Markus 11

1Labi Yesus Aba vi tau meedam dam lamti iho neo tom ladume kota Yerusalem laba fuseo vabali Zaitun Dee Dozeadaha Bak Buzoho labe modesuhu num debu behàsu Betfageti Betaniati lahaha doni laba tom le odo. Le odosi Aba vi tau meedam dam meida behàsu gagu ab olulo meedamam. 2Labi gagu olulo modem di labe Aho nehame vi vameada. “Um ahim nim num debu iba netàdeheda laba lafusi aameam keledai fi ho adat gàhàda lo vààsdam bak aa tame. Ame keledai lam amu damat nusu gohatehe vaba alimda modem bak. Keledai lam lo vuhatoi vuusu vou lele. 3Lo vuhatolo modem di meit uba nehi gagomeam, ‘Im keledai uho ana modelo lo vuhatolo modela?’ labihameam làhà uho fa nehi gagole. ‘Boehàda Aba Aho ozoho baket modelo modemu gi teohet vou le fa vou lelo mozo,’ lahame uho da laba labi gagole,” lahame ab vameadume oluham. 4Labi le aahat Yesusat lab gagu oluhu bak lam ab imbodeham. Ame keledai fi ho adat gàhàda lam gi num doo futom zie obe lo vààsdam bak ab aaham. Aahemu Yesusat vi gagu oluhu baket ab le lo vuhatosome modeha damat ab gagoham. “Aa! Im keledai uho ana modelo lo vuhatolo modela?” 6Lahame labi gagoha dam behàsu nibe fa ab gagoham. “Mm, vabà! Boehàda Aba Aho ozoho baket modelo modemu gi teohet vou le fa vou lelo mozo,” lahame labihasu gagohemu ame dam labe uledi ab lu oluham. 7Labi fa Yesus bake vou li ibi iho sue sona ahoba dusuhuda vihilame ame keledai adat gàhàda labe am toha laba ab nom gutaudaham. Labi gutaudume neàdi Yesusat zisi nusu ab ladamam. 8Labi ame dam dua totbaho labe im sue sona ahoba dusuhuda lam laha vihilame ame keledai Yesus vou lam zie laba vou olualada. Labi dam totbaho labe laha bom dee bake le bom alahaso fi kbodume ame zie laba vou olualada. Labihada. Damat ozo, “Yesus abo boehàda feàda am tame,” lahame ahu adat iedi labihada. 9Labihadume Yesus lab vou ladam di lam dam dua zoho nasi dozeadume lada. Labi dam zoho ba ohuse vi dozeame mitaeda. Labihadam dam labe iho im nehasu buteme vou bae lada: “Hosana! Ala abo feàteee. Dat abo Alat Aho Gagu Olu Ot Vai Im Dedateli iba etei ledamda nim abo feàteee!” 10“Im tai ahobada Boehàda Daud labe aho amu meedaha bak lamti ulohona aho vou faat lehe mekehàda nibe neo etei iba vuusu im vahokedalo modemda nim abo feàteee! Hosana! Imo dam ahebu ee bisi vousai feà datebolehe Ala laba, ‘Am abo feàte,’ lahame vou baedaseee!” Lahame meit buteme vou bae lada. Labi neo meit buteme vou bae lada. Labihada. 11Gi labihasu vou bae ladume kota Yerusalem laba ab vou fuham. Labi laba lafusi ame Fihasi Ala Bake Vou Baedam Num Vàmteabu labe am ad oli aam bak tomba le duzu nabidam labe aaha disi aibulelo modemu Am dua belasti fa futoi Betania laba ab laham. 12Labi Betania laba le izi dihambe neo Aba vi tau meedam damti vahi Betania vou esmozi fa kota Yerusalem laba ab ladamam. Ladam di labe Yesusat idoali meeda. 13Làhàmu Yesusat gi bak bohulat aaha ut ara abo mekehà faasi etali neàdehena zie obe laba doudam bak ab aaham. Aahemu oo sitoi àm bak ozome le netàdi nabitedaha oo aam kai. Gi et but neàdi modesda. Oo valem di fuhu vabak. 14Làhàmu ab uloodamam. “Seee. Ut nim ba oo a valemule. Gi maileleee,” lahame ab uloome esuham. Labi Aho lab uloome esuhu bak lam Aba vi tau meedam dam labe ab vi aime esuham. 15Labi neo ladume Yesus kota Yerusalem laba lafusi Fihasi Ala Bake Vou Baedam Num Vàmteabu labe am ad oli aam bak tomba laba le duzu aaha damat Ala bake vou baedalo na Ala bake lomna ot loidam bak aahemu meoli dam na ot loidam dam zi lamti na vadam dam lamti meoleme ootedume futoda. Labi doi meit iube vou leheda abo na vam biem doi vame fa ame Num Vàmteabu laba na ba vam neà doi lam ot loiam dam iho doi vahedam beahuba lam vuu vaktemoda. Labi laha damat meki fi ho ot loiam di nusumna lam laha vuu vaktemoda. Labihasu ab veimodamam. 16Gi im lada lamota meedam vabak. Fa neo ame na lam vame fa ame Fihasi Ala Bake Vou Baedam Num Vàmteabu labe am ad oli aam bak tomba olem doo laba vou olem bak laha ab maleham bak. 17Labi Yesusat dam duada laba vahokedam labe meoli neha, “Meit Alat Vameadaha Im Toedahana laba im meida nim um aam vaba? ‘Alat neha, “Em num nim gi dam debu mei dam debu mei labihasu ahebu Eba tom gagodam numat modem bak.” ’ Lahame toehena um akati aalahigeàmu meit na aa ve voutame fi olehe bak ozome vou oli vasti esdam bakti ulohona modi Em num feàda niba oli im mei faasi meedàla?” lahame faki meoli meedam labe ame beahuba zi lam veimome afoezobe dam soa neo odosu veimome dam ab ilidamam. 