Lukas 12

1Labi ame di labe dam zi fai Yesusat doudam bak laba valadume vahi bakamta dozeadume modeha gi dam bà tadi mei soat osidda. Labihadam di labe Yesusat amu nasi Aba Aho vahokedam im ozobohudelo vi tau meedam dam zi laba ab faasi vahokedamam. “Um iademe vou faovoehebeat meedale. Uba Farisi dam labe iho faina meedam bak uba ahit neà damali vageme uho vedi vabi dam lam imbona mode tiba uba vizemo. Labiham bake um iademe modele. 2Damat ozo, ‘Iho modehe bak nim damat aaha vabak,’ lahame iho aa modi vastehe im lam ahebu Alat ba diamut ahate modi fi zeam bitoi dam ahebu ba aame ozobohudem bak. 3Neham bak. Damat aibut aa fi olehe bake le aa vameaha im lam, ‘Ba meit aim vabak,’ lahame ozoho im lam ba diamut modi ala faasi fauhaedam di labe damat aime ozobohudem bak. Labi laha damat num ad oula tuoho bake le meia im adnahet aa vasti vameaha im lam, ‘Ba meit aim vabak,’ lahame ozoho im lam ba diamut modi ahate tombalem labe dam ahebu aime ozobohudem bak,” lahame ab vahokedaham. 4Labi im lada lam vahokedume neàdi Yesusat neo im meida vi vahokeda. “Emti vou alehe dam oa, Eho etei uba vamealo modem im nim laha mahate iademe aile. Uho dam bakda uba gi soabota oteme voom dam laba a àvodi vi ozome iedemule. Dam lam um otem di um so lam gi lab eloi vooho tadem bak. Ba neo um eloi it oazehena lam vi vabidam vabak. Labiham bake ame dam laba uho a àvodi iedemule. 5Fa gi nehale. Uho gi Ala Na Debu Modeheda laba, ‘Feàte,’ lahame ahu adat iedi ozodale. Neham bak. Um dam bakda Ala naedat modehe labe um oteme elomta elo. Lahana uho lab eloi it oazehena lam Aho ba vi ve fa vua eludamna sutem gikina bohu laba voom bak ehete. Labiham bake ubu uho bisi àvodi vi ozome ahu adat iedelo modemeam làhà Na Debu Modehe Ala laba iedele. 6Neham bak. Damat gena bume keobena nu vabna vam di, ‘Feà kaio,’ lahame doi oona tembagat modehena lam vam mom meote. Lahana ame bume keobena lam Alat faobekesi vou aasdam labe ba vàmtea vabiem vabak. Ahebu vi ozobohu tadehe bak. 7Lahana gi ame bume lamota vou aasdam vabak. Alat laha uba vou aasdam labe ba um meida buà vabiem vabak. Abo um ahebu vi ozobohu tadehe bak. Abo um ohuta tau keobebe lam Alat laha amu gi debe uloholi ozobohudi esuhu labe Alat um ba vàmtea vabiem vabak. Labiham bake Alat ame gena bume keobe zi laba deeli vou aasdameam làhà im dam bakda laha tau vou aasdam bak. Lahana bisi aho deeli vou faovoemda im dam am bak. Labiha labe ame dam bakda amomoi labe uba otelo modem bak modeo, uba faina modelo modem bak modeo, uho a bisi vi ozodume iedemule,” lahame ab vahokedaham. 8Lahame labi vahokedume neàdi Yesusat neo im meida nehame vi vahokeda. “Um Em im nim mahate aimale. Meit ladi iedehe vabna dam duada labe iho avaesdam laba le ahate duzu nehasu gagomeam, ‘Em Yesus bake tu vuzehi vi tau meedamda em meida am bak,’ lahame ahate labi gagomeam làhà Em Abo Asum Ahoba Iubet Bak Niba Li Dateleheda nibe Eho laha ba Alat Am im gagu vou usem dam zi labe avaesdam laba le duzu nehame gagom bak, ‘Da nim Eba tu vuzehi vi tau meedamda meida am am bak,’ lahame ba diamut ahate labi gagoda tame. 9Lahana meit ladi vei iedi dam duada labe iho avaesdam laba le duzu ahate nehameam, ‘Em ba Yesus bake tu vuzehi Aba vi tau meedamda modem kaio,’ lahame vei iedi Eba