Matius 21

1Labi Yesus Aba vi tau meedam dam lamti iho neo tom ladume kota Yerusalem fuseo vabali Zaitun Dee Dozeadaha Bak Buzoho labe modesuhu num debu Betfage laba tom le odo. Le odosi Aba vi tau meedam dam meida behàsu gagu ab olulo meedamam. 2Labi olulo modem di labe Aho nehame vi vameada. “Um ahim nim num debu iba netàdeheda laba lafusi aameam keledai fi ho ameaso lo vààsdamda labe am adat gàhàda lamti laba doudamna aa tame. Uho le lo vuhatoi vuusu amait vou lele. 3Lo vuhatolo modem di meit uba nehi gagomeam, ‘Im keledai baka uho ana modelo lo vuhatolo modela?’ labihameam làhà uho fa nehi gagole. ‘Boehàda Aba Aho ozoho baket modelo modemu vou lalo mozo,’ lahame uho labihasu gagomeam ame da labe gi uledi uba lu olum bak,” lahame ab vameadume oluham. 4Etei lab gagoho bak lam dat ahamda Alat vameadaha im aime fa dam bake ahate vameaidahada labe aho aham di iube im nehi fet toedume esuhu bak lam modi imbodelo labihaha bak. 5“Dam num debu Sion laba azihi dam laba gagole, ‘Nasi aamale. Uba vuusdam Boehàda labe etei uba ab ledamam tame. Abo daleà ladehebeat ahu nemahubat li im vameadalo modemu Am gi keledai adat gàhàda labe am toha laba nusu vou ledam bak uho ab aadamam tame,’ laham im lam Sion dam laba vameadale.” Lahame aham di iube labihasu fet toeme esuhu im lam ab modi imbodeham. 6Labi Aba vi tau meedam dam behàsu labe le aaha Yesusat lab gagu oluhu bak lam ab imbodeham. Ame keledai fi ho ameaso lo vààsdamda labe am adat gàhàda lamti laba doudamna ab aaham. Làhàmu Yesusat vi gagu oluhu baket ab modeham. Lo vuhatoi ame na fi ho ahim lam Yesus bake fa ab vou leham. Labi fa vou li ibi iho dusuhu sue sona ahobada vihilame ame keledai adat dooda labe am toha laba ab nom gutaudaham. Labi gutaudume neàdi Yesusat zisi nusu ab ladamam. 8Labi lab ladam di labe dam dua totbaho labe im sue sona ahoba duhuda lam laha vihilame ame keledai Yesus vou lam zie laba vou olualada. Labi dam totbaho labe laha bom dee bake le bom alahaso fi kbodume ame zie laba vou olualada. Labihada. Damat ozo, “Yesus abo Boehàda feàda am tame,” lahame ahu adat iedi labihada. 9Labihadume Yesus lab vou ladam di lam dam dua zoho nasi dozeadume lada. Labi dam zoho ba ohuse vi dozeame mitaeda. Labihadam dam labe im nehasu buteme vou bae lada: “Hosana! Ala abo feàteee. Boehàda Daud Labe Aho Vou Faat Leheda Meida nim abo feàteee! Dat abo Alat Aho Gagu Olu Ot Vai Im Dedateli iba etei ledamda nim abo feàteee!” Lahame vou bae lada. Labi meit neo nehame vou bae lada. “Hosana! Imo dam ahebu ee bisi vousai feà Datebolehe Ala laba, ‘Am abo feàte,’ lahame vou baedaseee!” Lahame meit buteme vou bae lada. Labi neo meit buteme vou bae lada. Labihada. 10Gi labihasu vou bae ladume kota Yerusalem laba vou fusi modeha dam bak deda labe ame bak lam gut aihemu àvodi ihimo ab ot gagoidamam. “Uho ozom, dam zi feà nim ama bake deeli vou bae ledàla?” lahame meit gago meit gago labihadume vabi ab ot gagoidamam. 11Lahame labi ot gagoidume modeha dam etei leheda zi labe fa ab gagoham. “Um ozobohudem vaba? Da nim abo Alat vameadaha im aime fa dam bake ahate vameaidahada Galilea bak zoho labe num debu Nazaret labe leheda Yesus am bak,” lahame ab vameadaham. 