Yohanes 6

1Labi ba Yesus Aba vi tau meedam damti iho kota Yerusalem vou esmozi fa Galilea bak laba li digat meida labe iheba ziddume Itea Galilea dumam tot iuba ab bioham. Ame itea lam ee behàsute. Ee meida Tiberias am. 2Di lam dam dua bak Aba vi tau goda. Yesusat dam gaileheda zi modi fa neàdedaha bak abo na damat ihimo modem biem im feàna damat fet aame ozobohudemna zi Aho amu meedaha bak aahemu vi tau goda. 3Labihadume modeha Yesus Aba vi tau meedam dam lamti iho bak otesuhu bak labet fa tom ladume ab zizi nusualadaham. 4Ame di lam Yahudi dam labet ibi iho modi baleàhà bak na àme iziam bak abo Paskah lam neo fuseo vabaehe di am. 5Labi nusualadume neàdi Yesusat lab aidam labet nom aaha dam dua bak zi fai, “Aba netàdese,” lahame tom ledam bak ab nom aaham. Làhàmu Filipus bake gago, “Dam zi fai nim iho ake le roti doit vame lodume àdàla?” 6Lahame Yesusat etei lab gagoho bak lam Aho ba modelo modem im Ahamo naedat ozobohuna ahit biehenali Filipusam ahu modi ozolo ahit fi bovai ab gagoham. 7Lahahat Filipusat fa ab vi gagoham. “Aa! Dam zi feà nimohona iho na ake vame lu àdàla? Dam bisi feà labe ba meit na modeme ala delapan foli vam doi lamohoda vou le na àmna vameam ba uloholem vabak. Iho na àmna le ve fa dam bake vou li gi koena zagum bak laba ozome lodume uloholesome meedameam dam bisi feà labe na koedi dam zoho fotem bak.” 8Lahame labi gagoha Aba vi tau meedamda meida abo Simon Petrusam dubu Andreas labe aho neo vi gago, “Guru oa, daboseà nib doudamda nim am rotibu gi auoholehenati bohe behàsu buàti ehete. Lahana oho akatiham bake ozome labi gagohela? Dam duana na nim àm koena ba akati modi faheme lodume uloholela?” 10Lahahat Yesusat fa gago, “Uho dam gagome sibe baa niba nusualadale.” Làhàmu gagu ab nusualadamam. Ame bak lam sibe baa duamu laba gagu ab nusualadaham. Ame dam zi lam dam aabota dem di abo lima ribu fuhu bak. 11Labi nusualadume neàdi Yesusat ame rotibu auohole lam ve Ala bake, “Neàte,” lahame tom gagu neàdi ame rotibu auohole lam fahedume fa Aba vi tau meedam dam laba lodume iho fa ot vai vame dam duada zi laba ab lodaham. Labi neo bohe lam gi ame baket meeda. Abo dam labe àme dedem bake uloholi ab lodaham. Labihadume dam lam ame na lam àdume modeha dedebuli na àmna zoho gi vaheme esu. 12Làhàmu Yesusat Aba vi tau meedam dam laba ab gagoham. “Uho nasi na damat àme dedehemu esuhuna zoho lam ahebu vamatele. Na meida vàmtea a voomule.” 13Làhàmu rotibu auohole modi dualehena lam damat àme neàdi vahehena zoho lam vi ateti atetidume boloseh vahedume modeha boloseh dua belas ab bektoham. 14Na damat ihimo modem biem im feàna damat fet aame ozobohudemna Yesusat etei lab modehena lam damat vi aahemu im nehasu ab faasi vameadamam. “Làhà, Ame Da Yesus nim abo Alat Vameadaha Im Aime Fa Dam Bake Ahate Vameaidahada abo Alat amu neha, ‘Aho bak niba olu tame,’ lahame fet gagu esuhuda lam iho vou faodam Dat am taia?” lahame ab faasi vameadamam. 15Làhàmu damat neha, “Imo Yesus tet si modi iba vuusdam boehàdatelese,” lahame fet ozome esuhu bak lam Yesus ahamo nasi ozobohudi ozo, “Em Aiat Aba Aho ozome esuhu bak fuhu vabak,” laham bak ozobohudi bak lam vou esmozi Ahamo fa neo ab tom ladamam. 