Efesus 4

1Im Boehàda Yesus labe Aba Aho meedaha Im Neàna lam eho dam bake vou vameatedàmu damat em si sel niba ousdamda nibe eho uba im nehasu ooteme vahokedalo modem bak. Eho amu uba lab vameadaha bak lam abo Alat uba duana deeli neà bak meedàmu, “Um Am damalese,” lahame Alat amu uba gagu fi hasi vadaha bak laba ozome gi im lamohodata nehi iademe vi ozome meedale. 2Im ubuda daetesu meedam vaba gi feà vab damali ladehebeat im vameadam tadele. Labi meia im vameadam di gi dae nemahuba neàt vameadam bak tadele. Labi meit uba git meedam di modeo, im fai bak duzum di modeo, uho gi ozahigeàmu laha vou faodume fa ot deeliame meedale. 3Labi laha Alam Aha Nutabe Neàna labe amu uba modi vizi um fa vahi um ahu vàmadehe bak lam ba ot fakiame fahedam vaba abo gi it vou faovoi vabademsu bohu vuusdale. 4Eho gi neham bak vi ozome uba labi gagoho bak. Iho Kristus bake tu vuzehi vahi meedam dam nim abo im Yahudi damti um Yahudi damat modem vab damti labihasu dam debu behàsudehenàme fa vahi debu ab vàmadeham bak. Labi laha im ahebu vizi vuusdam Alam Aha Nutabe Neàna gi vàmtea bak. Labi laha Alat amu neha, “Am damalese,” lahame iba gagu fi hasi vadaha dam nibe ibi iho tu, “Ba mode tame,” lahame vi ozome vou faodamna gi vàmtea bak. 5Labi laha iba vuusdam Boehàda iho tu vuzeheda gi vàmtea bak. Yesus Kristus lam ame Boehàda am bak. Labi laha ibi iho ozome valo baptislem bak lam gi vàmtea bak. Iho Yesusti vou ali im Abada meedalo modem bak lam damat aame ozobohudem bake fet ozome meedamna am bak. 6Labi laha im ahebu, “Ai,” lahamda vàmtea gi Ala am bak. Abo im dedateli na ahebu vuusdamda Am am bak. Labi laha na ahebu laba modi Aba Aho ozoho bak lam meedam bak. Labi laha Am feà bak lam ame na ahebu labe im ad laba vizedume modealadaha bak. 7Im gi amedam debu vàmteana ààmomnàme Kristus Aba Aho ozahit meia ilabdi deeli im neà bak modi esuidam Dàt modem labe Aba Aho ozoho bak labe faheme ahaladidume da iudu iuba im amomoi modi vize. Da iudu iuba im amomoi modi vize. Labihadaha bak. 8Ame Da Kristus Aba Aho ba lab meedaha bak lam dat ahamda Daud labe Alat Vameadaha Im Toedahana laba nasi nehi fet toeme esuhu bak ehete. “Boehàda labe Aba fakeheda zi lam beodume neàdi Aho zili vadaha nazoh zi lamti ahoba iuba vou tom iluhu bak. Labi Aho zili atehe nazoh lam Am dam bake lodaha bak.” Lahame labihasu fet toeme esuhu im am bak. 9Ame im lam, “Ba akatihasu modemna modela?” laham bak lam ozom di iho gi nehi vi ozodam bak. Daud amu neha, “Boehàda labe tom iluhu bak,” lahame fet toeme esuhu bak lam iho gi nehi vi ozo, “Làhà ame da labe amu bak adba niba nom ilu fa tom iluhu bak,” lahame labi vi ozodam bak. 10Kristus lam ame Da am bak. Aho amu bak niba nom iluhuda fa Ahamo asum ahoba iuba tom iluhu bak. Abo na ahebu vuusdalo ahit asum ahoba tom novaha bak iuba tom iluhu bak. Labiha labe Aba Aho vuusuhu vaba voohoda vabak. 