Markus 10

1Labi Yesusat im lada lam vahokedume neàdi Aba vi tau meedam dam lamti iho num debu Kapernaum vou esmozi fa neo, “Yudea bake lase,” lahame Yordan Soabo dumam tot laba biou num debu meidati num debu meidati modealadaha bak laba goda. Labi ame bak laba godam di labe dam duada zi labe neo Yesus bake valada. Abo dihasi valada. Dihasi valada. Labihada. Labihadàmu Yesusat laha Aba Aho amu modi baleàlehe baket neo ame dam zi laba im vi vahokeda. Labihada. 2Labihadam di labe Farisi damat Yesusat git gagom bak aihizobe vàlulo ahit Aba netàdi duzu vi ailo ab gagoham. “Oho ozom, im Yahudi dam nibe ibi iho tu vuzehi meedam im labet vulam di meit aho amu vaha nam fa mu voom neào? Fa mu voom maleheo? Akatihasu vi vulaela?” 3Lahahat Yesusat fa ab gagoham. “Dat ahamda Musat aho toedume fi hasi esuhu Im Feàna zi laba, ‘Akatihasu modem neàte,’ lahame toehela?” 4Lahahat ame Farisi dam labe fa gago, “Im tai ahobada Musat aham di iube neha, ‘Uho meit am nam amu neàt vahana fa mu voolo modemeam làhà amu nasi, “Nam nim debu nehasu meedàmu em mu voolo modem bak,” lahame sunit toeme ahate fi desi vameadume mu voomta neàte.’ Lahame labi toehe bak.” 5Lahame labi gagoha Yesusat fa ab gagoham. “Um ozom vaba? Um ahebu ahu tamzohobulehe labe meit im vahokem bak aim biem damat modem labe Musat gi ozahit uledi im lam toehe bak. Lahana bisi alimeat Alat datti namti modehe di labe labi gagoho vabak. Alat Vameadaha Im Toedahana laba uho im nidi nim aame ozobohudehe vaba? ‘Ala Na Debu Modeheda labe ahamte na modehe vab di iube dam bakda ahamte alimeat na meedaha di iube dat mode. Nam mode. Lahaha bak.’ 7Labi Aho modi neàdi Aho lab modehe bak lam vi ozome ab gagoham. ‘Làhà etei di nim dat nam vam di am aiti am oiti vou esmozi da nim gi am nam laba akili ihimo ahili so vàmadi ab le azimam bak. Labi lab le azihi bak lam vi ozom di gi nubu ab vàmadeham bak.’ Lahaha bak lam um aame ozobohudehena taia? ‘Ba so behàsuo?’ laham bak lam ba vi ozom vabak. 9Labihàmu Alat modi vàmadehena uho dam bakda a modi fàsi behàsdemule,” lahame ab mali vameadaham. 10Labi im lam vameadume neàdi ibi iho esdam num laba fa oli modeha Aba vi tau meedam dam labe Aba neo dat nam mu voom im vi ailo ab gagoham. 11Vi ailo gagu modeha Yesusat fa ab vi vameadamam. “Meit am nam aho neàt vahana fa mu voou fa nam amomoi vameam làhà ame da labe gi nam aba amu vahada laba faina modehe bak. ‘Nam ehena fa nam amomoi vaho,’ lahame Alat vàlu gagom bak. 12Labi laha namet am dat aho neàt vahana fa mu voou fa dat amomoi vameam làhà ame nam lam faina modeho. ‘Dat ehena fa dat amomoi vaho,’ lahame Alat vàlu gagom bak,” lahame ab vahokedaham. 13Ame di labe dam totbaho labe ozo, “Yesusat fà im data niba Am anekehà odosu neha, ‘Ai oa, Oho data niba neà bak modi esule,’ ” lahame tom gagom bake ozome im data Yesus bake ab vou ledamam. Vou ledume modeha Aba vi tau meedam dam labe iho ame bak lam aahemu ab gut mali meedamam. “Um data Yesus bake a vou li vabidamule.” 