Lukas 9

1Labi ba neo Yesusat Aho gagu olu Am im vameadume esmozi laiam dam dua belas lam gagome fa bakamta ab vaheham. Labi vahi neàdi Aho neha, “Uho im nehasu im dedamali meedam neàte. Mei ahu oli veimam setan mei setan mei laba gagu futodume ilidam bak ame. Labi meia vizi gailemna ahaladiahana ahebu laha modi fa neàdedam bak ame. Um labihasu im dedamali meedam neàte,” lahame ame dam dua belas laba modi vizi teudedume ab modi im dedamaleham. 2Labi im dedamali neàdi Yesusat am dam dua belas laba neha, “Nasi ladale. Labi uho bak iuba la. Bak iuba la. Lahadam diat ame dam laba, ‘Uho Alat Gagu Fihasi Vimteme Oluhu Dat Boehàda laba tu vuzehem labe Alat uba deeli vame Am damali uba vuusu im vahokedam bak laba uledi meedale,’ lahame dam bake vou vameatedume fi deda. Labi dam nisileheda modi fa neàdeda. Labihasu vou modetedale,” lahame gagu ab oudaham. 3Ahamte gagu oudalo modem di labe Yesusat im meida nim nehame ab vi vameadamam. “Uho bak iuba la bak iuba la lahadam diat um odoamsoti um nazoh dekti um na àmnati um doiti sue sona ada dusumna gi esuhuda lamti ahebu niba vaheme esmozi gi saemea ladale. 4Labi uho num debu mei iuba le lafusidam di labe aimeam dam labe uho vou laha im lam aime uledi num deda meida labe uba nehameam, ‘Uho num ebeda niba azim neàte,’ lahameam làhà gi num obo oho azimda lamota azile. A num iudu iuba le i. Num iudu iuba le i. Labihadamule. Gi num ubu uho azimda lamota azibe neo num debu amomoi bake neo le ame baket mode. Lahadale. 5Laham vabameam uho num debu mei iuba le lafusidam di labe aimeam dam labe uho vou laha im lamti um soti moudume im bak malemeam làhà uho ame num debu bak lam vou esmozi lale. Vou esmozi lalo modem di labe um naba bak itabe fau foamome esmozi lale. Labi dam labe vi aame nehi ozom bak. ‘Aa làhà! Iho dam labe vou lehe im aihi vabake im bak itabe fau foamohe? Labihalahit Alat iba beoe taia?’ laham bak vi ozom bak am tame,” lahame vi vameadume ab oudaham. 6Làhàmu ame dam dua belas labe ladume le Alat Boehàdateboli dam bake vuusu im vahokedam bak lam, “Akatihasu modemna modela?” laham Im Neàna lam num debu bak iudu iuba le vou vameateda. Num debu bak iudu iuba le vou vameateda. Lahada. Labi dam gaileheda bak iuba le modi fa neàdeda. Iuba le modi fa neàdeda. Labihada. 7Labihadam di lam ame dam dua belas labe iho meedaha im lam meit aime fa meia vamea. Meit aime fa meia vamea. Lahadume Galilea bak vuusdam Boehàda Herodes Antipas laha ab vi aiham. Aime vabi vi ozoda. Neham labe vabi ozoda. Dam totbaho labe vedi vabili nehame vameada. “Yohanes Mei Vuu Valo Baptisleiamda labe fat ahedi mode moio?” lahame vabi vameada. 8Labi dam totbahot laha vedi vabili nehame vameada. “Dat ahamda Alat vameadaha im aime fa dam bake ahate vameaidahada Elia labe fa nom olu ame im lam meedam moio?” lahame vabi vameada. Labi dam totbahot laha vedi vabili nehame vameada. “Gi dat ahamda Alat vameadaha im aime fa dam bake ahate vameaidahada meida eloho dàt fat ahedi lehe moio?” lahame vabi vameada. Labihadam labe Herodesat laha gi ame bak labet modi ozom vabi ab azi ozodamam. 