Lukas 19

1Labi vou bae ladume modeha Yesusat ame num debu Yeriko laba lafusi labohotelo meeda. Labiham di lam Yeriko laba Zakeus laha laba ehet. Meia gagu gi teo vi vaiam doi pajak gut gagome vam dam labe im boehàda meida Zakeus am. Am abo na duada am. 3Zakeus am Yesusat ledam bak aihemu am abo Yesus bake aalo àhàke. Lahana dam duada labe Yesus bake valadam labe dam duali Yesus aam biehemu Yesusat lam bak laba ahamo nasi vazidazi emoeme le uto zisi ausi gut aasda. Am gi buuna buà modehe labe labihaha bak. 5Labi aasdameam Yesusat lehe labe Zakeus aidam adba laba li duzu tom aaha Zakeus ut aasoa aidam bak aame tom gago, “Zakeus om taho usele. Em etei nim om numa izi neo lam bak modelo modem bak.” 6Lahame labi gagoha Zakeus gi àvodehat usi deelehat Yesusti ahili am numa ab laham. 7Labi am numa le vou olesome modeha dam duada labe num zoho obe laba dozeadaha dam labe Zakeus labe aho Yesus am numa vou olelo modem bak aahemu ab tozoham. “Ea, ne Yesus gi dat faina modemda laba ana modi deeli vou izeo mode?” lahame ab tozome gagoham. 8Lahana Zakeus aho gagom im gi dam labe fà aisome Yesus bake ab gagoham. “Dat Boehàda oa, em etei nim em nazoh duana ahebu faheme totbaho dam na vab dam laba lodam bak. Labi eho mei doi ahi vageme vaiamdaleàmu na ebe eho esuhuda totbaho lam laha faheme dam laba fa duana lodam bak. Eho amu meia vageme doi vaha di gi koena vaha bake etei abo fa duana lodam bak.” 9Lahame labi gagoha Yesusat neha, “Oho etei lab gagoho bak lam Em ab aime ozobohudeham bak. Om lahi datati ubu uho faina meedàmu Alat uba beolo modem bake om abo om tai Abraham labe aba aho amu Ala bake lab tu vuzehehe bak lamti ulohona oho laha modehemu etei nim Alat ozahigeàmu fa uba soat vausu ab vei neàdeham bak. 10Em Abo Asum Ahoba Iubet Bak Niba Li Dateleheda bak niba lehe bak nim gi damat faina meedàmu Alat beolo modesdam dam lam abo Zakeusti ulohoda lam Eho nabime soat vausu fa vei neàdedalo lehe bak. Abo dat domba vou aasdamda labe am domba zie fàusi git ub oedahemu fa vi nabime vame fa iademe oumahedam datti uloholelo Em bak niba lehe bak,” lahame ab vameadaham. 11Labi Aho lab vameadaha im lam dam zi labe ame im lam aidam lahasuhu di labe vedi nehi ozo, “Yesusat Am kota Yerusalem ab fuseo vabaleham bak. Aho kota Yerusalem laba le lafusi im Israel dam vahi vuusu im vahokedam bak abobo modem bak etei ab faasi meedalo modemam bak,” lahame labi ahu ab git ozoham. Làhàmu Yesusat, “Aho Boehàdateboli dam bake vuusu im vahokedam bak fum kaio,” lahame vameame tombalelo ame dam laba im totobe nidi nim neo nehame ab faasi vi fi koadamam. 12“Dat elaidamda meida nibe aho ozo, ‘ “Em boehàdateli neàdi eho fa em dam vuusu im vahokedase,” lahame fa boehàdatebo laba le fa gagu boehàdateli neàdi em fa li em dam vahi vuusu im vahokedalo modem bak,’ lahame ozome neàdi bak bohula bak laba lalo ab usaham. 