16Labi disi aibulehemu Yesusat Aba vi tau meedam dam labe ihimo ab lazeham. 17Labi lazi iheba ziddume itea tot iuba num debu Kapernaum laba aibut ab biodamam. Aibulehenàme Yesus ba iba tau biodam kai. 18Labi biodume itea tombu fusi modeha nutabe fai iubet li vao baho foadam labe im ihe ab oke okedamam. 19Gi oke okedamna geàmu vou vaelame enam kilometer lamoho ozomomna fusi it aaha Yesusat gi vao tom ahoba laba duzui duzuidume iba ledam bak ab aaham. Lahamnàme, “Yesusat mode?” laham bak im ozobohu vab labe ab iedi modem faideham. 20Làhàmu Yesusat vi vuli netàdi ab gagoham. “A iedemule. Eho ledalo.” 21Lahaha bak aihemu iho gi deelehat gut gagu Yesusat fa ab ziham. Labi zihat gi kehàm vabna ibi iho ladam auobe ab zituham. 22Labi izi dihasi Yesus Aho ahamte li meedaha tot iuba vou esmoho dam labe Yesus setehe bake nabida. “Uho ozom, Yesus ake lahela? Ne, im ba bak niba ihe behàsu aaha vabak. Gi ihe vàmteana Aba vi tau meedam dam labe ihimo ziddume ab bioham bak,” lahame ot vameaida. 23Labi vameadameam aaha num debu Tiberias laba azihi dam ihe ibida ziddume li zituadaha bak ab aaham. Abo màt im Boehàda Yesus Aho rotibu ve Ala bake vou baedume modi dualehe roti àdaha bak netàdi zituadaha bak ab aaham. 24Labi zituadume nabidume aaha Yesus Aba vi tau meedam damti im alihi aam vabamu fa im iheba ziddume Kapernaum dumam tot iuba Yesus bake vi nabidalo ab biodaham. 25Labi biodume dumam tot iuba ab zituadaham. Zitu nabidume Yesus bake ab tàham. Tàhi gago, “Ai Guru oa, Om adi diat niba fuhela? Akati modi biohela?” 26Lahana Yesusat fa gago, “Lo, uho lab gagoho bak lam Em aiha. Lahana Eho etei uba gagolo modem im imboda nidi nim laha nasi iademe aima. Ubu uho ozome Eba nabidam bak lam Em ozobohu bak. Na damat ihimo modem biem im feàna lam abo damat fet aame ozobohudemna Eho lab meedahana labe am im tombu um ozobohudi Eba nabidam vab damat modem bak. Um gi ame roti lam àdume dedehe labet, ‘Fà neo àse,’ lahame Eba vi nabidam damat mode taia? 27Na iho àlo àhàki dihasi meeda. Dihasi meeda. Laham im lam bisi a tombuli meedamule. Lada lam gi kehàm vaba koeili sete. Labi gi àme foli sete. Labihadamna bohu meedam bak. Fa gi nehale. ‘Im akatihasu meedam labe iho Alati vahi ahe neàna bohu vuusdàla?’ laham bake gi na àmna koeilem gikina abo uho tu vuzehem bak laba modi teudemna laba vi ozome keàtedi ame im lam dihasi mode. Dihasi mode. Labihadale. Ame bak uba modelo modemda lam gi Asum Ahoba Iubet Bak Niba Li Dateleheda nibe Eho uba ame bak lam modem bak. ‘Ame baket modele,’ lahame Em Ai Alat Eba deeli gagohemu Eho ot vai im dedateli ab meedamam bak.” 28Lahame labi gagohemu ame dam zi labe fa vi ailo ab gagoham. “Iho ana im meedam labet Alat fa Aba Aho ozoho bak ulohodesu meedàla?” 29Lahahat Yesusat fa gago, “ ‘Im nehasu meedale,’ lahame Alat uba gagohona gi neham bak. Alat Aba Aho Gagu Fihasi Vimteme Uba Oluhu Dat Boehàda Em ame Da niba uho tu vuzehele.” 30Lahahat ame dam labe neo vi gago, “Làhà, Oho na damat ihimo modem biem im feàna abo damat fet aame ozobohudemna modem labe iho aame ozo, ‘Imbote. Alat Gagu Fihasi Vimteme Oluhu Dat Boehàda Om am bak,’ lahame iho aame Oba tu vuzehem bak. Làhà Oho ame im feàna adida modi iho aaela? 