9Labi Herodesat vabi azi ozodaha vabamu ahamo aba ab it gagoham. “Ne, Yohanes eho amu em dam gagome bio vaitoi eloho bak. Ne lahana eho aidam im lam ana Dàt meedam imot modela? Ba Yohanesat modem vabak,” lahame ahamo aba ab it gagoham. Labihàmu, “Am abo ame Da Yesus lam Am alihi aase,” lahame àhàki ab ozome izidamam. 10Labi Yesusat Aho gagu olu Am im vameadume esmozi laiam dam dua belas labe iho iuba le mode iuba le mode labihadume neàdi fa li bakamta vahi iho bak mei bake le meedaha im lam ahebu Yesus bake ab li vameadaham. Labi im lam vameadume neàdi Yesusat ame dam lam gagome dam duada vaitoi vou esmozi ihimo num debu Betsaida laba ab vou ladamam. 11Labiham di labe Yesus Am dam dua belasti ladume setehe bak laba dam dua totbaho labe ozobohudi ba vi vula. Ba vulaha labe vule vi aaha Yesus Am dua belasti doni bake odosdamna ab vi fuham. Làhàmu Yesusat gut aaha dam duada zi ba vulehemu, “Neàte,” lahame ab gut gagoham. Gut gagu ozoha vabamu fa neo im vameada. “Meit am faina meedam bak lam voedume fa ahu neà bak vàmadi Ala bake tu vuzehi meedameam làhà Alat ame da laba deeli vame Am damali vuusu im vahokeda tame,” laham im lam faasi vahokeda. Labi neo dam nisileheda labe, “Iba modi neàdele,” lahame gagodam dam lam Aho modi fa neàdeda. Labihasu ab meedaham. 12Labihadume modeha ala vakidi ab disilo modemam. Làhàmu Yesus Am dua belas labe Yesus bake li ab gagoham. “Ai oa, im bak nim dam vaba alim bak modem labe ba na àmna kaio. Laham bake Ai Oho dam duada zi niba gagome fa dam si modealaha bak iuba gagome oudume iho àmna lamti iho im bak lamti fà le nabidume laba ahala izidase.” 13Lahame labi gagoha Yesusat fa ab gagoham. “Gi na àmna ubuda dam zi laba lodume àdameta.” Lahame labi gagoha Am dam labe fa ab vi gagoham. “Aa! Im gi rotibu auohole. Labi bohe behàsu. Lamota ehete. Dam feà nim ba akati ulohole. Gi doi bak mei bake vou le na àmna ot loiame ve fa vou li dam niba lome àm bake Oho labi ozome gagoheo?” lahame vi ailo ab gagoham. 14Ame dam zi feà lam gi dam aabota dem di abo lima ribu fuhu bak. Lahana Yesusat fa Aba vi tau meedam dam laba ab gagoham. “Uho dam zi nim gagome lima puluh iuba nusu lima puluh iuba nusu lahadale,” lahame ab gagoham. 15Labi gagohemu Am dam nibe le gagome dam fàsi lima puluh iuba nusu lima puluh iuba nusu. Lahadume dam ahebu ab nusualadaham. 16Labihazobe Yesusat ame rotibu auohole lamti bohe behàsu lamti vame vuusualame neàdi ohu vousai tom avaesu Am ai aabo bake, “Neàte,” lahame tom gagu neàdi ame rotibu lamti bohe lamti visoi ab fahedaham. Fahedume fa Aba vi tau meedam dam laba lodume iho fa ot vai vame dam duada zi laba lodume uloholi ab àdaham. 17Labi ame dam zi fai labe ame na zi lam àdume modeha dam ahebu dedehemu zoho ab vahedaham. Labi Aba vi tau meedam dam labe damat lab àme dedehemu vahehena zoho lam fa vi ateti atetidume boloseh vahedume modeha boloseh dua belas ab bektoham. 