13Usai lalo modem di labe am na meedam dam sepuluh gagome li dozeadume neàdi doi oona emas lam abo nazoh feàna vamna sepuluh lam faheme am dam laba vàmtea lodume uloholi it vameada. ‘Em doi uba gi koena lohona nim uho vame vou le fa na vame ot loidam bohu vuusdume fa doi dualehena em fa li aase,’ lahame labi gagu neàdi usai bak bohula bak laba ab laham. 14Labi ladam di labe ame da labe aho vuusulo modem dam zi aba vi feàtàdume fa dam totbaho fàsi dam laba nehame gagu ab vi oluham. ‘Uho boehàdatebo laba le gagole. “Im da labe boehàdateli iba vuusum bak im moho,” lahale,’ lahame labi gagu ab oluham. Làhàmu dam ba vulahada labe labi le boehàdatebo laba gagoha 15boehàdatebo gi ailahigeàmu ame da laba ab modi boehàdateleham. Boehàdateli fa am bake ab oluham. Labi boehàdateli fa am bake ledume am numa ab lefuham. Am numa lefusi aho amu am doi lodaha dam abo am na meedam dam sepuluh laba, ‘Am doi dualeheo?’ laham bak aalo ame dam laba, ‘Lele,’ 16lahame gagu modeha ame da ahamte li duzuhuda labe li duzuhemu dat naeda labe ab ailo gagoham. ‘Eho oba loho doi lam akatihahela?’ Lahame labi gagu vi aaha ame na meedamda labe neha, ‘Ai, doi oona emas vàmtea oho eba lohoda lam eho modi fa duali ab sepuluhleham tame.’ 17Lahame labi gagoha dat naeda labe fa gago, ‘Lo, làhà oho modehe bak abo neàte. Om abo na meedamda bisi neàda am bak. Eho oba doi koena lohona oho abo iademe vou aasdume fa dualehemu eho fa oba modi boehàdateli oho num debu sepuluh labe im dam zi lam vuusu im vahokedam bak ab modelo modemam bak,’ lahame ab gagoham. Lada labiha. 18Labi na meedam dam meida labe ba neo li duzuhemu dat naeda labe ab ailo gagoham. ‘Eho oba loho doi lam akatihahela?’ lahame labi gagoha dat ba leheda nibe gago, ‘Ai, doi oona emas vàmtea oho eba lohoda lam eho modi fa duali ab auoholeham tame.’ 19Lahame labi gagoha dat naeda labe fa gago, ‘Lo, làhà oho modehe bak abo neàte. Labiham bake eho oba modi boehàdateli oho num debu auoholehena labe im dam zi lam vuusu im vahokedam bak ab modelo modemam bak,’ lahame ab gagoham. Lada labiha. 20Labi na meedamda meida labe ba neo li duzuhemu dat naeda labe neo ab ailo gagoham. ‘Eho oba loho doi lam akatihahela?’ lahame labi gagoha dat ba neo leheda nibe gago, ‘Ai, oho eba doi oona emas vàmtea lohona neam bak. Om abo dae teuna meedam dàt iba vuusu meeda. Om bisi meit debe soalehena gi ahum gagome vada. Meit ahamo meedume vanamai nuhatehena oho vedi gi ahum vada. Om labiham dàt modehe labe oho eba loho doi oona emas vàmtea lam eho meedume ame emas lam dualehe vaba setemeam làhà oho eba li faki beom bak labna zohàme em fa oba vei iedi meedam labe eho doi lam gi oho loho di labe ve sue zohot giame gi esdam bohu meedume fa om ab leham bak.’ 22Lahahat dat naeda labe ame lab gagoho bak lam aime faki ab gagoham. ‘Làhà, om em na meedamda abo bisi fai bak modem dàt modem bak. Oho lab gagoho bak lam eho ab aiham bak. Labihàmu eho gi ame bak labet fa zuhou na asimbuna feà oba ab modelo modemam bak. Oho neha, “Em abo dae teuna meedam dàt uba vuusu meedala. Em bisi meit debe soalehena gi ahum gagome vadala. Meit ahamo meedume vanamai nuhatehena eho vedi gi ahum vadala,” lahame om labi ozobohudi gagomda labe akati eho oba loho doi lam oho neo ve damat mei emas modi duaedam num laba vou oli esu eho fa lehezobe ame emas fa dualehena oho eba gut lom vaba modela?’ 