31Ne, im tai ahobada zi labe iho aham di iube bak aotba baa bohu dam vaba alim bak Alat ahit zie vou kibo kibodam di labe na àmna ee gagom manna lahamna vou à ladaha bak. Ame im lam meit Alat Vameadaha Im Toedahana laba nehame toehe bak ehe bak. ‘Asum ahoba iube bak niba goagoadamna lam Musat dam laba lu àdaha bak.’ Lahame toehe im ehe bak. Làhà Oho laha ame da Musati ulohona laha modeme iho aame ozobohudi Oba tuse.” 32Lahahat Yesusat fa gago, “Lahana bisi imbo bak gi nehaha bak. Ame na um tai ahobada zi labe iho àhana lam ba Musat lodaha vabak. Gi Em Ai Alat ame dam laba lodaha bak. Labi etei nim neo Em Aiat roti abo imbona asum ahoba iube bak niba oluhuna uba lolo modem bak ab faasi meedamam bak. 33Ame roti imbona lam abo Alat uba lolo modemna lam gi neha: Gi Dat asum ahoba iube fa bak niba li dam bakdate modi fa ahe neàna bohu vuusdamda Am am bak.” 34Lahahat ame dam zi labe fa neo gago, “Làhà! Dat Busao, Oho etei di nibe faasi ame roti lam iba dihasi lo dihasi lo labihadale.” 35Lahahat Yesusat neo ab vi gagoham. “Na Àmna Meia Modi Alati Vahi Gi Ahe Neàna Bohu Vuusdam Roti lam Em ame Da am bak. Meit Eba tu vuzehemeam làhà ba idoali valo àhàkedam vabak. Eho ame da laba modi asimdi bohu vuusdam bak. 36Lahana Eho amu uba gagoho bak lam abo uho Eho meedaha im feàna lamti Emti aadahanàme, ‘Alat Gagu Fihasi Vimteme Oluhu Dat Boehàda Em am tame,’ laham bak Eba ba tu vuzehem vabak lam uho meedam lahasuhu damat modem bak. 37Em Aiat neha, ‘Dam nim Om dam am tame,’ lahame fet gagu esuhu dam lam Eba ba tu vuzehi im Ebeda meeda tame. Labi Eba ba tu vuzehem dam lam ba meida vàmtea Em mu voom vabak. Abo vam bak. 38Neham labe labihaha bak. Em asum ahoba iube bak niba lehe bak nim Em ba Ebe Eho ozoho baket modelo lehe vabak. Gi Eba gagu oluhuda Em Aiat Aba Aho ozoho baket meedalo lehe bak. 39Eba gagu oluhuda Em Aiat Aba Aho ozoho bak gi neham bak. ‘Damat Eba ozom di, “Em abo Alam Adat am tame,” lahame ozobohudi Eba tu vuzehem dam laba Eho modi fa Em Aiti vahi gi ahe neàna bohu vuusdam bak ame. Labi Aiat neha, “Dam nim Om dam am tame,” lahame fet gagu esuhu dam lam Eho meida vàmtea voom vaba gi ahe neàt vuusu vou aasdam bak ame. Gi labihasu vou aasdume Dam Bake Uloodume Vi Aime Ozobohudi Neàdi Fime Fahedam Digat vou fusi ame dam lam elodahanàme Eho modi fat ahedi usnadam bak ame. Labihadase,’ laham bak lam Em Aiat Aba Aho ozoho bak am bak.” 41Lahame labihasu vameadume modeha ame Yahudi dam fa Yesus bake ab voe voedamam. Yesusat amu neha, “Ame roti asum ahoba iube fa bak niba oluhuna lam Em ame Da am tame,” lahame lab gagoho bak lam aihemu faki fa Yesus bake ab voe voedamam. 42Voe voedam labe ot vameaida. “Aa! Da nim gi Yusufam adat Yesusat mode taia? Ne, Am oiti Am aiti im ozobohu bak. Baka akati Aho neha, ‘Em asum ahoba iube fa bak niba lehe bak,’ lahame labi gagodàla?” 43Lahahat Yesusat fa ab gagoham. “Uho lab faki Eba voe voedam labe ot vameaidam bak lam nasi vaitole. 