Matius 2

1Boehàda Herodes labe aho Yudea bak laba azihi dam vuusu im vahokedam di labe Yudea bak labe aba zoho modesuhu num debu Betlehem laba Mariat Yesus ab faaham. Labi Yesus faasi vou esdameilahit falo modem bak ozobohu dam totbaho labe ala debu zizem bak labet kota Yerusalem laba ab ledaham. 2Labi kota Yerusalem bake ledume lefusi neha, “Data faahana um Yahudi dama vuusu boehàdatebolelo modem Data akete? Im ame boehàdatebo faaseo modem di labe duzum falo ala debu zizem bak laba duzuhuna iho bak ibida iubet aaho. Im ame Data lam, ‘Feàte,’ lahame ozome ahu adat iedi vou baedalo leho,” lahame vabi iuba le gagu ai. Iuba le gagu ai. Lahada. 3Labihadameilahit Boehàda Herodes ame im lam aime modeha vi ozoda. “Oo, em boehàda am bak. Akati Data etei faahana boehàdatelelo mode?” lahame àvodi vi ozoda. Labi kota Yerusalem laba azihi dam totbaho ahebu gi laha àvodi vi ozoda. 4Labihàmu Yahudi dam labe ibi iho Ala bake lomna ve vua vahudam toheda zi laba vuusu im vameame faheme modiam dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti labihasu Herodes labe aho gagome ab valadaham. Labi valadume li dozeadume neàdi Herodesat vabi vi ailo ab gut gagoham. “Alat aham di iube meia fet vameadume esuhu im toedahana lam Aho Gagu Fihasi Vimteme Olulo Modem Dat Boehàda lam ake faalo modem im toeme esuhela?” 5Lahahat ame dam zi labe fa gago, “Yudea bak labe aba zoho num debu Betlehem laba faalo modem bake. Dat ahamda Alat vameadaha im aime fa dam bake ahate vameaidahada labe aho im nehasu fet toeme esuhu labe iho aame ozobohudehe bak. 6‘Yehuda bak labe am num debu meida Betlehem laba azim dam oa, Yehuda bak laba modesuhu num debu meiti num debu meiti labihasu azihi dam lam bisi um voou meit ihimo feà damalem vabak. Um laha feà damalem bak. Neham bak. Ba ubu meida labe boehàdatebolem bak ehe bak. Ame Boehàdatebo lam Aho fa Israel ahamda labe aho ba vou faat ladaha dam laba vuusu im vahokeda tame.’ Lahame fet toeme esuhu im ahum lam iho aame ozobohudehe bak,” lahame Herodes bake ab vameadaham. 7Labi vameadume neàdi dam lada debu behàsu lam fa lada. Labi fa ladume seti Herodes labe aho dam falo modem bak ozobohu dam lam fa neo aa gagome leda. Ledume dozeadume neàdi Herodesat ab gagoham. “Ame falo ahamte futoi duzuhu di um adi diat aahela?” 8Lahame labi gagu aime ozobohudi neàdi Herodesat fa neo vi gago, “Uho nasi Betlehem laba le iademe nabidamehamdi ame Data lam vi aale. Vi aameam làhà eba taho fa li gagole. Em laha ame Data laba, ‘Feàte,’ laham bak ozome ahu adat iedi vou baedalo mozo,” lahame ahi vageme ame dam lam Betlehem bake ab gagu oluham. 9Labi ame dam labe ame im lam aime neàdi neo ab ladamam. Ladameam aaha amu ala debu zizem laba aaha falo lam neo futoi duzu nasi ladam bak vi aahemu ab deeli vàhàdeham. Labihàmu damat gi fako zisu vou vi vulada. Labi ame falo labe dam lam vou ladume ame Data vou aidam numa fuhuzobe num ahoba laba ab duzuham. 11Labihàmu damat ame num laba oli vi aaha Data lam am oi Mariati ab aaham. Labi aahemu ame Data lam, “Feàte,” laham bak ozome ahu adat iedi ogomasu biti ab vou baedamam. Labi soa maehena dumna ame dam labe vou lehena lam fi stoi nazoh vihiladume ab lodaham. Emasti labi na ahana neàna vuahubulemna kemenyanti labi na ahana neàna ut àkti ulohona soa noimna murti labihasu vihiladume ab lodaham. 12Labi lodume neàdi fa ibi esum bake bolohet ab laham. Alat dam laba neha, “Herodes bake fa a lamule,” lahame gagohona ulehemu gi bolohet fa ibi esum bake ab iliham. 13Labi ame dam falo modem bak ozobohu dam lam fa ladume seti Yusufat ba bisu iddameam uleha Alat Am im gagu vou usemda meida labe aba usi im vameadam bak ab uledamam. “Om nasi keele. Boehàda Herodes labe aho om Data otem bak nabidalo mozo. Om nam Mariati ahili Data ve taho Mesir bake vou itale. Laba le azi faobe eho ba neo nom ilu oba gagohozobe fa vou lem neàte,” lahame labi vameadume neàdi esmozi ab tom iluham. 