Matius 10

1Labi ba digat meida iube Yesus Aba vi tau meedam dam dua belas gagome ledume ab li dozeadaham. Dozeadume neàdi Yesusat fa ame dam dua belas laba im nehasu modi vizi ab im dedamaleham. Mei ahu oli veimam setan mei setan mei laba gagu futodume ilidam bak ame. Labi meia vizi gailemna ahaladiahana ahebu laha modi fa neàdedam bak ame. Labi nisilehe bak ahaladiahana ahebu laha modi fa aodedam bak ame. Yesus Aho neha, “Uho labihasu modem neàte,” lahame Am dam dua belas laba ab gagu ab vizedaham. 2Yesusat Aho gagu olu Am im vameadume esmozi laiam dam dua belas lam neha: Simon ee Yesusat ba taluhuda Petrus ame. Labi am vahada Andreas ame. Labi Zebedeusam adam behàsu Yakobusti am vahada Yohanesti labihasu ame. 3Labi Filipus ame. Bartolomeus ame. Tomas ame. Matius ame. Ame da Matius lam gi meia teo vi gagome vaiam doi pajak atem dam meida am bak. Labi Alfeusam adat Yakobus ame. Tadeus ame. 4Labi Simon Meohoda ame. Labi neo Yudas Iskariot ba Yesus otem bake vou foholo modemda ame. Labihasu Yesusat debe ab Aho gagu olu Am im vameadume esmozi laiam damaleham. 5Labi Yesusat Aho gagu olu Am im vameadume esmozi laiam dam dua belas lam gagu olulo modem di labe im nehasu fet ab vi vameadamam. “Eho etei uba gagolo modem im nim uho le meedalo meedam di uho Yahudi damat modem vab dam labe im num debu mei num debu meime a ladamule. Labi laha Samaria bak labe am num debu mei num debu mei lahadume azihi dam laba a ladamule. 6Gi im Yahudi dam abo dat ahamda Israel labe aba aho vou faat lehe dam totbaho abo domba vou aasdamda vabalehe bak lamti uloho dam laba ladale. 7Uho ame dam laba ladume lafusi im vou vameatedam di labe im nehasu vameadale. ‘Alat Gagu Fihasi Vimteme Oluhu Dat Boehàda lam etei bak niba lehemu Alat Ahamo Boehàdateboli dam bake deeli vame Am damali vuusu im vahokedam bak lam etei ab faasi gàhàli meedamam bak,’ laham im lam uho ame Israel dam laba vou vameatedume fi dedale. 8Labi laha dam gaileheda uho modi fa neàdeda. Labi dam gi etei elodahada zi uho modi fa ahedi usnada. Labi sokba faidi vàhàdem bohu vuusdam dam zi lam uho laha modi fa neàdedume fa dam aheda modi fa vahe vaheda. Labi mei ahu oli veimam setan uho fa gagu futodume ilidume fa vei neàdeda. Uho labihasu meedale. Labi uho lab meedaha bake gohali na a vi gagu vamule. Gi ule neàt meedam tadele. Neham bak. Amu Eho uba modi vizehe di lam uho Eba naat vaha vab labe abo Eho gi uba ule neàt modi vizehe bake ulohona labihadale. 9Labi uho lam di gi saemea ladale. Damat emas modi doilehena lam modeo, perak modi doilehena lam modeo, tembaga modi doilehena lam modeo, labihasu a dume vou ladamule. 10Labi laha nazoh dumna a vou ladamule. Labi laha sue sona ada dusumna modeo, sepatu modeo, gi ubu uho dusuhuda lamota vou ladam neàte. Labi laha um odoamso lam gi niba vou esmozi ladale. Neham bak. Uho ame dam laba le tau meedam bake ame dam labet uba gohali sue modeo, doi modeo, na àmna modeo, uba fà lodase. 