18Labi ba digat meida iube Yesus dam duada zi vaitoi vou esmozi Aba vi tau meedam damta ihimo vazisi ab laham. Labi le Yesusat neo Ahamo fota vaitesu Am Ai Ala bake tom gagoda. Labi tom gagodume neàdi fa li Aba vi tau meedam dam laba ab gagoham. “Dam duada labe, ‘Em amat modela?’ lahame vameadaha bak uho akatihasu aihela?” 19Lahame labi gagu aiha Aba vi tau meedam dam labe fa ab vi gagoham. “Dam duada totbaho labe vedi neha, ‘Om gi Yohanes Mei Vuu Valo Baptisleiamda labe amu elohona fat ahedi mozo,’ lahame vameada. Labi dam duada totbaho labe vedi neha, ‘Om gi aham di iube Alat vameadaha im aime fa dam bake ahate vameaidahada Elia amu ahena Alat vahada fa nom iluhe moio?’ lahame vameada. Labi dam duada totbaho labe vedi neha, ‘Om gi dat ahamda Alat vameadaha im aime fa dam bake ahate vameaidahada meida amu eloho dàt fat ahedi lehe moio?’ lahame dam zi labe Oba labihasu ozome otesi otesidam bak.” 20Lahame labi vameadume modeha Yesusat fa neo vi ailo ab gagoham. “Ne lahana um akatiha? Um, ‘Em amat modela?’ laham bak um akatihasu ozome gagodàla.” Lahahat Petrusat fa ab vi gagoham. “Aia, Om abo Alat Gagu Fihasi Vimteme Oluhu Dat Boehàda am bak.” 21Lahame Petrusat labi gagohemu Yesusat Aba vi tau meedam dam laba ab gagoham. “Petrusat etei lab gagu tombalehe bak lam, ‘Em abo Alat Gagu Fihasi Vimteme Oluhu Dat Boehàda am tame,’ lahaha bak lam uho meia a le fi demule,” lahame ab mali gagu esuham. 22Labi im lada lam gagu neàdi Yesusat neo ab vi gagoham. “Em Ai Alat fet gagu esuhemu Yahudi damat ibi iho tu vuzehi meedam im vuusdam tohe dam zi labe vahi Em abo Asum Ahoba Iubet Bak Niba Li Dateleheda niba mu fa Eba fai bak bohu modi geàda tame. Labi laha meia gagu Em oteme eloi fa usi behàsdi Em eloho bak labet Alat modi fa ahedi usa tame,” lahame fet ab vameadume esuham. 23Labi ame im lam Aba vi tau meedam dam laba vameadume neàdi aaha dam duada zi lam neo lehemu Yesusat ame dam laba im ab faasi vameadamam. “Meit Ebe Eho vahokedam im ozobohudi vi tau meedalo àhàkedameam làhà ba im aba aho it ozome modelo àhàkemda lam it ozome meedam vabak. Ame da labe aho gi neham bak. ‘Eho Yesus bake tu vuzehi im Abada meedàmu damat em si ut tetehesuhunaso lam ve lu vatu vou ladam di lam damat eba aasdamnàme eho gi ozahit vou le em paku dou elom neà bak,’ lahame Eba labihasu tu vuzehi gagu vàmademda lam aho Eba tu vuzehi vi tau meedam neà bak. 24Neham labe labiham bak. Meit aba aho Eba lab tu vuzehehe bak lam ahate gagomeam damat am otem bak labna zohàme it vou faovoi vei iedi ahit biehenali, ‘Em Yesus bake tu vuzehi Am damalem kaio,’ lahame veibadamda lam ba Alati vahi ahe neàna bohu vuusdam vabak. Lahana meit neha, ‘Em Yesus bake tu vuzehi im Aba Aho ozohoda lamota meedam labe damat em otemeam làhà gi neà bak. Em ba àvodem vabak,’ lahame aba aho elom bak laba bisi it vou faovoi meedam vabda lam Alati vahi gi ahe neàna bohu vuusdamda am am bak. 25Iho bak niba esdam di meit nehi ozo, ‘Em gi nazoh zi nim vadume duali neàdese,’ lahame ozodamda labe aho vedi am ahu it vou faovoi Eba tu vuzehi Alati ahili ahena aabo laba vuusdam vabameam làhà aho amu modehe zoho ium gi meedume vanamai voom bak. 26Labi meit etei