Yohanes 4

1Ame di lam Farisi damat aiha dam dua bak, “Iba meit vuu valo baptislese,” lahame Yesus bake dihasi valada. Dihasi neo valada. Lahada. Labihadume Yesus bake tu vuzehi meit vuu valo baptisli neàdi ame dam Yesus bake vi tau meedam dam totbaho laba vi taui vi tauidume duaeda. Abo Yohanes Mei Vuu Valo Baptisleiamda labe aba aho vuu valo baptisli fa aba vi tau meedam dam lam fa vafozi Yesusbada duaeda. Laham bak lam meit li gagoho bak ame Farisi damat ab aiham. ( 2Lahana Boehàda Yesus mei vuu valo baptislem vab dàt modem bak. Gi Aba vi tau meedam dam labe ihimo mei vuu valo baptisleidam bak.) 3Lahana ba digat meida iube meit neo Yesus bake le ab gagu fi deham. “Damat Oba vi tau meedam damalehemu meit im vuu valo baptislehe dam duale. Labi Yohanes abada fa koede. Lahaha bak lam meit gagohona Farisi damat aiho,” lahame meit Aba li gagu fi dehena Yesusat aime ozobohudi Aba vi tau meedam dam lamti iho Yudea bak vou esmozi fa Galilea bak laba ab ladamam. 4Yudea bak vou esmozi ladam di labe Samaria bak labet ab ladamam. Di lam Yahudi damti Samaria damti ba ot vahiame meedam vab damat modem bak. Lahana Yesus ozahit, “Taho lase,” lahame iho Aba vi tau meedam dam nimti vahi gi zie buuda Samaria bak labet ab ladamam. 5Labi ame Samaria bak labet ladume ala tomali abo jam dua belas fuseo vabaehe diat num debu Sikar labe am bàhàgo laba ab lafuham. Ame Sikar lam gi dat ahamda Yakub labe aho aham di iube am adat Yusuf bake loho bak zoho laba netàdi modesuhu num debut moz. Labi laha ame num debu bak labe am bàhàgo laba Yakubat aham di iube sihi vao nobu laha ehet. Labi Yesus ladaha vanamahemu ame vao nobu obe laba ab le nusuham. Labi ame di labe Aba vi tau meedam dam nibe iho na àm bak ozome na àmna doit valo Sikar laba ab ladaham. Labi omozit Yesus lab aidam di labe Samariada lahi vao noalo ab leham. Li modeha Yesusat ab gut gagoham. “Oi, oho Eba vao noai lom vabao?” 9Lahahat nam labe ozo, “Ne, Yahudi dam ba im Samaria dam labe vao udemna zoho ibida ba vao udem vabak. Mom bak,” lahame àvodi fa ab gagoham. “O Dat busao, Om Yahudi dam modemna akati eba Samariada lahi niba vao tauledàla?” 10Lahahat Yesusat fa gago, “Ne, Alat oba lolo modemna lam om ozobohude. Labi Eho etei oba vao tauleheda nim, ‘Em amat modela?’ laham bak lam om laha neo vi ozobohude. Labihameam oho Eba neo vao tauledàmu Eho uledi oba ahedem vao lu udem bak.” 11Lahahat ame nam labe fa gago, “Dat busao, ne Om vao noamna vabna vao nobu feà adba iuba modesdamna akati noaela? Oho ahedem vao lam adi bake vàla? 12Làhà im tai ahobada Yakub labe iba modi vou esmoho vao misia nim fai? Labi Om bisi feàda ame? Ne, ame vao nim Yakub am naeda laha tau vao noai udehe bak. Labi am adamti aba aho ba vou faat lehe mekehà dam zi lamti labi na fi ho zi lamti labihasu uddaha vao nim fai? Labi Obo Oho lolo modemda lam fa bisi neà? Lahame ozome labi gagohe?” 