Matius 19

1Labi Yesusat im lada lam vahokedume neàdi Aba vi tau meedam dam lamti iho ame Galilea bak lam vou esmozi fa neo Yordan Soabo dumam tot Yudea bak labe am num debu meidati meidati laham bak lam ahebu goda. 2Labi ame bak laba vou godam di labe dam duada zi Aba tau vi goda. Labi dam aheda zi labe iho dam nisileheda vou ledam di Yesusat gut ulasi modi fa neàdida. Labihada. 3Labihadam di labe Farisi damat Yesusat git gagom bak aihizobe vàlulo ahit Aba netàdi duzu vi ailo ab gagoham. “Oho ozom, im Yahudi dam nibe ibi iho tu vuzehi meedam im labet vulam di meit aho amu vaha nam lam fa mu voom di gi ostame la vàlui le vàluidume mu voom neào? Akatihàla?” 4Lahahat Yesusat fa gago, “Meit Alat Vameadaha Im Toedahana laba im nehi toehena nim um aame vi ozobohudehe vaba? ‘Ala Na Debu Modeheda labe ahamte alimeat na meedaha di iube dat mode. Nam mode. Lahaha bak.’ 5Labi Aho modi neàdi Aho lab modehe bak lam vi ozome ab gagoham. ‘Làhà etei di nim dat nam vam di am aiti am oiti vou esmozi da nim gi am nam laba akili ihimo ahili so vàmadi ab le azimam bak. Labi lab le azihi bak lam vi ozom di gi nubu ab vàmadeham bak.’ Laham bak lam um aame ozobohudehena taia? 6‘Ba so behàsuo?’ laham bak lam ba vi ozom vabak. Labihàmu Alat modi vàmadehena uho dam bakda a modi fàsi behàsdemule.” 7Lahame labi gagohemu Farisi dam labe fa neo Yesus bake vi ailo gago, “Ne lahana im tai ahobada Musat akati modi im nehasu toehela? Aho aham di iube neha, ‘Uho meit am nam amu neàt vahana fa mu voolo modemeam làhà dat amu nasi, “Nam nim debu nehasu meedàmu em mu vooho bak,” lahame sunit toeme ahate fi desi vameadume mu voou fa olumta neàte,’ lahame akati modi labi toehela?” 8Lahame labi gagoha Yesusat fa gago, “Um ahebu ahu tamzohobulehe labe meit im vahokem bak aim biem damat modem labe Musat gi ozahit uledi im lam toehe bak. Lahana bisi alimeat Alat datti namti modehe di labe labi gagoho vabak. 9Um ozobohudem bake nasi Ebe Eho etei gagolo modem im nim aimale. Neha: Meit am nam dat amomoit bako bake aa vaha vab nam aho naedat vedi ostame mu voou fa nam amomoi vameam làhà ame da lam faina modehe bak.” 10Lahame labi gagoha Aba vi tau meedam dam labe ihimo Yesus bake ab gagoham. “Làhà dam lahi vam di labiham bake imo lahi vam bak gi mose. Gi soaona aidase.” 11Lahame labi gagoha Yesusat fa gago, “Ne lahana uho etei lab gagoho bak lam dam dua zoho ba modem biem bak. Abo gi dam nam vadam bak. Lahana Alat Aba Aho gagu fi hasi esuhu dam labe ihimo nam mom bak modi vizi esuhu dam ehe bak. 12Dam totbaho labe im nehasu meedam labe nam vam bak mouda. Im oiat faaha di mei modem biemna faadam labe lahi vam bak mouda. Labi dam totbaho labe im àko meit tet si vaomoho labe lahi vam bak mouda. Labi dam totbaho labe ihimo ozo, ‘Im ab Alam Damali Aho Iba vuusu im vahokedamam bak. Labihàmu imo gi Alat Aba Aho gagohona ahu vàmadi meedase,’ lahame lahi vam bak mouda. Um labihasu meedam uledemeam làhà gi ame baket modele,” lahame Yesusat ab vameadaham. 