Markus 13

1Labi Yesusat ame Fihasi Ala Bake Vou Baedam Num Vàmteabu labe am ad oli aam bak tomba lam vou esmozi futoi lalo modem di labe Aba vi tau meedam dam meida vàmtea labe aho it aame Yesus bake ab gagoham. “Guru oa, ame Num Vàmteabu nim kebu feàna susume moadaha na feà nim Om aadào?” 2Lahame labi gagoha Yesusat fa ab vi gagoham. “Uho etei lab aadamna zi lam bisi labaha bohu modesdam vabak. Ame ke mei ahoba vou vahe zihina zi lam ba fa faamome gi alimdi seddam bak,” lahame ab gagoham. 3Labi neo ladume kota Yerusalem lam vou esmozi bàhàgo obe labet le Zaitun Dee Dozeadaha Bak Buzoho laba ab laiteham. Ame bak lam ame Fihasi Ala Bake Vou Baedam Num Vàmteabu labe doudam bak dum aam neà bak laba laisi odosi esdam di lam Petrusti Yakobusti Yohanesti Andreasti labihasu ihimo Yesus bake li aa vi ailo ab gagoham. “Guru oa, Oho etei lab vi ozome gagoho im lam adi diat modemna gagohela? Labi ame bak lam modelo modem diat amu ana nasi iba fet vouhoho bak iho aame ozo, ‘Ame bak lam ab modelo modem ame?’ lahame iho ana aame ozobohudela?” 5Lahahat Yesusat fa ab gagoham. “Iho bak niba esu meedam im zi ahebu ba novai vaitolo modem digat fuseo modem di lam amu im nehamda nasi meeda tame. Amu dam duada totbaho labe uba nasi li neha, ‘Em abo Alat Gagu Fihasi Vimteme Oluhu Dat Boehàda am tame,’ lahame uba li ahit vageme keobaedam labe damat vabi imbo tibame dam dua zoho vi ozome tu vuzeheda tame. Labiham bake uho iademe vou faovoi esdam labe vou faodale. 7Labi laha ame ba novai vaitolo modem digat fuseo modem di lam damat uba nasi li im nehasu vameada tame. ‘Dam bak kia bak ium ot fakiame ot belui ot beluidalo.’ Labi, ‘Dam bak netà bak niba ot fakiame ot belui ot beluidalo.’ Labihasu uba nasi li vameadam bak ehete. Lahana uho labihasuhuna aim di um ahu a bisi iedi vi ozodamule. Ame ba novai vaitom digat lam di labe taho fum vabak. 8Labi ame di labe im nehasu laha meeda tame. Dam debu fa vàmadiaha bak lamti dam debu fa vàmadiaha bak lamti ot fakiame ot belui ot beluidam bak ame. Labi bak amomoi vuusdam boehàda am damti bak amomoi vuusdam boehàda am damti labihasu ot fakiame ot belui ot beluidam bak ame. Labi bak iuba modeo, bak iuba modeo, di neà faasi bak aotbali na debe soali àm vabili idoali ibzidume dam elodam bak ame. Labi bak iuba modeo, bak iuba modeo, balim feàna nigome dam beodume foedam bak ame. Labihasu ahamte faasi meedam im zi am bak. Abo lahit data faaseo modem di labe ahamte vi ozome vàzbudam bak lamti uloho bak. Lahana a bisi iedi vi ozodamule. Eho etei lab vameadaha im lam nasi meedamta meeda. Lahana dam bakda zi ahebu foli seddam digat lam di labe taho fum kaio. Ame bak lam vou meedamehamdi ba vou fuse tame. 9Labi laha uho mei bake le meedam di labe uho Eba tu vuzehi vi tau meedam damat modemu uba nehada tame. Uba fakemoholehe dam labe um siàdume fa Yahudi dam labe ibi iho tu vuzehi meedam bak gagu faheme modiam dam labe ibi iho meit im modem diat uloodume aim dam debu koeda laba ub lodam bak ame. Labi laha uloodume aime neàdi fa uhumo fi hasi bakamta vahi Alat vameadaha im ahamda dogoit aidam bakti im meiti meedam num laba um vou oli na sokba nasbe ahit alibulehena labe uba foadume geàdam bak ame. Labi laha uho Eba