12Labi Yesus kota Yerusalem laba lafusi Fihasi Ala Bake Vou Baedam Num Vàmteabu labe am ad oli aam bak tomba laba le duzu aaha damat Ala bake vou baedalo na Ala bake lomna ot loidam bak aahemu meoli dam na ot loidam dam zi lamti na vadam dam lamti meoleme ootedume futoda. Labi laha damat dam debu mei doi vame fa dam debu mei doi ot loiam doi vaheme ot loidam beahuba lam vuu vaktemoda. Labi laha damat meki fi ho ot loiam di nusumna lam laha vuu vaktemoda. Labihasu ab veimodamam. 13Aho meoli gago, “Um ozom vaba? Meit Alat Vameadaha Im Toedahana laba im meida nehame toehe bak. ‘Alat neha, “Em num nim gi Eba tom gagodam numat modem bak.” ’ Lahame toehena um akati aalahigeàmu meit na aa ve voutame fi olehe bak ozome vou oli vasti esdam bakti ulohona modi Em num feàda niba oli im mei faasi meedàla?” lahame faki meoli meedam labe ame beahuba zi lam veimome afoezobe dam soa neo odosi veimome dam ab ilidamam. 14Labi ame di labe dam aheda labe fa dam fako faida zi lamti dam nao zoho nutabedeheda zi lamti labihasu ame Fihasi Ala Bake Vou Baedam Num Vàmteabu labe am ad oli aam bak tomba laba Yesus bake vou ledahemu Aho ulasi fa neàdeda. 15Labihadume modeha ame Num Vàmteabu labe am ad oli aam bak tomba laba dozeadaha data zi labe ab faasi buddamam. “Imo dam ahebu Alat Gagu Fihasi Vimteme Oluhu Dat Boehàda bisi feàda nim abo Boehàda Daud Labe Aho Vou Faat Lehe Mekehàda nim, ‘Abo feàte,’ lahame vou baedase,” lahame ab buddamam. Labihadume modeha damat Ala bake lomna ve vua vahudam toheda zi laba vuusu im vameame faheme modiam dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti labihasu iho Yesusat damat ihimo modem biem im feàna meedaha bak lam aaha bak lamti ame data buddaha bak aihi bak lamti labihasu meedam bak aahemu faki feà bak ab fuham. 16Labi faki, “Yesus ame Dàt modem kaio,” lahame ozoho labe Yesus bake ab gagoham. “Om data zi nibe oba vou baedam bak om aidà? Oho taho meoleme fa dae vabalele.” Lahame labi gagoha Yesusat fa gago, “Lo, Em aidam bake. Ne, meit Alat Vameadaha Im Toedahana laba im meida nim um aaha vaba? Ame im neha taia? ‘Ai Ala oa, Om amu gi data vohomdati tatvamdati nehi fet ozome esuhu bak. Ame data zi labe Oba, “ ‘Om abo feàte,’ lahame Oba vou baedase,” lahame fet ozome esuhu bak.’ Lahame labihasu toehe im lam um aaha vaba? Data gi ahole meedam bak.” 17Lahame Yesus labi gagu neàdi Fihasi Ala Bake Vou Baedam Num Vàmteabu labe am ad oli aam bak tomba labe futoi neo Aba vi tau meedam damti iho kota Yerusalem vou esmozi fa neo num debu Betania laba ab le iham. 18Labi Betania laba le izi dihambe neo Aba vi tau meedam damti vahi kota Yerusalem laba fa ab ladamam. Ladam di labe Yesus idoali meeda. 19Làhàmu aaha ut ara zie obe laba doudam bak ab aaham. Aahemu oo sitoi àm bak ozome le netàdi nabitedaha oo aam kai. Gi et but neàdi modesda. Labihàmu ab uloodamam. “Seee. Ut nim ba oo a valemule. Gi mailele,” lahame uloohoilahit gi ame di labe am et lam ab bozileham. 20Labi modeha Aba vi tau meedam dam labe ab aame àvodeham. Àvodi gago, “Aa làhà! Ut lam akati modi Da nibe gi etei aame ulooha ame di labe ut et lam bozili alahela?” 