14Lahame labi gut mali gagoha Yesusat aime faki daetesu gago, “Ame data lam Eba vou ledam neà bak. Uho a mali gagomule. Neham bak. Damat ibi iho vou mode leme baleàhà bak lam fa veimdi fa data koena zi nibe ibi iho lab vou mode leme baleàhà bak lam abo daleà azi meit iba vahokedam im aidam bak lamti ulohona meedam dam lam Alat deeli vame Am damali vuusu im vahokedam dam am bak. 15Imbote. Labi Eho etei uba neo gagolo modem im imboda nidi nim laha nasi aima. Meit ibi iho vou mode ledume baleàhà bak lam fa veimdi fa data koena zi nibe ibi iho lab vou mode ledume baleàhà bak lam abo daleà azi meit iba vahokedam im aime meedam bak lamti ulohona meedam vabameam làhà ba Alat ame dam laba modi Am damali vuusu im vahokedume neà bak modi esuiam biem bak.” 16Lahame labi gagu neàdi ame data zi lam vamateme sivai meida Am anekehàt nom odosu, “Ai oa, Oho data niba neà bak modi esule,” lahame ab tom gagoham. Labi data totbaho laha gi ame baket neo meeda. Labihada. 17Labi Yesus Aba vi tau meedam damti iho ame num labe futoi ladasome modeha da meida labe, “Yesus bake im gagose,” lahame emoehe labe le Yesus bake gut tàhi, “Yesus Am abo feàte,” lahame ahu adat iedi Yesusam naba modesdam bak laba ogomasu ahit bake biti ab gagoham. “Guru bisi neàda oa, eho ana im meedam labet Alat eba modi Amti vahi gi ahe neàna bohu vuusdàla?” 18Lahame labi vabi vi ailo gagoha Yesusat fa ab vi gagoham. “Om akati Eba, ‘Bisi neàda oa,’ lahame eba labi gagohela? Bak niba azim dam ahebu bisi neàda kaio. Gi Ala vàmteata bisi neàda am tame. 19Alat dam bake neha, ‘Nehame meedale. Nehame meedale,’ laham im dat ahamda Musat toedume fi hasi iba esuhu Im Feàna zi lam om ozobohuna taia? Ame im neha: ‘Mei a otemule. Labi nam dat eheda modeo, dat nam eheda modeo, a modemule. Labi mei na a aa vamule. Labi na aaha vabda labe, “Eho nehi aaho,” lahame a ostame giomim vàlu gagodamule. Labi meit vahana, “Eho fa vase,” lahame a teidi vi modeme vamule. Labi um ai bake modeo, um oi bake modeo, ahu adat iedi uba gagoho im laba vuzehi meedale.’ Labihasu toedume fi hasi esuhu im lam om ozobohuna taia?” 20Lahame labi gagoha da nibe fa gago, “Guru oa, em gi amu bos diat ame im lam faasi vou meedume etei busaolehe bak.” 21Lahame labi gagoha Yesusat ame da laba aame faobekesi ab gagoham, “Lo. Lahana om im meida vàmtea vekehe bak. Om soa maehe nazoh zi lam ahebu gelevai doit ot loidume neàdi ame doi lam vadume fa faheme dam na vab dama iuba lo. Iuba lo. Lahadale. Oho labi modemeam làhà Alat Aba Aho azihi bak laba oba vahehe nazoh aabo ehete. Labihàmu oho ame doi lam dam na vabdate lodume neàdi fa li Eba tu tau godale.” 22Lahame labi gagoha ame dat labe Yesusat lab gagoho im lam aiha am soa maehe nazoh zi abo feà dat modemu ahu faidi daleàdi ab laham. 