14Labi Yusuf keesi am nam Maria am Datati ukeme ame aibu labe Mesir bake ab vou itaham. 15Labi Mesir bake lafusi aidam di lam gi Boehàda Herodes elohozobe fa lam bake vou faoda. Ame da Yusuf am nam am Datati Mesir bake vou itaha bak lam gi dat ahamda Alat vameadaha im aime fa dam bake ahate vameaidahada labe aho nasi nehi fet toeme esu. “Em Adat fa vi gagome Mesir bak labet fa Aba bake vou lelo mozo.” Lahame labi fet toeme esuhu im lam imbodelo modem labe Data lam ab vou iliham. 16Labi Boehàda Herodes labe aho amu ame dam falo modem bak ozobohu dam laba neha, “Aba fa li gagole,” lahame gagu oluhu bak lam vou faodaha dam ame Data laba le aame fa aba li gagom vaba ahi vageme setehemu faki feà bak fusi am meo dam zi ab gagome ledume li dozeadaham. Labi dozeadume neàdi gut vameada. “Um nasi num debu Betlehem lamti labi num debu netàda zi lamti ahebu le nabidume daboseà tahun behàsdeheda lamti labi daboseà tahun behàsdehe vabda lamti labihasu ahebu oddale,” lahame vameadume ab oluham. Ame Boehàda Herodes labe nehi ozo. Ame dam falo modem bak ozobohu dam labe amu aba lehe diat nehi gago, “Ame di lam iho falo alimeat aaha di am tame,” laham bak ozobohudi am meo dam labihasu vameadume olu le ame baket ab modeham. Abo num debu iudu odda. Labi num debu iudu neo odda. Labihadume daboseà tahun behàsdeheda lamti labi daboseà tahun behàsdehe vabda lamti ahebu ab oddume foleham. Labihàmu Betlehem laba azihi Yahudi lahi lamti labi num debu netàda zi laba azihi Yahudi lahi lamti im data daboseà damat oddume foli seddàmu meb dae feàna faasi meedam bak lam damat ab aidamam. 17Labihàmu dat ahamda Alat vameadaha im aime fa dam bake ahate vameaidahada Yeremia labe aho aham di iube nehi fet toeme esuhu im nim ab imbodeham. 18“Damat aiha, num debu Rama abo kota Yerusalem netàdehe bak laba meit ahu faidi meb dae feàna meedam bak damat aidalo. Abo Israel nam Rahel labe am data ilahu vi ozome medaom bak damat aidalo. Am data elodume foli seddàmu meit vabededam diat ba ahu neàdi dae vabalem bieho.” Lahame labi fet toeme esuhu im lam ab modi imbodeham. 19Labi Yusuf am nam Maria am Datati Mesir bake aidam lahasuhu di labe Boehàda Herodes bak abada laba ab eloham. Labi eloi neàdehezobe aibu meida labe Yusuf bisu iddameam uleha Alat Am im gagu vou usemda meida labe nom ilu am obe laba li duzu im nehame vameadamna ab uledamam. 20“Yusuf, om nasi keesi usai om nam am Datati fa Israel bak laba vou lam neàdeho. Dat boehàda labe am meo dam gagome data ahebu oddam labe ozo, ‘Data oboda laha vi tau otese,’ lahame ozohoda lam eloho,” lahame labi gagu neàdi fa ab tom iluham. 21Labi Yusuf kehàm vaba usai Maria am Datati gagome Mesir vou esmozi Israel bak laba fa ab vou laham. 22Labi fa vou le azi modeha ame Herodes labe am adat Arkelaus fa neo boehàdateli ame Yudea dam neo vuusu im vahokedam bak aihemu fa Israel bak zoho labe Yudea bak laba lam iedi fa itam bak neo ab vi ozodamam. Labi fa neo itam bak ozome bisu iddameam uleha Alat Am im gagu vou usemda labe neo nom ilu aba li duzu im nehame vameadamna ab uledamam. “Oho etei li aidam bak niba a aidamule. Om gi Israel bak zoho labe Galilea bak laba lale,” lahame labi gagoho bak lam aihemu ame baket ab modeham. Yusuf am Data Am oiti vahi bak lam vou esmozi Galilea bak laba ab laham. 23Galilea bak zoho labe am num debu Nazaret laba le im Data Yesus ab vou aziham. Ame bak lam modehemu dam ahamda Alat vameadaha im aime fa dam bake ahate vameaidaha dam zi labe ibi iho amu nasi nehame fet toeme esuhu im nidi nim ab modi imbodeham. “Ame Da lam ba, ‘Nazaretda,’ lahame gago tame,” lahame fet toeme esuhu im lam ab modi imbodeham.

will be added

X\