24Lahame labi gagu neàdi dat naeda labe dam aba obe laba netàdi dozeadaha dam laba gago, ‘Da nibe vuusuhu doi oona emas vàmtea lam si vietoi fa em na meedamda meida labe aho em doi modi sepuluhleheda laba taho fa lole.’ 25Lahame labi gagoha ame dam labe àvodi gago, ‘Aa! Ai om akati labi gagodà? Ame da lam oho amu doi sepuluh lohona ba akati doi nidi nim neo vi loe?’ 26Lahame labi gagoha dat naeda labe fa gago, ‘Neha taia? Eho meia neha, “Em na nimota oho vou aasdale,” lahame gagu ame da labe iademe vuusu vou aasdameam làhà eho ame da laba neo neha, “Em na nidi nim oho laha vou aasdale,” lahame gagu ame na vi tau duali feà bak fusi vuusu vou aasdam bak. Laham vabameam eho meia neha, “Em na nimota oho vou aasdale,” lahame gagu ame da labe iademe vuusu vou aasdam vabameam làhà eho naedat ame da laba gagu meedam im lam gi fa faatoi vei setem bak. 27Labihàmu uho nasi le dam amu neha, “Im da labe boehàdateli iba vuusum bak im moho,” lahame eba faki labi gagoho dam laba le gagome eba fa vou ledale. Labi eba vou li vou dozeadume em aasdahit ame dam lam oddume voedale,’ lahame ab gagoham.” Lahame Yesusat im totobe lada lam ab fi koadaham. 28Labi im lada lam fi koadume neàdi Yesus Aba vi tau meedam damti vahi kota Yerusalem ab tom lalo ladamam. Tom ladam di labe Yesus nasi lada. 29Labi ladume Zaitun Dee Dozeadaha Bak Buzoho bak laba tom ladume bak labe modesuhu num debu behàsu Betfageti Betaniati lahaha doni laba fuseo vabalehe di labe Aba vi tau meedam dam meida behàsu nasi gagu olulo meeda. 30Gagu olulo modem di labe Aho nehi vi vameada. “Um ahim nim num debu iba netàdeheda laba lefusi aameam keledai fi ho adat gàhàda lo vààsdam bak aa tame. Ame keledai lam amu damat nusu gohatehe vaba alimda modem bak. Keledai lam lo vuhatoi vuusu vou lele. 31Lo vuhatolo modem di meit uba nehi gagomeam, ‘Im keledai uho ana modelo lo vuhatolo modela?’ labihameam làhà uho fa nehi gagole. ‘Boehàda Aba Aho ozoho baket modelo modemu vou lalo mozo,’ lahame uho da laba labi gagole,” lahame ab vameadume oluham. 32Labi le aahat Yesusat lab gagu oluhu bak lam ab imbodeham. Ame keledai fi ho adat gàhàda num zohobe laba lo vààsdam bak ab aaham. 33Labi le lo vuhatosome modeha keledai dedam labe gago, “Aa! Im keledai uho ana modelo lo vuhatolo modela?” 34Lahame labi gagoha dam behàsu nibe fa ab gagoham. “Mm vabà! Boehàda Aba Aho ozoho baket modelo modemu vou lalo mozo,” lahame ab gagoham. 35Labi gagu neàdi lo vuhatoi loa vuusu fa Yesus bake vou li ibi iho sue sona ahoba dusuhuda vihilame ame keledai adat gàhàda labe am toha laba ab nom gutaudaham. Labi gutaudume neàdi Yesusam naba tom odosi zisi nusu ab ladamam. 