Yohanes 11

1Ame di lam dat ee gagom Lazarus lahamda labe aho num debu Betania laba gaili bisda. Labi am nà behàsu Martati Mariati laha ame bak laba vahi azi. Ame nam Maria lam ba im Boehàda Yesusam naba minyak ahana neàna noime afoezobe am ohuta bohu labe vi footolo modem nam am. Laham nam labe am dubu Martati im vahada Lazarus gaili bisdàmu vou aasda. 3Làhàmu am nà behàsu labe iho da meida laba gagu Yesus bake ab oluham. “Ai Boehàda oa, Omti vou alemda Oho deelemda gaili bisdalo. Lele,” lahame ab gagu oluham. 4Lahaha im lam Yesusat aihemu gago, “Lazarus lab gaili bisdam bak lam gi labihasu fà bisdase. Ba elom kaio. Am gaili bisdam bak lam Alat nehame ozome gaili bisdam bak. Alat Aho Lazarus bake ba modem im ehe labe ame bak labet modi Amti Em Am Adatti, ‘ “Bisi feàte,” laham bak lam damat fà ozobohudese,’ lahame ahit labihaha bak.” 5Yesusat aho Martati Mariati Lazarusti deeli meedamnàme vedi, “Lazarus gaili bisdalo,” laham bak aihina taho laha vaba vedi Aba Aho azihi bak laba neo usi behàsde. 7Labi usi behàsdi neàdehezobe Aho iba Aba vi tau meedam dam niba ab gagoham. “Imo Yudea bake laba fa lase.” 8Lahame labi gagoha iho fa gago, “Ai Guru oa, Om ozom vaba? Om etei laba laha di ame Yahudi damat gi ke visomoame Om otelo modem bake akati kehàm vaba fa laba lalo modela?” 9Lahahat Yesusat fa gago, “Digat vàmtea labe fauhaedam di dua belas jam ehete. Di lam ala fauhaedam labe damat godameam ba naba gitadi bitem vabak. 10Lahana damat aibut godameam naba gitadi bitem di am. Fauhaedam bak vab labe labihaha bak.” 11Lahame labi gagu neàdi neo vi gago, “Imti vou alemda Lazarus bitesu iddalo. Imo le Eho ukese.” 12Lahahat Aba vi tau meedam dam nibe iho fa vi gago, “Ai Boehàda oa, am iddameam làhà gi fa neàdelo iddam bak. Gi labihasule.” 13(Yesusat etei lab gagoho bak lam gi Lazarus eloho bak gagolo Aho ahit im totobet gagoho bak. Lahana Aba vi tau meedam dam labe vedi abo iddam bak gagoho tibame vabili labi vi gagoho bak.) 14Ame dam labe vabilehemu Yesusat fa ahate ab gagoham. “Lazarus eloho. 15Lahana Eho ame da laba ba modem im ehe labe uba modi uho Eba vi tu vuzehi dualem bake am elolo vabalehe di lam ame bak laba Em tau modehe vab labe Em gi deelehe bak. Neàde. Imo nasi Lazarus eloho bak laba ladase.” 16Lahahat Tomas damat neha, “Tasbana,” lahame ee meida taluhuda labe aho fa im amti vahi Yesus bake vi tau meedam dam totbaho niba ab gagoham. “Lo, im Da laba tau vuladume le Amti vahi elodam neàte,” lahame gagu neàdi dam vahi Yudea bake ab laham. 17Ame Betania gi kota Yerusalem laba netàdehe num debut moz. Gi kilometer làtela lamo. Kia vabak. Labihadam di lam Yahudi dam kota Yerusalem laba azihi dam dua totbaho labe li Martati Mariati im vahada Lazarus elohemu im ahu faidehe bak vabededa. Labihadume modeha Yesus Aba vi tau meedam damti lehe labe li num debu Betania netàdehe bak niba ab fuham. Fusi aiha, Lazarus gi digat meida iube eloi ke bumata esu abo usi ahialehena li ai. 20Labi Yesus ledam bak lam Martat aihemu, “Yesus bake tàse,” lahame doait ab laham. Lahana Maria gi ahu faidi numa aida. 21Labi Marta doait le tàhi ab gut gagoham. “Ai Boehàda oa, Om màt di iube iba taho lemta im vahada ba elom kaio. Oho modi fa neàdem bak lam em ozobohu bak. Oho etei nim Ala bake neha, ‘Eba na nim veiale. Eba na nim veiale,’ lahame gagomeam làhà Oho lab gagohona lam Alat ahebu aime uledi modem tadem bak.” 23Lahahat Yesusat fa gago, “Um vahada fat ahedi usa tame.” 24Lahahat Martat fa gago, “Lo, em ozobohu bak. Etei bak niba vou mode ladume ba Dam Bake Uloodume Vi Aime Ozobohudi Neàdi Fime Fahedam Digat labe dam ahebu elodaha bak labet Alat modi fa ahededume usnadam di lam em vahadati laha am eloho bak labet ba Alat modi fa ahedi usam bak lam em ozobohu bak.” 25Lahahat Yesusat neo vi gago, “Dam Elodahada Lam Fa Modi Ahededume Usnadamda Em am bak. Meit Eba tu vuzehemeam làhà gi elohonàme Eho modi fa usai Alati vahi gi ahe neàna bohu vuusdam bak. Ba neo vi elodam vabak. Gi ahe neàna labaha bohu vuusdam bak. Marta, Eho etei lab gagoho bak lam om tu vuzeheo?” 