Markus 9

1Labi im lada lam vameadume neàdi Yesusat fa neo vi vameada. “Eho lab gagoho bak lam ba imbodemta imbode. Lahana Eho etei uba neo gagolo modem im imboda nidi nim laha nasi aima. Um dam etei nib dozeadaha dam totbahota taho elom vaba ahe lahasdamna uho ba Alat Boehàdateboli dam bake vuusu im vahokedalo li duzum bak um dam zohota ame bak aa tame,” lahame Yesusat ab fet gagu esuham. 2Labi usi enamli neàdi Yesus Aho Aba vi tau meedam dam Petrusti Yakobusti Yohanesti labihasu gi dam lada làtela lamota gagome sibu bake ab vou laiteham. Labi vou laisi modeha Yesus Am alihi veimdehe bak lam Aba vi tau meedam dam làtela labe ab aaham. 3Abo gi ala digadda meo fau fako aam iedem bakti ulohona Yesusam sue laba modesu ab fauha meoleham. Ba bak damat iho sue fauhana kikeme bisi fauha neàdem bakti uloho vabak. Abo bisi vafozi meona fau feà modesu ogatedam bak. 4Labihàmu ame dam làtela labe iho vi aaha Alat vameadaha im aime fa dam bake ahate vameaidaha dam abo aham di iube eloi seddaha dam behàsu Musati Eliati iho lehe bak aaha vabna nom ilu Yesus Am obe laba vi tau duzu im vameadamna ab aaham. 5Labi ame bak lam aahemu Petrusat Yesus bake ab gagoham. “Ai Guru oa, iho etei niba li odosi umti vahehe bak abo neàte. Imo teohet mom num làtela mose. Meida Oba mo. Labi meida Musa bake mo. Labi meida Elia bake mo. Labihadase.” 6Petrusti aba mei dam behàsu lamti iho iedi modem faidi Petrusat gi ahulat ozom im ostame fa num mom bak lam ab gagoham. 7Lahame Petrusat gi etei labi vameadam lahasuhu di labe ulo fauha meona nom ilu ame dam lam ab baguamdi seteham. Labi modeha Alat Am dae ulo labe futoi gago, “Da nim Em Adat vàmtea Ebe Eho bisi deelemda Am am tame. Uho Aho vameadam im mahate aime meedale.” 8Lahame gi etei labihasu vameadameilahit ame dam làtela labe vi nabime aaha ulo fau lamti ame dam behàsu lamti fa seti gi Yesus Ahamo doudamna ab aaham. 9Labi im lam meedume neàdi sibu labe fa lezedam di labe Yesusat Am dam làtela niba ab gagoham. “Uho etei le aadaha bak lam Em Abo Asum Ahoba Iubet Bak Niba Li Dateleheda nim eloi Em eloho bak labet Alat modi fa ahedi usaha vab di meia a le fi demule,” lahame ab gagu mali esuham. 10Làhàmu ame dam làtela labe iho etei le aaha bak lam ba meia fi dehe vaba ab vasteham. Lahana Yesusat etei neha, “Em eloi fat ahedi usam bak,” lahaha bak lam, “Akati modemna gagohela?” laham bak ozom vabili ot vameaida. 11Labi ot vameaidam labe fa neo Yesus bake vi ailo ab gagoham. “Dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi labe nehi vahokedamna iho aihi bak. ‘Amu dat ahamda Alat vameadaha im aime fa dam bake ahate vameaidahada Eliat nasi bak niba fa le. Labi Alat Gagu Fihasi Vimteme Olulo Modem Dat Boehàda ba vule tame,’ lahame vahokehena iho aihi bak. Ne, ‘Om ame Da am tame,’ lahana iho etei Eliam alihi aahana aho Om ba vulem bak zie vuehe vabna akati nasi fa lahela? Làhà, gurut iba lab vahokedam im lam giomimot mode?” 12Lahame labi gagoha Yesusat fa vi gago, “Lo, lamota imbot. Eliat nasi bak niba li dam bake nehi fet vameada. ‘Alat Gagu Fihasi Vimteme Olulo Modem Dat Boehàda le tame,’ lahame vameadume damat aime neàdi im ahu vabiedume ahumdi vou faodam bak ehe bak. Lahana um ozom vaba? Ame da Eliati ulohoda amu gi Eho ba vulem bake nasi li duzu neàdehe bak. Nasi li duzuhunàme aho lab vahokedaha im lam damat aime tuhu vabak. Vedi ame dam labe ibi iho modelo àhàkehe bak labet modi aba fa fai bak meedume vabidume geàdaha bak. Ame bak lam meit Alat Vameadaha Im Toedahana laba labihasu fet toeme esuhu im ehe labe labihaha bak. Lahana Em Abo Asum Ahoba Iubet Bak Niba Li Dateleheda nibe Ebe Eho ba modem im akatihà? Meit Alat Vameadaha Im Toedahana laba nehasu fet toeme esuhu bak. ‘Asum Ahoba Iubet Bak Niba Li Dateleheda lam damat Aba modi geàdume mu voo tame,’ lahame toehe bak lam akati modi um ozom vaba modela?” lahame ab vameadaham. 