11Labi uho ame num debu bak modeo, sii bak modeo, iuba ladume lafusi, ‘Uho num amabadate tau azie?’ laham bak ozolo modem di nasi, ‘Amat am num uba uledi gagu azie?’ laham bak lam nasi nabidale. Nabidume aime neàdi ame num vàmtea lamota laba tau azile. A num iudu iuba le i. Num iudu iuba le i. A labihadamule. Gi num ubu uho azimda lamota azibe neo num debu amomoi bake neo le ame baket mode. Lahadale. 12Labi uho ame num laba olelo modem di labe im nehasu num deda laba gagodale. ‘Neàte. Im Boehàda Alat Ahamo uba neà bak modi esuse,’ lahame gagu olele. 13Labi uho ame num vàmtea laba azim di num dedamat uba iademe gut ve meedameam làhà uho amu lab oli gagoho im lam, ‘Im Boehàda Alat Ahamo uba neà bak modi esuse,’ lahame lab gagoho bak lam gi labihasule. Lahana uho ame num vàmtea laba azim di ame num dedamat uba iademe gut ve meedam vabameam làhà nasi uho amu lab gagoho bak lam fa vi faatoi vou esmozi neo ladale. 14Labi uho mei num modeo, num debu bak modeo, uho ame bak laba lafusidam di aimeam num deda labe aho modeo, ame num debu laba azihi dam labe iho modeo, labihasu ubu uho vou lehe im lam aim moudume im bak malemeam làhà uho ame num debu bak lam vou esmozi fa neo ladale. Vou esmozi lalo modem di labe um naba bak itabe fau foamome vou esmozi fa neo iuba lale. Labi dam labe vi aame nehi ozom bak. ‘Aa làhà! Iho dam labe vou lehe im aihi vabake im bak itabe fau foamohe? Labihalahit Alat iba beoe taia?’ laham bak vi ozom bak am tame. 15Em ba giomim gagoho vabak. Labi eho etei uba neo gagolo modem im imboda nidi nim laha iademe aime ozodale. Ba diamut Dam Bake Uloodume Vi Aime Ozobohudi Neàdi Fime Fahedam Digat fum di lam ubu uho vou lehe im lamti umti ule neàt vaha vab dam lam beodam di abo duana beoda tame. Lahana dam ahamda num debu Sodom laba azihi dam lamti labi num debu Gomora laba azihi dam lamti dam lada labe bisi faina meedaha bakta imbot. Lahana eho etei uba gagu olu ubu uho lab vou le meedaha bak lam aaha vab labe Alat ba beom di mahate duana beodam kaio. Gi fota beodalo modem bak,” lahame ab vameadaham. 16Labi Yesusat neo vi susume nehame vameada. “Um nasi ozodale. Eho etei uba gagu olulo modem di nim um gi domba adatea nembedati ulohona fa dam abo serigala meo feà bakti ulohona laba olulo modem bak. Labihàmu uho mei bake lam di gi moket meedam bakti ulohona iademe ozome vatohedale. Labi uho dam laba le Eho uba lab gagu oluhu im lam meedam di gi bume dolet ilabdem bakti ulohona ahu nemahuba neàt meedale. 17Labi laha Eho etei uba lab gagu oluhu bak lam uho mei bake le meedam di labe uho Eba tu vuzehi vi tau meedam damat modemu Yahudi dam labe ibi iho tu vuzehi meedam bak gagu faheme modiam dam labe fa uba faki vabidume fai baket meedam bak ehe labe iademe it vou faovoi meedale. Neham bak. Uba fakemoholehe dam labe um siàdume fa Yahudi dam labe ibi iho tu vuzehi meedam bak gagu faheme modiam dam labe ibi iho meit im modem diat ulooiame aim dam debu koeda laba ub loda tame. Labi ame dam labe uloodume aime neàdi fa uhumo fi hasi bakamta vahi Alat vameadaha im ahamda dogoit aidam bakti im meiti meedam num laba um vou oli na sokba nasbe ahit alibulehena labe uba foadume geàda tame. 18Labi laha uho Eba tu vuzehi vi tau meedam damat modemu uba fakemoholehe dam labe ozo, ‘Im boehàda