11Labi Daud amu neha, “Aho zili atehe nazoh lam Am dam bake lodaha bak,” lahame fet toeme esuhu bak lam ozom di iho gi Kristusat Aho ba nehasu meedam im lam vi ozodam bak. Kristus bake tu vuzehi im Abada vahi meedam dam laba taum bak ozome Aho ahit dam bake modi im neà bak nehasu ahala vizedaha bak. Aba tu vuzehi vahi meedam dam totbaho laba vizi Yesusat gagu olu Am im vameadume esmozi laiam damalehe bak ame. Labi dam totbaho laba neo laha vizi Alat vameadaha im aime fa dam bake ahate vameaidam damalehe bak ame. Labi dam totbaho laba neo laha vizi Aba Aho meedaha Im Neàna lam dam iudu iumti dam iudu iumti alim lahasdam dam laba vou vameatedam damalehe bak ame. Labi dam totbaho laba neo laha vizi Aba tu vuzehi vahi meedam dam laba im vameadume faheme modiam damalehe bak ame. Labi dam totbaho laba neo laha vizi Alam im dam bake vahokedam damalehe bak ame. Labihadaha dam zi lam vizedume neàdi iba ab modeme vahedaham bak. 12“Nehadase,” lahame Kristusat ame dam lam iba modeme vahedaha bak. Dam Kristus bake tu vuzehi Alam damaleheda zi nibe iho Alat Aba Aho ozome iba gagohona lam iho ba meida modem biem vaba abo ahebu ozobohudi meedam bak ame. Labi laha iho Kristus bake tu vuzehehe dam nim abo Kristusam soabobu ààmom dam nibe iho Amti vou ali ahu vàmadi vazisi debu vàmadi meedam bak lam fa vi teudedam bak ame. Labihasu ozome Aho ame dam lam iba modeme vahedaha bak. 13Ame dam zi labe ibi iho meedam im lam gi labaha bohu vuusdahit, iho Kristus bake tu vuzehi meedam dam nibe neha, “Lo imbot. Ame Da Kristus lam Alam Adat am tame,” laham bak ozobohudehemu im ahebu fa vazisi Amti vou ali vàmadi neàdehe bak ame. Labi laha Kristus labe Aba Aho ozobohu aabodi busaoli meedaha bak lamti uloholi iho laha im vekehe bak vaba abo ozobohu aabodi vou teude ladume neàbodem bak laba vou fusi neàdem bak ame. Labihasu meedàmu ame dam lam vaitom di am bak. 14Labihameam làhà im ba data koenati uloholi meit im gagom di uledemoholehe damat modem vabak. Im ba data koenati uloho vab labe meit giomim vameadam dam labe neha, “Iho meia ahi vagedase,” lahadam dam labe iba im gagom di im ba aime im iudu ium vuzehi meeda. Im iudu ium vuzehi meeda. Labihadam vabak. Labi laha im ba ihe itea tomba laba vou ladam di nutabe fai nom ilu ibi iho lalo ozoho bak iuba lam bi gi nutabe fai nom ilu vao fi tauledam labe iehelai iehelaidam bakti uloho vabak. Abo im ba ahu fi goaitoi ozom bili ibi iho modelo modem bak lam ba modem vabiem vabak. Abo ibi iho tu vuzehehe bak lam ba veimdem vaba abo gi labaha bohu tu vuzehi modesdam bak. 15Im ba data koenati uloholem vaba iho Alam im imbona lam teuna vuusdam labe iho meia vameadam di ba meia fakehebeat vameadam vaba gi meia deelehat betea dae nemahuba neàt vameadam bak. Iho labihadam labe iho Kristus bake tu vuzehi vahi meedam dam nim abo Kristusam soabobu ààmom dam nibe iho gi labihadume bak niba im iho meedamna ahebu ab ozobohu aabodi busaoledamam bak. Abo im Boehàda Kristus labe Aba Aho ozoho bak laba vi ozome vi meedam labe Kristusti ab uloholemam bak. Iba vuusdam Boehàda Kristus amemu ibi iho na im meedam di im gi Kristusat gagohozobe ame im modidam bak. 16Ba ihimo