Ibrani 7

1Eho etei lab gagohoda Melkisedek lam, “Akatihasu modem dàt modela?” laham bak uba vameadalo mozo. Neha: Ame da Melkisedek lam aham di iube num debu Salem laba azi dam vuusdam boehàda am. Labi laha ame dam labe ibi iho Ala Bisi Feà Datebo bake vou baedam di labe meedam im lam faheme modiam tohedatelehe dàt moz. Ame da labe am ee, “Melkisedek,” lahame taluhu bak lam gi neham bak ozome talu. Ame dam laba vuusu im vahokedam di am abo Im Vamdesu Meedam Boehàdatebot moz. Ame da labe aho vuusdam dam labe im num debu Salem lam gi, “Ot fakiam vaba gi neà esdam bak,” laham bak laba ozome taluhu num debut modem bak. Labihàmu iho ozom, ame da Melkisedek ame dam vuusu im vahokedam di Ot Fakiam Vaba Gi Neà Esdam Boehàdatebot modem bak. Laham bak behàsu laba ozome ee, “Melkisedek,” lahame taluhu bak. Labi ame da labe aba aho meedaha im meit toehena nabime aameam ba am faaha ai modeo, am faaha oi modeo, am vou faat lehe tai ahobada modeo, “Amat modela?” lahame toem bak ba aam vabak. Am faaha bakti am eloho bakti ba toehe bak im aaha vabak. Labiha labe iho ozom, “Ame da Melkisedek gi Alam Adatti uloholi gi labaha tohedateli bohu vuusdam dàt modemna ozomom bak.” Aham di iube Abraham am damti vazisi le bohudi ot beluiame aho meoli ame boehàda zi labe im damti ahebu beodume vou esmozi fa ledam di labe Melkisedek doait li Abraham bake tàhi Ala bake tom gago, “Oho da niba neà bak tadi bohu vuusu meedale,” lahame deeli ab gut tom gagodamam. Labi gagu neàdi modeha Abrahamat aho zili vietomoaha nazoh zi lam ahebu fahedume na zi sepuluhli neàdehezobe meida zi vàmtea lam utasi Melkisedek bake ab lodaham bak. 4Uho im nim nehasu vi ozomale. Ame da Melkisedek lam feà datebo mode taia? Nehaha bak. Israel labe aho vou faat ledaha dam labe im tai ahobada feàda Abrahamat modemnàme aho zili vietomoaha nazoh zi lam ahebu fahedume na zi sepuluhli neàdehezobe meida zi vàmtea lam utasi Melkisedek bake ab lodaham bak. Aho ozo, “Melkisedek bisi feàda modem bak,” lahame ozobohudi ahu adat iedi ame nazoh zi lodaha bak. 5Uho im nidi nim laha nasi vi ozomale. Ame Israel damat vuusdam Im Feàna lam im meida nehasu toeme fi hasi esuhuna ehe bak. “Abrahamam mekehàda Lewi labe aho vou faat ladam dam laba modi Ala bake lomna ve vua vahudam tohe damalehe dam labe iho fa im dam totbaho laba gagome im nazoh lam ahala faheidume sepuluhli sembilan vekesidume vàmtea utasi vaida. Lahadume dam ahebu uloholele. Ba dam giidate a gagu vaidamule,” lahame labihasu toehe im ehe bak. Ame dam lam ahebu Abrahamat vou faat lehe dam abo gi im dam debut modemnàme ozahit gagome ame nazoh vaidaha bak. 6Lahana ame da Melkisedek lam ba Abrahamam mekehàda Lewit vou faat leheda meida modem vabnàme aho gi ozahit Abrahamat aho vàmtea utasi esuhuda lam aho ab vaham bak. Labi laha Alat Aba Aho aham di iube fet vameadume vàmadi esuhu im lam, “Obo oho ba vou faat ladam dam debu duale tame,” lahame fet vameadume vàmadi esuhu im lam gi Abraham bake gagohonàme iho dat feàda ozomomda Abraham labe ba Melkisedek bake ozome nehasu Ala bake tom gagoho vabak. “Ala oa, Oho Melkisedek bake im neà bak modi esule,” lahame ba labihasu tom gagoho vabak. Vedi gi ame da Melkisedek labe fa Abraham bake ozome tom gagohoda am am bak. 7Iho nehasu ozobohudehe bak. Meit meia neha, “Alat oba im neà bak modi esule,” lahame Ala bake tom gagu esuhuda lamti labi neà bak modi esum bak gagohemu deelehedati labihasu ozom di bisi feàda Ala bake im gagu esuhuda lam am