Lukas 20

1Labi ba neo digat meida iube Yesusat ame Fihasi Ala Bake Vou Baedam Num Vàmteabu labe am ad oli aam bak tomba laba neo le ame bak laba dozeadaha dam zi laba vahokeda. Labi laha, “Alat Dam Bake vuusu im vahokedam bak lam, ‘Akatihasu modemna modela?’ ” laham Im Neàna lam ame dam zi laba laha vameadume fi deda. Labihadam di labe ame Yahudi damat ibi iho tu vuzehi meedam im vuusdam tohe dam zi laha vahi tau dozeadaha dam labe Yesus bake li netàdi vabi vi ailo ab gagoham. 2“Ne, Oba amat modi vizi teudi im feàna lam Oho duzu meedàla? Oho nib li meedam im nim Oba amat gagu im dedateli Oho vuusu meedàla?” 3Lahame labi gagu modeha Yesusat fa gago, “Im ubuda faode. Ebe Eho etei uba vi ailo gagomda nim uba nasi vi gagu aise. 4Ne, Yohanes Mei Vuu Valo Baptisleiamda labe aba aho amu mei vuu valo baptisleiam bak lam amat Yohanes bake gagu aho ame bak lam meedahela? Alat aba gagu aho ame bak lam meedaheo? Laham vabameam damat aba gagu aho ame bak lam meedaheo? Akatihahela? Uho ame bak lam Eba fa gagomta uho etei Eba lab gagu vi ailo modem bak lam Eho fa uba vi gago tame.” 5Lahame labi gagu vou faoha ame Yahudi ee dam zi labe gi ihimo ot gagoida. “Uho ozom, iho akatihasu fa Yesus bake gagoe? Iho nehameam, ‘Alat Yohanes gagu olu meedaha bak,’ lahame labi gagomeam làhà Yesusat fa iba nehame vàlu gagom bak. ‘Ne, um lahana akati Yohanes am im aime tu vuzehem vaba moudume mohela?’ lahame iba labi fa gagom bak. 6Lahana iho nehame gagomeam, ‘Damat gagu oluha,’ lahameam làhà dam etei iba tau dozeadaha dam totbaho zi nibe fa iba faki ke visomoame iba beodume elodà moio? Neham bak. Dam etei iba tau dozeadaha dam totbaho zi nim, ‘Yohanes ba damat gagu olu meedaha vabak. Am gi Alat vameadaha im aime fa dam bake ahate vameaidahada meida am am bak,’ lahame labi ozodam labe iho fa im mei gagomeam làhà dam iba faki beom bak.” 7Lahame ame dam busaoda zi labe ihimo vou faovoi iedi fa vei biehenali Yesus bake fa ab gagoham. “Yohanes aho amu lab meedaha bak lam, ‘Amat gagu olu meedàla?’ laham bak lam im bieho.” 8Lahahat Yesusat fa dam laba ab gagoham. “Lo, làhà Eho li meedam im zi nim, ‘Amat Eba gagu olu Eho im dedateli meedàla?’ laham bak lam Em laha ba uba gagom vabak,” lahame ab vasteham. 9Lahame labi gagu neàdi Yesusat lab dozeadaha dam zi laba im totobe nidi nim neo nehame ab faasi fi koadamam. “Dat utoho deda nibe am tat vueheba laba am na meedam dam gagome anggur neb zi deddume neàdi esu. Labi bak mei bake le azibehamdi fa lelo modemu dam na debe soali modeme vahem dam zoho laba gago, ‘Uho em anggur dee nim teohet vou aasdume amdehezobe modeme vahedam di zoho uho va. Zoho eba naedate vahedume esu. Labihadale,’ lahame it gagu esmozi bak bohu bake ab laham. 10Labi le aidamehamdi ozoha, am anggur oo vaedume amdem bak fuhemu fa am na meedamda meida laba gagu ab oluham. ‘Em anggur dee teohet vou aasdam dam labe iho ot loiame vaha doi ebe eho vam zoho eba esuhuda lam le vame fa vou lele,’ lahame gagu ab oluham. Labi le gagoha ame anggur dee teohet vou aasdam dam labe ame da lam lehemu gut si foadume saemea fa ab oluham. 11Labi anggur deda labe gut aaha dat gi saemea fa lehemu am na meedamda meida laba neo gagu fa ab oluham. Labi olu lafusi modeha ame anggur dee teohet vou aasdam dam labe neo gi gut foadume game ladi fa saemea ab oluham. 12Labihàmu ame anggur deda labe neo gut aaha neo dat gi saemea fa lehemu dat meida laba neo gagu oluhu bak ab làteladeham. Labi olu fusi modehat ame dam labe neo ame da nim gut beome nisili visoi anggur dee natàh zidazi ab vooham. 