Galatia 5

1Ame Im Feàna lam iho ahebu ulohodesu meedaha vaba zidazi zidaziame meedàmu Alat neha, “Beose,” lahame amu iba lab uloome esdam bak lam Kristus Aho fa ahit fai Dateli ot vai ame bak lam ab faatoham bak. Ame Im Feàna lam iba veimai vuusu ootedàmu iho uledi meedam labe, “Alat iba deeli vadase,” lahame iho ame Im Feàna laba ba tu vuzehi meedam vabake Kristusat labihaha bak. Labihàmu dam giomim vou lehe dam labe uba neha, “Alat uba deeli vadam bake um laso aubehà sokba ukbodale,” lahame uba labi ootedam im lam uho bedi vuzehi ame bak labet modi uba neo veimai vuusu ootedam bak labna zohàme a uledi meedamule. Gi teudi laodoamsdale. 2Yesus Aho amu eba Paulus bake gagu Am im vameadume esmozi laiam dateleheda meida nibe uba vameadalo modem im nim iademe dogoi balesu aidale. Dam giomim vou lehe dam labe ibi iho vameadam im uho aime vuzehi neha, “Alat iba aam di, ‘Im im vamdesu meedam damat modem bak,’ lahame Aho iba ozahit deeli gagu vadam bake ame Im Feàna lam ulohodesu meedam labe im laso aubehà sokba ukbom bak lam vi tau meedam neàte,” laham bak laba uho uledi meedameam làhà ba Kristusat Aba Aho amu meedaha bak labet uba tau modi um neàdedam vabak. Aba zoho gi vanamai teolem bak. Ba ame bak labet modi Alat uba deeli vadam vabak. 3Labi laha uho neha, “Iho ame Im Feàna lam ulohodesu meedam labe Alat iba deeli vadam bak am tame,” lahame labi tu vuzehi meedam dam lam eho uba nehi gagolo mozo. Uho labihameam làhà uho gi Kristus mu ot vaitesuiame ab vooham bak. Labi Alat ozahit uba deeli gagu vadam bak lam uho ab ohusesuham bak. Labihaha bak. Uho fa vabiem bak labna zohàme eho neo uba nehi gagolo. Meit am laso aubehà sokba ukbodam bak vi tau meedalo àhàkem dam lam um gi im lada lamota meedam labe ba Alat uba deeli um vadam vabak. Gi ame Im Feàna lam totbaho ahebu laha ulohodesu meedam labe Alat uba deeli vadam bak am bak. Lahana im ba ame Im Feàna lam labihasu ahebu ulohodesu meedamda vàmtea buà vabak. 5Lahana iho Kristus bake tu vuzehi Amti vou ali meedam dam nim im labihasu meedamda ba na vabak. Alam Aha Nutabe Neàna labe iba neha, “ ‘Im im vamdesu meedam damat modem bak,’ lahame Alat iba ozahit deeli gagu vada tame,” lahame iba fet gagu vàmadi esuhemu im ozobohudi iho gi Kristus bake tu vuzehi meedam bak labet ame bak laba nasi tu vou faodam bak. 6Iho Kristus bake tu vuzehi Amti vou ali ahu vàmadi meedam labe Alat ba iba ozom di nehasu vi ozodume gagodam vabak. “Im laso aubehà sokba ukboeo? Ukbom vabao?” Laham bak lam ba vi ozom vabak. Alat ozomta ame im lam feà vabak. Lahana im bisi feàda Aho vi ozodamda gi neham bak. “Gi iho Kristus bake tu vuzehi meedam bak labet modi iho meia deelem bak meedào? Kristus bake tu vuzehem vaba iho meia faki meedào?” Laham bak lam Aho bisi vi ozodam im am bak. 7Amu dita uho Kristus labe Aba Aho meedume vou esmoho Im Neàna lam uho tu vuzehi keàtedi meedamna amat fa uba ba li im mei vahokedam labe um vou fohome veimdi ubu uho amu im imbona vuzehi meedam bak lam fa mu voou setehela? Em abo àvodeha! 8Alat uba, “Am damalese,” lahame amu gi gagu esuhu bak. Labihaha labe damat etei uba li vahokedume um ahu faheme ame im laba vuzehehe bak lam debu ba Alat ame dam laba gagu uba modi um ahu fahehe vabak. Gi dam labe ihimo im imot uba modi um ahu fahehe bak. 9Ame im mei ba li vahokedahana labet uba vizi faidemo! Um ozom vaba? Uho roti modem bak laba vi ozodale. Roti ahubu modi deili fi kidemna ragi lam ve fa roti ahubu gàhàda laba vi tau valihem labe ame roti ahubu gàhàda lam modi deili fi kidem bak lam um ozobohuna taia? Uba laha labi modemo. Ame giomim vou lehe dam lam mahate dua vab damat uba li vameadaha um dam ahebu vizi feà bak fusi faidemo! 