nibe neha, ‘Em abo Yesus bake tu vuzehi Aho vahokedaha im aime meedamda modem kaio,’ lahame ladi vei iedi Eba momeam làhà ba diamut Em Abo Asum Ahoba Iubet Bak Niba Li Dateleheda nibe Em Aiat Am na fauha meona fako iedemna ogatei modealaha bak lam fa Eba modi vizi feà Dateli Aho Am im gagu vou usem dam zi lamti ba neo amediat bak niba nom ilu meedam di lam Em laha ame da laba neha, ‘Om Eba tu vuzehi Em damalehe vabda am tame,’ lahame mu voo tame. 27Lo, lamota imbot. Lahana Eho etei uba neo gagolo modem im imboda nidi nim laha nasi aima. Um dam etei nib dozeadaha dam totbahota taho elom vaba ahe lahasdamna uho ba Alat Boehàdateboli dam bake vuusu im vahokedalo li duzum bak um dam zohota ame bak aa tame,” lahame ab vahokedaham. 28Labi Yesusat Aho ame im lam dam bake vahokedume neàdi usi delapan folehena ozohomu dihasi Aho tom gagodam bak ozome Aba vi tau meedam dam Petrusti Yohanesti Yakobusti labihasu gi dam lada làtela lamota gagome sibu bake ab vou laiteham. 29Labi vou laisi le Yesusat ab tom gagodamam. Tom gagodam di labe Am dauhati Am sueti alihi veimdi ab fauha meoleham. Abo asum boz velem bakti ulohona Am sue laba ab modesuham. 30Labi modeha Alat vameadaha im aime fa dam bake ahate vameaidaha dam behàsu aham di iube eloi seddaha dam Musati Eliati Alat Am na fauha meona fako iedemna ogatedamna im so laba modesu iho lehe bak aaha vabna nom ilu Yesus Am obe laba vi tau duzu im vameadamna ab aaham. “Yesus Am ba kota Yerusalem laba le elo tame,” lahame Alat amu vameame esuhu im ab imbodelo modem amemu im lam ab vameadamam. 32Labihadam di lam Petrus am dam meida behàsuti idao. Labi idaome fa keesi aaha Yesus labe Am dauha laba Alat Am na fauha meona fako iedemna modesu ogatedam bak lamti ame dam behàsu labe Yesusam obe laba tau doudam bak lamti ab aaham. 33Labi aadameilahit ame dam behàsu lam Yesus vou esmozi lalo modemu Petrusat Yesus bake ab gagoham. “Ai Guru oa, iho etei niba li odosi umti vahehe bak abo neàte. Imo teohet mom num làtela mose. Meida Oba mo. Meida Musa bake mo. Meida Elia bake mo. Labihadase,” lahame gi ahulat ozom im ostame ab vi gagoham. 34Lahame Petrusat gi etei labi vameadam lahasuhu di labe ulo fauha meona nom ilu dam lam ab baguamdi seteham. Labi baguamdi fi oli setehemu dam ab iedeham. 35Labi modeha Alat Am dae ulo labe futoi gago, “Da nim Em Adat Eho amu fi hasi gagu oluhuda Am am tame. Uho Aho vameadam im mahate aime meedale,” lahame ulo labe ame dae lam ab gagoham. 36Labi gagu neàdi ame dam làtela labe neo vi aaha uloti dam behàsu lamti seti gi Yesusat Ahamo duzuhu bak ab aaham. Lahana ame dam làtela labe iho etei aaha bak lam iho Yesus bake vi tau meedam lahasuhu di labe ame im lam ba meia gagom kai. Gi dam ihimo aame vaste. 37Labi izi dihasi dihambe Yesus Aba vi tau meedam dam làtela lamti vahi sibu labe fa ab lezeham. Lezi aaha dam duada zi labe doait li odosdam bak ab aaham. 