13Labihàmu ame anggur deda labe vi ozo, ‘Ne, em akati mode? Làhà gi em adat vàmtea ebe eho deeleheda nim gagu oluse. Eho labihameam dam labe fa em adat bake vei ladi ahu adat iedi fa eba doi lu olum zoaha bak,’ lahame vi ozome neàdi am adat ab gagu oluham. 14Olu ladume lafuseo vabalehe di labe ame anggur dee teohet vou aasdam dam labe gi bak bohulana gut aaha anggur deda labe am adat ledam bak aahemu neha, ‘Da nim ba am aiam na misia vamda am taia? Imo da nim oteme afoezobe anggur dee nim fa im na misialese,’ lahame im aa ab odoadaham. 15Labi im aa odoadume neàdi ame da fuhuzobe neo gut si vou kea lame anggur dee natàh ke labe vou futoi bako iuba ab oteme vooham.” Lahame Yesus ame im totobe lam fi koadume neàdi neo ame Yahudi dam busaoda zi laba vi ailo ab gagoham. “Uho ozom, ame anggur deda labe fa li am anggur dee teohet vou aasdam dam laba li akati modela? 16Gi neha taia? Dat naeda fa li ame anggur dee teohet vou aasdam dam laba oddam bak. Labi oddume am anggur dee lam fa dam amomoi gagome fa vou aasdam bak,” lahame im totobe lada lam fi koadume neàdi modeha lab dozeadaha dam zi labe Yesusat lab gagoho bak lam aime ozo, “Alat iba Yahudi dama labihalo modemna ozomo?” lahame tombu ozobohudi fa Yesus bake ab gagoham. “Vabà! A labihamule.” 17Lahame labi gagohemu Yesusat ame dam totbaho labe Aba moho bake vi ozome Aba vi gagoho dam laba vi aasu gago, “Imbo bak. Eho etei uba lab gagoho bak lam abo imbote. Lahana meit Alat Vameadaha Im Toedahana laba im meida nehi toehena nim um aame vi ozobohudehe vaba? ‘Dam num moadam dam labe, “Faite,” lahame mu vooho ke lam fa feà Dateli bisi num mome teudem ke am bak.’ Lahame toeme esuhu im lam uho ozom, akatiham bake labi gagohela? Ame im lam gi neham bak. 18Ame ke lam Alat Gagu Fihasi Vimteme Oluhu Dat Boehàda Em am bak. Meit Ebe Eho vahokedam im tu vuzehi meedam vabda lam gi da nibe ke bake gitadi vàhàdemdati uloho bak. Laham vaba ame ke labe ame da laba fi tmai bake deebosi setemdati uloho bak,” lahame Yesusat ab vameaham. 19Labi dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti damat Ala bake lomna ve vua vahudam toheda zi laba vuusu im vameame faheme modiam dam lamti ame dam labe ozo, “Oo, Yesusat etei lab vameadaha im lam gi iba vàlu vameada taia? Aho li vahokedaha im lam iho aim mu vooho bak laba ozome ame anggur dee teohet vou aasdam dam laba gi vàlu im totobet fi koada taia?” laham bak ozobohudehe labe abo Yesus silo àhàki nabidaha dam duada totbaho labe Yesus bake tuhuda feà labe iedi sim bili gi vabedda. 20Labi iho Yesus sim biehemu fa ba sim neàdi vou fuhuzobe, “Sise,” lahame gi vou faoda. Vou faodam labe ozo, “Yesus git gagohozobe si fa gubernur iba vuusdamdate vou le ub lu aho im dedateli fà uloose,” lahame fa dam amomoi bake ab gagoham. “Uho ahit Yesus bake le neà damali vahi keobaedale,” lahame gagu Yesus bake ab oluham. 21Labi Yesus bake le dam duada zi totbaho labe vou faodahit ahit fi bovai im ab vameadamam. “Guru oa, Oho lab meedam bak lam im ahebu ozobohu bak. Om abo im vameadam di im vamdesu vameadam bak. Labi im vahokem di laha im vamdesu vahokedam bak. Labi Alat ozo, ‘Dam bakda nehasu meedase,’ lahame Aba Aho ozoho im lam Oho dam bake im vahokedam di Om laha gi im vamdesu imbona vahokedam bak. Om ba neham bak modem vabak. ‘Da lam ee feàda Eba im gagohe? Làhà aime tuse.’ Laham vab di, ‘Da lam ee vabda Eba im gagohe? Làhà Em aime tum bak mose,’ lahame ba dam fahem vabak. Om gi ozahit vahi vahokedam bak. 22Om labiham dàt modemu iho nehi Oba gagu vi ailo modem bak. Im Yahudi dam ihimo dat ahamda Musat toedume fi hasi esuhu Im Feàna zi lam iho tu vuzehi meedam labe Oho ozom, pemerintah iba vuusu meedam bak gohali lodam doi pajak lam iho fa Kaisarleheda laba lodam neào? Ame Im Feàna zi labet iba maleheo? Akatihàla?” 