23Labi ame da lam le seti Yesusat fa Aba vi tau meedam dam laba aasumtedi ab gagoham. “Dam nazoh duada labe iho it ozo, ‘Iho Yesusam im aime vuzehi fa Alam damali Aho iba vuusu im vahokedase,’ lahame it ozodamnàme im nazohti nehi ame bak lam uledi meedam biem meo bak.” 24Lahame labi gagoha Aba vi tau meedam dam labe ab aime àvodeham. Àvodi meedàmu Yesus im Abada neo vi vameada. “Em dam oa, dam nazoh duada labe iho nehi it ozo, ‘Imo Yesusam im aime vuzehi fa Alam damali Aho iba vuusu im vahokedase,’ lahame it ozodamnàme am nazohti nehi ame bak lam uledi meedam biem meo bak. 25Im unta fi hobu labe aho sue tademna mo labe am bumat kekehena laba ba dalu lafutom biem bak. Labi dat na duada labe aho nehi ozo, ‘Alat laha eba modi Am Dateli Aho eba Vuusu Im Vahokedase,’ lahame gagu meedam bak lam laha modem biem bak. Lahana ba gagohoda lam bisi modem biemda am bak.” 26Lahame labi gagu modeha Aba vi tau meedam dam labe aime àvodi modem faidi ab ot gagoi ot gagoidamam. “Aa làhà! Dam na duada labihalahit im dam totbaho ahebu Alat ba iba soat vausu im vei neàdi Amti vahi gi ahe neàna bohu vuusdam biehe taia!” 27Lahame labi ot gagoidaha Yesusat Aba vi tau meedam dam laba aasdam labe ab gagoham. “Faode. Ame bak lam damat ihimo it modem biem bak. Lahana Ala bisi feàda abo na ahebu modem meo Ala labe ame bak lam modem meo bak.” 28Lahame labi gagoha Petrusat fa ab vi gagoham. “Imota nehaha bak. Iho Oba vi tau meedam damalelo modemu nazoh ibida ahebu amu gi voedume vausi fa Oba tau vou godam bak.” 29Lahame labi gagoha Yesusat fa ab vi gagoham. “Lo, oho lab gagoho bak lam imbota imbot. Lahana Eho etei uba neo gagolo modem im imboda nidi nim laha nasi aima. Uho meit neha, ‘Eho Yesus bake vi tau meedalo mozo.’ Labi neo, ‘Eho, “Alat meia soat vausu fa vei neàde tame,” laham Im Neàna lam eho tau vou vameatedalo mozo.’ Labihasu uledi modelo modemu am ai modeo, am oi modeo, am dubu modeo, am vahada modeo, am nà modeo, am lahiti datati modeo, am num modeo, am na utoho modeo, labihasu ahebu voedume esmomeam làhà ame da labe am ahe lahasuhu di nibe Alat fa ame da laba gi ame baleà vouhou na lodam di abo fetehesu duana vi loda tame. Lahana ba neà bakta gi labihasum vabak. Abo aho bak niba esdam diat damat aba vabidamna bohu modesdam bak laha ehe bak. Labi laha ba diamut ame da lam gi elomnàme Alat modi fa Amti vahi gi ahe neàna bohu vuusda tame. 31Alat ba diamut Aho Eba modi Eho Boehàdateboli dam vuusu im vahokedam di neham bak ehete. Damat etei bak niba esdam di vedi nehi it ozoda. ‘Im ee feàda ame?’ lahame it daetbadam dam lam ba feà damalem vaba gi ee vousi ba duzum dam am bak. Lahana damat nehi it ozoda, ‘Im ee feà vabda ame?’ lahame it daetbadam vab dam lam ba feà damali fa ee vousai nasi duzum dam am bak,” lahame Yesusat ab vahokedaham. 32Labi Yesusat Aba vi tau meedam damti dam gi vi tauhuda lamti iho kota Yerusalem zoolelo lada. Labi ladam di labe Yesus koena vaitesu nasi duzu lada. Labi dam duada ba vulada. Labihada. Labihadam di labe Aba vi tau meedam dam labe ozo, “Yesus akati modi nasi duzu ladà?” lahame ab àvodi vi ozo laomam. Labi dam giida totbaho labe neo vei iedi vi vulada. Làhàmu zie doni bake Yesusat Aba vi tau meedam dam dua belas lamota gagu fàsi damat Aba kota Yerusalem laba ba modem im neo fet ab vameadamam. 