momeam làhà Eho ba Alat Am im gagu vou usem dam zi labe iho avaesdam laba le duzu laha nehasu gagom bak, ‘Da lam Eba tu vuzehi vi tau meedamda modem kaio. Em bieho,’ lahame ba diamut ahate labi gagoda tame. 10Labi Dat Asum Ahoba Iubet Bak Niba Li Dateleheda nim meit Em mu feàtàme ba ozobohudi fa Ala bake ahatet tom gagomeam làhà Alat gi ame da laba ozahigeàmu fa vei neàdem meo bak. Lahana Alam Aha Nutabe Neàna Labe Eba lab tau modi vizi teudi Eho setan gagu futodume ilidam bak laba meit neha, ‘Iblisit Eba tauha,’ lahame vàlu gagoho bak lam git gagom bak am bak. Ame da labe gi Alam Aha Nutabe Neàna laba feàtàhà bak. Meit Alam Aha Nutabe Neàna laba feàtàmeam làhà ba Alat ozahigeàmu mu fa vei neàdem vabak. 11Ba diamut uho Eba tu vuzehi vi tau meedam damat modemu uba fakemoholehe dam labe um si fa Yahudi dam labe ihimo fi hasi meedam num laba vou le ame Yahudi im ozobohudatebo zi labe uba uloodam di modeo, pemerintah eeda zi labe iho avaesdam laba vou le uba uloodam di modeo, lahadam di labe uho ame dam laba fa veibadam bak lam, ‘Iho im akatihasu vi gagoela?’ laham bak lam um ahu a bisi nasi fet vi ozodamule. 12Ame di lam ba uhumo gagodam vabak. Gi Em Ai labe Am Aha Nutabe Neàna Labe fa um ahu ad laba vahokedam bak labet modi vizehe labe uho ot vai gagodam bak,” lahame ab vahokedaham. 13Labi Yesus im lada lam vahokedume neàdi modeha dam zi labe dat meida labe Yesus bake ab vi gagoham. “Guru oa, Oho em dubu bake gagome aiat misiali vou esmoho nazoh gagome fàsi eba lole.” 14Lahame gagoha Yesusat fa gago, “Uhumo modem im akati Em giida taue? Amat Eba neha, ‘Oho dam behàsu nibe modem im ozome ozobohudi gagu fi baele,’ lahaela? Lahame Eba ba labi gagomda vabak.” 15Lahame gagu neàdi Yesusat dam laba dozeadaha dam zi laba neo vi vameada. “Uho etei bak niba esdam di um soa maehe nazoh duana vadume vahedam bak labet modi um ba ahe neàdedam vabak. Labiham bake um ahu mahate iademe it ozodume vou faovoele. A bisi, ‘Nazoh dualese,’ lahame meia mali soat ziemausi vadamule.” 16Lahame labi vameadume neàdi Yesusat ame dam duada zi laba neo im totobe nidi nim nehame ab vi fi koadamam. “Da na duada nibe am utoho abo na duana debe soale. 17Na duana debe soalehe labe am it ozo, ‘Na vahem num kekehe bak em na modeme ake vahela?’ 18Lahame it ozodume ozobohudi fa aba it gago, ‘Làhà em gi nehi modese. Em na vahem num zi faamome fa num buduana zi moadase. Labi em na àmna ziti na àm vabda ziti ame num laba vahedase. 19Labi vahedume neàdi em fa eba nehi it gagom bak, “Em abo na neàna ala oli buzidamehamdi folemna modeme num tamehodi vahedaho. Em ba na modem bak ozom vabak. Em gi ame na ahum lamota azi àda. Udda. Lahadume izidalo modem bak. Labi na eho deelemna ozome meedalo modem bak,” ’ lahame aba ab it gagoham. 20Labi it gagodume modeha Alat Am dae gagu neisoat ab vàuham. ‘Om disi elom bak vabi meedamda ahusobu dàt moz. Labi om elom di om na zi oho om soa it ozome vahehena lam oho naedat ba vame vou lam vabak. Om na zi fai oho voedume vou esmohona lam meit gelevai setem bak,’ lahame Alat ame da laba ab gagoham,” lahame Yesusat ahit im totobe lada lam ab fi koadaham. 21Labi fi koadume neàdi Yesusat neo vi gago, “Meit neha, ‘Em akati modi em nazoh dualela?’ lahame ahamo am ahulat labi it ozodume am soa maehe nazoh vahedume zi dualem bakta ozodume meeda. Lahana im Alat, ‘Nehame meedale,’ lahame gagomda lam aho ba ozodume meedam vabak. Ame da labe aho gi da amu gagohoda lamti uloho bak. Alat laha ame da laba, ‘Ahusobu dàt moz,’ lahame gagom bak,” lahame Yesusat ab vameadaham. 22Labi ame im lam dam duada zi laba vameadume neàdi Yesusat Aba Aho vahokedam im ozobohudelo vi tau meedam dam laba neo nehame vi vahokeda. “Eho amu neha, ‘Meit am nazoh duana vadume vahedaha bak labet modi am ahe neàna tadem vabak,’ lahame gagohemu uho etei bak niba esdam di uba modi ahe neàdemna, ‘Modem vabna ozomo?’ lahame a bisi vi ozodamule. ‘Im na àmna vabalemeam làhà im ba akati modi ahedi na im meedàla? Im labihameam eloe taia?’ laham bak modeo, labi, ‘Im so bozbulehe bak nim im akati modi sueli dusuela?’ laham bak modeo, um bisi a labi vi ozodamule. 23Neham bak. Im ahedi na im meedam bak lamti na àm bak lamti na behàsu lam vi ozom di bisi tombuda im ahedi na im meedam bak am bak. Labi laha im so lamti sueti na behàsu lam vi ozom di bisi tombuda im so am bak. 24Uho bumet meedam bak laba vi ozodale. Bume ba na debe soali modeme àm vab bumet modem bak. Labi laha ba na modeme vahem num mome iho àmna laba vahedam vabak. Lahana Ala naedat Aho gi ozahit ame bume keobena laba vou faovoi dihasi na lu esu. Dihasi na lu esu. Labihadam bak. Labihàmu uho ozom, damti ame bume lamti na behàsu lam vi ozom di bisi tombuda akete? Gi im dam am bak. Labiham bake Ala naedat Aho laha dam bake vou faovoi aasdam bak. 25Uho ozom, um elom vaba ahe lahasu bohu vuusdam bak laba uho bisi lab it vou faovoi ozodam bak labet modi um elom vaba fa vi ahedidume bohu vuusdam meo? Vabà! Ba gi koena vi tau bohulalem vabak. 26Uho koena vi tau bohulalem bak modem biem labe um a bisi nehame vabi vi ozodamule. ‘Im dihasi ana à?’ Labi, ‘Im so bozbulehe bak akati modi sueli dusuela?’ laham bak lam bisi a labi vi ozodamule. 27Uho ut ava aam neàna ahamo usim di meedam bak laba vi ozodale. Ame ut ava lam damat dehe vabna gi ahamo usihinat modem bak. Labi laha ame ut ava labe ba anekehàli elu faitoi fi name beateli gimsum vabak. Lahana ame ut ava damat aam di abo aam neàna modem bak. Labihamta labiha. Lahana ahamda Boehàdatebo Salomo labe aba aho vuusualaha nazoh feà lamota zi feàt. Lahana aba aho dusuhu sue neàda lamti ame ut ava lamti na behàsu lam vi ozodam di bisi aam neàda ut ava am bak. 28Ame ut ava lam gi usdalo iahamu aladume seti fa damat vamateme fa vua vahudam bak lam Alat ozobohunàme gi ozahit aasu vabiedam labe damat aam neà bak modi esuidam bak. Alat labihasu modehelahit uho ozom, um so bozbulehe bak lam laha modi fa fi olem vaba? Vabà! Abo modem bak. Neham bak. Ame ut ava lam Alat modi aam neàdehe bak lamti um so bozbulehe bak lam Alat modi fa fi oli neàdem bak lamti na behàsu lam vi ozodam di uho ozom, bisi tombuda akete? Im dam am bak. Lahana um akati Eba mahate tu vuzehem vaba vedi gi im iudu ium ozo. Im iudu ium ozo. Lahadume vi ozodam bohu meedàla? 29Neham bak. Ala bake tu vuzehe vab dam debu mei debu mei laham dam labe, ‘Im etei ana à? Vao ake le ude?’ lahame àvodi vi ozodam bak abo feàte. Lahana ame dam labe ibi iho àvodi vi ozodam bak lam uho a vi tau meedamule. Dam bakda na àm vaba valo àhàki idoali elom bak lam im Ai Ala Na Debu Modeheda lam ozobohu bak. Am ba biem vabak. Labiham bake uho a nehame àvodi vi ozodamule. ‘Im na àm bake im akati mode? Im vao udem bake im akati mode?’ laham bak bisi a àvodi vi ozodamule. 