10Labihadamnàme emti umti im Boehàda Yesus bake tu vuzehi Amti vou ali vàmadehe labe eho amu gi nehi nasi tu vi ozodam labe em ba àvodem vabak. Damat uba neha, “Uho ame Im Feàna lam ulohodesu meedam labe Alat uba deeli vadam bak am tame,” laham im giomimna lam um ba vi tau vuzehi meedam vabak lam em ozobohu bak. Um gi im ebe eho amu uba vahokedahada lamota um vuzehi meedam lahasum bak. Labi laha dam uba li vameadume um ahu modi fahehe dam lam abo eeda modeo, ee vabda modeo, Alat fa dam laba beom bak ehemu eho amu gi nasi tu vi ozobohudehe labe em ba àvodem vabak. 11Emti vahi Kristus bake tu vuzehi meedam dam oa, dam totbaho vedi eba nehi giomim vàlu gagodam dam ehete. Ame dam labe eba neha, “Ame da Paulus lam dam bake im vou vameatedam di gi nehada, ‘Alat meia deeli vadam bak laba ozome ame Im Feàna lam ulohodesu meedam labe um laso aubehà sokba ukbodale,’ lahame im labihasu vou vameatedam dàt modem bak,” lahame eba labi giomim vàlu gagodam bak em aihi bak. Lahana em ba labi vou vameatedam vabak. Eho ame im lam vou vameatedam lahasumeam làhà ame Yahudi dam labe ibi iho ozoho bak eho meedam labe ame dam labe ba eba vabidam lahasum vabak. Lahana em ba labi vou vameatedam vaba gi im nehasu vou vameatedam bak. “Kristus iho faina meedam bak lam Aho ot vai fai Dateli damat Am ve ut tetehesuhunaso laba esu paku dou eloho im lamota iho tu vuzehem labe Alat iba deeli vadam bak,” lahame eho gi labihasu vou vameatedam labe ame Yahudi dam labe eba faki vabidam bak. 12Uho Kristus bake tu vuzehi meedam bak lam ame dam labe uba li, “Um laso aubehà sokba laha ukbodale,” lahame uba vameadume um ahu modi fahehe dam lam laha gi ahebu nehame vi modem vaba? Meia gagu am olohu àko laha vi vaome esum vaba? 13Emti vahi Kristus bake tu vuzehi meedam dam oa, iho ba neha, “Alat iba deeli vadase,” lahame vedi ame Im Feàna lam vuzehi ulohodesu meedam bak labna zohàme Alat ahit neha, “Am damalese,” lahame amu gi fet gagu esuhu bak. Labihadamnàme imo nasi nehi a vi ozome meedamule. “Ame Im Feàna lam iba veimai vuusu vabidam bak lam amu gi faatoi neàdehe? Làhà imo gi im ahulat faina modelo àhàki ozomna lam fa vi meedase,” laham bak lam vi ozome meedam vaba fa gi nasi dam bake ot deeli ot deeliame fa ahu vàmadi vou ali na meedam di ototo vi tauidume meedam bohu vuusdale. 14Eho gi neham bak vi ozome uba labi gagoho bak. Alat amu Musa bake gagu aho toedume esuhu Im Feàna lam im meida gi nehaha bak. “Uho meit aba it deeli vou faovoi vabiedam bak lamti ulohona vi ozome fa meia laha deeli vou faovoi vabiedale.” Lahame amu labi toeme esuhu bak. Labiha labe iho Alat lab gagoho im vàmtea buà lam vuzehi meedameam làhà ame Im Feàna totbaho lam ahebu gi ab vi taum neàdeham bak. 15Lahana uho gi dihasi ot vai ot beida. Labi dihasi neo meia ot fakiame feàtàida. Labihadam bak lam nasi voole. Uho gi labihasu ot modi ot modiameam làhà ubu uho Kristus bake lab tu vuzehi vahi meedam bak lam gi uhumo naedamat it vàhàdedume fa seddam meote. Laham bak labna zohàme ubu uho lab ozome meedam bak lam nasi voou it vou faovoi ozodale. 16Eho amu uba neha, “Iho ahulat faina modelo àhàkem im lam mali voedume seddale,” lahame lab gagoho bak lam, “Akatiham labe labi meedàla?” laham bak um biem bake eho uba vi vameadume um ozobohudelo mozo. Neha: Alam Aha Nutabe Neàna labe iba modi vizi vuusu iademe vamdedam bak lam a malemule. Gi labihasu uledem bohu meedale. Uho labi modemeam làhà im ubu uho ahulat faina modelo àhàki ozomna lam vi uledem vaba modi setem bak am bak. 17Eho gi neham bak vi ozome uba labi gagoho bak. Im ubu uho ahulat faina modelo àhàki ozomna lamti labi Alam Aha Nutabe Neàna labe Aba Aho ozohoda lamti gi ot odosiam bak. Labiha labe iho im meida lam vuzehi meedameam làhà ba im meida meedam biem bak. Neham bak. Im ibi iho ahulat faina modelo àhàki ozomna lam vuzehi meedameam làhà ba Alam Aha Nutabe Neàna labe Aba Aho ozohoda lam ba vuzehi meedam vabiem bak. Labi laha iho Alam Aha Nutabe Neàna labe Aba Aho ozohoda lam vuzehi meedameam làhà ba im ibi iho ahulat faina modelo àhàki ozomna lam ba vuzehi modem vabiem bak. Labihasu ot odosiahemu uho neha, “Làhà em im nidi nim nehasu modese,” laham bak lam modem biem bak tadem bak. 18Labihàmu im ubu uho ahulat faina modelo àhàki ozomna lam ba vi modem vaba fa Alam Aha Nutabe Neàna labe uba modi vizi vuusu iademe vamdedam bak lam uho uledehemu Aho fa uba vuusu iademe vamdedameam làhà ba ame Im Feàna lam uba veimai vuusu vabidam vabak. 