33“Um nasi iademe aimale. Im etei vahi kota Yerusalem laba zoolelo ladam bak. Labi laba lafusi Em Abo Asum Ahoba Iubet Bak Niba Li Dateleheda nim meit Em vou foho tame. Labi vou fohome damat Ala bake lomna ve vua vahudam toheda zi laba vuusu im vameame faheme modiam dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti laham dam laba ub lu ame dam labe fa Eba uloodume vi aime ozobohudi neàdi, ‘Nasi otele,’ lahame ahu vàmadi gagu esu tame. Labi Em otem bak gagu neàdi fa neo Yahudi damat modem vab dam abo Ala bake tu vuzehem vab dam laba neo ub lu dam labe Em gut ve fu tozoidam labe keha vi dome afoezobe fa vou futoi na sokba nasbe ahit alibulehena labe Eba foadume geàda tame. Gi labihadume ut tetehesuhunaso laba Em nom esu paku dou ote tame. Lahana fa usi behàsdi Em eloho bak labet Alat modi fa ahedi usa tame,” lahame fet ab vameadaham. 35Labi ba neo Zebedeusam adam Yakobusti Yohanesti le Yesusat avaesdam laba netàdi duzu ab gagoham. “Guru oa, ‘Oho iba nehi modem neào?’ laham bak Oba gagu vi ailo mozo.” 36Lahahat Yesusat fa ab gagoham. “Eho oba ana im modem bake um ahim Eba lehela?” 37Lahahat dam ahim labe fa ab vi gagoham. “Vabà! Im gi neham bak Oba gagu vi ailo leha. Ba diamut Alat Oba modi Ohomo Boehàdateboli dam bake deeli vame Om damali vuusu im vahokedam bak faaseo modem di Oho iba gagome fa neo tau boehà damali meida Om ahi tot laba nusu dam bake tau vuusda. Labi meida Om soi tot laba nusu dam bake tau vuusda. Labihadam neào?” 38Lahame labi gagoha Yesusat fa ame dam ahim laba ab gagoham. “Ne lahana uho etei lab gagoho im lam um it ozom vaba? Na im feàna Eba modi geàdamna etei Eba modi ozolo modem bak ehe bak. Ame bak lam uba laha modi ozolo vouhom neào? Um laha geàdume elom ule?” 39Lahahat ame dam ahim labe fa gago, “Modem neà bak. Im ahumdi neàdehe bak.” Lahahat Yesusat fa neo vi gago, “Lo, imbo bak. Na feàna eba modi geàdume elom bakti ulohona uba laha modi geàdume elom bak ehe bak. 40Lahana meia gagu fa Em ahi tot modeo, soi tot modeo, laba tau nusu vahi dam bake vuusu im vahokedam bak lam Ehemo gagu modem biem bak. Lam gi Em Aiat Ahamo fi hasi ahumdi ozome gagodam bak.” 41Lahame lab ot vameaidam im lam Aba vi tau meedam dam totbaho sepuluh labe vi aime modeha Yakobusti Yohanesti ame dam behàsu laba ab fakeham. 42Labihàmu Yesusat Aba vi tau meedam dam gagu fa vazisi neàdi im ab vahokedamam. “Um ozobohuna taia? Yahudi damat modem vab dam labe vedi, ‘Im abo feàte,’ lahame iho vuusdam dam laba tet ootedam labe im vahokedam di gi dae meobeat vahokedam meo bak. Labi im ee dam labe iho vuusdam dam laba teubeat vuusdam labe iho gagom im damat meeda. Labihadam meo bak. 43Lahana um ba a labihadamule. Um fa gi nehame meedale. Uho meidavat nehi it ozo, ‘Alat fa eba modi ee feà datelese,’ lahame it ozome modelo àhàkemeam làhà amu nasi gi amti vahi esdam dam labe im na daleà meedam datelele. 