modem vabiem bak. Nasi ozomale. Im dam so nim alisoti aligat fauti aasoaledume lailaiaha labe im so vàmadi soahebuli teudi usai godam bak. Ame bak lamti uloholi iho Kristus bake tu vuzehi Amti vou ali ahu vàmadehe dam ahebu nim fa ot vuusuiame debu ab vàmadeham. Labi laha Kristusat iba ahala gagoiaha bak lam ihimo it ozome meit im abada meeda. Labi meit im abada meeda. Labihadam labe ibi iho Kristus bake tu vuzehi im Abada meedam bak lam gi keàtedi ab meedam bohu modesdamam bak. Labi iho ot deeli ot deeliame meedam labe ibi iho ot vahiaha bak lam ba setem vabak. Abo gi labaha vi meedam bohu modesdam bak. 17Eho etei lab vameadaha bak lam vi ozome uba nehasu neo ootedume gagolo modem bak. Im Boehàda Yesus Kristusat eba gagu eho im dedateli uba nehi gagolo modem bak. Ala bake tu vuzehehe vab dam labe ibi iho ahu ozom bak lam gi im ostamna imbo vabna gi voom im meedam damat modem bak. Labihàmu ubu uho amu meedume baleàhà im lam abo ame dam labe ibi iho meedam bak lamti ulohona uho meedam bak lam ahebu nasi mu voedume seddale. 18Ame dam labe ibi iho ozoho bak lam gi aibuna ozomom bak. Alam im imbona lam ba ozobohudem biehe bak. Ame dam labe ihimo ahu teudi, “Ala akatihasu modem Alat modela?” laham bak lam ba aime vi ozom mu ahusobulehe bak. Labihàmu Alat Aba Aho neà bak ozoho bak lam modi vizi ozobohudi meedam bak lam ba uledi meedam vabak. Ba Am gau ada netàdi im Abada gagu meedam vabak. Gi vaitesu godam bak. 19Ame dam labe ibi iho faina meedam bak ba vi ozome ladem vaba vedi, “Imo fai bak nidi nim modese. Nidi nim modese,” lahame gi ibi iho ahulat aam ahasbeam im modelo àhàkedam bak lamota vi ozodume meedam bohu meedam damat modem bak. Abo ostame fi loholi ame na modehelahit faozohobusu vou vabodam damat modem bak. 20Lahana umota labihaha vabak. Meit uba amu Kristus labe Aba Aho meedaha im lam uba vahokedume um aime tu vuzehe labe ame im lam ba uba vizi uho meedam vabak. 21Em ozobohu bak. Kristus labe Aba Aho meedaha im lam meit uba vahokedume um aihi bak. Labi laha uho Kristus bake tu vuzehi Amti vou ali ahu vàmadehemu meit neha, “Bisi im vamdesu meedam bak neam tame,” lahame Yesusat amu vouhoho im lam meit uba vahokedahana uho aihi bak. 22Uho amu Kristus bake tu vuzehehe vab di iube uho vedi nehi ozo, “Eho fa im nidi nim modi asimdese. Im nidi nim modi asimdese,” lahame ahu gukeme meedume modeha ba neàdem bak ozom vabna gi ahulat it vagedam bak tadi meedam bohu meedume abo fai dam aaboli vàhàdedalo modem damat modem bak. Lahana meit uba amu, “Labihadase,” lahame uba labi vahokedaha vabak. Gi nehi vahokedaha bak. “Uho amu Kristus bake tu vuzehehe vab di iube uho fai bak lab meedume baleàhà im lam ahebu nasi mu voedume seddale. 23Labi seddume neàdi fa Ala bake nehale. ‘Eho ahulat ozome modelo àhàkem bak lam Oho modi fa veimdi gàhàledam bohu meedale,’ lahame Ala bake tom gagoidale. 