13Ame di labe dam totbaho labe ozo, “Yesusat fà im data niba Am anekehà odosu neha, ‘Ai oa, Oho data niba neà bak modi esule,’ ” lahame tom gagom bake ozome im data Yesus bake ab vou ledamam. Vou ledume modeha Aba vi tau meedam dam labe iho ame bak lam aahemu ab gut mali meedamam. “Um data Yesus bake a vou li vabidamule.” 14Lahame labi gut mali gagoha Yesusat daetesu gago, “Ame data lam Eba vou ledam neà bak. Uho a mali gagomule. Neham bak. Damat ibi iho vou mode ledume baleàhà bak lam fa veimdi fa data koena zi nibe ibi iho lab vou mode ledume baleàhà bak lam abo daleà azi meit iba vahokedam im aidam bak lamti ulohona meedam dam lam Alat deeli vame Am damali vuusu im vahokedam dam am bak.” 15Lahame labi gagu neàdi ame data zi laba Am anekehàt nom odosu, “Ai oa, Oho data niba vou aasdale,” lahame tom gagoidume neàdi fa ab oudaham. Labi ame im lam meedume neàdi fa bak mei bake ab laham. 16Labi ba digat meida iube dat bas nibe Yesus bake li netàdi gago, “Guru oa, Om abo neàte. Eho ana im meedam labet Alat eba ba modi Amti vahi gi ahe neàna bohu vuusdàla?” 17Lahame labi vabi vi ailo gagoha Yesusat fa ab vi gagoham. “ ‘Na im neà bak meedam bak akete?’ laham bak lam ohomo ozobohudehena akati Eba labi gagoela? Lahana im dam bakda nim ba im neà bak meedamda vabak. Gi Alat Ahamo im neà bakta meedam bak. Labihàmu Alat oba ba modi Amti vahi gi ahe neàna bohu vuusdam bak lam, ‘Oba modi vizese,’ lahame oho modelo àhàkemeam làhà oho gi Aba Aho gagu fi hasi esuhu im zi lamota meedale. Oho labihamta ame bak lam oba modi vizem bak.” 18Lahahat ame dat bas labe fa gago, “Alat gagu fi hasi esuhu im zi adida eho meedam labe ame bak lam eba modi vizela?” Lahahat Yesusat fa gago, “Ame im neha taia? ‘Mei a otemule. Labi nam dat eheda modeo, dat nam eheda modeo, a modemule. Labi mei na a aa vamule. Labi na aaha vabda labe, “Eho nehi aaho,” lahame a ostame giomim vàlu gagomule. 19Labi um ai bake modeo, um oi bake modeo, ahu adat iedi uba gagoho im laba vuzehi meedale. Labi uho meit aba it deeli vou faovoi vabiedam bak lamti ulohona vi ozome fa meia laha deeli vou faovoi vabiedale.’ Labihasu toedume fi hasi esuhu im lam om ozobohuna taia?” 20Lahame labi gagoha dat bas nibe fa gago, “Oho etei lab gagoho im zi lam eho ahebu ulohodesu meedaha bak. Oho ozom, im meida ba eho neo modem bak eheo?” 21Lahame labi gagoha Yesusat fa vi gago, “Lo, lahana om im meida vàmtea vekehe bak. Om abo neàbodelo àhàkemeam làhà om soa maehe nazoh zi lam ahebu gelevai doit ot loidume neàdi ame doi lam vadume fa faheme dam na vab dama iuba lo. Iuba lo. Lahadale. Oho labi modemeam làhà Alat Aba Aho azihi bak laba oba vahehe nazoh aabo ehete. Labihàmu oho ame doi lam dam na vab dama lodume neàdi fa li Eba tu tau godale.” 22Lahame labi gagoha ame dat bas labe Yesusat lab gagoho im lam aiha am soa maehe nazoh zi abo feà dat modemu ahu faidi daleàdi ab laham. 