tu vuzehi vi tau meedam damat modemu uba fakemoholehe dam labe ozo, ‘Im boehàda zi labe laha dam nim uloodume vi aime beodase,’ laham bak laba ozome um siàdume bak ahaladiame vuusuidam boehàdatebo zi lamti dam eeda zi lamti laham dam laba vou le duzu uba uloodume aidam bak ame. Lahana ame bak lam meedam di a iedemule. Neham bak. Uho ame dam laba neha, ‘Iho Yesus bake tu vuzeheho,’ laham bak ahate vameadam bake Alat ahit uba modi labihada tame. Labihasu meedam im zi lam uba meedam bak ehe bake iademe it vou faovoi meedale. 10Eho meedaha Im Neàna lam meit bak mei bak iuba le vou vameatedume fi deda. Meit bak mei bak iuba le vou vameatedume fi deda. Labihadume dam mei debuti dam mei debuti vou vameatedume uloholi neàdi ame ba novai vaitolo modem digat lam ab vou fumam tame. 11Lahana uba fakemoholehe dam labe uho Eba tu vuzehe bake faki um si damat bakamta vahi uloodume aidam debu laba vou le ub lodume ame damat fa uba uloodam di lam uho neha, ‘Iho im akatihasu fa vi gagoela?’ laham bak a bisi àvodi vi ozodamule. Gi ahu keahumtedesu vou faodale. Damat uba uloodume gagu vi ailo modem di lam uho fa vi gagolo modem di gi Alat Aho uba modi vizi fi gatehe im lamota uho iedem vabna fa vi gagodale. Ame di lam ba uhumo gagodam vabak. Gi Em Ai labe Am Aha Nutabe Neàna Labe fa uba modi vizehe labe uho ot vai gagodam bak. 12Labi laha ame di labe uho Eba tu vuzehi vi tau meedam damat modemu dam duadat uba faki im nehasu meeda tame. Dat meida lam Eba tu vuzehe vabda labe am vahada Eba tu vuzeheda lam fa vou fohome meia ub lu otem bak ame. Labi dat meida lam Eba tu vuzehe vabda labe am dubu Eba tu vuzeheda lam fa vou fohome meia ub lu otem bak ame. Labi dat meida lam Eba tu vuzehe vabda labe am data Eba tu vuzeheda lam fa vou fohome meia ub lu otem bak ame. Labi mei data labe fa am ai modeo, am oi modeo, ibi iho gagoho im voou fa daet bohudi fa vou fohome meia ub lu otem bak ame. Labihada tame. Lahana Eba tu vuzehi meedam dam lam naat iba vabidam di iho gi ozahit keàtedi tu vuzehi meedam bohu vuusdume digat ba novai vaitomda laba vou fusi meedam dam lam Eho soat vausu fa vei neàdedam dam am bak,” lahame Yesusat fet ab vameadaham. 14Labi Yesusat neo nehame susume vi vameada. “Ba novai vaitom digat fuseo modem di labe uho nehi fet aame ozobohudemna Eho uba ab fet gagolo modemam bak. ‘Ba diamut aam ahasbeamna abo Alat aam fakemda lam fa ame Fihasi Ala Bake Vou Baedam Num Vàmteabu laba oli duzu vàhàdehemu damat ame num lam gi mu vou esmo tame.’ Lahame Daniel lab fet vameame vàmadi esuhu im lam imbodi amena aam ahasbeamna labe ame Num Vàmteabu labe am Fota Fiham Zoho abo duzum maem zoho laba duzuhu bak uho aameam làhà ame digat ab fuseo meedamam bak. (Damat Daniel aho fet toeme esuhu im lam meit aame ozom di, ‘Akatihasu modem bake gagohela?’ lahame mahate fetehesu vi ozome ozobohudele). Labihàmu amena aam ahasbeamna lam uho ame num laba duzuhu bak aameam làhà um Yudea bak laba azim dam labe uho laba a esdamule. Um foli seddam bak labna zohàme ahedem bak laba ozome gi taho sibu bak iuba iitaole. 15Labi laha ame digat lam fuseo meedàmu ubu uho num ohut vabna baa ahoba laba zisi esdam dam lam a fa um numa oli na koena it ve voutamule. Gi ahebu vou esmozi iitaole. 