27Lahahat Martat fa gago, “Lo. Ai Boehàda, Oho lab gagoho bak lam em tu vuzeheho. Labi laha Alat aham di iube neha, ‘Eho Gagu Fihasi Vimteme Olulo Modem Dat Boehàda bak niba olu tame,’ lahame fet gagu vàmadi esuhuda Om ame Da am bak. Labi Om laha abo Alam Adat am bak.” 28Lahame Marta labi gagu neàdi fa num bake le Maria bake aa gagu dam dua bak vaitesu vou li gago, “Im Guru bàhàgo bak laba doudalo. Oba, ‘Lele,’ lahaho.” 29Lahame labi gagu modeha Mariat aihemu gi àvodehat usai Yesus bake ab laham. 30Di lam Yesus gi num debu Betania bàhàgo bak laba abo Marta Aba doait tàhà bak laba vou faodam lahasu. Ba num debu bake fum kai. 31Labihadam di labe Yahudi damat neha, “Maria bake vabededase,” lahame am num laba teohe li esdam dam labe vi aaha Mariat àvodehat usai num labe futoi ladam bak aahemu ab ozoham. “Am vahada koei ke bumata esuhu bak laba le mezeo mode taia?” lahame gagu usnadume ab vuladamam. 32Labi Maria le Yesusat odosdam bak laba lafusi Yesus aahemu ahit Yesusat avaesdam laba ogomasu biti ab gagoham. “Ai Boehàda oa, Om màt di iube iba taho lemta im vahada Oho modi fa neàdem bak. Ba elom kaio,” lahame ab vameadaham. 33Labi Mariat lab mebe vameadam bak lamti labi Yahudi dam aba tau vuladaha dam labe medaom bak lamti Yesusat aahemu ahu faidi feà bak fusi, “Dam nim akati modi, ‘Dam elohoda ba fat ahedi usam kaio,’ lahame tum vaba modela?” lahame vi ozodaha vabamu ab gagoham. 34“Koei esuhu ke bumat akete?” Lahahat dam labe fa neha, “Ai, nasi iba tau le aale.” 35Làhàmu ladam labe Yesus fa vi tau fa vaksa vevea lada. 36Labi modeha ame Yahudi damat vi aame ab gagoham. “Nasi aama. Am abo Lazarus bake deelehe bak ba koena modem kaio.” 37Lahana dam totbaho labe vedi neha, “Dat fako na aam biemda modi fa neàdehena ba akati koei nim amu gailehe di taho modi fa neàdehe vaba modela?” lahame ab gagoham. 38Labi Yesus neo gi ahu faidi feà bak fuhuna ozahit ladume ame ke bumat laba lafu. Ame ke bumat lam damat koei esu neàdi am ahazo ke baana ve tusu baguamdi modesda. 39Làhàmu Yesusat ab gagoham. “Ke bumat labe am ahazo baana osoktole.” Lahahat koei labe am nà Martat mali gago, “Ai Boehàda oa, Om ozom vaba? Im vahada koei amu gi esuhuna usi ahialehena koei ahana fem bak. A osoktomule.” 40Lahahat Yesusat fa gago, “Eho amu oba gagohona taia? Meit Eba tu vuzehemeam làhà Eho ame da laba modi ozobohudi, ‘Ala abo feàte,’ laham bak fi gate tame.” 41Lahame labi gagoha damat ame bak lam aihemu ame ke ahazo baana lam ab osoktoham. Labi osoktoi neàdi Yesusat Am ohu vousai asum ahoba iuba tom aasdume gago, “Ai oa, Eho Oba lab gagoho im lam Oho aihi bak lam abo neàte. 42Eho Oba im gagom di Om gi aim tadem bak lam Em ozobohu bak. Lahana dam niba Eba tau dozeadaha dam zi nim, ‘Fà aime ozo, “Eba gagu oluhuda Om am tame,” laham bak ozobohudese,’ lahame Eho ahit labi ahate gagodam bak.” 43Lahame labi tom gagu neàdi Yesusat dae buduana ab buteham. “Lazarus nasi futoi lele.” 44Lahahat koei lam damat amu am anekehà ahimti am nao ahimti sue nasbe gia. Labi sue baana am dauha neo suusu baguamde. Lahadume amu lab giaha bak lahasuhuna fa usai futoi ab li duzuham. Làhàmu Yesusat ab gagoham. “Uho Lazarus fà lam neà bak ozome um nasi Lazarusam so laba giaha sue lam ahebu ziamome voedale.” Làhàmu ame baket ab modeham. 45Labihadam labe Yahudi dam Maria bake li vabededam dam labe aaha Yesusat lab modehe bak aahemu dam dua bak totbaho labe Yesus bake ab tu vuzeheham. 