bak. Labiha labe Abrahamat aho na zi vàmtea utasi Melkisedek bake loho labe iho ame dam behàsu lam vi ozodam di bisi feàda Melkisedek am bak. 8Iho labi gagomeam làhà iho neo im nehasu vi ozodam bak. Làhà Melkisedek lamti Lewit vou faat ledaha dam laba modi tohe damalehe dam lamti ozom di laha bisi feàda Melkisedek am bak. Neham labe labihaha bak. Etei nim ame tohe dam zi lam am dam giida totbaho laba gagu doi zi vàmtea utasi esuhuda lam etei vadamta vada. Lahana ame dam lam gi ek damat modem bak. Abo elom meote. Lahana Abrahamat na zi vàmtea utasi esuhuna vahada lam Melkisedek lam ba labiham vabak. Alat Vameadaha Im Toedahana laba am elom bak vi tau toehe vab labe iho ozom, ame da Melkisedek lam gi labaha ahena bohu vuusdam dàt modem bak. Ba elom vab dàt modem bak. 9Labi ame im lam vi ozom bak meida ehe bak. Neha: Etei nim ame da Lewit vou faat ledaha dam laba modi tohe damalehe dam zi lam am dam debu totbaho laba gagu doi zi vàmtea utasi esuhuna lam vadamta vada. Lahana im gi nehi laha vi ozom bak. Abrahamat na zi vàmtea utasi esuhuna lam aho Melkisedek bake loho di lam Lewit vou faat ledaha dam laba modi tohe damalehe dam labe laha tau lodahana ozomom bak. 10Neham labe labi gagoho bak. Ame da Lewi lam abo Abrahamam mekehàdat modem bak. Labihàmu Melkisedek Abraham bake tahi im vameadaha di labe ame di lam Lewi faaha vabak. Lahana iho ozom, Abrahamam iba zohot ba Lewi ba faam bak ehe bak. Gi Abrahamam ibat goudahana ozomom bak. Labihaha bak. Iho laha nehi vi ozo. Ame da Abrahamat na zi vàmtea utasi esuhuna lam ve fa Melkisedek bake loho di lam Lewit vou faat ledaha dam laba modi tohe damalehe dam labe iho vi tau lohona ozohomu iho ozom, ame tohe dam lamti bisi feà damat modem kaio. Bisi feàda Melkisedek am bak. 11Emti vahi Kristus bake tu vuzehi meedam dam oa, aham di iube Alat Aho neha, “Nehame modem di Em fi ham bak. Nehame modem di Em neà bak,” lahame ame Im Feàna lam Musa bake gagu aho fa ot vai fa ame Israel dam ahamda laba vameadaha bak. Labi Musat aho ame Im Feàna lam vameadaha di lam Alat neo gi Lewit aho vou faat ledaha dam laba gagu fa tohe damali, “Ame Im Feàna lam Israel damat ulohodesu iademe meedào?” laham bak laba ame dam labe vou faovoi meeda. Lahana ame tohe dam labe iho lab vahokedaha Im Feàna lam ame Israel dam ulohodesu vou mode ledasome modeha modem vabili vou mode ledume iba dam badate vou fuhu bak. Labihàmu ba ame tohe dam amuda labe iba modi neàbodem biehemu Alat fa ozo, “Toheda amomoi modi fa oluse,” lahame labi ozohemu Aho ba Lewit vou faat leheda Harunti ulohona ba modi tohedatelehe vabak. Gi Melkisedekti ulohona ozome tohedateli oluhu bak. 12Labihàmu Alat Lewit vou faat ledaha dam laba modi tohe damalehe dam lam mu fa veimdi dam mei debu laba ozome fa toheda amomoi modi ab ot vaham bak. Làhàmu iho ozom, Alat aham di iube Musa bake gagoho Im Feàna lam abo fa veimdem bak. Eho gi neham bak ozome uba labi gagoho bak. Alat amu neha, “Israel dam debu amomoi bake a gagu tohe damali a meedamule. Gi Lewit vou faat ledam dam lamota gagu tohe damali meedale,” lahame gagu vàmadi esuhu bak. Labihàmu iho ozom, damat ame bak lam ulohodesu modehe vaba voohemu Alat Aho naedat ame Im Feàna lam modi fa veimdi fa im amomoi fa toeme fi hasi vàmadi esuhu bak. 13Neham labe iho labi ozome uba gagoho bak. Iho etei lab gagoho toheda amomoi lam gi im Boehàda Yesus am bak. Yesus ba Lewit vou faat leheda modem vabak. Am abo Yehudat vou faat leheda meida Am am bak. Lahana