaha bak. Eho amu idoalehe di labe uho ba Eba faobekesi na àmna lodaha vabak. Labi neo Eho valo àhàki modehe di labe uho laha Eba faobekesi vao noai Eba lu udehe vabak. 43Labi laha Eho bak mei bak iube fa uba lehe di labe uho ba Eba ule neàt gut ve um numa vou oli ousu ihi vabak. Labi laha Em sue vabali so bozbulehemu uho ba Eba sue lome duadaha vabak. Labi laha Eho gaili meedaha di labe uho ba Eba li faobekesi vabiedaha vabak. Labi laha damat Em si sel ousuhu di labe uho ba Eba li Em ahu faidem bak labna zohàme Eba vabededaha vabak. Um gi labihadam dam tadehe bak.’ 44Lahame Eho labi gagom di labe ame dam Em anekehà soi totbaho niba oumaheda zi nibe fa Eba nehi gagom bak. ‘Ai Boehàda oa, Om adi diat idoali iho aame faobekesi na lu àhà vaba mohela? Om adi diat valo àhàki meedàmu iho aame faobekesi vao noai lu udehe vaba mohela? Om adi diat bak mei bak iube iba lehemu iho ule neàt gut vaha vaba num ibida malehela? Om adi diat sue vabali so bozbulehemu iho aame faobekesi sue lome duhu vaba mohela? Om adi diat gaili meedàmu iho aame faobekesi li vabiedaha vaba mohela? Om adi diat damat si sel ousuhemu iho li vabededaha vaba mohela?’ 45Lahame ame dam labe labi gagodàmu Eho Boehàdatebo nibe nehi fa gagom bak. ‘Nasi ozomale. Bisi imbo bak gi neham bak. Dam Eba vi tau meedam dam nim abo gi ee feà vab dam meida buà niba uho ame bak laba vi ozome ame dam niba tauhu vab labe uho gi ame bak lam Eba laha modehe vab damat ozomom bak.’ 46Lahame Eho labi gagu neàdi ame dam lam gi Eba vaitesu vua eludamna sutem gikina bohu laba ab le geàdam bohu modesdamam bak. Lahana ame dam Alat Aba Aho gagoho im vuzehi vamdesu meedam dam laba Eho modi dam lam Emti vahi gi ahe neàna bohu vuusda tame,” lahame ab vahokedaham.

will be added

X\