31Uho fa gi nehasu meedale. Alat Boehàdateboli uba deeli vame Am damali vuusu im vahokedam bak laba nasi ahu vitasu vàmadele. Uho ame bak laba nasi ahu vitasu vàmadi meedameam làhà Alat uho amu lab àvodi vi ozodamna lam ahebu uba ba vi loda tame,” lahame ab vahokedaham. 32Lahame labi vahokedume neàdi Yesusat neo nehame vi vahokeda. “Um Ai Alat neha, ‘Aho ba diamut uba deeli vame Am damali asum ahoba iuba Aba vi tau vahi boehà damali dam bake vuusu im vahokedase,’ lahame àhàkedam bak. Labiham bake um Eba vi tau meedam dam debu koe damat modemnàme bisi a àvodi nehi vi ozodamule. ‘Im dihasi ana à? Im so bozbulehe bak akati modi sueli dusuela?’ laham bak bisi a labi àvodi vi ozodamule. Gi Ala bake mahate tu vuzehele. 33Meit aho soa maehe nazoh vahedaha bak laba am ahu laba it ozodam meo bak. Labiham bake gi im nehasu meedamta bisi neà bak am bak. Um soa maehe nazoh fa meia doit ot loiame neàdi fa ame doi vame fa dam na vab dama iuba lo. Iuba lo. Labihadam bak meedale. Uho labi modem labe Alat asum ahoba iuba uba vahedam nazoh vadumna neàna laba soa maehe nazoh vaddume vahedam bak. Ame nazoh lam ubu uho bak niba vaheheda lamti uloho vabak. Nazoh asum ahobada lam ba vàhàdeme setem vabak. Mei na aa vamda ba iuba le na lam aa vame voutame seti koedem vabak. Labi ba naat aum vabak. Abo gi neàna modesdam bak,” lahame ab vahokedaham. 35Lahame labi vahokedume neàdi Yesusat neo, “Am fa lem bake ahumdi neàdi vou faodale,” laham bak vahokelo im totobe nidi nim faasi ab fi koadamam. “Uho gi mei na meedam dam nibe iho nehasu meedam bakti ulohona laha meedale. Mei na meedam dam labe iba na gagu meedamda labe aho dat amomoi nam vam bake vazisi na àm bake tau àdalo modem bake am na meedam dam laba gagu esmozi ab laham. Labi gagu esmohemu ame na meedam dam labe omozit amu gi modi ahumdi sue dusu minyak vua fauhali gi labihasu modesu dat naeda fa lem bake vou faoda. Dat naeda ba fa li gagohemu num doo taho fi stom bake ame dam labe gi labihasu ahumdi vou faodam bak. 37Labi dat naeda aibut leo? Usi neisoat leo? Labi li aameam am na meedam dam amu gi modi ahumdi neàdi aba vou faodam bak lam li aameam ab deelemam bak. Lahana gi im lada lamota modem vaba fa im nidi nim laha modem bak. Am na meedam dam labe vou faodamna li aahemu aho ame dam laba abo im neà bak modi esuiam bak. Dat naeda labe ahamo ame dam laba nehame gagom bak. ‘Um betea nusu faode. Eho na ohume fa uba lu àm bak,’ lahame deeli aho am dam laba labi gagu meedam bak. 39Em im totobe nidi nim uho laha aime vi ozome ozobohudele. Neha: Dat num deda labe am num laba meit am na aa li vam bak ozobohudemeam làhà ba ame aibu lam ba bisu im vabak. Abo vou faovoi aasdam labe ba meit am numa oli am nazoh aa li vam vabak. 40Labihàmu um laha gi ame baket meedale. Em Abo Asum Ahoba Iubet Bak Niba Li Dateleheda nibe Eho ba lem digat um vabilem bake um gi vou faovoi ahumdi ibzidale.” 41Lahame labi gagu modeha Petrusat Yesus bake vi ailo ab gagoham. “Boehàda oa, Oho etei lab totobet fi koadaha im lam iho Oba vi tau meedam dam nimota im vahokelo totobet fi koadào? Gi im ahebu im vahokelo totobet fi koadào?” 