13Lahahat Yesusat neo fa vi vameada, “Meit vao nidi nim udemeam ame da lam fa neo vao àhàkedam bak. 14Lahana meit vao Eho lolo modemda nim udemeam ame da labe ba valo àhàkedam vabak. Neham labe labihaha bak. Vao Eho lolo modemda nim meit udemeam làhà aho udehe bak labet modi am ahu ad laba vao aanati ulohona labaha bohu futodam bakti ulohona modi am gi ahe neàna bohu vuusdam bak.” 15Lahahat nam labe vabi abo gi vao abo gagoho tiba fa neo ab gagoham. “Dat busao, làhà Oho eba ame vao lam lu udele. Labiham labe em ba valo àhàkem vab labe em ba niba li vao noaiam vabak am tame.” 16Lahahat Yesusat fa neo gago, “Làhà, om nasi fa le om dat gagome fa niba vou lele.” 17Lahahat nam labe fa gago, “Mm, em dat vabak.” Lahame labi gagohemu Yesusat fa ab gagoham. “Lo, oho etei, ‘Em dat kaio,’ lahaha bak lam imbo taia? Lahana oho amu dat vaha bak auoholehe bak. Labi oho etei bako vou godam dat lam oho iademe vaha vab namet modem bak.” 19Lahame labi gagoha nam nibe vatohedam labe fa neo ab gagoham. “Làhà Dat busao, em etei ab ozoham bak. Om Alat Am im fi desi fa meia ahate vameaidaha dàt mode moio? 20Làhà Oho ozom, meit Ala bake, ‘Am abo feàte,’ lahame ahu adat iedi vou baedam di adi bake vou baedam labe neàde? Ne, im Samaria dam nibe gi sibu nidi niba Ala bake vou baedam bak. Abo im tai ahobada zi labe ibi iho aham di iube iho Ala bake vou baedam di gi sibu nidi nimota laisi ame baket meedam bak. Lahana um Yahudi damat neha, ‘Im Samaria dam git meedala. Gi Fihasi Ala Bake Vou Baedam Num Vàmteabu kota Yerusalem laba duzuhuna lamota Ala bake vou baedam bak am tame,’ lahame labi gagodam bak. Làhàmu Oho ozom, um Yahudi damat imbodeheo? Iho Samaria damat ibi iho meedam bak labet imbodeheo? Adida imbodehela?” 21Lahame labi gagohemu Yesusat neo ab vi vameadamam. “Oi, Eho etei oba gagolo modem im nidi nim mahate aime tu vuzehele. Faobe ba damat im Ai Ala bake vou baedalo modem di ba gi sibu niba modeo, gi kota Yerusalem laba modeo, ba gi bak lamota vou baedam vabak. 22Um Samaria dam labe uho Ala bake vou baedam di, ‘Akatihasu meedam Alat modela?’ laham bak lam um mahate ozobohudi neàdem vab damat Ala bake vou baedam bak. Lahana im Yahudi dam nibe iho Ala bake vou baedam di im abo ozobohu aabodi Ala bake vou baedam bak. Neham labe labihaha bak. Im Boehàda Alat amu di iube neha, ‘Aho ba dam soat vausu fa vei neàdedam bak lam Aho fa dam bake modi fi zeam bitom di Aho gi Yahudi dam labet modi ame bak lam fi zeam bito tame,’ lahame iba fet gagu esuhu bak. 23Neham bak. Ala Am alihi im gi fota aam vabnat modem bak. Labihàmu iho dam bakda Aba vou baedam di gi im ahu ad nibet vi ozome vou baedam bak. Lahana gi modem vaba abo imbolabe ahu adat vi ozome ahu vàmadi Aba vou baedam bak. Damat ba im Ai Ala bake abo imbona vou baedalo modem di gi labiham bak ba mode tame. Gi im ahu ad nibet vi ozome abo imbolabe ahu vàmadi im Ai Ala bake vou baedam bak. Ai Ala labe gi, ‘Dam gi labihasu meedam damta Aba vou baedase,’ lahame ozome àhàki vou faodam bak. Lahana ame bak lam gi etei di nibet ab faasi meedamam bak.” 25Lahame labi vameadume modeha nam labe fa neo gago, “Em nehi ozo. Alat Aho Gagu Olulo Modemda Boehàda ba iba le tame. Labi Aho lehezobe iho ba meedam biem im lam ahebu Aho ba iba gagu im ozobohudi fi gate tame.” (Ibrani dae, “Mesias,” laham di modeo, Yunani dae, “Kristus,” laham di modeo, gi, “Alat Gagu Fihasi Vimteme Oluhu Dat Boehàda,” lahame gagom bak am.) 26Lahame labi gagoha Yesus labe fa ab gagoham. “Ne, Em ame Da am bak. Em ame Da etei im oba ab vameadamam bak.” 27Lahame gi etei lab vameadam lahasuhu di labe iho Yesus bake vi tau meedam dam nibe iho num debu iuba le fa li aaha Yesus lahi bake im vameadam bak aame ab àvodeham. “Guruleheda ba lahi bake im ot vameaidam vabak. Fiham bak,” lahame ozome ab àvodeham. Lahana ba ame nam laba, “Om ana lehela?” lahame ba labi vi ailo gagom bak modem kai. Labi laha Yesus bake, “Guru, um ana im vameadàla?” laham bak lam laha ba vi ailo gagom iedi gi vei daleàde. 