zi labe laha neo uba uloodume vi aime beodase,’ laham bak laba ozome um neo si bak ahaladiame vuusuidam boehàdatebo zi lamti dam eeda zi lamti laham dam laba vou le duzu uba uloodume aida tame. Lahana ame bak lam meedam di a iedemule. Neham bak. Uho ame dam laba neha, ‘Iho Yesus bake tu vuzeheho,’ laham bak ahate vameadam bake Alat ahit uba modi labihada tame. Abo Ebe Eho meedam im lam fi desi tombalehe labe fa ame Roma boehàda zi lamti Yahudi damat modem vab dam totbaho lamti iho fa aime ozobohudem bake labihadam bak. 19Lahana ame Yahudi dam eeda labe um si vou ladume ame boehàda zi labe uba tet uloodam di labe uho fa dam laba fa gagom bak lam, ‘Iho im akatihasu fa vi gagoela?’ laham bak lam a bisi vi ozodamule. Neham bak. Em Ai Alat uba modi fi gatehe labe uho gi ame im lam fa ame dam laba fa gagoda tame. 20Ame di lam ba uhumo gagodam vabak. Gi Em Ai labe Am Aha Nutabe Neàna Labe fa uba modi vizehe labe uho ot vai gagodam bak. 21Labi ame di labe neham bak modem bak ehete. Um Eba vi tau meedam damat modemu dam duadat uba faki im nehasu meeda tame. Dat meida lam Eba tu vuzehe vabda labe am vahada Eba tu vuzeheda lam vou fohome meia ub lu otem bak ame. Labi dat meida lam Eba tu vuzehe vabda labe am dubu Eba tu vuzeheda lam fa vou fohome meia ub lu otem bak ame. Labi dat meida lam Eba tu vuzehe vabda labe am data Eba tu vuzeheda lam fa vou fohome meia ub lu otem bak ame. Labi mei data labe am ai modeo, am oi modeo, ibi iho gagoho im lam voou fa daet bohudi vou fohome meia ub lu otem bak ame. Labihada tame. Lahana Eba tu vuzehi meedam dam lam naat iba vabidam di iho gi ozahit keàtedi tu vuzehi meedam bohu vuusdume digat ba novai vaitomda laba fusi meedam lahasuhu dam lam Eho soat vausu fa vei neàdedam dam am bak. 23Labihàmu uho bak mei bake lam di ame dam labe uba gut vabidume fai bak meedameam làhà dam lada lam vou esmozi fa bak mei bak iuba lale. Neham bak. Eho etei uba lab gagu uho meedalo meedam im lam uho Israel dam bake abo num debu mei num debu mei lahadaha dam laba uho le meedume gi neàdehe vabna Em Abo Asum Ahoba Iubet Bak Niba Li Dateleheda nim Em alihi damat ba fa aam bak. 24Eho etei uba totobet fi koadalo modem im nim mahate vi aime ozobohudele. Neha: Meit vahokedam bak aidamda labe aho ba aba vahokedam guru laba fa vafozi feà datelem vabak. Labi laha mei na meedamda labe aho ba aba im gagu modiamda laba ba vafozi feà datelem vabak. Ame bak lam gi neham bak. Damat Eba fai bak meedameam làhà uho ozom, um Eho vahokedam dam niba ba damat fai bak laha meedam vaba? Vabà! Gi umti damat laha fai bak meedam bak. Neham bak. Em bak niba esdam di Em gi uba im gagomda Boehàda Em am bak. Labi uho Ebe Eho gagoho im aime vuzehi meedam dam um am bak. Labihàmu damat Eba neha, ‘Em gi setan zi ahebu vuusdam boehàda Beelzebul Em am bak,’ lahame Eba labihasu vàlu feàtàmeam làhà uho ozom, uba ba labiham vaba? Modem bak. Lahana uho Eba vi tau meedàmu uba fa duana feàtàdam bak,” lahame ab vameadaham. 