Markus 15

1Labi dihambe Yahudit Ibi Iho Modem Im Gagu Vàmadi Esum Dam Debu abo damat Ala bake lomna ve vua vahudam toheda zi laba vuusu im vameame faheme modiam dam ame. Labi Yahudi dam bake vuusu im vameame faheme modiam dam busaoda zi ame. Labi Musam Im Feàna zi ozobohudi fa meia vahokedam guru zi ame. Labihasu vahe vahedume im vameadume neàdi ahu vàmadi ab gagoham. “Neàdehe bak. Yesus gagome otem neàte. Imo Yesus neo Roma dàt Yudea bak vuusdam gubernurleheda laba vou le ub lu aho fà uloome aise.” Lahame labi gagu neàdi Yesusam anekehà ahim giame vou duzu vou futoi Gubernur Pilatus bake ab vou ladamam. Labi vou ladume gubernur labe am im meedam num feàda Pilatusat aidam bak laba lafusi aho avaesdam laba vou duzu neàdehezobe, “Pilatusat fà aise,” lahame im meiti im meiti Yesus bake la vàlui le vàluidume ab vameadamam. “Gubernur oa, iho aiha Yesusat neha, ‘Am abo dam bake vuusu im vahokedam boehàdatebo Am am bak,’ lahadam bak im aiho.” 2Làhàmu Pilatusat Yesus bake ab vi ailo gagoham. “Imbo? Oho neha, ‘Em Yahudi dam debu vuusu im vahokedam boehàda am tame,’ lahame Oho labihasu gagodàmu damat Oba vàluhu bak lam imboo? Om ame da ameo?” Lahaha Yesusat fa gago, “Lo, oho etei lab gagoho bak lam imbote. Em ame Da am bak.” 3Lahame labi gagoha ame toheda zi laba vuusu im vameame faheme modiam dam labe fa neo im mei tem vàlu beàda. Labi neo im mei tem vàlu beàda. Lahada. Gi labihadamnàme Yesus ba dae bum kai. 4Làhàmu Pilatusat Yesus bake neo vi ailo ab gagoham. “Dam etei Oba nib la vàlui le vàluidam bak nim Om aidamna akati taho fa veibam vaba mode?” 5Lahame labi gagoha Yesus ba neo dae bum kai. Labihàmu Pilatus ab àvodeham. 6Ame Roma dam zoho vuusdam gubernur labe aba aho tahun ahebu modi baleàlehe bak gi nehadam bak. Yahudi dam ibi iho na àme iziam bak abo Paskah fum di Yahudi dam amu si sel oumahehe dam lam, “Dat adida isi oluela?” laham bak lam dam bake gagu aime gi damat iho ee gagohoda vàmtea lamota aho fa gagu vou futoi Yahudi dam bake olum meot. 7Ame di labe amu sel oumahehe dam dat meida Barabas laba ehet. Ame da Barabas lam amu im nehasu meedaha dàt moz. Amti am Yahudi dam totbaho lamti iho vazisi kota Yerusalem niba li dam totbaho gagome fàsi fa Kaisarleheda labe am Roma damti, “Beose,” lahame modi dae gai duzu mei otehemu ame Roma meo dam labe si sel oumaheda meida am bak. 8Labihàmu ame gubernur labe aba aho amu modi baleàlehe bak fa neo vou fuhemu dam duada zi labe ame num feàda labe am ad oli aam bak tomba laba vazisi neàdehezobe ab vi tauledamam. “Obo oho amu modehe baket neo modele.” Lahame labi gagoha Pilatusat vi ailo ab gagoham. “Eho etei dat adida gagu vou futoi uba oluela? Yesus abo damat neha, ‘Um Yahudi dam vuusdam boehàda am tame,’ lahamda nim eho uba isi olue?” 10Pilatus neham bak amu gi ozobohudi labi gagu vi ailo gagoho bak. Yesus ba git modehe bak na vabak. Gi ame toheda zi laba vuusu im vameame faheme modiam dam labe iho nehi ozo, “Akati modi dam dua totbaho labe fa Yesus bake tu vuzehi Am damali meedà?” lahame ahu adat faki teidi aba ub loho bak lam am ozobohu labe ahit vi ailo ab gagoham. 11Lahana ame toheda zi laba vuusu im vameame faheme modiam dam labe iho amu dam duada zi laba nehi fet gagu esu, “Gubernur uba neha, ‘Am dat adida gagu vou futoi iba oluela?’ lahame gagom di uho gi gubernur laba fa nehi gagole, ‘Iba Barabas gagu vou futole. Labi oho om meo dam gagome fa Yesus otele,’ lahale,” lahame tet ootedam labe ame dam duada zi labe ab uledeham. 12“Barabas isi oluse,” lahame gagodam labe Gubernur Pilatusat neo vi ailo ab gagoham. “Eho Barabas isi olumeam làhà eho ame da Yesus damat neha, ‘Um Yahudi dam bake vuusu im vahokedam boehàda am tame,’ lahamda nim eho akati modela?” 13Lahahat dam zi labe vi ozome dae vàmadi fa ab gagoham. “Làhà ut tetehesuhunaso laba esu paku dodume elole.” 14Lahahat Pilatus fa neo gago, “Ne lahana eho Da nim uloodume aiha Aho faina modehe bak aihi vabna akati eho gagu ote?” Lahame labi gagoha ame dam duada zi labe Yesus gi ut tetehesuhunaso laba esu paku dolo àhàki meedàmu dae duali dae gai ab ziddamam. “Vabo. Gi om meo dam gagome ut tetehesuhunaso laba esu paku dodume elole,” lahame ab daetesu meedamam. 15Labi Pilatusat ozoha, dam duada zi labe labihasu daetesu vàhàdehemu, “Eho ba akati modi dam laba male,” lahame vi ozodaha vabamu dam zi labe im ahu deelem bake Pilatusat am meo dam gagome Barabas sel ousuhuda laba gagu vou futoi ame dam zi laba fa ab oluham. Labi Yesus fa meo dama ub lu na sokba nasbe ahit alibulehena labe Aba foadume ab geàdamam. Labi foadume neàdi Pilatusat neo, “Yesus ut tetehesuhunaso laba esu paku dole,” lahame am meo dam lam gagu ab oluham. 16Labi ame meo dam labe iho Yesus si gubernur labe am im meedam num feàda labe am zoho laba abo meo damat vahi esdam bak laba neo vou le duzu neàdi im meo dam totbaho ahebu gagome ledume Yesusam obe laba ab ahilesu dozeadamam. 17Dozeadume neàdi Yesusam sue vome vihilame fa sue sona boz gihona bohu abo boehàdat ahoba dusum sue lamohoda ve Yesus bake nom dusu. Labi neo lo alibuna vabome vuihàli neàdi Yesusam ohu laba neo nom usulo vi gago, “Nim gi boehàdat am sueti am ohu laba usumnati lahamnat modem bak,” lahame tozome afoezobe ab nom usuham. 18Labihadume neàdi ame meo dam labe iho neo ahit neà damali Yesus bake ab gagu tozoidamam. “Looo. Yahudi dam debu vuusu im vahokedam boehàda abo neàteee,” lahame meit gagu tozo. Meit gagu tozo. Labihada. 19Labi loso visoi Yesusam ohu laba meit fu tozo. Meit fu tozo. Labihada. Labi neo keha vi dou gagu tozoida. Labi neo ahit neà damali ogomaladume, “Yesus abo feàteee,” lahame vou baedam labe tozoida. 20Labihadume neàdi ame sue bohu lam fa vuu vihitoi sue Abada fa duadume neàdi damat Am esu paku dolo modem ut tetehesuhunaso lam visoi Aba nom vatu kota Yerusalem vou esmozi fa bàhàgo iuba Yesus ab vou ladamam. 21Labi lab vou ladam di labe dat ee gagom Simon abo Aleksanderti Rufusti labe im ai Kireneda labe aho kota Yerusalem bàhàgo bak laba godam dàt fa kota bake ledamda ab ot tahiaham. Ot tahiame modeha Yesusat Am vanamai alihi nemahuhemu ame meo dam labe Simon bake tet gut ooteme Yesusat Aho vatu vou ladam ut tetehesuhunaso lam fa visoi Simon bake tet ab nom vatuham. Labi Simon ame utso lam vatu ab vou ladamam. 22Labi vou ladume Golgota laba ab vou fuham. Aram dae Golgota laham di gi, “Ohu Fetahabu,” laham bak. 23Labi Golgota laba vou fusi ame meo dam nibe anggur oo vaksa laba na amomoi àhàkebuna ee gagom mur lamti vi tau valihehena lam, “Yesusat valo àhàkem bak laba ozome lu udese,” lahame lu modeha Yesus ab moham. 