28Labi ame nam labe am vao noamna lam gi laba vou esmozi ame num debu bake esdam dam laba fa ab emoeham. Labi le dam bake ab vameadamam. 29“Etei niba li eba im vameadamda eho bàhàgo laba vou esmohoda lam um nasi eba tau fa le aamale. Da lam im ebe eho amu modeheda ahebu Ahamo ozobohudi eba gut vameadaha bak. Uho ozom, Da lam Alat amu Gagu Fihasi Vimeteme Iba Olulo Modem Boehàda iho vou faodamda ameo? Imo taho fa le aase,” lahame labi gagohemu dam lam ahebu num debu labe usname fa Yesus bake ab ladamam. 31Labihadam di omozit iho Yesus bake vi tau meedam dam nibe Aba nehi gagoda. “Ai Guru oa, Om idoalehe bak na nasi li àle.” 32Lahame labi gagoha Yesusat fa vi gago, “Em na àmna ehe bak um biem bak.” 33Lahahat Am dam labe ihimo fa ab ot vameaidamam. “Uho ozom, Da nim amat na vou li lu àhela?” 34Lahahat Yesusat Aho etei, “Na àmna ehe bak,” lahame lab gagoho bak lam fa neo vi vameada. “Eho na àme modi neàdemna ehe bak. Eba Gagu Oluhuda lam abo Em Ai Ala labe Aba Aho ozome Eba gagoho im lam ahebu meedume neàdem bak lam bisi Eba modi neàdemna am bak. 35Nasi ozomale. Uho gi nehasu ozome gagodam damat mode taia? ‘Na debe uloholi neàdi ala ahiali ame na ba modeme vahedam bak,’ lahame labi gagodume baleàhà damat mode taia? Lahana Eho uba gi im nehasu gagom bak. ‘Um na utoho zi laba aale. Na ambedi neàdeho. Modeme vahedam bak ab vou fuham bak. Abo Samaria dam labe meit iba li vameadam labe aime Eba tu vuzehem bake ahumdi vou faodam bak ehe bak,’ lahame uba labi gagom bak. 36Neham bak. Dam amuda iube bak vabieme neàdi na oo gulaha dam lam amu gi meedume neàdehe bak. Lahana dam ba etei nibe na modeme vahedam dam lam ibi iho na meedam bak gohali vamna lam etei ab vadamam tame. Labiham labe dat amu bak vabieme neàdi na oo gulahada lamti labi dat na ba modeme vahedamda lamti gi ame na ab modeme vahehamemu fa vahi deelem bak. Ame dam labe ibi iho modeme vahedamna lam gi dam Eba tu vuzehi im Ebeda meedamda zi am bak. ‘Ame dam laba im vameadume modi fa Eba tu vuzehi fa Alati vahi gi ahe neàna bohu vuusdase,’ laham bak laba ozome modeme vahedam bak. 37Labihàmu damat gagodume baleàhà im nim imbote. Neha: ‘Dat meida na de. Labi ame na ambedehezobe dat meida fa modeme vaheda. Labihadam bak,’ lahame labi gagodume baleàhà im lam imbote. 38Neham bak. Ba utoho Ebeda lam uho dehe vabna Eho ozahit uba neha, ‘Laba le na modeme vahedale,’ lahame Eho uba gagu oudaha bak. Ame utoho lam Alat dam amomoi gagu oudaha dam labe iho tat vueme na debe vanamahana uho gi mei na ahum fa modeme vahedaha bak,” lahame Yesusat im labihasu ab vameadume esuham. 39Ame Samariada lahi labe neha, “Da lam im ebe eho amu modeheda ahebu Ahamo ozobohudi eba gut vameadaha bak,” lahame aho aime àvodi fa dam bake ahate vameaha labe ame Samaria dam lam num debu Sikar laba esuhu dam dua totbaho labe neha, “Ame Da Yesus lam Alat Gagu Fihasi Vimteme Oluhu Dat Boehàda Am am bak,” lahame ab tu vuzeheham. 40Labi ame Samaria dam labe Yesus bake le tàhi im vameadaha di labe Yesus bake deeli nehi gagoda. “Om nasi a lamule. Iba tau iddume lale,” lahame labi gagodàmu Yesus uledi ame dam labe im num debu bak laba le tau aidume usi ab behàsdeham. 