23Lahame labi gagoha Yesusat dam labe Aba keobaedam bak Ahamo ozobohudi ab gagoham. 24“Uho ame pajak abo gi vi tau lodam doi oona perakat modehena lam Eba fi male.” Làhàmu ame dam labe le ame doi oona visoi fa vou li Yesus bake ab loham. Labi Aho ve vousai dam bake fi si vimtedam labe ab vi gagoham. “Ame doi nim amam dauha ame doi laba modesuhela? Labi amam ee toehela?” 25Lahahat dam labe neha, “Dam ahebu vuusdam Kaisarleheda labe am dauhati am eeti modesuhu bak.” Lahame labi gagoha Yesusat fa neo vi gago, “Lo. Làhà uho dam ahebu vuusdam Kaisarleheda laba na abada lam fa naedate loda. Labi uho laha Alat Aba Aho gagohoda lam laha meeda. Labihadale.” 26Lahame labi gagohemu dam Yesus bake keobaedam dam labe, “Dam duada zi labe Yesusat git gagom bak fà aise,” lahame ame im lam gagoha Yesusat git gagom vabamu àvodi ab daleàdeham. 27Labi ame digat zoho labe Saduki dam labe laha neo Yesus bake gagu vi ailo ab li dozeadaham. Ame Saduki dam labe iho ozome tuhu im gi neha, “Mei elom di ba fat ahedi usam kaio,” lahame tu ozodam dam am bak. Laham dam labe Yesus bake li vi ailo ab gagoham. 28“Guru oa, dat ahamda Musat aho toedume fi hasi iba esuhu Im Feàna zi lam im meida nehi toeme fi hasi esuhu bak. ‘Meit am itbaho fatoho vaba elomeam làhà fa ame nam maboe lam am dam zohot fa ve data faasi, “Ame koei labe am data am tame,” laham bak ozome debu bohulalelo ame maboe lam koei labe am vahadat modeo, am dubut modeo, fa vale,’ lahame Musat aham di iube labi toeme fi hasi iba esuhu bak. 29Ne lahana iho etei vouholo modem im nim Oho nasi aimale. Amu di iube ame dam abo tujuh ehet. Datahida ame. Labi donida auoholehena ame. Labi domuàda ame. Labihasu ame dam tujuh labe dat datahida nam ab vaham. Labi ve modeha ame nam lam data faaha vabna dat ab eloham. 30Labi ame maboe lam ame koei laba vi tusuhu dàt neo fa ab vaham. Labi ve modeha ame maboe lam data faaha vabna dat neo ab eloham. Labi ame maboe lam dat doni dàt neo fa ab vaham. Labi ve modeha ame maboe lam data faaha vabna dat neo ab eloham. Gi labihasu vou mode ledume dat domuàdate ab vou fuham. Labi vou fusi modeha gi neo ame baket modi ame maboe lam data faaha vabna dat neo ab eloham. Labiha ladume ame dam tujuh lam ahebu ab foli seteham. 32Labi ame maboe lam ba neo ab vi eloham.” 33Lahame ame Saduki dam labe iho ame im lam vouhome neàdi, “Im elom di ba fat ahedi usào?” laham bak lam tozolo Yesus bake neo vi ailo ab gagoham. “Làhà Oho lab gagoho bak lam, ‘Mei elom di fat ahedi usam bak,’ lahame Oho lab tu ozome gagoho im lam imbodemeam làhà ba diamut dam ahebu elodaha dam fat ahededume usnadam di lam ame dam tujuh labe ototo vaidume ba vi eloho nam lam Oho ozom, amam namet mode?” 34Lahahat Yesusat fa ab gagoham. “Vabà! Um git ozo. Dam bakda ahebu bak niba azim di lahi vada. Labi lahit ihimo dat aho vamda gagu vada. Lahadam bak. 35Lahana ba diamut Alat ozo, ‘Da lada lam am eloho bak labet Eho modi fa ahedi usam neàte,’ lahame Aho labi ozoho dam modeo, lahi modeo, lada zi lamota modi fat ahededume usnadume Alat azihi bak neà bak laba azim di ba meit neha, ‘Em nam valo mozo.’ Labi meit neha, ‘Em dat valo mozo,’ laham bak lam ba labi gagom vabak. 36Labi laha ame bak laba azim di fa Alat Am im gagu vou usem dam lamti uloholehe labe ba neo elodam vabak. Labi laha Alat ame dam elodahada zi laba Aho modi fat ahededume usnadaha labe ab modi Am damalemam bak. 37Uho vedi neha, ‘Dam elodaha dam labe im elodaha bak labe ba fat ahededume usnadam vabak,’ lahame git ozodam damat modem bak. Eho ozoha, uho Musat aham di iube toedume esuhu im lam vi aame ozodam vab damat modem bak. Aham di iube ut aabadehena buà lam vuat eludam bak Musat vi aadàmu aasuhat vua elum bak lam taho faali setem vabamu Musat le netàdi ab aasdamam. Labi aasdume modeha Alat am dae vua labe futoi Musa bake nehame vameadaha bak. ‘Em abo Abrahamti Isakti Yakubti labihasu Eho vuusuhu labe ame dam labe Eba vi ozome vou baedam Ala Em am bak.’ Lahame vameadahana toeme esuhu im lam uho mahate vi ozodam vab damat modem bak. Alat aham di iube lab gagoho bak lam ame dam làtela lam gi elodahanàme fat ahedi Aba vou baedam lahasuhu bak lam Aho vameadaha bak. 38Labiham labe Eho vi ozom dam elodahada zi labe ba Ala bake vou baedam vab taia? Gi dam ahe damat ihimo Ala bake vou baeda taia? Alat ozomta ame dam elodahada zi lam gi ahe lahasuhu damat modem bak,” lahame Yesusat ab vameadaham. 39Lahame labi vameadume modeha ame dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru totbaho labe iho Yesusat ame Saduki dam bake lab vameadaha im lam aime, “Ahole vahokeha,” lahame ozome Yesus bake gago, “Oho ame lab vameadaha im lam abo imbona vameadaho,” lahame ab gagoham. 40Labi gagu modeha ame dam labe ladi ba Yesus bake fa li im vi aim bak ab moham. 41Labi Yesusat neo ame dam zi laba neo vi vameada. “Damat akati modi ame Alat Gagu Fihasi Vimteme Oluhu Dat Boehàda laba im nehasu gagodàla? ‘Am abo boehàda Israel dam bake vuusdam dat ahamda amu gi eloi seteheda abo Daud labe am mekehàdat modem bak,’ lahame labi gagodàla? 42Nehaha bak. Boehàda Daud aham di iube aho Ala Bake Vou Baedam Labe Ladeem Im Toedahana laba im meida nehi toehena ehe bak. ‘Na Debu Modehe Ala labe Aho fa eba vuusdam Boehàda laba gago, “Om Em ahi totbaho niba nusu Eba tau im dedateli dam vuusu im vahokedase. Labi Eho dam Oba fakemoholehe dam zi lam Eho ahit modi bedi fà Oba iedi uledi im Oboda fà aime meedase.” ’ Lahame Daud aham di iube labi toeme esuhu bak. 44Daud ahamo Alat Ba Gagu Fihasi Vimteme Olulo Modemda Boehàda laba neha, ‘Eba vuusdam Boehàda,’ lahame labi gagodàmu ba akati meit Alat Gagu Fihasi Vimteme Oluhu Dat Boehàda laba neha, ‘Boehàda Daum mekehàda modem bak,’ lahame labi gagodàla? Labihameam làhà Alat Gagu Fihasi Vimteme Oluhu Dat Boehàda lam fa Boehàda Daud vafozi bisi feà Dateleheda Am taia?” lahame ab gagoham. 45Lahame labi gagoha ame dam duada zi labe Yesusat lab vahokehe im aidam di labe Yesusat fa Aba vi tau meedam dam zi laba neo im vahokeda. 46“Dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru labe ibi iho meedam bak uba fa vizemo. Labiham bake um abo iademe it vou faovoi meedale. Ame guru zi labe ibi iho meedam bak gi nehadam bak. ‘Dam totbaho iba fà gut baedase,’ laham bak ozome sue sona ahoba dusumda bohuna duadume damat im vameadam bak tomba laba le it aai it aaidam labe deeli goom bak ame. Labi iho neo dam duana zi dokbuedam bak laba le damat fà, ‘Neàte,’ lahame iba gut gagom bake deeli meedam bak ame. Labi neo im Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba olem di vedi dam feàda ihimo nusum bak laba deeli nusualadam meo bak ame. Labi laha na zi vaheme àlo modem di vedi dam feàda ihimo nusu na àm bak laba bisi netàdi vi tau nusu na àdam meo bak ame. 47Labi laha maboe zi laba ahit neha, ‘Im om vou aasdalo mozo,’ laham dam labet vedi ahi vageme netàdi maboe nazoh fetehesu vi vadume dualem bak ame. Labi laha Ala bake tom gagodam di iho lab faina modehe bak lam vedi ahit vasti ihimo neà damali gi Ala bake la gagoi le gagoidam labe bohulaledam bak ame. Labihasu meedam damat modem labe Alat ba diamut ame dam laba, ‘Fà duana modi geàdase,’ lahame na asimbuna feà meeda tame,” lahame ab vahokedaham.

will be added

X\