21Lahame labi gagohemu Yesusat fa ab gagoham. “Lo, ame ut et bozili alahanata ala. Lahana Eho etei uba gagolo modem im imboda nim nasi aima. Um ahu behàsdi vi ozodam vaba abo uho Eba mahate tu vuzehi ahu vàmadi meedameam làhà uho fa Eho ame araso lam aame gagu alaha bak lamti ulohona neo modem bak. Lahana gi im feàna lada lamota modem vabak. Abo gi im feàna amomoi laha uho neo modem bak. Abo gi bak buzoho niba neha, ‘Nasi itezeavai itea feàna laba nom ilu fi oli setele,’ lahame gagom di ame baket modem bak. 22Abo ubu uho valo Ala bake tom gagodamna lam uho nehi fet ozo, ‘Ame na lam Alat iba lom bak,’ lahame ahu vàmadi tu vuzehemeam làhà ame na lam uho vam bak,” lahame ab vahokedaham. 23Labi Yesusat im lam vameadume neàdi neo ladume ame Fihasi Ala Bake Vou Baedam Num Vàmteabu labe am ad oli aam bak tomba laba le ame bak laba lab dozeadaha dam zi laba vahokeda. Vahokedume modeha damat Ala bake lomna ve vua vahudam toheda zi laba vuusu im vameame faheme modiam dam lamti Yahudi dam bake vuusu im vameame faheme modiam dam busaoda zi lamti laham dam labe Yesus bake li netàdi daet beàdalo vabi vi ailo ab gagoham. “Ne, Oba amat modi vizi teudi im feàna lam Oho duzu meedàla? Oho nib li meedam im nim Oba amat gagu im dedateli Oho vuusu meedàla?” 24Lahame labi gagu modeha Yesusat fa gago, “Im ubuda faode. Ebe Eho etei uba fi bovai vi ailo gagomda nim uba nasi vi gagu aise. Ne, Yohanes Mei Vuu Valo Baptisleiamda labe aba aho amu mei vuu valo baptisleiam bak lam amat Yohanes bake gagu aho ame bak lam meedahela? Alat aba gagu aho ame bak lam meedaheo? Laham vabameam damat aba gagu aho ame bak lam meedaheo? Akatihahela? Uho ame bak lam Eba fa gagomta uho etei Eba lab gagu vi ailo modem bak lam Eho fa uba vi gago tame.” Lahame labi gagu vou faoha ame Yahudi ee dam zi labe gi ihimo ot gagoida. “Uho ozom, iho akatihasu fa Yesus bake gagoe? Iho nehameam, ‘Alat Yohanes gagu olu meedaha bak,’ lahame labi gagomeam làhà Yesusat fa iba nehame vàlu gagom bak. ‘Ne, um lahana akati Yohanes am im aime tu vuzehem vaba moudume mohela?’ lahame iba labi fa gagom bak. 26Laham vaba iho neo nehi gagomeam, ‘Damat gagu oluha,’ lahame labi gagomeam làhà dam etei iba tau dozeadaha dam totbaho zi nibe iba beom bak. Neham bak. Dam etei iba tau dozeadaha dam totbaho zi nim, ‘Yohanes ba damat gagu olu meedaha vabak. Am gi Alat vameadaha im aime fa dam bake ahate vameaidahada meida am am bak,’ laham bak lam ozobohu labe iho fa im mei gagomeam làhà dam iba faki beom bak.” 27Lahame ame dam busaoda zi labe ihimo vou faovoi iedi fa vei biehenali Yesus bake fa ab vi gagoham. “Yohanes aho amu lab meedaha bak lam, ‘Amat aba gagu olu meedàla?’ laham bak lam im bieho.” Lahahat Yesusat fa dam laba ab gagoham. “Lo, làhà Eho li meedam im ahebu nim, ‘Amat Eba gagu olu Eho im dedateli meedàla?’ laham bak lam Em laha ba uba gagom vabak,” lahame ab vasteham. 28Yesusat labi gagu neàdi fa ame Yahudi dam vuusdam eeda zi laba neo vi vahokeda. “Eho etei uba totobet fi koadalo modem im nidi nim uho mahate vi ozodale. Da nibe adam behàsu faasi vou buduali neàdi am aiat am adat datahida bake le gago, ‘Da adat busaoda oa, om etei em anggur dee laba le na modele.’ 29Lahame labi gagoha am adat fa gago, ‘Vab. Em moho,’ lahame gagohoda labe fa ba uledi am aiam anggur dee laba le fa na meeda. 