24Labi ame meo dam labe neo Yesusam sue ahoba dusuhuda lam ab vome vihilaham. Labi vihilame neàdi neo ame ut tetehesuhunaso lam visoi bake esu afoezobe Yesus tom gaesu nom esu neàdi Am anekehà meida kidadesu paku do. Labi Am anekehà meida neo kidadesu paku do. Labi Am naba bakamta modesu paku do. Labihadume neàdi vi vuu vousai bak bumata ab nom zisuham. Labi zisu teudi neàdi ame meo dam labe iho Yesusam so laba amu lab vihilaha sue lam, “Amat vaela?” lahame ibi iho fi mam baket modeme neàdi ab vadaham. 25Damat Yesus ve ut tetehesuhunaso laba paku doho di lam gi dihambe jam sembilan doho bak. 26Labi meit aame ozo, “Da nim ana im modehe bake damat vàlu otehela?” lahame damat ut gaheba ve meo dam gagome toeme neàdi Yesusam ohu vazidazi toma zoho laba taasu paku vi dou esu. Ame ut gaheba lam im nehasu toe. DA NIM ABO YAHUDI DAM VUUSU IM VAHOKEDAM BOEHÀDA AM TAME, lahame toeme ab taasu esuham bak. 27Labi Yesus ve paku doho di lam ame meo damat ut tetehesuhunaso meida ahim neo visoi dam mei nazoh vietomoadume vou itam dam ahim lam vame Yesusat modehe bakti ulohona modi paku dodume neàdi Yesusam anekehà ahi totti soi totti modesuhu laba bak bumata ab nom zisitdaham. [ 28Labihadaha bak lam vi ozom di gi meit Alat Vameadaha Im Toedahana laba im meida nim abo meit Alat Gagu Fihasi Vimteme Oluhu Dat Boehàda labe Aho ba modem im nasi ozobohudi nehi fet toeme esuhu im nim ab modi imbodeham bak. “Ame da lam ozom di faina meedamda ozomomda am bak.” Lahame fet toeme vàmadi esuhu labe ame bak lam ab modi imbodeham bak.] 29Labi Yesus taasu modesdam di labe dam duada zi labe labohotedam labe tom aame ohu bobodam labe nehi tozome gagoida. “Làhà, ‘Ame Fihasi Ala Bake Vou Baedam Num Vàmteabu lam Om feàda modem labe Ohomo beodume fa faamome seti usi làteladi fa mo tame,’ lahame gagodamda am taia? Làhà Ohomo naedat soat it vausu taho Ohomo paku laba it vi vuu veioi usemeta,” lahame tozome labohotida. 31Labi laha ame di labe damat Ala bake lomna ve vua vahudam toheda zi laba vuusu im vameame faheme modiam dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti labihasu laha Yesus bake feàtàom labe ihimo ot gagoi ot gagoida. “Ea, Da nim mei modi fa neàdemda ame. Akati Ahamo naedat taho it vabieme neàdem vaba mode? 32‘Alat Gagu Fihasi Vimteme Oluhu Dat Boehàda Am am tame,’ lahamda Ahamo nasi paku laba it vi vuu veioi usi neàdemeta. Labihamta iho aame, ‘Imboo?’ laham bak ozome tu vuzehem bak,” lahame tozome ot gagoida. Labi laha ame di labe dam mei nazoh vadam dam abo Yesusam obe laba tau paku doho dam behàsu labe vedi fa Yesus bake laha feàtàda. Labihada. 33Gi labihadume ala tomaleha bak ahebu ala fauhaedam bak seti ab aibuleham. Labi aibulehemu vou faodameilahit ala vakidem bak fuha fa ab fauha neàdeham. 34Labi jam tiga abo ala vakidehe di labe Yesusat bisteat Ibrani dae, “Eloi, Eloi, lama sabaktani,” lahame buteme ab geham. (Ame lab gagoho bak lam gi, “Eba vuusdam Ala oa, Om akati Em vou esmohela?” lahame gagoho imot moz.) 35Lahame dam Yesus paku doho bak laba netàdi dozeadaha dam labet ame lab buteme gehe bak lam aihemu vedi neha, “Laha vi aima. Da lam gi dat ahamda Alat vameadaha im aime fa dam bake ahate vameaidahada Elia am ee gagoda taia?” 36Lahame labi gagohemu meit emoeme le kohu lasobuti ulohona visoi anggur oo vaksa àhàkebuna laba nom ekeme neàdi ut aaso bohu laba taasu giame, “Yesusat fà udese,” lahame Yesusam aha laba tom fi sulo gago, “Imo vao nim lu udeme aamase. Da labe gagoho bak lam imbodi, ‘Eliat aba vi tau fa veioi vou useo?’ laham bak aasu vou faose.” 