Yakobus 1

1Yahudi dam Kristus bake tu vuzehi meedam dam abo Alam damaleheda zi labe faheme ahala fi goaitoi le esdam dam oa, neàte. Eho Yakobusat sunit nim toeme uba oluho. Alati im Boehàda Yesus Kristusti labihasu im na eba gagu eho meedamda am bak. Em labihamda modem labe eho sunit nim toeme uba oluho. 2Emti vahi Kristus bake tu vuzehi meedam dam oa, naat uba, “Fai bak nim modem neào?” lahame uba modi ozolo modem im ahebu modeo, fai bak mei fai bak meime duzum di modeo, labihasu uho gi ozahit deelehe bohu vuusdale. 3Im nidi nim um ozobohuna taia? Alat ozo, “ ‘Uho gi ozahit Aba labaha tu vuzehi meedào?’ laham bak lam modi aase,” lahame ozohemu ame fai bak mei fai bak meime uba duzum bak lam Aho ahit uledehe bak. Neham labe labi ahit uledehe bak. Naat uba, “Fai bak nim modem neào?” lahame uba modi ozolo modem di uho gi Ala bake ozahit labaha bohu tu vuzehi meedameam làhà ba neo ame na uba vabidam di lam um ba bedem vaba gi Aba ozahit labaha tu vuzehi meedam bak am bak. Laham bak lam um ozobohuna taia? 4Uho lab keàtedi labaha bohu meedam bak lam ba a bedi fa odohali momule. Gi keàtedi ame bak bohu meedale. Uho labi modem labe um gi labahana bohu vuusdam damat modem bak. Ba Alat uba, “Im zoho vekeho,” lahame ba uba gagom vabak. Gi ab neàdeham bak. 5Na im uba duzum di lam uho meit neha, “Ahu adat iademe ozome meedam bak akete?” lahame vi ozom vabiemeam làhà gi Ala bake nehasu tom gagodale. “Ai Ala oa, em akati modela?” lahame tom gagodam di labe Alat ba uba neham vabak. “Aa! Om akati modem bi mode?” lahame ba meoli im vahokedam vabak. Alat abo na ilabdi kehàm vaba meedam Alat modem labe gi taho ame da laba, “Nehame modele,” lahame modi ozobohudi fi gate tame. 6Lahana ame da labe aho Ala bake lab tom gagodam di labe abo mahate Ala bake tu vuzehi ahu vàmadi neàdi Ala bake tom gagodale. Ba, “Eho etei tom gagoho im lam Alat aime modeo? Aime modem vabao?” lahame ba a ahu behàsdi Ala bake tom gagodamule. Eho gi neham bak ozome uba labi gagodam bak. Ame da labe ahu behàsdeheda labe am gi nutabet vao foadam labe niba li fi tauleda. Fa iuba le fi tauleda. Lahame modem vao bahoti ulohote. 7Ame da lam gi taho ozome ahu vàmadem vaba gi ahu behàsdi vi ozodam bohuta meedam dàt modem bak. Ame da labe na meedam di lam mahate fi tatom vaba gi zohali esuiam dàt modem bak. Labihàmu ame da labe aho ba a nehi it ozodamule. “Eho Ala bake tom gagodameam làhà Alat gi ilabdi eba modi em ozobohudi fi gatem bak,” laham bak lam ba a it ozodamule. Alat ba ame da laba labi modem vabak. Labiham bak uho Ala bake tom gagodam di gi ahu vàmadi tom gagodale. 9Emti vahi Kristus bake tu vuzehi meedam dam oa, uho meit nazoh vabda abo damat neha, “Feà vabda,” lahame feàtàhàda ehelemeam làhà ame da lam nasi a ladi aidamule. Gi ozahigeàmu fa deeli vou faodale. Neham bak. Alat ame da laba neha, “Om Eho deelemda am bak,” lahame ame da labe am ee vousaha bak laba vi ozome deelele. 