14Labi Yesus Aba vi tau meedam dam làtela lam iho vahi lezi Aba vi tau meedam dam totbaho bake ab lefuham. Lefusi aaha dam duada zi totbaho lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti labihasu vahi fa Aba vi tau meedam dam totbaho laba vabousu daet beàdam bak ab li aaham. 15Labi modeha dam duada zi labe iho it vaktesi aaha Yesusat ledam bak aahemu àvodi Yesus bake, “Neàte,” lahalo ab emoeham. 16Labi emoeme Yesus bake lefuhemu Yesusat ab gut gagoham. “Um ana im beàdàla?” 17Lahame gut gagohemu dat meida labe fa ab gagoham. “Vabà! Ai Guru oa, em daboseà nim mei ahu oli veimam setan labet modi dae vabaleho. 18Ame setan labe aba modiam bak fum di aba modi bake biti geàda. Labi fa neo aba modi aheli kehanabu vaome geàda. Labi neo modi am mo uzimtedi so teilemahi modida. Labi modidàmu eho Oba vi tau meedam dam totbaho niba tauledume gago, ‘Uho ame setan laba gagu futoi itale,’ lahame gagoha dam labe modesome modeha modem bi moho,” lahame Yesus bake ab vameadaham. 19Labi vameadume modeha Yesusat fa ame lab odosdam dam zi laba ab gagoham. “Em abo uba tau azibehamdehena um eteida nim akati Eba mahate tu vuzehem vaba modela? Alat Aba Aho ozoho baket uho modehe vaba akati bisi odohabuli git meedam bak bohu vuusdàla? Eho uba vuusdam di adi bake fusi um mu voe? Uho Eba tu vuzehem bak Eho ba gi labihasu vou faodà?” lahame gagu neàdi fa ame da niba ab gagoham. “Om daboseà nasi ve vou lele.” 20Lahame labi gagohemu dam labe le ame daboseà ve fa ab vou leham. Labi Yesus bake vou le netàdeha ame setan labe Yesusam alihi aahemu ame daboseà niba modi ab tufa tufadamam. Labi bake biti vakte vaktedam labe kehanabu vaome ab geàdamam. 21Labi geàdam di labe Yesusat ame daboseà labe am ai bake ab gagoham. “Om daboseà nim adi diat faasi ame im nim meedàla?” Lahahat ame da labe fa gago, “Amu gi koe diat faasi meedume etei ab vou fuham bak. 22Ame setan labe, ‘Em adat nim otese,’ lahame aba modi vua bak modeo, vao bak modeo, ostame bitidam meote. Lahana Obo Oho modem im ehelemeam làhà iba faobekesi tau modele.” 23Lahame labi gagoha Yesusat àvodi fa gago, “Lo, Eho modem im ehe bak. Ne, anat? Meit Eba tu vuzehi meedameam làhà na ahebu Eho modem neà tadehe bak.” 24Lahame labi gagoha ame daboseà nibe am aiat ab gagoham. “Lo, em Oba tu vuzehemta tu vuzehehe bake. Lahana mahate tu vuzehem kaio. Oho eba laha vi modi Oba tu vuzehem bak mahate modi dualele.” 25Lahame labi gagoha dam amomoi zi neo, “Imo vi tau aase,” lahame emoeme lefuseo meedam bak lam Yesusat aahemu ame setan laba ab mali ootedamam. “Meia modi dae vabalehe bakti ulaihàbulehe bakti labihasu modem setan oho taho daboseà nibe futoi vou esmozi itale. Ba a fa li oli veimamule.” 26Lahame labi mali ooteha ame setan labe ame daboseà laba neo modi geàda. Gagada. Kehanabu vaoda. Labi modi tufa tufadume vou esmozi ab itaham. Lahana damat aaha ame daboseà lam koeisoti uloholi bisdam bak aahemu, “Eloho,” lahame àvodi ab gagodamam. 