18Labi ame di labe damat Ala bake lomna ve vua vahudam toheda zi laba vuusu im vameame faheme modiam dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti iho Yesusat etei lab gagoho bak lam aihemu faki, “Imo Yesus otese,” lahame ozom bak faasi im aa ab odoadamam. Dam dua bak fa Yesusat vahokedaha im laba àvodi fa ibi iho vahokedaha im mu voou fa Yesus bake tum bak labna zohàme iedi vou faovoi, “Yesus otese,” lahame vi ozoda. 19Yesus Aba vi tau meedam damti disi aibulehemu aibut am damti kota Yerusalem vou esmozi ibi iho esum bak laba fa ab laham. 20Labi izi dihasi dihambe Yesus Aba vi tau meedam dam lamti iho usai neo kota Yerusalem laba fa ladameam labe aaha ut ara Yesusat màt ulooho ut lam alai bozili seti modesdam bak ab aaham. 21Làhàmu Petrusat vi ozobohudi Yesus bake ab gagoham. “Ai Guru oa, nasi aama. Oho màt ulooho ut araso lam gi ab alai bozili doudamam bak.” 22Lahame labi gagoha Yesusat fa ab gagoham. “Nasi Ala bake tu vuzehele. Uho Ala bake gagom im lam Alat uledi modem bak. 23Imbote. Ala bake mahate tu vuzehele. Labi Eho etei uba neo gagolo modem im imboda nidi nim laha nasi aima. Um ahu behàsdi vi ozodam vaba abo ahu vàmadi nehi gagomeam, ‘Bak buzoho nim itezeavai itea feàna laba nom ilu fi oli setele,’ lahame ahu vàmadi tu vuzehi gagom di uho lab gagoho bak lam ame baket modem bak. 24Labihàmu Eho uba nehi gagolo modem bak. Ubu uho valo Ala bake tom gagodamna lam uho nehi fet ozo, ‘Ame na lam Alat iba lom bak,’ lahame ahu vàmadi tu vuzehemeam làhà ame na lam uho vam bak. 25Labi uho laha duzu Ala bake tom gagolo modem di meit uba git modehemu uho fakemda ehelemeam làhà nasi ame da laba ozahigeàmu vei neàdi ba tom gagodale. Ubu uho faina meedam bak lam um Ai Ala asum ahoba iube Aho gi vei mu fa faamome vei neàdem bake labihadale. [ 26Lahana meit uba fai bak modeheda lam uho fa ozahigeàmu fa vei neàdem vabameam làhà um Ai Ala asum ahoba iube ba ubu uho faina meedam bak lam laha ba gi vei mu fa faamome vei neàdem vabak,”] lahame Yesusat ab vahokedaham. 27Labi vahokedume neàdi Yesus Aba vi tau meedam damti iho neo ladume kota Yerusalem laba lafusi Yesus ame Fihasi Ala Bake Vou Baedam Num Vàmteabu labe am ad oli aam bak tomba laba le godam di labe Yahudi damat ibi iho tu vuzehi meedam im vuusdam tohe dam zi labe Yesus bake li netàdi daet beàdalo vabi vi ailo ab gagoham. 28“Ne, Oba amat modi vizi teudi im feàna lam Oho duzu meedàla? Oho nib li meedam im nim Oba amat gagu im dedateli Oho vuusu meedàla?” 29Lahame labi gagu modeha Yesusat fa gago, “Im ubuda faode. Ebe Eho etei uba fi bovai vi ailo gagomda nim uba nasi vi gagu aise. Ne, Yohanes Mei Vuu Valo Baptisleiamda labe aba aho amu mei vuu valo baptisleiam bak lam amat Yohanes bake gagu aho ame bak lam meedahela? Alat aba gagu aho ame bak lam meedaheo? Laham vabameam damat aba gagu aho ame bak lam meedaheo? Akatihahela? Uho ame bak lam Eba fa gagomta uho etei Eba lab gagu vi ailo modem bak lam Eho fa uba vi gago tame.” 31Lahame labi gagu vou faoha ame Yahudi ee dam zi labe gi ihimo ot gagoida. “Uho ozom, iho akatihasu fa Yesus bake gagoe? Iho nehameam, ‘Alat Yohanes gagu olu meedaha bak,’ lahame labi gagomeam làhà Yesusat fa iba nehame vàlu gagom bak. ‘Ne, um lahana akati Yohanes am im aime tu vuzehem vaba moudume mohela?’ lahame iba labi fa gagom bak. 32Laham vaba iho neo nehi gagomeam, ‘Damat gagu oluha,’ lahame labi gagomeam dam etei iba tau dozeadaha dam totbaho zi nibe iba beom bak. Neham bak. Dam etei iba tau dozeadaha dam totbaho zi nim, ‘Yohanes ba damat gagu olu meedaha vabak. Am gi Alat vameadaha im aime fa dam bake ahate vameaidahada meida am am bak,’ laham bak ozobohu labe iho fa im mei gagomeam làhà dam iba faki beom bak.” 33Lahame ame dam busaoda zi labe ihimo vou faovoi iedi fa vei biehenali Yesus bake fa ab vi gagoham. “Yohanes aho amu lab meedaha bak lam, ‘Amat aba gagu olu meedàla?’ laham bak lam im bieho.” Lahahat Yesusat fa dam laba ab gagoham. “Lo, làhà Eho li meedam im zi nim, ‘Amat Eba gagu olu Eho im dedateli meedàla?’ laham bak lam Em laha ba uba gagom vabak,” lahame ab vasteham.

will be added

X\