42Lahame labi gagoha Yesusat ozo, “Dam Aba tu vuzehi im Abada meedam lahasuhuna ahum Aho gi li aase,” laham bak vahokelo im totobe nidi nim fa ab faasi fi koadamam. “Mei na meedamda nibe aho aba na gagu meedamda labe na gagom di aho gi ule neàt meedam tadem dàt moz. Aba na gagome meedam di ba gi modem vaba abo iademe ozobohu aabodi meedam bak. Labihadam dàt modem labe aba na gagu meedamda labe aho bak mei bake lalo meedàmu aho ame da laba fa neo ab gagoham. ‘Em na meedam dam totbaho zi nim oho fa ot vai vou aasdume na meedam bake ohomo vi ozobohudi vameadale. Labi ame dam labe na àdalo modem di oho na àmna faheme dihasi iuba loda. Dihasi iuba loda. Lahadale,’ lahame am na meedamda ahida laba ab gagu esmozi ab laham. 43Labi le azibe fa li aaha aho am na meedamda ahida laba, ‘Nehame modele,’ lahame amu fet gagu esuhuna lam aho uledi meedamna li aahemu aho deeli am na meedamda laba gi im neà bak meedam tadem bak. 44Lahana ba gi im lamota meedam vabak. Ame na gagu meedamda labe am na meedamda laba neha, ‘Em soa maehe nazoh ziti doi ziti oho fa ot vai iademe vou aasdale,’ lahame ab gagomam bak. 45Lahana ame mei na meedamda labe ahida modehe vaba soida modemeam làhà aba na gagu meedamda labe le setem di am ahulat gi nehi it ozo taia? ‘Aa! Ne, eba na gagu meedamda lam taho fa lem vaba? Akati kehàdà?’ lahame alamdi vedi aho vuusu na meedam damti na meedam lahiti ame dam laba faki beodume geàda. Labi ozom vabamu fa gi na duana àda. Anggur vaksa vao meona lam uddume bak vabili ohu bobida. Labihada. 46Labihadam di labe ame ot vai meedamda labe vedi aba na gagu meedamda lam ba fa lem digat labe am jamti vabili esdameam làhà aho ozom vab digat labe dat naeda fa li ame da labe aho lab meedam bak lam aameam fa nehi gagom bak. ‘Om gi dat mei,’ lahame gagu feàna beome mu fa bàhàgo iuba abo Alat gagohona tu vuzehi meedam vab dam labe ibi iho esdam bak laba voom bak. 47Neham bak. Meia na gagu meedamda labe am na meedamda laba neha, ‘Oho na nim modele,’ lahame gagohona ame na meedamda labe ahamte gagoho dita aime ozobohude. Lahana ailahigeàmu ame na modi ahumdi neàdi vou faodam vabak. Labi modemeam làhà dat naeda fa li ame da lam abo duana foadam bak. 48Lahana dat naedat am na meedamda laba, ‘Nehame modele,’ laham bak gagom vabameam ame na meedamda labe, ‘Ana modemna gagohela?’ laham bak biehe labe ba ahamo git modemeam dat naeda faki foadamta foada. Lahana mahate foadam vabak. Gi fota foadam bak,” lahame gagu neàdi Yesusat neo ab vi gagoham. “Labiham bake Alat meia neha, ‘Oho gi na nidi nimota meedale,’ lahame amu gagu esuhuna Aho ba vi ailo gagu modem di ame da laba gi koena gagu esuhu labe gi koena vi gagu vi aim bak. Lahana Alat meia neha, ‘Oho na nidi nim meeda. Na nidi nim laha meeda. Lahadale,’ lahame amu gagu esuhuna ba Aho ame da laba vi ailo gagu modem di ame da laba bisi duana gagu esuhu labe abo duana vi gagu vi aidam bak,” lahame ab vahokedaham. 