Matius 22

1Labi im totobe lada lam fi koadume neàdi Yesusat Aho ame Yahudi dam busaoda zi laba im totobe meida nim neo nehame ab fi koadamam. 2“Alat neha, ‘Um Em damali Eho uba vuusu im vahokedam neàte,’ lahame fet gagu esuhu im lam damat aime uledi Alam damalem bak lam Eho uba vameadase. Ame bak lamti dat boehàda labe am adat nam vam bake vazisi na àm bake dam bake gagu oluhu im lam damat aime uledi lem bak lamti uloho bak. Neham bak. Dat boehàda labe am adat nam valo modemu fa vazisi na àm bak ab ozoham. 3Làhàmu am na meedam dam laba gagodume aba aho ozoho dam iuba, ‘Lele,’ lahame fet gagu esu. Labi neo dam iudu iuba, ‘Lele,’ lahame fet gagu esu. Labihada. Labi ame na àdam digat fuhemu am na meedam dam laba neo gagome aho amu di iube, ‘Lele,’ lahame fet gagu esuhu dam laba ab gagu oluham. ‘Neàdeho. Nasi ledale,’ lahame gagu olu vou faoha dam lem mouda. 4Làhàmu fa neo am na meedam dam totbaho neo gagome olu. ‘Uho dam eho amu fet gagoho dam laba le nehi gagole. “Nasi ledale. Na zi feà nim àdeho. Em abo sapi dooda zi nimti sapi adam eho amu na vaheme budualeheda zi nimti ahebu oddume ohume àdemahedume neàdeho. Nasi em adat nam vam bake ozome deeli vahi na àm bak niba nasi ledale.” Uho labihasu le gagodume vou ledale,’ lahame am na meedam dam neo gagome ab oluham. 5Labi dat boehàdat aho amu fet gagu esuhu dam laba le gagoha dam ahebu gi ailahigeàmu fa im amomoi la modi le modida. Dat meida gi am utoho laba le na meeda. Labi dat meida labe aba aho doilem bak laba le na meeda. 6Labi ame dam totbaho labe gi boehàda labe aho etei oluhu dam laba gut siàdume afoezobe beodume ab oddaham. Labihada. 7Labihadàmu ame boehàda labe aho ame bak lam aihemu faki feà bak fusi am meo dam zi laba ab gagome oluham. ‘Dam lam le oddume fa vi vatause. Labi im num debu bak lam laha vuat beole,’ lahame gagu olu ame baket ab modeham. 8Labi ame baket modi neàdi am na meedam dam totbaho neo gagome bakamta dozeadume neàdi neo ab gagu oluham. ‘Em adat nam vam bake damat deeli vazisi na àlo modemna zi nim àdeho. Lahana eho amu neha, “Lele,” lahame fet gagoha moudaha dam lam ahole lehe vaba vooho bak. 9Labihàmu uho zie sedieba bak laba le dam gi laba goomda zi ahebu gagole. “Na àm bak niba li vazisi na àdase,” lahame gagu fa eba oluidale,’ lahame ab gagu oluham. 10Labi am na meedam dam labe le ame baket ab meedamam. Abo zie sedieba bak laba le iho aaha dam ahebu gagodume na àm bake ab oudaham. Abo dam faina meedam dam modeo, dam im neà bak meedam dam modeo, gi ostame iuba le gagu olu. Iuba le gagu olu. Lahada. Labi oudume modeha ame num laba dam vazisi na àm bak kekesi guguai feà bak ab fuham. 11Labi ame boehàda labe aho dam etei vazisi na àlo lehe damat esdam bak laba oli nabidume aaha meit nam vam di damat deeli vazisi na àm bak ozome dusum sue dusuhu vab dat labe am gi sue giida dusu li aidam bak ab aaham. 12Ame bak lam aahemu ame da laba ab gagoham. ‘Om sue giida dusuhuda akati niba olehela?’ Lahame gagoha ame da labe ba dae bum kai. Gi daleà aida. 13Làhàmu ame boehàda labe am im ot vai meedam dam laba ab gagoham. ‘Da nim nasi sile. Labi am anekehà ahim gia. Nao ahim gia. Labi vou futoi bàhàgo bak iuba bisi aibu feà bak laba voou ame da nibe fà kikezi geàdam labe ahu faidi meb dae feàna faasi meedase.’ ” 14Lahame im totobe lam Yesusat ab fi koadaham. Fikoadume neàdi neo vi gago, “Um nasi ozomale. Alat neha, ‘Aho Am damali vuusu im vahokedase,’ lahame dam bake gagodam di gi dam dua bake gagodam bak. Lahamnàme ame dam zi lam bisi ahebu uledi Am damali ame bak lam meedam vabak. Gi dam zohota Am damali aho vuusu im vahokedam bak,” lahame ab vi vameadaham. 15Labi ame Farisi dam totbaho labe iho Yesusat etei iba vàlu totobet fi koadaha im amudati badati aime faki ame Fihasi Ala Bake Vou Baedam Num Vàmteabu labe am ad oli aam bak tomba labe futoi ab ladamam. Ladam di labe ozo, “Im ba Yesus akatihasu modi vou fohome siela? Làhà imo gi nehase. Iho vou faobe Yesusam ahu ozolo ahit fi bovai vi aime Aho im git gagoho bak iho aihizobe vàlu sise,” lahame im aa ab odoadamam. 16Labi im aa odoadume neàdi fa ame Farisi dam labe ibi iho vahokedam im ozobohudelo vi tau meedam dam zi ame. Labi Galilea bak laba azim dam laba vuusdam Boehàda Herodes Antipas bake taumda zi ame. Labihasu gagome Yesus bake ab oluham. “Yesusat git gagoho bak aime vàluse,” lahame im mei im meime vi ailo ahit Yesus bake ab oluham. Labi le Yesus bake ab gagoham. “Guru oa, Oho lab meedam bak lam im ahebu ozobohu bak. Om abo im vamdesu meedamda Om am bak. Labi Alat ozo, ‘Dam bakda nehasu meedase,’ lahame Aba Aho ozoho im lam Oho dam bake im vahokedam di Om laha gi im vamdesu imbona vahokedam bak. Om ba neham bak modem vabak. ‘Da lam ee feàda Eba im gagohe? Làhà aime tuse.’ Laham vab di, ‘Da lam ee vabda Eba im gagohe? Làhà Em aime tum bak mose,’ lahame ba dam fahedam vabak. Labiham labe damat Oba ozomsu gagom di Om ba ame im lam aime iedi vuzehem vabak. 17Om labiham dàt modemu iho nehi Oba gagu vi ailo modem bak. Im Yahudi dam ihimo dat ahamda Musat toedume fi hasi esuhu Im Feàna zi lam iho tu vuzehi meedam labe Oho ozom, pemerintah iba vuusu meedam bak gohali lodam doi pajak lam iho ame doi lam fa Kaisarleheda laba lodam neào? Ame Im Feàna zi labet iba maleheo? Akatihà?” 18Lahame labi gagoha Yesusat ame dam labe Aba vàlulo ahit keobaedume fi bovai vi ailo modem bak lam Ahamo ozobohudi fa ab gagoham. “Um gi ahobat neàdi Eba li vameadam damat modem bak. Uho akati, ‘Eho git gagose,’ lahame ahit Eba li gagu vi ailo meedà? 19Uho ame gi vi tau lodam doi pajak oona perakat modehena lam Eba fi male.” Làhàmu ame dam labe le ame doi oona visoi fa vou li Yesus bake ab loham. 20Labi Aho ve vousai dam bake fi si vimtedam labe ab vi gagoham. “Ame doi nim amam dauhati ulohona modesuhela? Labi amam ee laba toehela?” 21Lahahat dam labe neha, “Dam ahebu vuusdam Kaisarleheda labe am dauhati am eeti modesuhu bak.” Lahame labi gagoha Yesusat fa neo vi gago, “Lo. Làhà uho dam ahebu vuusdam Kaisarleheda laba na abada lam fa naedate loda. Labi uho laha Alat Aba Aho gagohoda lam laha meeda. Labihadale.” 22Lahame labi gagohemu ame dam labe Yesus git gagom bak aiesome ame im lam gagoha Yesusat git gagom vabamu àvodi gi daleàdi Yesus vou esmozi ab iliham. 