ame Yehudat vou faat ledaha dam labe ba meida utasi gagu tohedateli meedahada vàmtea vabak. Lahaha bak lam im laha ozobohu bak. Labi laha Musat ame Yehudat vou faat ledaha dam meida utasi tohedateli meedaha bak toehe bak vabak. Labihàmu iho ozom, ame Im Feàna lam modi fa veimdi fa im amomoi fa toem bak ehe bak. 15Iho etei lab gagoho bak lam, “Ame Im Feàna lam modi fa veimdi fa im amomoi fa toem bak ehete,” lahame gagoho bak lam ahole gagoho bak. Nehaha labe labihaha bak. Tohedatebo ibida etei leheda nim gi Melkisedek tohedatelehe bakti ulohona modehe bak. Ba Lewit vou faat ledaha dam laba modi tohe damalehe bak lamti ulohona modehe vabak. Labiha labe iho ozom, ame Musat gagodume vahedaha Im Feàna zi lamti labi Lewit vou faat ledam dam lamota ihimo fa tohe damalehe bak lamti labihasu ahebu fa voedume veimdi fa ot vaha bak lam im ab ozobohudeham bak. 16Alat Yesus bake gagu modi tohedatelehe di lam Aho ba ame Israel dam labe ibi iho fi hasi vàmadi esuhu im zi laba ozome modehe vabak. Ame Israel dam ahamda labe meia gagu tohedatelem di iho gi nehadam bak. Ame dam labe iho ozo, “Ame da nim Lewit vou faat leheda mode?” lahame nasi ozobohudi ame da lam fi me vame gagu tohedatelem bak. Lahana Yesus gagu tohedatelehe di lam ba labiham vabak. Gi Am bisi feà labe Am elom gikina ahena bohu modesdam bak laba ozome Aba gagu tohedatelehe bak. 17Meit Alat Vameadaha Im Toedahana laba nehi toehe labe eho gi ame bak laba vi ozome uba labi gagoho bak. “Alat neha, ‘Om abo dat ahamda Melkisedek labe aba aho tohedateli meedaha bakti ulohona gi labaha bohu vuusu meedamda Om am bak.’ ” Lahame labihasu toehena lam gi Alat Aho ba Am Adat Yesus bake gagu tohedatelem bak fet nasi ozome toeme esuhunat modem bak. 18Iho ozom, Alat amu Musa bake vameadume Musat fa ot vai toedume esuhu Im Feàna zi amuda lam gi voomnat modem bak. Neham labe labi gagoho bak. Etei nim iho ame Im Feàna zi laba tu ulohodesu meedameam làhà ba Alat iba neha, “Im im vamdesu meedam damat modem bak,” lahame Alat iba ba ozahit fet deeli gagu vadam vabak. Im lada lam bee labe ba iba modi Ala bake lafum imot modem vabak. Labihàmu ame Musat lab toedume fi hasi esuhu Im Feàna zi lam modi seti fa amomoi bisi neàda fa ab ot vai ab modesuham bak. Ame bisi neà bak lam gi neham bak. Ame aham di iube lab meedaha bak lam Alat fa veimdi Yesusat fa ot vai Tohedatebolehe bak. Labi Tohedateboli damat faina meedam bake gohali Aho fa ot vai elohemu im Ala bake lafum bak ab modi esuham bak. 20Yesus iba lab ot vai tohedateli duzu vameadam bak lam vi ozodam di fa im nehasu laha vi ozodam bak ehe bak. Aham di iube ame Israel dam iho dam gagu tohe damali meedam di lam ba iho amu im gagu fa neo vi gagu faa fegube vàmadi esuhu vabak. Gi amu lab gagoho vàmadehe tadehe bak. Lahana ame Toheda bada nim Alat gagu tohedatelehe di lam gi gagoho vàmadi tohedatelehe vabak. Amu gagohona ba neo, “Em amta nim,” lahame vi gagu faa fegube vàmadi esuhu bak. 21Nehaha bak. Alat Yesus bake gagu tohedatelehe di lam Aho amu gagohona ba neo vi gagu faa fegube vàmadi esuhu bak lam meit Alat Vameadaha Im Toedahana laba nehi toehe bak ehete. “Em Boehàda Ala amta nim. Dae Ebeda ba veimdem vaba abo imbodem bak. Eho Oba modi tohedateli Om gi labaha bohu vuusdam bak.” Lahame Yesus bake labihasu vi gagu faa fegube vàmadi esuhu im am bak. 22Alat amu Yesus bake gagu afoezobe ba neo vi gagu faa fegube vàmadi esuhemu iho neo nehi vi ozome ab ozobohudeham bak. Làhà, Alat Aho ba