44Meit Eba tu vuzehelo modemeam làhà ahamo ozome Eba tu vuzehem vabak. Amu Eba gagu oluhuda Em Aiat nasi meit Eba tu vuzehem bak lam ame da laba modi vizem labe ba Eba tu vuzehem bak. Labihamda lam Eho ba diamut Dam Bake Uloodume Aime Ozobohudi Neàdi Fime Fahedam Digat fum di lam am eloho bak labe Eho modi fat ahedi usa tame. 45Dam ahamda Alat vameadaha im aime fa dam bake ahate vameaidaha dam labe damat Eba ba tu vuzehem bak laba ozome ibi iho aham di iube nehi fet toehena nidi nim ehe bak. ‘Alat fa dam ahebu im vahokeda tame.’ Alat Vameadaha Im Toedahana labihameam làhà Em Ai Alat Aho vahokedam dam lam im Abada aime ozobohudi tu vuzehi meedameam làhà Eba laha tu vuzehi im Ebeda meedam bak. 46Lahana Eho etei lab gagoho bak lam uho a nehi git ozodamule. ‘Meit Em Aiam alihi aaho,’ laham bak a ozomule. Ba meit Am alihi aahada vabak. Gi Aba Aho gagu oluhuda Emota Am alihi aame ozobohudehe bak. 47Im lada lam imbomu im imboda nidi nim laha nasi iademe aima. Meit Eba tu vuzehemda lam Alati vahi gi ahe neàna bohu vuusdamda am bak. 48Em abo Roti Meia Modi Alati Vahi Gi Ahe Neàna Bohu Vuusdam Roti Em am bak. 49Um nasi ozomale. Aham di iube um tai ahobada zi labe iho bak aotba baa bohu dam vaba alim bak laba Alat ahit zie vou kibo kibodam di labe iho vou à laha manna zi lam ba iba modi Alati vahi ahe neàna bohu vuusdaha vabak. Ame na àdamnàme gi bak laba elodume seddaha bak. 50Lahana asum ahoba iube bak niba nom oluhu roti nim abo Em nib doudamda nim ba labiham vabak. Meit ame roti nim àmeam làhà gi Alati vahi ahe neàna bohu vuusdam bak. 51Imbote. Asum ahoba iube bak niba nom oluhu roti abo meia modi Alati vahi gi ahe neàna bohu vuusdam roti lam Em am bak. Meit ame roti nim àmeam làhà Alati vahi gi ahe neàna bohu vuusdam bak. Ame roti lam gi Em nu am. Dam bakda ahebu iho Alati vahi gi ahe neàna bohu vuusdam bake Eho ahit Em nu nim uledi dam bakdate lolo modem bak.” 52Yesusat etei lab gagoho bak lam gi amti vou alem bake vi ozome am nu niba gi it vàlu gagoho im laba Yahudi damat vabi otesidam labe gago, “Oo, da lam akati Am nu iba lu iho àela? Ba labiham biem bak.” 53Làhàmu Yesusat ozo, “Damat Eba tu vuzehi ibi iho faina meedaha bak lam Aho ba Am vasea veàtoi fa faamom bak uledese,” lahame neo im nehasu vi vameada. “Eho etei uba gagolo modem im imboda nidi nim iademe aime ozomale. Asum Ahoba Iubet Bak Niba Li Dateleheda nibe Em so ad nu nim meit àm vaba mu meeda. Labi Em vasea nim laha udem vaba mu meeda. Labihameam làhà ame da lam ba Alati vahi ahe neàna bohu vuusdam vabak. Gi vaitesu meedam dàt modem bak. 54Lahana Em abo Alat Gagu Fihasi Vimteme Oluhu Dat Boehàda modem labe meit Em so ad nu nim à. Labi Em vasea nim laha ude. Labihasu meedameam làhà ame da lam Alati vahi gi ahe neàna bohu vuusdam bak. Labi Dam Bake Uloodume Aime Ozobohudi Neàdi Fime Fahedam Digat lam vou fusi Eho fa li ame dam lam elodahanàme Eho modi fat ahedi usnada tame. 55Neham bak. Em so ad nu nim àmna imbona am. Labi Em vasea nim udemna imbona am. Labihaha bak. 56Meit Em so ad nu nim à. Labi Em vasea laha ude. Labihasu meedameam làhà ame da lamti Emti ot vou aliame ahu vàmadi meedam bak. 57Im bakda ahebu ahe di godam bak lam Em Aiat debu modehe bak. Em Aiat labiham Alat modem labe Aho neo Eba gagu Eho bak niba li Dateli ahe di godam bak. Labiha labe meit Em so ad nu nim àmeam làhà Eho ame da laba modi Alati vahi gi ahe neàna bohu vuusdam bak. 58Eho amu uba lab gagoho bak lam neo vi gagolo. Roti asum ahoba iube bak niba nom oluhu roti lam Em am bak. Lahana im tai ahobada zi labe iho àhà manna lamti uloho vabak. Ame dam labe iho ame manna àdamnàme gi elodume seddaha damat modem bak. Lahana meit Eho etei lab gagoho roti lam àmeam gi Alati vahi ahe neàna bohu vuusdam bak.” 59Lahame lab vameadaha im bohu lam Yesusat Aho num debu Kapernaum laba abo Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli ab vahokedaham. 