10Lahana na duada lam ba diamut Alat Dam Bake Uloodume Aime Ozobohudi Neàdi Fime Fahedam Digat fuhuzobe Aho ahit ame da laba modi fa na vabali am ee vousem bak lam ame da labe nasi ahu it daetbadam neà? Vabà! Ba labiham vabak. Neham bak. Ame na duada lam gi ut avat alai setem bakti ulohote. 11Ala faasi tomali galihasi modeha ame ut ava boz lam kehàm vaba ala gait belu nemahubali alai goaitoi bake bitem bak. Labi aba amu aam neà bak lam laha setem bak. Ame da na duada lam modem bakti ulohote. Neha. Ame da labe neha, “Am na neo vi tau dualese,” lahame bak niba na im meedam di labe aho vedi am elom vab tiba ozome modeha ab eloham bak. Labi aho vahehe nazoh lam gi vou esmom bak. Labiham bak. 12Alat amu nehi fet gagu vàmadi esu, “Meit Eba deeli meedamda laba Emti vahi gi ahe neàna bohu vuusda tame,” lahame amu di iube fet ozome gagu esu vàmadehe bak. Labihàmu fai bak mei fai bak meime uba duzum di uho bedem vaba gi ozahigeàmu Alat Aba Aho gagohona lam uledi bisi keàtedehe bohu vuusu meedamda lam Alat ame da laba gi neà bak modi esuida tame. Aho ame bak lam gohali ame da laba ba modi Amti vahi gi ahe neàna bohu vuusdam bak. 13Naat uba li neha, “Fai bak nim modem neào?” lahame uba modi ozolo meedam di lam ba a nehi ozo, “Alat gagu oluho,” laham bak lam a ozome Ala bake vàlu gagomule. Neham bak. Ala ba fai bak modelo àhàkemna vab labe ba naat Aba li neha, “Fai bak nim modem neà?” lahame li Aba modi ozolo modemna na vabak. Labi laha Aho meia, “Fai bak nim modem neào?” lahame ba meia modi ozolo modem vabak. 14Gi neham bak. Naat iba li, “Fai bak nim modem neào?” lahame iba modi ozolo gagom di iho meit vedi uledi faina modemeam làhà gi nehame modem labe faina modehe bak. Am ahu faina modelo àhàkemna ehe labe vou fohodume ame fai bak ab modeham bak. 15Labi ame na labe vou fohodam labe ame bak lam ab uledi modeham bak. Labi ame da labe gi labihasu faina meedam bohu vuusu meedameam làhà Alat ba ame da laba modi vaitesu vua elum sutem gikina bohu laba voou geàdam bak bohuta meeda tame. 16Emti vahi Kristus bake tu vuzehi meedam dam abo ebe eho deelehe dam oa, uho git ozohomo? Uho neha, “Iho faina meedam bak lam Alat iba gagu meedaho,” lahame a giomim it ozome vuzehi meedamule. Alat ba meia neha, “Im fai bak nim modem neào?” lahame ba meia modi ozolo gagu faina modem vabak. 17Eho gi neham bak ozome uba labi gagoho bak. Na Alat iba meedume esuhuna lam ahebu ba fai bak vaba gi neà bak tade. Ba zohalehe vaba gi ahebu modi neàbodedaha bak. Ame na ahebu alimeat meedume esuhu Ala am bak. Abo ala digaddati ala usehedati labi falo zi nimti abo na fauhaedamda ahebu modehe labe iba na neàna modi esuhu Ala am bak. Lahana ame na fauhaedamna zi lam ogatem bak veimdi veimdiam bak lam Ala Na Debu Modeheda lamti ba uloho vabak. Ala ba veimdi veimdiam vabak. Gi Aba aham modesuhu bak lam lahasuhu bak. 18Alat amu neha, “Ebe Eho alimeat modehena zi ahebu lam fi hasi gi dam aabota Em damali im Ebedata fà meedase,” lahame fet ozome esuhu labe Aho iba vameadaha im imbona lam iho tu vuzehehe labe Alat iba ab modi am damaleham bak. 19Emti vahi Kristus bake tu vuzehi meedam dam abo ebe eho deelehe dam oa, eho etei uba gagolo modem im nim uho iademe dogoit aidale. Meit vameadam im aidam di, “Aise,” lahame mahate dogoi balesu iademe aidale. Labi laha im gagolo modem di àvodehat im faasi vameadam vaba gi amu nasi iademe ozome neàdi ba im faasi vameadale. Labi laha gi etei aihina a nasi àvodehat fakemule. 