26Labi Yesusat neo nehame susume vi vameada. “Uho bak iuba le im Ebeda vou vameatedam di ame dam labe uba faki fai baket vabidume meedam di lam ame dam laba uho a iedi vi ozodamule. Neham bak. Alat Ahamo Boehàdateboli dam bakdate deeli vame Am damali vuusu im vahokedam bak lam, ‘Akatihasu modemna modela?’ laham bak lam amu fi zeam bitoi tombalehe vab im lam ba gi labihasu vastem bohu modesdam vabak. Abo ame im lam ahate vameame fi zeam bitoi tombali dam ozobohudem bak ehe bak. 27Neham bak. Eho amu uba neha, ‘Alat Ahamo Boehàdateboli dam bake deeli vame Am damali vuusu im vahokedam bak lam ab faasi meedamam bak,’ laham im lam eho amu uba aa vameame fi gatehe im lam uho fa etei ot vai fa dam bake ahate fi desi vameadale. Abo Eho um dogoi bumat laba si aa vameadam im lam uho laha fa etei ot vai fa dam duadat odosdam bak laba le bisteat ahate vameadume fi dedale. 28Labi uho dam bakda uba gi soabota oteme voom dam laba a àvodi vi ozome iedemule. Dam lam um otem di um so lam gi lab eloi vooho tadem bak. Ba neo um eloi it oazehena lam vi vabidam vabak. Labiham bake ame dam laba uho àvodi a iedemule. Fa gi nehale. Im so nim Alat modi elomnàme fa neo iho lab eloi it oazehena lam vi ve fa vua eludamna sutem gikina bohu laba voom bak ehete. Labiham bake ubu uho bisi àvodi vi ozome ahu adat iedelo modemeam làhà Na Debu Modehe Ala laba iedele. 29Neham bak vi ozomale. Damat gena bume keobena nu vabna vam di, ‘Feà kaio,’ lahame ba doi oona tembagat modehena lam vam mom meote. Lahana ame bume keobena lam Alat faobekesi vou aasdam bak. Alat, ‘Ame bume lam biti elom neàte,’ laham bak uledem vabameam làhà ame bume lam meida buà ba bake biti elom vabak. 30Lahana ame bume lamota vou aasdam vabak. Alat laha uba vou aasdam labe ba um meida buà vabiem vabak. Abo um ahebu vi ozobohu tadehe bak. Abo um ohuta tau keobebe lam Alat laha amu gi debe uloholi ozobohudi esuhu labe Alat um ba vàmtea vabiem vabak. 31Labiham bake Alat ame gena bume keobe zi laba deeli vou aasdameam làhà im dam bakda laha tau vou aasdam bak. Lahana bisi aho deeli vou faovoemda im dam am bak. Labiha labe ame dam bakda amomoi labe uba otelo modem bak modeo, uba faina modelo modem bak modeo, uho a bisi vi ozodume iedemule. 32Meit ladi iedehe vabna dam duada labe iho avaesdam laba le ahate duzu nehasu gagomeam, ‘Em Yesus bake tu vuzehi vi tau meedamda em meida am bak,’ lahame ahate labi gagomeam làhà Eho laha ba Em Ai asum ahoba iuba azim Ala labe Aho avaesdam laba Eho le duzu nehame gagom bak. ‘Da nim Eba tu vuzehi vi tau meedamda meida am am bak,’ lahame ba diamut Ala bake ahate labi gagoda tame. 33Lahana meit ladi vei iedi dam duada labe iho avaesdam laba le duzu ahate nehameam, ‘Em Yesus bake tu vuzehi Aba vi tau meedamda modem kaio,’ lahame vei iedi Eba momeam làhà Eho ba Em Ai asum ahoba iuba azim Ala labe Aho avaesdam laba le duzu laha nehasu gagom bak. ‘Da lam Eba tu vuzehi vi tau meedamda modem kaio. Em bieho,’ lahame ba diamut ahate labi gagoda tame,” lahame Yesusat ab vameadaham. 