16Labi laha ame digat fuseo meedàmu dam utoho bake le godam dam labe a nehi ozo, ‘Em nutahalem bake num bake fa emoeme em sue sona ahoba dusumda it visoi vou itase,’ lahame fa um num bake a lamule. Gi labihasu vou esmozi taho iitaole. 17Aiee! Lahana lahi zubuleheda zi lamti data tatvamda do àm lahasuhuda eheda zi lamti iitaom vanamam bak akati modelo? Làhà gi emoem vabilemnàme taho ozahit betea iitaole. 18Labi laha uho lab iitaom digat vi ozom di uho mahate Ala bake nehame tom gagodale. ‘Ai Ala oa, ame digat fuseo meedam di a di faidi emoem biem digat lam a modemule. Gi fa digat amomoi ozome iba modi iitaole,’ lahame mahate Ala bake labihasu tom gagodale. 19Eho gi neham bak vi ozome uba labi gagoho bak. Ame digat fuseo meedam di lam ba dam bakdate modi geàdamna lam ba koena modi geàdam kaio. Abo duana modi geàda tame. Amu Alat alimeat bak nim ahamte modehe di labe faasi vou mode ledume etei vou fusi meedam digat nim dam bakdate labihasu modi geàdamna lam ba na vabak. Gi ba novai vaitolo modem digat fum di ame im meedam di am bak. Labi laha ba diamut neo vi meedam bak na vabak. 20Lahana Alat Aho fi hasi vame Am damalehe dam laba Aho bisi vi ozome deeli faobekesi meedàmu ame geàdam bak lam Aho ahit modi fa zohobuli vaito tame. Aho faobekesi ame bak lam zohobulem vabameam dat meida so lam vàmtea vekehe vaba gi dam ahebu modi vàhàdedume seddam bak. 21Labi laha ame ba novai vaitolo modem digat fuseo meedam di lam meit uba nehi gagomeam, ‘Nime! Alat Gagu Fihasi Vimteme Oluhu Dat Boehàda neam tame,’ lahame labi gagom bak modeo, ‘Iume! Ame Da lam tame,’ lahame uba labi gagom bak lam modeo, um nasi a aime imbo tibame tu vuzehemule. Giomimot modem bak. 22Eho gi neham bak ozome uba labi gagoho bak. Ame di labe damat lehe bak aaha vab dàt im nehasu vameadamna uho ai tame. ‘Em abo Alat Gagu Fihasi Vimteme Oluhu Dat Boehàda am tame,’ lahame giomim gagodamda modeo, ‘Alat Am im eba gagu eho ot vai dam bake ahate vameaidahada em ame Da am tame,’ lahame giomim gagodamda modeo, labihasu duzu vameadam dam uho aa tame. Ame dam labe nehi ozo, ‘Damat fà ibi iho vameadaha im aime iba tuse,’ lahame ozome ahit na damat ihimo modem biem im feàna lamti abo damat fet aame ozome àvodi meedamna lamti labihasu meedam labe dam duada zoho vedi imbo tibame ame im laba tu vuzehe tame. Ame giomim vameadam dam labe iho lab vou li vameadam im lam Alat fi hasi vame Am damalehe dam labe aime vuzehem bak mom bak lam ame dam labe iho ozobohuna ahit, ‘Modi aase,’ lahame vameada tame. Labihadamnàme Alat fi hasi vame Am damalehe dam labe ba ame bak lam tu vuzehem vabak. 23Labihàmu mahate it vou faovoele. Eho ame im zi lam vameadam bak lam uho vi ozome ozobohudem bake Eho ahit uba nasi fet labihasu vameadume esulo modem bak,” lahame Yesusat fet ab vameadaham. 24Labi Yesusat neo susume vi vameada. “Ame ba novai vaitolo modem digat fuseo meedam di labe dam bakdate modi geàdamna zi lam foli neàdi kehàm vaba im nehasuhuda neo meedam bak aada tame. Ala digadda fa aibuli ba fauhaedam vaba modesda. Labi ala useheda lam ba fauhaedam vaba gi aibuli modesda. 