30Labi neo ame da labe am adat basdate neo le gago, ‘Da adat basda oa, om etei em anggur dee laba le na modele,’ lahame labi gagoha ame da labe uledi gago, ‘Lo, ai eho mode tame,’ lahame gagohoda labe fa vei mu am aiat gagoho bak lam ba le modehe vaba ab moham.” 31Lahame Yesusat im totobe lam fi koadume neàdi fa neo vi ailo ab gagoham. “Làhà um etei akati ozoe? Adat adida am aiat im gagoho bak aime uledi modehela?” Lahame labi gagoha ame Yahudi busaoda zi labe fa gago, “Dat datahida labe uledi modehe bak.” Lahame labi gagohemu Yesusat fa neo gago, “Lo, uho abo imbona gagoho bak. Lahana Eho etei uba neo gagolo modem im imboda nidi nim laha nasi aima. Um gi ame adat basda labe aho meedam bak lamti ulohona meedam damat modem bak. Neham bak. Kaisarleheda bake lodam doi pajak atem dam lam abo uho neha, ‘Faite,’ lahame tozome umti vahem mu fi hasi esuhu dam zi lamti labi lahi fi lohoda zi lamti labihasu umti vahem biem dam labe um fa vafozi amu nasi Alam damali Aho vuusu im vahokedam dam am bak. 32Neham labe labihadam bak. Yohanes Mei Vuu Valo Baptisleiamda labe aho amu nasi duzu lehe di lam aho uba neha, ‘Alat Aba Aho ozome esuhu bak lam bisi im vamdesu meedam bak gi neham bak,’ laham bak uba vahokedasome modeha aba aho vou lehe im lam um gi tu vuzehem mu voedaha bak. Lahana pajak doi gi teo vi atem dam zi lamti lahi fi lohoda zi lamti labihasu nasi tu vuzehi ibi iho faina meedam bak lam voedume fa ahu neà bak vàmadi meedaha bak. Lahana uho ame bak lam aahanàme ba im abada tu vuzehi ubu uho faina meedam bak lam voedume fa ahu neà bak vàmadi meedaha vabak,” lahame ab vahokedaham. 33Labi Yesus im lada lam vameadume neàdi Aho ame Yahudi dam busaoda laba im meida nim neo nehame vi vahokeda. “Eho etei uba totobet fi koadalo modem im nim uho mahate aime vi ozodale. Dat utoho deda nibe am tat vueheba laba am na meedam dam gagome anggur neb zi deddume neàdi esu. Labi neo am na meedam dam laba neha, ‘Um laha em anggur dee nim ke vou vahe lame fi bovai esule. Labi afoezobe ame anggur oo amdehezobe vaheme meit duzu uname vaksa futom bake ozome ke baana nabime ve fa ahit feme bumatali esule. Labi neo damat em anggur dee aa li vam bake azi nom vou aasdam num kilana laha mome duzule,’ lahame gagu olu ame baket ab modeham. Labi modeme neàdi anggur deda labe bak mei bake lalo modemu dam na debe soali modeme vahem dam zoho laba gago, ‘Uho em anggur dee nim teohet vou aasdume amdehezobe modeme vahedam di zoho uho va. Zoho eba naedate vahedume esu. Labihadale,’ lahame it gagu esmozi bak bohu bake ab laham. 34Labi le aidamehamdi ozoha, am anggur oo vaedam bak fuhemu fa am na meedam dam làtela gagome ab oluham. ‘Em anggur dee teohet vou aasdam dam labe iho ot loiame vaha doi ebe eho vam zoho eba esuhuda le vame fa vou lele,’ lahame gagu ab oluham. 35Labi le gagoha ame anggur dee teohet vou aasdam dam labe ame dam làtela lam lehemu ab gut siàdaham. Siàdume meida abo ote. Labi meida neo ket beodume ote. Labi meida gi fota beome isi olu. Labihada. 36Labi anggur deda labe gut aaha dat vàmtea gi saemea fa lehemu neo am na meedam dam dua totbaho neo gagome fa duali ab oudaham. Labi oudume lafusi modeha ame anggur dee teohet vou aasdam dam labe neo gi ame baket meeda. 