24Labi laha Alat amu neha, ‘Eho um modi Em itbaho fatoi gàhàdese,’ lahame fet ozome esuhu labe imbodi uba modi um dam ab gàhàdeham bak. Labihàmu uho im meedam di ubu uho gàhàlehe bak lamti ulohona im nehasu meedume baleàlele. Abo fai bak meedam vaba gi Alat Aba Aho gagoho im lamota fi hasi iademe vamdesu meedam tadele. Abo Alam im imbona vahokedahana lamti ulohona meedale,” lahame meit uba labihasu vahokedaha bak. 25Meit uba neha, “Ubu uho amu meedume baleàhà bak lam mu voedume seddume fa na im meedam bak gàhàli meedume baleàse,” lahame meit uba labi vahokedàmu eho uba nehi gagolo. Uho meia ahi vagedam bak lam nasi mu voedume fa umti vahi Kristus bake tu vuzehi meedam dam totbaho laba gi iademe im vamdesu imbona vameadale. Neham bak. Im gi debu vàmteadi Kristusam soabobu laba modealahana ààmom damat modem bak. Ba akati ibi meida laba vage? Ba labiham vabak. 26Uho na im modi fakem di a ame fakehe bak labet fa uba modi vi ozodume faina a meedamule. A fakem bohu vuusu vi ozodume a ala bozilemule. Gi taho ozahigeàmu fa vei neàdele. 27Uho labiham vabameam ame fakehe bak labet modi Iblisit uba li um ahu ozolo modem bak ab modemam tame. Iblisit uba li labiham bak labna zohàme um ahu mahate it vou faovoi ozodale. 28Uho meit mei na aa vadam bak lam nasi mu voedume fa gi anekehà abada keàtedi na meedume fa nali na modeme àdale. “Labi nali dam na vabdate fa lodume damat fà ame na lam àdase,” lahame labihadale. 29Labi laha uho meia im vameadam di um aha lam im faina futom vaba gi meit am ahu fa teudem bak laba ozome gi damat aim di, “Abo ahole gagoho bak,” lahame aime vuzehem neà bak laba ozome vameadale. 30Alam Aha Nutabe Neàna labe Am ahu faidem bake uho faina a meedamule. Gi iademe meedale. Neham bakti uloho bak. Meit am fo damat aame ozobohudem bake ahit so laba toedam bak. Alat laha labihaha bak. “Um Alam damaleheda Ala naeda am tame,” laham bak lam um ozobohudem bake Aho Am Aha Nutabe Neàna lam uba ahit lodume modi vizedaha bak. Labi Alat Am Aha Nutabe Neàna lam iba Am damaleheda niba lodume vizedam bak labet modi iho neham bak vi ozobohudemna am bak. Iho faina meedam bak lam Alat gi labaha bohu vou faamo ladume Aba Aho ba diamut modi vaitom digat fuhuzobe Aho lab vou faamo ladam bak lam fi tatahivai neàdi im asum ahoba iuba vousai ab neàdehame? Laham bak lam iho vi ozobohudem bak am bak. Labiham bake Alam Aha Nutabe Neàna labe Am ahu faidem bake faina a meedamule. 31Labi laha faina nehasu meedam bak nim laha mu voedume seddale. Meia ahu adat teidi faki meedam bak ame. Labi im gi koena aihina ahu gukeme gi kehàm vabna tufamoholem bak ame. Labi daet beàdam labe meia gadam bohu meedam bak ame. Labi meia feàtàdam bak ame. Labi meia faki, “Mei fà beose,” lahame bisi fai bak la modi le modidam bak ame. Labihasu ahebu mu voedume seddale. 32Fa gi nehasu meedale. Neà bak ot modida. Labi laha ot faobekesi ot faobekesidume im neà bak ototo tauidume meeda. Labi laha Kristus Aba Aho meedaha bak labet modi ubu uho lab faina meedam bak lam Alat ozahigeàmu fa vei neàdedaha bak laba ozome uloholi uho laha faina ot modidam bak lam ot ozahigeàmoiame fa vei neàdeida. Labihadale.

will be added

X\