38Labi dat vàmtea labe Yesus bake bisteat gut gago, “Guru oa, em daboseà nim Oho li aame modi fa neàdele. Em gi data vàmtea faaha dàt moz. 39Lahana em data nim mei ahu oli veimam setan labe aba li si modi aheleidume dam aim biem dae geme vou esmozi laida. Labi laha aba modi tufa tufame kehanabu vaoda. Lahana ame setan lam em data nim gi odohalehebeat isi esmozi lalo modem labe gi beome nisili vou esmozi laida. 40Labi modidàmu eho Oba vi tau meedam dam totbaho niba tauledume gago, ‘Uho ame setan laba gagu futoi itale,’ lahame gagoha dam labe modesome modeha modem bi moho,” lahame Yesus bake ab gut vameadaham. 41Gut vameadume modeha Yesusat fa ame lab odosdam dam zi laba ab gagoham. “Em abo uba tau azibehamdehena um eteida nim akati Eba mahate tu vuzehem vaba modela? Akati Alat Aba Aho ozoho baket uho modehe vaba akati bisi odohabuli git meedam bak bohu vuusdàla? Eho uba vuusdam di adi bake fusi um mu voe? Uho Eba tu vuzehem bak Eho ba gi labihasu vou faodà?” lahame gagu neàdi fa ame da niba ab gagoham. “Om daboseà nasi ve vou lele.” 42Lahame labi gagohemu da nibe le ame daboseà ve vou ledameam ame setan labe daboseà lam belu bake biti modi tufa tufada. Lahana Yesusat ame setan laba, “Futoi daboseà nim vou esmozi itale,” lahame mali gagoha ame setan labe futoi daboseà lam vou esmozi ab itaham. Labi modeha daboseà lam fa ab neàdeham. Labi fa neàdi am ai bake ab loham. 43Labi modeha dam duada zi lab dozeadume aasdamna modehe labe Alat im feàna modehe bak lam ab aame àvodeham. Labi dam duada zi labe Yesusat etei lab meedaha im lamti amu meedahada iumti ahebu labihasu àvodi meedam di labe Aho fa Aba vi tau meedam dam bake aa ab vameadamam. 44“Eho etei uba gagolo modem im nidi nim um mahate dogoi balesu aile. Em Abo Asum Ahoba Iubet Bak Niba Li Dateleheda nim meit Em vou fohome meia ub lu ote tame.” 45Lahame labi vameadume modeha Aba vi tau meedam dam nibe ozo, “Yesusat akati modemna gagohela?” laham bak ozom bi vi ozoda. Lab ozom biehe bak lam Alat ahit vaste. Labiha labe dam labe Yesus bake, “Akatihasu modemna gagohela?” laham bak fa vi gagu aim iedi moh. 46Labi ba digat meida iube Yesus Aba vi tau meedam dam labe ihimo otesi otesida. “Uho ozom, ba diamut im dua belas nim Yesusat da adidate gagu modi ee feàda talu Aba tau dam vuusu im vahokedàla?” lahame ab otesi otesidamam. 47Lahana dam labe im ahulat ozodam bak lam Yesusat Ahamo ozobohudi data koena laba gagome li Aho Am anekehàt vuu Aba Aho balesdam tot niba ab vou li duzuham. 48Labi vou li duzu neàdi ame dam laba ab faasi vameadamam. “Uho meidavat nehi ozo, ‘Em bisi feàda modem kaio,’ lahame ozome fa meit aba im gagomda laba uledi meedameam làhà ame da lam bisi feàda am bak. Labiham labe meit Eba tu vuzehi meedàmu fa damat neha, ‘Feà vab dàt moz,’ lahame gagomda lam abo data koena nimti ulohoda lam meit ame da lam ule neàt gut vamda lam Alat ozom di ame da lam gi Eba laha ahu ule neàt ab vaham bak. Labi Eba ahu ule neàt vamda lam gi Emota ule neàt vaha vabak. Abo Eba Gagu Oluhuda lam abo Em Ai bake laha ahu ule neàt vaha bak,” lahame Yesusat ab vameadaham. 