23Labi ame digat zoho labe Saduki dam labe laha neo Yesus bake gagu vi ailo ab li dozeadaham. Ame Saduki dam labe iho ozome tuhu im gi neha: “Mei elom di ba fat ahedi usam kaio,” lahame tu ozodam dam am bak. Laham dam labe Yesus bake li vi ailo ab gagoham. 24“Guru oa, dat ahamda Musat aho toedume fi hasi iba esuhu Im Feàna zi lam im meida nehame toeme fi hasi esuhu bak. ‘Meit am itbaho fatoho vaba elomeam làhà fa ame nam maboe lam am dam zohot fa ve data faasi, “Ame koei labe am data am tame,” laham bak ozome debu bohulalelo ame maboe lam koei labe am vahadat modeo, am dubut modeo, fa vale,’ lahame Musat aham di iube labi toeme fi hasi iba esuhu bak. 25Ne lahana iho etei vouholo modem im nim Oho nasi aimale. Amu di iube ame dam tujuh ehet. Datahida ame. Labi donida auoholehena ame. Labi domuàda ame. Labihasu ame dam tujuh labe dat datahida nam ab vaham. Labi ve modeha ame nam lam data faaha vabna dat ab eloham. Labi ame maboe lam ame koei laba vi tusuhu dàt fa neo ab vaham. 26Labi ve modeha ame nam lam data faaha vabna dat neo ab eloham. Labi ame maboe lam dat doni dàt fa neo ab vaham. Labi ve modeha ame maboe lam data faaha vabna neo dat ab eloham. Gi labihasu vou mode ledume dat domuàdate ab vou fuham. Labi vou fusi modeha gi neo ame baket modi ame maboe lam data faaha vabna dat ab eloham. Labiha ladume ame dam tujuh ahebu ab foli seteham. 27Labi ame maboe lam ba neo ab vi eloham.” 28Lahame ame Saduki dam labe iho ame im lam vouhome neàdi, “Im elom di ba ahedi usào?” laham bak lam tozolo Yesus bake neo vi ailo ab gagoham. “Làhà Oho lab gagoho bak lam, ‘Mei elom di fat ahedi usam bak,’ lahame Oho lab tu ozome gagoho im lam imbodemeam làhà ba diamut dam ahebu elodaha dam fat ahededume usnadam di lam ame dam tujuh labe ototo vaidume ba vi eloho nam lam Oho ozom, amam namet mode?” 29Lahahat Yesusat fa ab gagoham. “Vabà! Um git ozome gagoho bak. Alat Vameadaha Im Toedahana zi lam uho mahate aame vi ozome ozobohudehe vab damat modem bak. Labi Ala laha im feàna modem Alat modem labe dam elohonàme Aho modi fa neàdem meo bak um laha vabiem damat modem bak. 30Ba diamut dam elodaha dam im elodaha bak labet Alat modi fa ahedi usnadam di lam dam ba lahi vam vabak. Labi laha lahi ba dam vam vabak. Gi Alat Am im gagu vou usem dam labe iho asum ahoba iuba azim di gi soaona esdam bakti uloho bak. 31Ne, meit Alat Vameadaha Im Toedahana laba im meida nehi toehena nim, ‘Mei elom di fat ahedi usam bak,’ lahame toehe im lam Alat uba gagohona lam um aame ozobohudi neàdehe vaba Eba vabi vi ailo gagodà? 32Alat aham di iube uba Yahudi dama nehasu vameadahana taia? ‘Em abo Abrahamti Isakti Yakubti labihasu Eho vuusuhu labe ame dam labe Eba vi ozome vou baedam Ala Em am bak.’ Lahame Alat aham di iube lab gagoho bak lam ame dam làtela lam gi elodahanàme fat ahedi Aba vou baedam lahasuhu bak lam Aho vameadaha bak. Labiham labe Eho vi ozom, dam elodahada zi labe ba Ala bake vou baedam vab taia? Gi dam ahe damat ihimo Ala bake vou baeda taia?” 33Labi dam duada zi labe iho Yesusat Aho Saduki dam bake lab vi vahokedaha im lam aidume modeha ab àvodi meedamam. 