37Labihadameilahit Yesusat neo bisteat buteme ab geham. Labi etei lab buteme geheda labe Yesus ab fi sivai eloham. 38Labi fi sivai eloho di labe ame Fihasi Ala Bake Vou Baedam Num Vàmteabu donibu laba tetehesdam sue tamzohobuna baa lam ahamo ahoba zoho iube fàsi nom vou li busbe nom zoho iuba ab fi tatoham. 39Labi modeha ame meo dam zi labe iba vuusdam boehàda lam abo Yesusat avaesdam totbaho laba duzuhuda labe aho Yesusat geme fi sivai eloho bak aahemu ab gagoham. “Làhà imbote. Da nim abo Alam Adàt modem bak,” lahame ab gagoham. 40Labihadam di labe lahi dua totbaho labe vaitesu dozeadume damat Yesus paku dome meedam bak laba vou aasda. Ame lahi zi lam amu Galilea bak labe faasi Yesus bake tau godam labe na vou modetedume fa kota Yerusalem niba vou fuhu lahi zi am. Ame lahi zi lam nam meida Maria abo num debu Magdala labet lehe nam am. Labi nam meida abo Yosesti dat baseà Yakobusti im faaha oi Maria am. Labi nam meida Salome am. Labi lahi amomoi totbaho zi am. Labihasu gi vaitesu dozeadume vou aasda. 42Damat Yesus ve ut tetehesuhunaso laba esu paku dome eloho digat lam gi Yahudi dam labe ibi iho dihasi gi azibe im digat hari Sabat fulo modemu iho na modeme ahumdem digat eloho bak. Làhàmu disi aibulelo vabalehe di labe dat Yusufti ee fatahivahada abo num debu Arimatea laba azihida labe aho Yesus koei visom bak ozome fa Pilatus bake gagu ailo ab laham. Ame da Yusuf lam ame Yahudit ibi iho modem im gagu vàmadi esum dam debu laba taumda bisi dam totbaho labe ibi iho vou baedamda meida am. Aho laha Alat Gagu Fihasi Vimteme Oluhu Dat Boehàda lam ba li dam bake vuusu im vahokedam bak lam, “Adi diat modela?” laham bak vou faodamda am. Lahamda labe iedehe vab dàt Pilatus bake le Yesus koei baumsum bake le ab tauledamam. “Im etei Yesus koei ve vou le baumsulo oba gagu ailo leho.” 44Lahame labi gagoha Pilatusat aiha, “Yesus akati kehàm vaba elohela?” lahame ab aime àvodeham. Làhàmu, “Imboo?” laham bak vi ailo am meo dam vuusdam boehàda abo damat Yesus ve ut tetehesuhunaso laba esu paku doho bak vou aasdamda laba ab gagome leham. 45Lehemu gagu aiha imbodehemu Yusuf bake ab gagoham. “Lo, le visoi vou le baumsum neàte.” 46Làhàmu Yusuf le sue fabebu vabna ee gagom linen lahamda lam doit ve am dam totbaho lamti laha labe le Yesus paku doho bak laba zisi ame koeiso vi vuu vuazi vou usi aho vou lehe sue baana lam visoi Yesus koei ab giaham. Labi giame neàdi ke bumat alimda amu kebitem laba meit fet sime bumataeme esuhuna ahum laba Yesus koei lam ab vou oli esuham. Labi vou oli esu neàdi fa futoi ke baana am doo laba tusum ulohoda lam vou ogi ogialame tusu baguamdi esu neàdi ab vou esmozi ladaham. 47Labi ame di labe Magdala labe lehe nam Mariati am ee fatahivaha nam Maria meida abo Yoses labe am oi lamti labihasu Yesus koei vou oli esu ke baana vi baguamdehe bak lam ame lahi behàsu lam gi laba tau aasda.

will be added

X\