49Lahame labi vameadume modeha Yohanesat Yesus bake ab vi gagoham. “Ai oa, iho amu iuba le aaha da meida labe Om ee gagodume mei ahu oli veimaha setan laba gagu futoi itaha bak im aaho. Lahana ame da lam imti vahi Oba vi tau meedam vab dàt labi modehemu iho malesome modeha vaba moho.” 50Lahame gagoha Yesusat fa gago, “Mm, vabà! Meit labihameam uho a malemule. Meit imti ot odosiam vabda lam iba taumda am bak,” lahame ab gagoham. 51Labi Yesus Alat vuu vousai asum ahoba iuba tom ilum digat fuseo vabalehemu kota Yerusalem lalo ahu ab vàmadi vitasuham. 52Labi lalo modem di labe Yesusat dam totbaho gagome nasi olu. “Bak iuba le na teohe labe àme imna modeme vahele,” lahame gagu nasi ab oluham. Labi dam labe le Samaria dam num debu laba fusi ame na modesome modeha Samaria dam Yesus lem bak male. Yesus Yahudi dàt modem labe kota Yerusalem laba lalo ahu vitasuhu labe Samaria dam bak ibida Yesusat lem bak male. 54Labihàmu dam lam Yesus bake fa li Samaria dam labe ibi bak malehe im lam ab vameadaham. Vameadume modeha Aba vi tau meedam dam meida behàsu Yakobusti Yohanesti meoli Yesus bake ab gagoham. “Dat Boehàda oa, Om iho neham neào? Iho asum ahoba iuba ootedume vua modi nom ilu dam lam beom neào?” 55Lahame gagoha Yesusat fa vaktesi dam behàsu niba mali gago, “A labihamule,” lahame mali ab gagoham. 56Labi gagu neàdi Yesus Aba vi tau meedam damti fa vahi dam num debu meidate ab laham. 57Yesus Aba vi tau meedam damti kota Yerusalem bake ladam digat meida labe ladameam dat vàmtea doni labe Aba tàhi ab gagoham. “Em, ‘Oho adi bake lào? Adi bake lào?’ laham di vi tau godalo mozo.” 58Lahahat Yesusat ozo, “Da lam imboo?” laham bak ailo fa ab vi gagoham. “Nohubake azim vemta ibi iho im bak ehete. Labi bume laha ibi iho im ila ehete. Lahana Em Abo Asum Ahoba Iubet Bak Niba Li Dateleheda nim bitesu im bak kaio,” lahame ab gagoham. 59Labi dat meida labe Aba neo gut tàhi ab gagoham. “Om Eba vi tau godamda modele,” lahame gagoha da labet fa Yesus bake vi gago, “Ai oa, faode. Em nasi em bake fa le em ai faina eloi baumsuhuzobe Oba ba vi tau meedase.” 60Lahahat Yesusat fa ab gagoham. “Vabo. Lada gi labihasu feidate. Dam Eba tu vuzehi meedaha vab damat abo Alati vaitesuhu damat fà baumsuse. Oho gi, ‘Em abo Alat Gagu Fihasi Vimteme Oluhu Dat Boehàda niba damat tu vuzehem labe Alat ame dam laba deeli vame Am damali vuusu im vahokedam bak am tame,’ laham im lam bak mei bak iumti bak mei bak iumti le vou vameatedume fi dedale,” lahame ab gagoham. 61Labi neo ladameam dat amomoi labe Yesus bake neo tàhi ab gut gagoham. “Ai oa, em Oba tau Obo Oho vahokedam im ozobohudelo meedam datelelo mozo. Lahana em ebe mei dam bake nasi le, ‘Em Yesus bake tau lalo mozo,’ laham bak lam le gagu neàdi Oba ba taulo modem bak.” 62Lahame labi gagoha Yesusat fa da laba ab vi gagoham. “Meit Ebe Eho vameadam im laba tu vuzehehena vedi fa aba aho vou esmoho dam nazohti it ozodameam làhà ba Alat dam bake deeli vame Am damali vuusu im vahokedam bak lam, ‘Akatihasu modemna modela?’ laham Im Neàna lam ba bak mei bak iumti bak mei bak iumti le vou vameatedume fi dedam di ba uloho vabak,” lahame ab gagoham.

will be added

X\