23Labi ame dat bas le seti Yesusat fa Aba vi tau meedam dam laba ab gagoham. “Lo, ame dat bas labiha. Lahana Eho etei uba gagolo modem im imboda nidi nim nasi aima. Meit am nazoh duada labe aho it ozo, ‘Eho Yesusam im aime vuzehi fa Alam dateli Aho eba vuusu im vahokedase,’ lahame it ozodamnàme am nazohti nehi ame bak lam uledi meedam biem meo bak. 24Labi im nidi nim uba laha aimale. Im unta fi hobu labe aho sue tademna mo labe am bumat kekehena laba ba dalu lafutom biem bak. Labi dat na duada labe aho nehi ozo, ‘Alat laha eba deeli vame Am dateli eba vuusu im vahokedase,’ lahame gagu meedam bak lam laha modem biem bak. Lahana ba gagohoda lam bisi modem biemda am bak.” 25Lahame labi gagu modeha Aba vi tau meedam dam labe ab aime àvodeham. Àvodi gago, “Aa làhà! Dam na duada labihalahit im dam totbaho ahebu Alat ba iba soat vausu im vei neàdi Amti vahi gi ahe neàna bohu vuusdam biehe taia!” 26Lahame labi gagoha Yesusat Aba vi tau meedam dam laba aasdam labe ab gagoham. “Faode. Ame bak lam damat ihimo it modem biem bak. Lahana Ala bisi feàda abo na ahebu modem meo Ala labe ame bak lam modem meo bak.” 27Lahame labi gagoha Petrusat fa ab vi gagoham. “Imota nehaha bak. Iho Oba vi tau meedam damalelo modemu nazoh ibida ahebu amu gi voedume vausi fa Oba tau vou godam bak. Lahana iho labihahemu ba diamut iho lab meedaha bak lam Alat ame baleà vouhom di im ana và?” 28Lahame labi gagoha Yesusat fa ab gagoham. “Lo, oho lab gagoho bak lam imbota imbot. Lahana Eho etei uba gagolo modem im imboda nidi nim nasi aima. Ba diamut Em Ai Alat Aho bak nimti bak niba modealahana zi nimti ahebu Aho modi gàhàdehezobe Em Abo Asum Ahoba Iubet Bak Niba Li Dateleheda fa abobo Boehàdateboli boehàdat ahamo nusu meia im vahokedam di nusumna feàda laba nusu dam ahebu vuusu im vahokedam bak. Labi ame di lam uho Eba vi tau meedam dam dua belas nim um laha boehà damali fa ame nusumna feàda dua belas amomoi laba nusualadume dat ahamda Israel labe aho vou faat lehe dam debu dua belas laba faheme ahala vuusuiame im vahokeda tame. 29Labi dam Eba vi tau meedam damalelo modemu im aiti im oiti im dubuti im vahadati im nàti im datati im dam zohoti im numti im utoho ziti im na fi ho ziti labihasu voedume esmomeam làhà ame dam labe im ahe lahasuhu di nibe Alat fa ame dam laba gi ame baleà vouhou na lodam di abo fetehesu duana vi loda tame. Labi laha ba diamut Alat ame dam laba modi Amti vahi gi ahe neàna bohu vuusda tame. 30Alat ba diamut Aho Eba modi Eho Boehàdateboli dam vuusu im vahokedam di neham bak ehete. Damat etei bak niba esdam di vedi nehi it ozoda. ‘Ee feàda im am bak,’ lahame it daetbadam dam lam ba feà damalem vaba gi ee vousi ba duzum dam am bak. Laham vaba damat nehi it ozoda, ‘Ee feà vabda im ame?’ lahame it daetbadam vab dam lam ba feà damali fa ee vousai nasi duzum dam am bak,” lahame ab vahokedaham.

will be added

X\