41Ame dam laba Yesusat Ahamo Am im vahokedume usi behàsdi modeha dam dua bak neo vi tauidume Yesus bake ab tu vuzehedamam. 42Labi tu vuzehedam labe fa ahamte Yesus bake tàhi im vameadaha nam laba nehame ab vameadamam. “Iho etei Yesus bake lab tu vuzehehe bak lam oho aame iba li vameadaha bak lamota ozome tuhu vabak. Im gi ihimo Yesus bake le tàhi im Abada aidume ab tu vuzeheham bak. Abo imbote. Ame Da Yesus lam abo dam bakda ahebu Soat Vausu Fa Vei Neàdemda Am am bak,” laham im lam ab vameadaham. 43Labi Yesus Aba vi tau meedam dam lamti iho num debu Sikar lam vou esmozi ibi iho Galilea bak laba lam bak ozome neo ab ladamam. 44Di amuda iube Yesusat Ahamo nehi ahate gagoho bak ehet. Aho neha, “Dat Alat vameadaha im aime fa dam bake ahate vameaidahada labe aho bak mei bake lam dita ame dam labe ahu adat iedi aho lab vou le vahokedaha im lam ule neàt gut ve aba vou baedam labe am im aime meedam meo bak. Lahana aho am budualehe bak laba fa le am dam laba im vahokedam di am dam labe gi ailahigeàmodam meo bak. Ba ahu adat iedi aho lab li vahokedaha im lam aime aba vou baedam vabak,” lahame ahate gagoho bak ehet. 45Lahana Galilea bak zoho laba lafusi modeha ame Galilea bak laba azihi dam totbaho labe gi Aba deelehat gut vada. Ame dam labe amu Yahudi damat kota Yerusalem laba vahe vaheme ame na àme iziam bak abo Paskah lam laba tau vahi meedam di lam Yesusat na damat ihimo modem biem im feàna zi meedaha bak fako ibidat aadahemu labihada. 46Labi neo Galilea bak laba ladam labe ame bak labe am num debu meida Kana laba fa ab laham. Abo Aho amu laba le vao aabo modi fa anggur oo vaksalehe bak laba fa ab laham. Ame di labe Roma Boehàda meida labe am na vi tau meedamda meida labe am adat fa ibi iho azim num debu Kapernaum laba gaili bisda. 47Làhàmu aho aiha Yesusat Yudea bak labet fa Galilea bak niba lehe bak aihemu Kana laba le Yesus bake tàhi ab tauledamam. “Em adat Kapernaum laba gaili bisdamda elolo vabaleha. Oho eba nasi tau le modi fa neàdem neào?” 48Lahame labi taulehemu Yesusat ab gagoham. “Na damat ihimo modem biem im feàna damat amu aaha vabna fet aame àvodemna Eho modem bak lam um dam bakda labe aam vabameam um ba, ‘Em abo Alat Gagu Fihasi Vimteme Oluhu Dat Boehàda am tame,’ laham bak ba Eba tu vuzehem vabak.” 49Lahame labi gagoha ame eeda labe fa gago, “Dat busao, bisi a kehàmule. Em adat elolo vabaleho. Fa taho lase.” 50Lahahat Yesusat fa gago, “Om nasi om num bake lale. Om adat gi fa neàdehena fa le aa tame.” Labi ame eeda labe Yesusat etei lab gagoho bak laba aime tu fa am num bake Kapernaum laba ab ladamam. 51Labi ladume izi dihasi neo ladameam aaha am na modem dam doait ledam bak ab tàham. Tàhi gago, “Aia, om adat gailehe bak fa aodeha.” 52Lahaha bak aihemu gago, “Ne ana jam fat aodehela?” Lahahat ame dam labe fa gago, “Màt jam satu am so galihaha bak fa neàdi setehena ozomoho bak.” 53Lahaha bak lam aihemu ame eeda labe it ozo. “Oo làhà! Jam lam gi Yesusat eba neha, ‘Om adat fat ahede tame,’ lahame gagoho jam ame?” lahame it ozobohudi aho am dam laba fi desi aho am damti neha, “Ame Da Yesus lam Alat Gagu Fihasi Vimteme Oluhu Dat Boehàda am tame,” lahame Yesus bake ab tu vuzeheham. 54Yesusat ahamte Yudea bak labet fa Galilea bak niba li na damat ihimo modem biem im feàna damat fet aame ozobohudemna ahamte modeheda lamti etei modehedati vahi gagom di ab behàsdeham bak.

will be added

X\