34Labi Yesusat neo nehame susume vi vameada. “Uho nehame ozohe? ‘Dam mei debuti dam mei debuti Eho fa vahe vahedalo bak niba leha,’ lahame uho labihasu ozohe? Làhà um git ozoho bak. Ba labiham vabak. Eho bak niba lehemu dam Eba tu vuzehe vab damat fa Eba tu vuzehe dam laba faki oddam bak. 35Eho bak niba lehemu dam Eba tu vuzehe vab dam lamti fa Eba tu vuzehe dam lamti nehi ot fakiame ot beluidam bak. “Am adat fa am ai bake faki meeda. Labi am adnamat fa am oi bake faki meeda. Labi Am taai labe fa am tai bake faki meeda. 36Labihadam labe iho nehi ozom bak. Uba fakemoho dam lam gi um dam debu am bak. Ba dam giida oba fakem vabak.” 37Neham bak. Meit am ai modeo, am oi modeo, bisi duana deeli meeda. Labi Eba gi fota deeli meedamda lam ba neà vab labe Eho ba neha, ‘Ame da lam Eba tu vuzehi vi tau meedamda am am bak,’ lahame Eho ba labi gagom biem bak. Labi laha meit am adat modeo, am adnamat modeo, bisi duana deeli meeda. Labi Eba gi fota deeli meedamda lam ba neà vab labe Eho ba neha, ‘Eba tu vuzehi vi tau meedamda am am bak,’ lahame Eho ba labi gagom biem bak. 38Labi laha meit neha, ‘Eho Yesus bake tu vuzehi im Abada meedàmu damat em si ut tetehesuhunaso lam ve lu vatu vou ladam di lam damat eba aasdamnàme gi ozahit vou le em paku dou elom neàte,’ lahame Eba labihasu tu vuzehi gagu vàmadem vaba vedi iedi momda abo Emti uloho vab labe Eho ame da laba, ‘Eba tu vuzehi vi tau meedamda am am bak,’ lahame Eho ba labi gagom biem bak. 39Neham bak. Meit aba aho Eba lab tu vuzehehe bak lam ahate gagomeam damat am otem bak labna zohàme it vou faovoi vei iedi ahit biehenali, ‘Em Yesus bake tu vuzehi Am damalem kaio,’ lahame veibadamda lam ba Alati vahi gi ahe neàna bohu vuusdam vabak. Laham vaba meit bisi it vou faovoi elom bake vei iedem vaba ahatet neha, ‘Eho Yesus bake tu vuzehi Aba vi tau meedamda em am bak,’ lahame gagu afoezobe damat am otemeam làhà ame da lam ba Alati vahi gi ahe neàna bohu vuusdamda am am bak. 40Uho bak mei bak iuba lameam meit uba ahu ule neàt gut vamda lam Alat ozom di ame da labe gi Eba laha ahu ule neàt ab vaham bak. Labi ame da labe Eba ahu ule neàt vameam làhà Eba Gagu Oluhuda lam abo Em Ai bake laha ahu ule neàt vaha bak. 41Labi meit neha, ‘Da lam abo Alat gagu olu Am im ot vai fa iba ahate vameaidamda meida am bak,’ lahame am ahu ule neàt ame da labe etei iba leheda laba tu vuzehi gut vameam làhà Alat ba diamut ame da nibe aho lab tu vuzehehe bak lam gohali lomna lom di gi ame da nimti labi ame da nibe aho ule neàt gut vahada lamti amait ame na ulohona ba lodam bak. Labi meit neha, ‘Da lam abo Alat gagoho im vuzehi vamdesu meedamda meida am bak,’ lahame am ahu ule neàt ame da labe etei iba leheda laba tu vuzehi gut vameam làhà Alat ba diamut ame da nibe aho lab tu vuzehehe bak lam gohali lomna lom di gi ame da nimti labi ame da nibe aho ule neàt gut vahada lamti amait ame na ulohona ba lodam bak. 42Ebe Eho vahokedam im ozobohudelo vi tau meedamda meida nim abo damat neha, ‘Feà vab dàt moz,’ lahamda nim meit ozo, ‘Da lam laha Yesus bake vi tau meedamda meida am bak,’ lahame ozome gi vaota noai lu udemeam làhà Alat ba diamut dam bake gohali lomna lodam di ame da laba laha tau lodam bak. Ba loho vaba alia modem vabak,” lahame Yesusat Aba vi tau meedam dam dua belas laba ame im zi lam ab vahokedaham.

will be added

X\