20Nehaha bak. Alat amu nehi fet ozome esuhu bak. “Eho dam bake deelem bake damat gi im vamdesu labaha bohu meedase,” lahame amu fet ozome esuhu bak. Lahana iho meia fakemoholem bak bohu vuusdameam làhà ba Alat aame iba deelemna lam im ba modem biem bak. 21Labiham bake ubu uho faina meedamehamdem bak lam abo fai bak mei fai bak meime baleàhà bak lam ahebu nasi mu voou seddale. Labi neo damat amu uba vahokedaha Alam im lam uho amu aime um ahu ad labe vuzehi meedam bak lam voom vaba gi daleà azi vi ozodume ule neàt labaha bohu vuusu meedale. Uho labi meedam labe Alat uba soat vausu fa vei neàdem bak am tame. 22Uho Alam im aim di abo iademe aime uledi ame baket meedale. A gi aimta aime mu voomule. Uho Alam im aimta ai. Lahana ba uledi modem vabameam làhà uho amu lab ozoho bak lam, “Alat iba soat vausu fa vei neàdem bak am tame,” lahame labihasu ozoho bak lam gi giomim it vou daetbadam bak. 23Meit Alam dae aimta ai. Lahana uledi ame bak modem vabda lamti fa dat nehame modemdati uloho bak. Da nibe am dauha, “Boz neào?” laham bak lam itaamna aasdam bakti ulohote. 24Ame da labe itaamna iademe nabidume, “Em dauha labihasuhe?” lahame aame esu iuba lam di, “Am dauha akatihasuhela?” laham bak lam fa vabiem bak. Dam Alam im aimta ai. Lahana uledi ame bak modem vabda labe fa ame da lamti ulohote. 25Ala labe Aba Aho vameadume vàmadi esuhu im lam ba zohali esuhu vabak. Abo gi ahebu ab vameadume vàmadi esuham bak. Labi laha ame im lam feà labe iho faina modem bake soat vausu fa vei neàdemna am bak. Labiham labe meit itaamna, “Am dauha akatihasuhela?” lahame it aame ozodam bak lamti uloholi ame Alam im lam aime ozodume ba fa vabiem vaba abo ulohodesu meedam bohu vuusdamda lam Alat modi aho na meedam di gi neà bak modi esuida tame. 26Uho meit nehame it ozome daetbadameam, “ ‘Alat eba fà aame deelese,’ lahame Alat Aba Aho gagoho im meedamda em am bak,” lahame daetbadamna am dae ahat faina gagom bak lam it vou faovoi malem vabalemeam làhà ame da labe aba aho lab it daetbadam bak lam aho gi aba giomim it vou daetbadam bak. Labi laha aba aho lab meedam bak lam gi ostame meedam dàt modem bak. Ba imbo vabak. 27Dam Ala bake ahu adat iedi vou baedume Aba Aho gagoho im aime uledi meedam dam lam Alat Aho vi ozo, “Dam lam ba git modem vaba abo im vamdesu meedam damat modem bak,” lahame Aba Aho vi ozome deelem dam lam dam gi nehame meedam damat modem bak. Data dumdamda vou aasdume vabieda. Labi laha lahi maboe zi abo naat vabidam di vou aasdume vabieda. Labi laha dam Ala bake tu vuzehehe vab dam zi labe ibi iho faina meedam bak iba vizi iho fa faina meedam bak labna zohàme im ahu it vou faovoi mali meeda. Labihasu meedam dam lam Alat Aba Aho bisi deelehe dam am bak.

will be added

X\