27Lahana Yesusat geàmu ame daboseà lam neàdehe bak ozobohu labe am anekehà vi vuu vousai ab vou duzuham. 28Labi ame daboseà lam modi fa neàdi Yesus Aba vi tau meedam dam lamti ihimo vahi dam dua bak vaitesu fa num ibi iho azimdate ab vou oedaham. Vou oedume neàdi Aba vi tau meedam dam labe Yesus bake ab gagoham. “Oho ozom, akati modi iho ame setan lam iho gagu futoi itasome modeha modem bi mohela?” 29Lahahat Yesusat fa gago, “Mei ahu oli veimai ahelem setan lamohoda gagu futoi italo modem di gi modem vabak. Abo amu nasi Ala bake tom gagodume neàdi afoezobe ba ame setan lamohoda gagu futoi itam bak,” lahame ab vi gagu esuham. 30Labi Yesusat Aba vi tau meedam dam lamti iho ame bak lam vou esmozi neo ladume Galilea bak laba modealaha num debu meida laba labe i. Num debu meida neo laba labe i. Labihada. Labi izi labohotidam di labe damat aime Aba valadam bak labna zohàme iho fusidam bak laba fum di ba fi dem vabak. Gi aa labohoti laida. Am abo Aba vi tau meedam dam laba im duana vi vahokedalo labihadam bak. Labi digat meida iube Aho neha, “Um aile. Em Abo Asum Ahoba Iubet Bak Niba Li Dateleheda nim kehàm vaba meit Em vou fohome dam bake ub lu ote tame. Labi oteme usi behàsdi Em eloho bak labet Alat modi fa ahedi usa tame.” 32Lahame labi gagoha Aba vi tau meedam dam labe Yesusat etei lab gagoho im lam ozom bili vi ozodamnàme fa vi gagu aim iedi moh. 33Labi neo ladume num debu Kapernaum ab vou fuham. Laba vou fusi num bake vou oedume neàdi Yesusat Aba vi tau meedam dam laba ab gagoham. “Iho etei zie doni laba lab leom di uho ana im vou otesi otesia ledàla?” 34Lahame labi gagu aiha dam lam ba im vi gagom kai. Ame dam labe iho etei lab ledam di labe meit neha, “Alat iba ozom di eho feà datelem bak,” lahame vou otesi otesia lehemu Yesus bake vi gagu fi dem lade. 35Làhàmu Yesusat fa nusu Aba vi tau meedam dam dua belas laba im ab vi vahokedamam. “Uho meidavat nehi it ozo, ‘Alat eba, “Em feà,” laham bak modese,’ lahame it ozome modelo àhàkemeam làhà ame da labe fa feà vab dateli meit gagohona uledi meedam tadele.” 36Lahame labi gagu neàdi Aho fa data koena laba gagome li ame dam dua belas labe ibi iho avaelaha tot laba ab vou li duzuham. Labi vou li duzu neàdi ame data visoi sivai vou nusu Am dam laba nehame ab faasi vameadamam. 37“Meit Eba tu vuzehi meedàmu fa damat neha, ‘Feà vab dàt moz,’ lahame gagomda lam abo data koena nimti ulohoda lam meit ame da lam ule neàt vamda lam Alat ozom di ame da lam gi Eba laha ahu ule neàt ab vaham bak. Labi Eba ahu ule neàt vamda lam gi Emota ule neàt vaha vabak. Abo Eba Gagu Oluhuda lam abo Em Ai bake laha ahu ule neàt vaha bak,” lahame ab vameadaham. 38Lahame labi gagu modeha Yohanesat Yesus bake ab vi gagoham. “Ai Guru oa, iho amu iuba le aaha da meida labe Om ee gagodume mei ahu oli veimaha setan laba gagu futoi itaha bak im aaho. Lahana ame da lam imti vahi Oba vi tau meedam vab dàt labi modehemu iho malesome modeha vaba moho.” 39Lahame labi gagoha Yesusat fa gago, “Mm, vabà! Meit labihameam uho a malemule. Modem neàte. Neham bak. Eho meia gagu im dedateli fa na damat ihimo modem biem im feàna modemeam làhà ame di labe ame da labe ba kehàm vaba Eba vi feàtàm biem bak. 40Neham bak. Meit imti ot odosiam vabda lam iba taumda am bak. 41Um mahate ozobohudele. Meit Eba tu vuzehi Em damaleheda meida iube uba nehi ozo, ‘Uho Eba Alat Gagu Fihasi Vimteme Oluhu Dat Boehàda niba tu vuzehi meedam dam um ame?’ lahame uba faobekesi gi vaota noai lu udemeam làhà Alat ba diamut um Eba tu vuzehi meedam dam niba gohali lomna lodam di ame da laba laha tau lodam bak. Ba loho vaba alia modem vabak,” lahame ab gagoham. 