44Labi laha uho meidavat nehi it ozo, ‘Alat fà eba ee feàda modi talu vousai dam totbaho ee vousi fa eho vafozi bisi feà datelese,’ lahame it ozomda lam amu nasi gi amti vahi bak niba esdam dam zi labe im na daleà ladehebeat teo meedam datelele. 45Eho gi neham bak ozome uba labi gagoho bak. Em Abo Asum Ahoba Iubet Bak Niba Li Dateleheda nim Eho laha labihaha bak. Eho bak niba lehe di ba nehi it ozom vabak. ‘Em feàda am bak. Dam feà vab dam fa bake nusu Eho gagom im aime meedam damali Eba taum bohu meedale,’ lahame it ozome lehe vabak. Em gi feà vab Dateli dam bake taum bak ozome lehe bak. Abo gi dam bake tau bohu vuusdume damat Em si otem bak. Dam ahebu iho faina meedam bak lam Alat beom bake Ehemo ahit uledi damat Em oteme vasea gohali ot vai fa faamom bake ozome lehe bak. Labihàmu uho Ebe Eho ozome lehe bak lamti ulohona meedale,” lahame Yesusat ab vameadaham. 46Labi Yesus Aba vi tau meedam damti iho num debu Yeriko laba le ab lafuham. Labi lafusi bak lada lam vou esmozi ladam di labe dam duada zi iba vi tau vulada. Labi ladam di labe dat fako faida Bartimeus abo Timeusam adat lam gi zie obe laba aidam labe gut tauleda. 47Labihamda labe dam duada zi lebohotedam bak dae aidàmu ab gut gagoham. “Bak nim amat ana im meedàla?” lahame vabi ostame gagoha meit neha, “Ne, Yesus Nazaretda gi ab lebohotelo modemam bak.” Làhàmu dat fako faida nibe ab vi buddamam. “Yesus abo Dat Ahamda Boehàda Daud Vou Faat Lehe Mekehàda oa, Om eba aame faobekesi im neà bak tau modeleee. Alat Gagu Fihasi Vimteme Oluhu Dat Boehàda, ‘Om am tame,’ laham bak em ozobohuteee.” 48Lahame buddume modeha ame dam nasi dozeadaha dam labe fa gago, “Mm, a gagomule,” lahame mali modeha ame da nibe ailahigeàmu fa bisteat neo ab vi buddamam. “Dat Ahamda Boehàda Daud Vou Faat Lehe Mekehàda oa, Om eba aame faobekesi im neà bak tau modeleee.” 49Lahame bisteat neo vi buddameilahit Yesus gi laba ab duzuham. Duzu gago, “Le gagome vou lele.” Lahame labi gagohemu dam labe fa le ame da laba gago, “A ahu faidemule. Nasi usai duzule. Yesus oba, ‘Lele,’ lahaho.” 50Lahame labi gagohemu Bartimeus am sue sona ahoba dusuhuda vihitoi voou àvodehat usai Yesus bake ab vulaham. 51Vule duzu modeha Yesus ab gut gagoham. “Eho oba akati modemna oho Eba buddàla?” Lahame gagoha ame da labe fa gago, “Kaio. Ai Guru oa, em gi fako na aam biehemu àvodi na aalo àhàki Oho eba ulasi modi fa neàdem bak ozome Oba vi buddalo.” 52Làhàmu Yesusat fa ab vi gagoham. “Oho neha, ‘Yesusat eba modi fa neàdem bak,’ laham bak lam oho nasi fet Eba tu vuzehe labe om fako faidehe bak lam Eho modi fa na aam ab neàdeham bak. Om nasi fa lale,” lahame gi etei labi gagoha Bartimeusam fako fa na aam bak ab neàdeham. Labihàmu ame da labe fa zie doni laba Yesus bake gut tau ab vi vuladamam.

will be added

X\