49Lahame labi vahokedume neàdi Yesusat neo im amomoi neo vi vameada. “Dam bakda nibe faina meedàmu Alat dam bake modi geàdalo modemu Alat ahit Em gagu dam bake ab nom oluham bak. Alat Aho ame bak lam modelo modem bak akati taho modem vaba? 50Lahana Em nasi geàdamehamdem bakti nehi Alat Aba Aho modelo modem bak lam taho modem vabamu vou faodam bak. Lahana Em geàdam bak lam akati taho modi fi gatem vaba mode? Em bak lam bisi vi ozodam bohu meedam bak. 51Uho nehame ozohe? ‘Em bak niba lehemu dam mei debuti dam mei debuti fa ab vahe vahedam ame?’ lahame uho labihasu ozohe? Làhà um git ozoho bak. Ba labiham vabak. Eho bak niba lehemu dam totbaho labe Eba tu vuzehem mouda. Labi dam totbaho labe Eba tu vuzehem bak ulededa. Labihadume fahedaha labe dam mei debuti dam mei debuti fa ot faki ot fakiame ab ot belui ot beluidamam bak. 52Etei di nibe faasi num vàmtea laba azihi dam auoholehena lam ihimo faheme totbaho Eba tu vuzehe. Dam totbaho Eba tu vuzehem mouda. Lahada tame. Dam Eba tu vuzehe dam làtela labe fa Eba tu vuzehe vab dam behàsu laba faki ot odosia. Laham vaba dam Eba tu vuzehe dam behàsu labe fa Eba tu vuzehe vab dam làtela laba faki ot odosia. Labihada tame. 53Abo faheme ame ai labe fa am adatti ot fakiame ot odosia. Labi ame oi labe fa am adnamati ot fakiame ot odosia. Labi ame taai labe fa am taiti ot fakiame ot odosia. Etei di nibe faasi labihadamna bohu tade tame,” lahame ab vahokedaham. 54Lahame ame im lam Aba vi tau meedam dam laba vahokedume neàdi Yesusat fa neo dam duada zi laba im meida neo ab vi vahokedamam. “Uho ulo giho asum ala bozilem zoho laba aameam nehi aame gagom meo dam taia? ‘Asum di ilehe bak. Etei abaalem bak,’ lahame aame gagomeam gi ame baket modem bak. 55Labi laha uho aameam nutabe fa ba tot iube lem bak aam di uho neha, ‘Im etei di neà faasi galiha tame,’ lahame labi aame gagom di gi ame baket modem bak. 56Um gi asumti bakti modem bakta fet aame ozobohudi gagodam damat modem bak. Ne, um im labihamna meedam damat akati Eho etei li vahokedam im nimti labi Eho im feàna meedam bak lamti uho fet aadamna akati nehame vi ozodam vaba mode? ‘Elàhà! Alat iba vuusu im Am damali iba vahokedam bak ab faasi meedam ame?’ laham bak lam akati um ozobohudem vaba vabili ahusobuli modela?” 57Lahame labi vahokedume neàdi Yesusat neo ab vi vahokedamam. “Em Ai Alat neha, ‘Im vamdesu meedam bak neam tame,’ lahaha bak lam akati uhumo vi ozome ozobohudi neàdi Ebe Eho vahokedam im laba tu vuzehi Alati vahem vaba modela? Etei di nim ame bak lam meedam neàdi am bak. 58Uho taho ame bak lam meedam vabameam Alat um beom bak. Abo Eho etei vouholo modem im nimti uloho bak. Umti vahi azim dat meida labe fa oba faki neha, ‘Om eba git modehemu em om si meia uloome vi aime neàdi gagu modidam dat boehàda labe aho meia uloome vi aim num laba vou lalo modem bak,’ lahame oba vàlu gagomeam làhà oho gi ozahigeàmu etei vou ladam di labe gi zie doni laba taho fa nasi im ot vameaidume fa neàdele. Oho labiham vabameam oba faki vàlu gagomda labe om vou kea lame dat boehàda laba ub lom bak. Labi ame boehàda labet fa neo am meo dam gagome om neo si mei si ousu teudi simtedem num abo sel laba voom bak. 59Labiham bake om nasi aima. Om sel laba voomeam làhà ba taho futom vabak. Abo ousdamehamdi boehàdat aba aho gagu esuhu doi oho gohali lodume uloholehezobe ba futom bak. Labiham bake gi zie doni laba nasi ot vameaidume neàdele. Lam bisi fa ot vahiam bak am bak,” lahame ab vahokedaham.

will be added

X\