46Lahana ame Yahudi dam totbaho labe vedi Farisi dam bake le, “Yesus nehaho,” lahame ab fi deham. 47Làhàmu ame Farisi dam labe ame bak lam aihemu fa Yahudi dam labe ibi iho Ala bake lomna ve vua vahudam toheda zi laba vuusu im vameame faheme modiam dam lamti vahi ozo, “Imo fa Yahudit Ibi Iho Modem Im Gagu Vàmadi Esum Dam Debu laba gagu fa vahe vahedume ame im lam vameadase,” lahame Yahudi dam eeda zi labe bakamta nusualadume meia uloome aime vameadam dam debu laba ab laham. Le lafusi vameada. “Ame Da lam na damat ihimo modem biem im feàna damat fet aame ozobohudemna zi duana meedam bak lam akati iho ame Da laba gagu malem vaba modela? 48Iho gi labihasu aalahigeàmu nehasu modesdameam dam ahebu Aba aame ozo, ‘Ame Da lam Alat Gagu Fihasi Vimteme Oluhu Dat Boehàda am tame,’ lahame tu vuzehi meedam bak. Labihameam dam mei debu iba vuusdam boehàdatebo labe ozo, ‘Làhà, dam lam ibi iho vuusu meedam bak mu fa Da lada laba tu vuzehemo,’ lahame ozomsu im meo dam fa iba olu ame Fihasi Ala Bake Vou Baedam Num Vàmteabu ibi iho vuusdamna lamti im damti ame meo dam labet beodume vàhàdedume sedda moio?” 49Lahame labi vameadam labe im dat meida abo Damat Ala Bake Lomna Ve Vua Vahudam Tohe Dam Zi Labe Bisi Boehàdatebo abo tahun etei gàhàda nibe damat gagu fa boehàdateboleheda Kayafas labe aho ab gagoham. “Um ahusobu damat mode? Uho lab gagoho bak lam um it ozodam vaba? 50Im Yahudi dam ahebu bisi ahe neàdem bak gi neha taia? Im dam dua bak beoho vaba gi dat vàmtea ot vai eloi setem bak lam bisi neà bak lam um ozodam vaba?” 51Kayafas lab gagoho bak lam ahamo ozobohudi gagoho vabak. Aho lab gagoho im lam ba ab imbodeham bak. Ame da labe ame tahun labe Damat Ala Bake Lomna Ve Vua Vahudam Tohe Dam Zi Labe Bisi Boehàdatebolehemu Alat ahit ame da labe am ahu laba, “Yahudi dam ahebu soat vausu fa vei neàdem bake Yesus ot vai elo tame,” laham im lam vizi ozobohudi aho vabi fet gagu esuhu bak. 52Gi Yahudi dam lamota soat vausu fa vei neàdem bak lamota ozome gagoho vabak. Yahudi damat modem vab dam abo bak iuba azihi dam ahebu soat vausu fa vei neàdem bakti labihasu ozome gagoho bak. “Abo dam mei debuti dam mei debuti bak iuba fi goaitoho dam abo Aba tu vuzehemda ahebu Alat vamateme am dam debu vàmadese,” lahame labihalo modem bak. 53Labihàmu ame digat labe faasi Yahudi dam busaoda eeda zi labe, “Yesus si otese,” lahame im aa odoadume ahu ab vàmadeham. 54Làhàmu Yesusat Aba Aho meedam im lam damat Aba aam vabake Aho ahit Yahudi damat esuhu bak ahebu ahate gohatem bak ab mu vaitoham. Labi vaitoi kota Yerusalem vou esmozi bak aotba baa bohu dam vaba alim bak netàdehe num debu Efraim laba ab laham. Abo Aba vi tau meedam damti vahi laba ab le tau esdamam. 55Ame di labe Yahudi dam labet ibi iho modi baleàhà bak abo na àme iziam bak abo Paskah neo ab vou fuseo vabaleham. Ame digat fuseo vabalehemu kota Yerusalem netàdehe num debu mei num debu meime azihi dam labe iho faidehe bak fa neàdelo ibi iho amu nasi valo it kikeme itatam bake kota Yerusalem laba valada. Ame na àme iziam bak abo Paskah lam vahi àm bake ozome valada. 56Labi ame dam etei kota Yerusalem laba vahe vahedam dam labe, “Yesus akete?” lahame nabiha vabamo. Iho ame Fihasi Ala Bake Vou Baedam Num Vàmteabu labe am ad oli aam bak tomba laba dozeadaha di labe nehi ot gagoida. “Um akatihasu ozohela? Iho vahi na àme iziam bak nim Am ba lem vabao?” lahame ot gagoida. 57Ame damat Ala bake lomna ve vua vahudam toheda zi laba vuusu im vameame faheme modiam dam lamti Farisi dam lamti amu dam bake nehi fet gagu esu. “Meit Yesusam alihi aameam làhà iba li gagole. Iho Da lam taho sim bak am tame,” lahame fet gagu esuhu bak ehet.

will be added

X\