60Yesusat im labihasu vameadume modeha Aba Aho vahokedam im ozobohudelo vi tau meedam dam dua totbaho labe iho aime ozome voe voedam labe ot gago ot gagoida. “Aa! Ame Da labe etei iba nib vahokedaha im nim iho vi ozom biem im iba vahokedaha bak. Ba amat uledi vuzehi meedà?” 61Lahana ame dam labe Aho lab gagoho bak laba faki voe voedaha bak lam Yesusat Ahamo ozobohudi ame dam laba ab gagoham. “Eho lab vahokedaha im vàmtea buà lam uho aime faki Em vou esmolo modeo? 62Làhà Eho Asum Ahoba Iubet Bak Niba Li Dateleheda fa Ebe amu azihi bake ba tom ilum bak uho aameam um di lam akatihà? Làhà uho di lam bisi faki feà bak fum di ame? 63Alam Aha Nutabe Neàna labe Aho meia modi vizi Alati vahi fa ahe neàna bohu vuusdamda Am am bak. Dam bakda iho keàtedi meedam im lam ba na vamna vabak. Ebe Eho uba vameadaha im lam gi Alam Aha Nutabe Neàna labe Aho Eba modi vizi teudehe labe Eho uba vameadaha im lam fa uba modi Alati vahi gi ahe neàna bohu vuusdam imot modem bak. 64Laham imot modemnàme um dam totbaho labe Eba tu vuzehem mom lahasuhu dam ehe bak.” (Yesusat etei lab gagoho bak lam gi neham bak nasi fet ozobohudehe labe labi gagoho bak. Dam adida Aba tu vuzehem moe? Labi dat adida Am vou fohome meia ub lu ote? Laham bak lam gi amu di iube dam bake ahamte lab faasi vahokedam di iube nasi fet ozobohudehe bak.) 65Lahame labi gagu neàdi Yesusat neo vi gago, “ ‘Ana modi dam Eba tu vuzehem mohela?’ laham bak lam Eho amu uba gagohona fa neo vi gagolo. Meit Eba tu vuzehelo modemeam làhà ba ame da lam Alat neha, ‘Modem neàte,’ lahame nasi ame da laba modi teudehe vaba alia modem vabak.” 66Lahame Yesusat ame bak lam etei lab gagoho di labe faasi Aba Aho vahokedam im ozobohudelo vi tau meedam dam dua totbaho labe fa Yesus mu vou esmozi fa ibi amu modem bake fa meeda. 67Làhàmu Yesusat Aba bisi vi tau meedam dam dua belas laba ab gagoham. “Um akatihà? Um laha Em mu vou esmozi lào?” 68Lahahat Simon Petrusat fa gago, “Ai Boehàda oa, iho fa Om mu vou esmozi im ama bake là? ‘Meia modi Alati vahi fa ahe neàna vuusdam bak lam akatihasu modemna modela?’ laham im lam bisi ozobohudi meia fi gatemda Om vàmtea am bak. 69Om abo Alat Ahamo gagu fi hasi asum ahoba iube bak niba nom oluhu Dat bisi Neàboda Vàmtea Om am bak. Laham bak lam im ozobohudi tu vuzehi ab neàbodedaham bak.” 70Lahahat Yesusat fa gago, “Em um fi me vaha di dam dua belas vaha taia? Lahana um meidavat setan zi vuusdam boehàda Iblis labe aho veimai fa im abada modelo modem bak,” lahame ab vi gagoham. 71(Etei Yesusat lab vàlu gagoho bak lam gi Simon Iskariotam adat Yudas labe aho ba modem im nasi fet ozobohudi vàlu vameadaha bak. Ame da Yudas gi dua belas meida modemnàme ba Yesus vou fohome meia ub lu otelo modemda am bak.)

will be added

X\