42Im lada lam vameadume neàdi Yesusat im meida nim neo vi vameada. “Lahana meit Eba tu vuzehi meedamda nim abo damat neha, ‘Gi data koena nimti ulohoda feà vab dàt moz,’ lahame ozomda lam meit am vou fohome faina modi ubahi ubahidume Em mu voohemu ame mei vou fohohoda lam ba diamut Alat bisi feàna beomda am bak. Dat labihalo modemda lam gi nasi nehasu meedam vaba? Dam gagome am si ke feàda bumatna visoi am bio laba vààsu asimbuli itea feàna tombu iuba vou le nobu feà bak iuba nasi nom voou tezi eloi setem vaba? Lam bisi neà bak am bak. 43Labi laha om ahu labe oba modi om anekehàt om vou fohome faina modi ubahi ubahidume Em mu voolo modemeam làhà om anekehà nasi vaitoi fa nisilele. Bak lam bisi neà bak am taia? Omti Alati vahi vou ali ahu vàmadi amedamalem bake etei bak niba godam di gi anekehà vàmtea vou goda. Labi ba diamut gi nisilehena Alat Aba Aho azim bak laba le tau vahi azim bak lam bisi neà bak am bak. Ba akati modi anekehà ahimit faina meedam bohu vuusu vou mode ladume ba diamut om so ahebu vua elum sutem gikina bohu laba voela? [ 44Ba akati modi om so ahebu koeili fomsoali geàdamna bohu abo vua elum sutem gikina bohu laba voela?] 45Labi laha om ahu labe oba modi om naot om vou fohome faina modi ubahi ubahidume Em mu voolo modemeam làhà om nao nasi vaitoi fa nisilele. Bak lam bisi neà bak am taia? Omti Alati vahi vou ali ahu vàmadi amedamalem bake etei bak niba godam di gi nao vàmtea vou goda. Labi ba diamut gi nisilehena Alat Aba Aho azim bak laba le tau vahi azim bak lam bisi neà bak am bak. Ba akati modi nao ahimit faina meedam bohu vuusu vou mode ladume ba diamut om so ahebu vua elum sutem gikina bohu laba voela? [ 46Ba akati modi om so ahebu koeili fomsoali geàdamna bohu abo vua elum sutem gikina bohu laba voela?] 47Labi laha om ahu labe oba modi om fakot om vou fohome faina modi ubahi ubahidume Em mu voolo modemeam làhà om fako nasi valoi voou fa nisilele. Bak lam bisi neà bak am taia? Omti Alati vahi vou ali ahu vàmadi amedamalem bake etei bak niba godam di gi fako vàmtea vou goda. Labi ba diamut gi nisilehena Alat Aba Aho azim bak laba le tau vahi azim bak lam bisi neà bak am bak. Ba akati modi fako ahimit faina meedam bohu vuusu vou mode ladume ba diamut om so ahebu vua elum sutem gikina bohu laba voela? 48Ba akati modi om so ahebu koeili fomsoali geàdamna bohu abo vua elum sutem gikina bohu laba voela?” lahame Yesusat ab vameadaham. 49Im lada lam vameadume neàdi Yesusat neo vameada. “Eba tu vuzehi meedam dam lam ahebu, ‘Mahate tu vuzeheo?’ laham bak modi ozolo Alat ahit vuat modi geiam bakti ulohona modi geàdalo modem bak. Ibi iho lab tu vuzehe bak lam, ‘Fà vi teudese,’ lahame labihalo meedam bak. Neham bak. 50Garam abo na àmna nu laba voou vizehe labe ame na nu lam àm di abo àm neàt. Labiha labe garam lam abo neàt. Lahana ame garam labe ahamo na nua vizemna lam fa vei seti faidemeam làhà ame na fauha keobe lam ba akati iho modi fa garamli na nu laba vizemnalela? Labiham biem bak. Uho Eba tu vuzehem dam laha garam na àmna modi vizem bakti ulohona meedale. Neham bak. Umti vahi esdam dam lamti ot fakiam vaba gi vahi esdam bak laba ozome iademe neà bak bohu meedale,” lahame ab vahokedaham.

will be added

X\