37Labihàmu ame anggur deda labe neo gut aaha neo dam zoho gi saemea fa ledahemu vi ozo, ‘Ne, em akati mode? Làhà gi em adat nim neo gagu oluse. Eho labihameam dam labe fa em adat bake vei ladi ahu adat iedi fa eba doi lu olum zoaha bak,’ lahame vi ozome neàdi am adat ab gagu oluham. 38Olu ladume lafuseo vabalehe di labe ame anggur dee teohet vou aasdam dam labe gi bak bohulana gut aaha anggur deda labe am adat ledam bak aahemu neha, ‘Da nim ba am aiam na misia vamda am taia? Imo da nim oteme afoezobe anggur dee nim fa im na misialese,’ lahame im aa ab odoadaham. 39Labi im aa odoadume neàdi ame da fuhuzobe neo gut si vou kea lame anggur dee natàh ke labe vou futoi bako iuba ab oteme vooham.” 40Lahame Yesus ame im totobe lam fi koadume neàdi neo ame Yahudi dam busaoda zi laba vi ailo ab gagoham. “Uho ozom, ame anggur deda labe fa li am anggur dee teohet vou aasdam dam laba le akati modela?” 41Lahame labi gagoha ame Yahudi dam busaoda zi labe fa gago, “Ame faina meedam dam lam aho beodume ohabededume setem bak. Labi beodume am anggur dee lam fa dam amomoi gagome fa vou aasdam bak. Abo am anggur oo amdehezobe modeme vahedam di damat iademe ot loiame doi aba naedate lom zoho lam lom meoda ozome fi me vadume vou aasdam bak.” 42Lahame labi vameadume neàdi Yesusat fa neo vi gago, “Lo, um gi imbona gagoho bak. Lahana meit Alat Vameadaha Im Toedahana laba im meida nim um vi aame ozobohudehe vaba? Ame im lam gi uho Eba tu vuzehem mom bake nehame fet toeme esuhuna taia? ‘Dam num moadam dam labe, “Faite,” lahame mu vooho ke lam fa feà Dateli bisi num mome teudem ke am bak. Ame bak lam Boehàda Alat Ahamo ozome modehe bak. Labi Aho lab modehe bak lam iho aam di damat ihimo modem biem im feàna modehena aaha bak.’ Lahame toeme esuhu im lam um aame ozobohudem vaba? Ame im lam etei ab imbodi uho Eba ab moudamam bak. 43Labihàmu Eho uba nehi gagom bak. Em Alat Gagu Fihasi Vimteme Oluhu Dat Boehàda niba uho Eba tu vuzehi Alat uba deeli vame Am damali vuusu im vahokedam bak lam uho modem mohemu Alat fa dam amomoi bake abo Aba Aho gagohona uledi meedam dam laba fa Am damali vuusu im vahokedalo modem bak. [ 44Eho gi neham bak ozome uba labi gagoho bak. Ame ke lam Alat Gagu Fihasi Vimteme Oluhu Dat Boehàda Em am bak. Meit Eba momda lam gi da nibe ke bake gitadi vàhàdemdati uloho bak. Laham vaba ame ke labe ame da laba fi tmai bake deebosi setemdati uloho bak.]” lahame Yesusat ab vameadaham. 45Labi ame damat Ala bake lomna ve vua vahudam toheda zi laba vuusu im vameame faheme modiam dam lamti Farisi dam zi lamti iho Yesusat etei lab totobet fi koadaha im lam aihemu ab ozoham. “Oo, Yesusat etei lab vameadaha im lam gi iba vàlu vameada taia? Aho li vahokedaha im lam iho aim mu vooho bak laba ozome ame anggur dee teohet vou aasdam dam laba gi vàlu im totobet fi koadaha taia? 46Imo Yesus sise,” lahame ahu gukeme modem faidi seti vi ozodaha dam duada totbaho labe vedi neha, “Ame Da Yesus abo Alat vameadaha im aime fa dam bake ahate vameaidahada meida am bak,” lahame tuhuda feà labe iedi sim bili gi vabedda.

will be added

X\