im amomoi modi fa gàhàdi vameadume vàmadi esuhu im lam ba vagem vaba abo imbodem bak. Labiha labe Alat aham di iube Israel dam bake fet gagu vàmadi esuhu im lamti labi Aho iba dam badate fet gagu vàmadi esuhu im gàhàna nimti labihasu ozom di bisi neàda im bada nim am bak. Yesus tohedateli duzuhemu labihaha bak. 23Yesus iba lab ot vai tohedateli duzu vameadam bak lam vi ozodam di fa im nidi nim laha vi ozodam bak ehe bak. Lewit vou faat ledam dam laba modi tohe damalehe dam lam abo zi duate. Ame dam ek damat modehe labe labihaha bak. Ba ame dam zi lam meida vàmtea utasi ame tohedateli meedam bak lam gi labaha bohu vuusu meedamda vàmtea vabak. Gi teohet modi eloi seti fa meit ot vaidam bak. 24Lahana Yesus Aba Aho tohedateli meedam bak nim ba labiham vabak. Ba veimdi meit fa ot vai meedam vabak. Am elom gikida modehe labe Aba Aho tohedateli meedam bak nim gi labaha bohu vuusu meedam bak. 25Labihàmu Yesus Am elom gikida gi labaha ahena bohu vuusu fa tohedateli duzu iba tau fa Ala bake fi baedam bohu meedam dàt modem labe Aho iba lab meedaha bak laba iho tu vuzehi fa Ala bake neha, “Iba tau le,” lahame gagodam dam nim ahebu Aho iba soat vausu fa vei neàbodedam meo bak. 26Yesusat im labihasu meedamda lam bisi iba taum Tohedatebo ulohoda am bak. Ame Da Yesus lam Alat Aba gagu fi hasi, “Im Abada lamota meedale,” lahame labi gagu fi hasi esuhuda Am am bak. Labi laha ba faina meedam vabak. Labi laha ba meit Aba neha, “Am git modeho,” lahame vàlu gagom vabak. Labi laha Am bak dàt modemnàme ba bak dam totbahot faina meedam bak laba vi tau meedam vabak. Labi Am etei gi Am Aiat Am vousai tom ilu asum ahoba ium abo bisi tom novaha bak iuba olu aidam bak. Labihàmu iho ozom, ame da Yesus lam bisi iba tau Tohedatebolem neàda ulohoda Am am bak. 27Tohedatebo ibida labe Aho faina meedaha vab labe ba Israel dam tohedatebolehe dam labe ibi iho faina meedam bak lam fa faamome vei neàdedalo Ala bake vou baedalo na fi ho vou li oteme vua vahudam bak lam dihasi mode. Dihasi mode. Labihadam bak lamti ulohona ba Aho vi modehe vabak. Ame Israel dam tohedatebolehe dam labe nehadam meot. Amu ame tohedatebolehe dam labe ibi iho faina meedàmu fa faamome vei neàdedalo Ala bake vou baedalo na fi ho ibida vou li oteme vua vahuda. Labi ba neo dam giida totbaho labe ibi iho faina modehemu fa faamome vei neàdedalo Ala bake vou baedalo na fi ho ibida neo vou li oteme ame tohe dam labe fa neo vame vua vahuda. Gi dihasi mode. Dihasi mode. Labihadam damat modem bak. Lahana iba taum Tohedatebo Yesus lam ba labiham vabak. Gi Am naedat, “Damat fa Am ve ut tetehesuhunaso laba esu paku dou oteme vasea veàtoi fa dama gohalem neàte,” lahame uledi lab modehe bak lam gi modehe vàmadehe bak. Ba tamehodehe vabak. 28Labihàmu iho ozom, im labihasu meedamda lam bisi iba tau Tohedatebolem neàda ulohoda Am am bak. Neham labe labihaha bak. Dat ahamdat Musa labe aho ame Israel dam laba fi me gagu tohedatebolelo modem di lam aho gi ame Alat Aho fet vameadume vàmadi esuhu im amuda laba aame gi ame toehe bak laba ozome ulohodesu meeda. Labi modem labe gi bak damat abo bee damat faina meedam meo dam fi me vame fa gagu tohedateboli modidam bak. Lahana Alat ame fet vameadume vàmadi esuhu im amuda lam Musa bake vameadume vàmadi esuhunàme fa ba veimdi Aba Aho fet vameadume vàmadi esuhu im gàhàda fa faasi modelo modemu Am Adat Yesus bake abo gi labaha bohu neàbodeheda laba gagu faa fegube vàmadi esu Tohedatebolehe bak.

will be added

X\