36Labi zisi nusu zie ladam di lam dam dua totbaho labe im sue sona ahoba dusuhuda lam laha vihilame ame keledai Yesus vou lam zie laba vou olualada. 37Labiha ladume Yesusat Zaitun Dee Dozeadaha Bak Buzoho laba zizi kota Yerusalem lazesome modeha Aba Aho vahokedam im ozobohudelo vi tau meedam dam zi labe Yesusat na damat ihimo modem biem im feàna Aho amu meedaha im vi ozome deelehat ab faasi Ala bake bisteat ab vou baedamam. 38Nehame vou baeda. “Alat Aho Gagu Olu Ot Vai Im Dedateli iba etei lehe Dat Boehàda nim abo feàteee! Ala asum ahoba iumti im bak niba esdam damti fà modi vahe vahedase. Labihalo modemu imo Ala bake vou baedase.” Lahame meit buteme vou bae lada. Meit buteme vou bae lada. Labihada. 39Labi vou bae ladume modeha Farisi dam totbaho lab vi tau dozeadaha dam labe Yesus bake gago, “Guru Oba vi tau meedam dam zi nibe Oba vou baedam bak Oho gagu fa malele.” 40Lahame labi gagoha Yesusat fa gago, “Labiham vabiem bak. Ne, dam nim gagu dae vabameam làhà ke nibe fa ahali Ala bake vou baedam bak. Labiham bake etei di nibe vou baedam bak ba vabalem vabak,” lahame ab gagoham. 41Labi neo ladume Zaitun Dee Dozeadaha Bak Buzoho bak labe nom ladume kota Yerusalem fuseo vabali nom aaha dam num nom aadàmu Yesusat meb dae ab faaham. 42Ame dam lam dam amomoit faki beolo modemu Yesusat vi ozome faobekesi Ahamo im mebet ab vameadamam. “Um kota Yerusalem dam akati etei nibe ahu vàmadi fa vahem bak vabili mode? Ame bak lam um etei ozobohudemeam làhà um ba gi neà bak tadem bak. Lahana um ba lahame ame bak lam ba ozom vabak. Ab vaitoham tame. 43Um ba diamut dam uba fakehe damat li ahiledou vabousu beom bak. Um ba meida futoi itam vabak. 44Gi um data nazohti ahebu beome setem bak. Labi um num zi lam laha ahebu faatoi setem bak. Alat uba faobekesi vuusulo oluhuda um ailahigeàmohemu labiham bak,” lahame mebet ab vameadaham. 45Labi im lam vameadume neàdi Yesusat neo le kota Yerusalem laba lafusi Fihasi Ala Bake Vou Baedam Num Vàmteabu labe am ad oli aam bak tomba laba le duzu aaha damat Ala bake vou baedalo na Ala bake lomna ot loidam bak aahemu meoli dam na ot loidam dam zi lamti na vadam dam lamti meoleme ootedume ab futodamam. 46Aho meoli gago, “Um ozom vaba? Meit Alat Vameadaha Im Toedahana laba im meida nehi toehe bak. ‘Alat neha, “Em num nim gi Eba tom gagodam numat modem bak.” ’ Lahame toehena um akati aalahigeàmu meit na aa ve voutame fi olehe bak ozome vou oli vasti esdam bakti ulohona modi Em num feàda niba oli im mei faasi meedàla?” lahame faki meoli meedam labe dam soa odosi veimome dam ab ilidamam. 47Labi Yesusat kota Yerusalem laba aidam di lam gi Fihasi Ala Bake Vou Baedam Num Vàmteabu labe am ad oli aam bak tomba laba le dam bake vahokeda. Labi dihasi neo gi ame baket meeda. Labihadam di labe Yahudi damat ibi iho tu vuzehi meedam im vuusdam tohe dam zi labet vedi vahi Yesus otesome meedaha dam duada zi labe bisi Yesusat lab vahokedam im tu leidàmu otem vabi gi vabeddam bak meeda.

will be added

X\