19Im ibi iho ahulat faina modelo àhàki ozomna lam, “Ana imot modela?” laham bak lam im ba biem vaba abo ozobohu bak. Ame im zi gi neham bak. Ostame fi loholi ot vai ot vaidam bak ahebu ame. Labi ahate modem bak ba ladem vaba aam ahasbeam im meedam bak ame. Labi laha damat gagu fi hasi esuhu bak ehelahit ahole meedam vaba meit vedi neha, “Eho faina meedahe?” laham bak naedat it ozom vaba ahusobuli ostame la modi le modidam bak ame. 20Labi ostamna anekehàt modi alalehena laba ahu adat iedi vou baedam bak ame. Labi mei otem bak modi mei oddam bak ame. Labi, “Mei fà beose,” lahame ot fakiam bak ame. Labi daet ot beidam bak ame. Labi damat neha, “Na lam eho laha vaha vabate,” lahame vi ozome meia ahu adat faki teidem bak ame. Labi im gi koena aihina ahu gukeme gi kehàm vabna tufamoholem bak ame. Labi meit neha, “Amota ee abada vousai damat aba fà vou baedase,” lahame vi ozome meedam bak ame. Labi dam modi faheme ahu ot odosiame meedam bak ame. Labi dam aba tau gagom dam lamota deeli fa vahe vahedam bak ame. 21Labi na meit modehe im aame ahu adat faki teidiam bak ame. Labi damti lahiti vazisi vao meona duana uddume bak vabili sikitaom labe fa ostame la modi le modidam bak ame. Labi faina meedam bak ahebu totbaho ame. Labihasu faina meedam bak ahebu eho lab vou gago ledaha nim meit dihasi mode. Meit dihasi mode. Labihadam bohu vuusdam dam lam ba Alam damali Amti vahi Aho ba Boehàdateboli dam lam vuusu im vahokedam vabak. Eho etei lab gagodaha im lam eho amu uba vameadahanàme etei ozahit neo uba vi vameadam bak. 22Lahana Alam Aha Nutabe Neàna labe iba modi vizi teudi vuusdam bak lam iho uledem labe im ba labihadam vabak. Iho gi fa nehadam bak. Iho dam bake deeli meedam bak ame. Labi deeli vàhàdehe bohu modesdam bak ame. Labi im ahu laha faheme fi goaitom vaba gi vabademsu modesdam bak ame. Labi damat uba git meedam di modeo, im fai bak duzum di modeo, uho gi ozahigeàmu laha vou faodam bak ame. Labi dam bake im neà bak meedam bak ame. Labi dam bake neà bak ilabdi meedam bak ame. Labi im iho gagohona ahebu imbodem tadem labe meit vuzehem neà bak ame. 23Labi meo vaba meia na im neà bakta meedam bak ame. Labi im ahu naedamat faina modem bak labna zohàme it mali vou faovoi meedam bak ame. Alam Aha Nutabe Neàna labe iba modi vizi teudi vuusdam labe iho gi labihasu meedam bak. Iho labihadam bak lam Alat ba mali vi gagu esuhu vaba gi ahebu modem neà tadehe bak. 24Labi laha im Boehàda Kristus Yesusat Aho iba vuusu, “Am dam am tame,” lahame gagodam dam nibe ibi iho im ahulat faina modelo àhàki ozomna lam iho ba vi ozome uledi meedam vabak. Abo dat eloi seteheda labe am ahulat ahamo modelo àhàki ozomna lam ba modem biem bak lamti ulohona modem bak. 25Alam Aha Nutabe Neàna labe iba modi vizi vuusdam labe ibi amu bak fa vei seti fa gàhàdehe bak. Làhà im gàhàdehe labe imo gi Aba Aho iba neha, “Im nidi nimota meedale. Im nidi nimota meedale,” lahame iba modi ozobohudi fi gateheda lamota meedase. 26Imo laha gi nehadase. Im ba daet boehàdateli gago, “Im bisi feàda am bak. Dam lada lam bisi feà kaio,” lahame daet boehàdateli gagom bak lam feidase. Labi laha im ba meit neha, “Em eeda am bak. Damat eba fà vou baedase,” lahame ot modi ot modiam bak lam feidase. Labi laha meit modehe im iho aame ahu adat faki ot teidiam bak lam laha feidase. Imo gi Alam Aha Nutabe Neàna labe Aba Aho iba neha, “Im nidi nimota meedale,” lahame iba modi ozobohudi fi gateheda lamota meedase.

will be added

X\