25Labi falo zi lam fa bake nom fi goaitoi bidda. Labi asum ahoba iuba modealahana zi feà lam betea bakamta modealadam vaba gi ihevoulai ihevoulaida. Labihasu meeda tame. 26Labi ame di labe damat tom aam di Em Abo Asum Ahoba Iubet Bak Niba Li Dateleheda Em Aiat Am na fauha meona fako iedemna ogatei modealaha bak lam fa Eba modi vizi feà Dateli uloti nom vousdam bak lam damat aada tame. 27Labi ame di labe Eho laha Em im gagu vou usem dam zi laba gagome nom oudume Eho fi hasi vame Em damalehe dam lamota dam debu iudu iuba le vada. Dam debu iudu iuba le vada. Labihadume damat azihi bak ahebu ulohole tame,” lahame Yesusat fet ab vameadaham. 28Labi Yesusat neo susume nehame vi vameada. “Eho etei ut ara laba vàlu totobet fi koadalo modem im nidi nim uho laha aime ozodume ozobohudele. Bak ibida niba ut ara labe am mekehà aaso faasi et nakbedem bak damat aam di nehi ozom bak. ‘Ab di neà faalo modem ame?’ laham bak iho aame ozobohudem bak am. 29Labi laha Eho etei lab fet vameadaha im zi lam modesum bak uho aameam làhà uho nehi ozom bak am bak. ‘Eho amu lab fet vameadaha im lam ab imbodelo ahazobuleham bak,’ laham bak um ab ozobohudemam bak. 30Nasi aima. Eho etei uba gagolo modem im imboda nidi nim mahate tu vi ozodam bohu meedale. Eho etei lab vameadaha im zi lam ahebu meedume neàdehe vabna um eteida nim ahe lahasuhuna ame im zi lam imbodehe bak aadume neàdi ba eloda tame. 31Asumti asum ahoba iuba modealahana zi lamti labi bak nimti bak niba modealahana zi nimti labihasu ahebu ba beodume foedume sedda tame. Lahana Ebe Eho vameadam im zi lam ahebu ba setem vabak. Gi labaha bohu vuusdume imbodedam imot modem bak,” lahame fet ab vameadaham. 32Labi im lada lam vameadume neàdi Yesusat neo vi susume vameada. “Eho etei uba lab vameadaha im zi lam ahebu vou fum di lam, ‘Adi diat modemna modela?’ laham bak lam ame digat labe am jam lamti im dam bakda zi nim ba vàmtea buà ozobohuda na vabak. Im ahebu gi vabiem tadehe bak. Labi Alat Am im gagu vou usem dam zi lam laha vabilem bak. Em gi Am Adàt modemnàme Em laha vabilem bak. Gi Em Ai Alat Ahamo ozobohudehe bak. 33Eho etei uba lab vameadaha im zi lam ahebu vou fum di lam, ‘Adi diat modemna modela?’ laham bak lam ame digat labe am jam lamti um vabilem bake mahate it vou faovoi ozodam labe ahumdi vou faodale. 34Eho ba fa lem di neham bakti uloho bak vi ozome uba im totobe nidi nim neo vi vameadase. Dat num deda labe aho bak mei bake lalo modemu am na meedam dama it gagu esmo. ‘Uho em num vou aasu vabiedale,’ lahame am dam laba im mei im meime ab lodume esmoham. Labi neo num doo vou aasdamda laba neha, ‘Em num oho iademe vou aasdale,’ lahame neo gagu esmo. Labihasu gagu esmozi ab laham. 35Labi le setehe di labe ame dam labe ba gi aidam vabak. Iba im gagu modiamda labe aho fa lem di abo etei disim diat modeo, usi neisoat modeo, diham ozoho modeo, dihambe modeo, aho fa lem di lam ame dam labe iho biem bake abo vou faovoi aasdam bak. ‘Ame da labe fa lem diat im gi aho gagu vou esmoho bak modehe vaba gi idaom bak li aamna zohàme imo vou faovoi aasdase,’ laham bak ozome meedam bak. Um laha Eho fa lem digat biem bake vou faovoi aasdale. 37Eho etei uba neha, ‘Mahate vou faovoi aasdale,’ lahaha bak lam gi umota gagoho vabak. Abo dam ahebu gagoho bak,” lahame fet ab vameadaham.

will be added

X\