34Labi ame Saduki dam labe iho Yesusat etei lab vameadaha im lam aiha Yesus teudi gi im vamdesu vameadàmu ba dae bum kai. Labihàmu Farisi dam labe iho ame bak lam aihemu, “Iho akatihasu Yesus bake gagu aime Yesus git gagoho bak iho aihizobe iho siela?” laham bak neo vi ozome ihimo aa odoadalo fa bakamta ab vazisiham. 35Labi vazisi im vameadume neàdi dat meidavat abo dat ahamda Musat toedume fi hasi esuhu Im Feàna zi lam bisi ozobohuda labe aho Yesus bake netàdi duzu Am ahu modi ozolo keobaeda. Aho neha, “Guru oa, Oho ozom, Musat aham di iube toedume fi hasi esuhu Im Feàna zi lam bisi im tombuda iho modemda akete? Oho nasi gagomale.” 37Lahahat Yesusat fa gago, “Meit Alat Vameadaha Im Toedahana laba im meida nehaha bak. ‘Im dam ahebu meit am ahu vàmadi Ala bake deeli gi labaha bohu vuusda. Labi meit laha gi ame baket mode. Labihadale.’ 38Im lada lam bisi iho nasi vi ozome modi tombulemda am bak. 39Labi ame im bisi tombuda lamti ulohoda meida laha nehi toehe bak. ‘Uho meit aba it deeli vou faovoi vabiedam bak lamti ulohona vi ozome fa meia laha deeli vou faovoi vabiedale.’ Lahame toehe bak. 40Meit im tombuda behàsu lam meedam labet modi gi ame dat ahamda Musat toedume fi hasi esuhu Im Feàna zi lamti dam ahamda Alat vameadaha im aime fa dam bake ahate vameaidaha dam labe ibi iho lab toedume esuhu im lamti labihasu ame im zi feà lam gi ab vi tau meedamam bak,” lahame ab vameadaham. 41Labi ame Farisi dam lam laba dozeadam lahasuhu di labe Yesusat vi ailo ab gagoham. 42“Uho ozom, Alat Gagu Fihasi Vimteme Oluhu Dat Boehàda lam amam mekehàda modela?” Lahame labi gagoha ame dam labe fa gago, “Abo dat boehàda Israel dam bake vuusdam dat ahamda amu gi eloi seteheda abo Daud labe am mekehàda modem bak.” 43Lahahat Yesusat fa vi gago, “Ne lahana aham di iube akati modi Daud vedi Alat Ba Gagu Fihasi Vimteme Olulo Modem Dat Boehàda laba, ‘Eba vuusdam Boehàda,’ lahame gagodàla? Nehaha bak. Amu Alam Aha Nutabe Neàna labe Daud bake modi vizi teudi aho nehasu toehe bak. 44‘Na Debu Modehe Ala labe Aho fa eba vuusdam Boehàda laba gago, “Om Em ahi totbaho niba nusu Eba tau feà Dateli dam vuusu im vahokedase. Labi Eho dam Oba fakemoholehe dam zi lam Eho ahit modi bedi fà Oba iedi uledi im Oboda fà aime meedase.” ’ Lahame Daud aham di iube labi toeme esuhu bak. 45Daud ahamo Alat Ba Gagu Fihasi Vimteme Olulo Modemda Boehàda laba neha, ‘Eba vuusdam Boehàda,’ lahame labi gagodàmu ba akati meit Alat Gagu Fihasi Vimteme Oluhu Dat Boehàda laba neha, ‘Boehàda Daum mekehàda modem bak,’ lahame labi gagodàla? Labihameam làhà Alat Gagu Fihasi Vimteme Oluhu Dat Boehàda lam fa Boehàda Daud vafozi bisi feà Dateleheda Am taia?” 46Lahame Yesusat labi im vamdesu vameadaha labe ame Farisi dam labe, “Iho akatihasu vi ozome fa vi gagoela?” lahame ba dae koena buhu vabak. Labihàmu ame Yahudi busaoda zi labe iba neo modi vi ladem bak labna zohàme ame digat labe faasi im dam meidavat ba Yesus bake im vi gagu aim bak ab moham.

will be added

X\